1, 2. (a) Nvaho baani onooneliwemo okala wathima? (b)  Nvaho baani wathima onivahile Mulugu?

NVAHO baani wathima onabihigiwe wakela? Wihina nvaho ole okale wathima kunahoweleya okala wookwima. Nvaho onokala wathima wakwaneliha ele wafunesiiwe, obe wakala wowuhagalasa.

² Nvaho dhatedhene Mulugu onivahiliye, ohukalawo nvaho mmodha munlubale opitha nvaho dhatedhene. Eyo yovaha yuunlubale Mulugu aavahiliye athu. Musolo ola, onere onihudhiha wi Yehova ohunivaha mwanaye Yesu Kiristu, wi nikanne egumi yohimala. (Omwileri Mateus 20:28.) Yesu ohudha elabo yavati wi anobole, Yehova ohutonyihedha wi mwebaribarene ononidhivela.

3. Athu enakwela ddi?

³ Yowobola ekalelo Yehova olabihedhiye wi anobole muuthegani ni muukwani. (Efésios 1:7) Wihina nonelemo pama mwahaya bwaddi yowobola ekala yofuneya, nnohowela onona ele epadduwe yaka dhowinjhiva dhivirile mmunddani mwa Ideni. Makolo ehu oobajha Adawu ni Eva, ehithega. Bumwahaya edhe ekwege. Athu enookwa mwaha wi ehivala yothega ya Adawu ni Eva.—Osugwe wonelamo 9.

4. Adawu ahinathi othega egumi yaye yaari aavi?

⁴ Yehova nuunpaddusa mulobwana oobajha Adawu,  ahinvaha ethu yathima. Oliye ahinvaha egumi yologomana. Adawu ahikanna mwiili ni mubuwelo wologomana. Oliye newene kaabulelege, kuuluvalege, newene okwa. Woona wi Adawu aapaddusiwe ni Yehova, oliye amoona ninga Babe. (Lucas 3:38) Yehova owogesa nuuliye mudhidhi wamutene. Mulugu ahimwaddela pamadhene dhafuniye. Adawu ahivahiwa mabasa yamuhagalasa.—Génesis 1:28-30; 2:16, 17.

5. Bibliya awogaga wi Adawu aligana ni Mulugu enatapulela ddi?

⁵ Mulugu ohumpaddusa Adawu ‘ooligana ni oliye.’ (Génesis 1:27) Eyo, enatapulela wi Yehova ahinvaha makalelo ooligana ni oliye ninga: odhivela, enonelo, opama ni kopolo. Oliye ahinvaha ofuru wosakula. Adawu kaali makina. Mulugu ahimpaddusa Adawu ni oofuru wosakula yapama ni yabure. Adawu ahasakule omwiwelela Mulugu, ere okala mparayizu malabo amatene.

6. Dhego baani dhapama dhiyelele Adawu nuumuthegela Mulugu? Mwaha othega wa Adawu athu eri aavi?

⁶ Mudhidhi Adawu nuumuthegela Mulugu ni athongeliwa okwa, Adawu ahiyelela dhego dhapama. Ninga wandana waye ni Yehova, okanna egumi yologomana, ni okala mparayizu. (Génesis 3:17-19) Adawu ni Eva yahimusukuma Mulugu, mowindala aliwa kiyanna ejhehedho. Mwaha wa Adawu othega, ‘yothega ehivolowa mwilaboni ni okwa ohuvolowa mwaha wa yothega, nimukalelo mmodhave okwa wihaafwanya athu atene mwaha wi atene ehithega.’ (Romanos 5:12) Adawu nuumala othega, ‘wiguliha’, wavaliha athu atene ebaliwe nuliye othega ni okwa. (Romanos 7:14) Ki vano, athu ehikanna yojhehera? Hee, ehikanna.

7, 8. Madhu owi yowobola enagiwa ddi?

 ⁷ Yowobola ddi? Madhu owi ‘yowobola’ enagiwa dhego bili. Yobajha, yowobola muthengo onaliviwa wihina ooboliwena muthu. Yanabili, yowobola muthengo wowakwana wi yoboliwena ethu siithu.

⁸ Kaavo muthu okumele wa Adawu, onaawedhe orugunusa dhatedhene wi dhikale ninga variwa mudhidhi wihinakale obure. Mbwenye Yehova oherana ethu yafuneya wi nobowe mugoyini. Kabeni none makalelo enanikavihera yowobola.

9. Kiyandeya athu wiwobola, mwahaya bwaddi?

⁹ Kiyandeya athu wiwobola yekiwa. Mwahaya? Mwaha wi iyo kanili oologomana. (Salmos 49:7, 8) Ethu yafuneya wi nobowe, yowobola enaligana ni egumi yologomana oyelele Adawu. Eyo enithaniwa ‘yowobola yowakwanela.’ (1 Timóteo 2:6) Obe yowobola enna mutheengo mmodhave.

10. Yehova andile addi onobola?

¹⁰ Yehova andile addi onobola? Yehova omulenve mwanaye athima, oologomana odha elabo yavati. Mwaana ola, di Yesu, muthu oobajha opaddusiwa nuliye. (1 João 4:9, 10) Yesu orumedha ohiya mburo wakaliye odhulu, orumedha olapelana ni baabe. (Filipenses 2:7) Vano Yehova wapandda matikiniho,Yesu obaliwa oologomaneene elabo ya vati.—Lucas 1:35.

11. Enandeya addi muthu mmodha baahi wawobola athu atene?

¹¹ Muthu oobajha Adawu, nuumuthegela Mulugu, ohuyelela egumi yologomana, ohavaliha anaye atene othega ni okwa. Enandeya addi muthu mmodha  baahi wawobola athu atene? (Omwileri Romanos 5:19.) Woona wi athu atene evalihiwe othega ni okwa wodhela muthu mmodha baahi, ni mukalelo mmodhave muthu mmodha ohuvaha egumi yaye yologomana wi awobole athu atene. (1 Coríntios 15:45) Egumi yaye yologomana ehilabihedhiwa wi yoboliwe ahima atene Adawu.—1 Coríntios 15:21, 22.

12. Mwahaya bwaddi Yesu adhe oonege goyi enlubale?

¹² Bibliya onowoga goyi onile Yesu ahinathi okwa. Oliye ahiwaxuliwa vanlubale, okomeliwa vantxikwani, ni ahona goyi ofiyedha okwa. (João 19:1, 16-18, 30) Mwahaya bwaddi Yesu adhe oonege goyi enlubale? Mwaha Saddana ahiwoga wi kaavo muthu onaamuroromele Mulugu wula afwanyiwaga makathamiho. Mbwenye Yesu ohutonyihedha ni makalelo apama wi enowandeya omuroromela Mulugu naarive noonaga goyi enlubale. Yehova ahihagalala vanlubale mwaha wa Yesu!—Provérbios 27:11; Osugwe wonelamo 15.

13. Yowobola eliviwe addi?

¹³ Yowobola eliviwe addi? Yesu ohupeleka mmadani mwa babe egumi yaye ninga mukutho, nlabo na 14 mweri wa Nisa Yaka ya 33 a kalendariyo o Judeya. Nlabo nenne Yehova ahenya wi Yesu apiwe ni amwiddani aye. (Hebreus 10:10) Egavinre malabo mararu, Yehova onvenyiha Yesu ni mwiili womuzimuni. Yesu nuuhogolowela odhulu, Yehova ohulabihedha mukutho wa egumi yologomana ya Yesu wi anobole. (Hebreus 9:24) Woona wi yowobola ehiliviwa, nihikanna ofuru yowoboliwa muuthegani ni muukwani. — Omwileri Romanos 3:23, 24.

14, 15. Negi nleveleliwe dhothega dhehu nere ddi?

¹⁴ Nihimala okaviheriwa ni nvaho munlubale wa Mulugu. Vano nnafuna noone makalelo nvaho onanikaviheriwa peeno ni osogolo.

¹⁵ Dhothega dhehu dhihileveleliwa. Enorusa werana opama mudhidhi watene. Mudhidhi wowinjhiva, nnowoga obe nnowerana dhego dhabure. (Colossenses 1:13, 14) Ki nnere ddi negi nleveleliwe? Nnohowela othwaruwa mwa dhego dhatedhene dhabure nneresihuna ni mowiyeviha nimulobe Yehova wi anilevelele. Nnofwanelela ororomela wi dhothega dhehu dhihimala oleveleliwa.—1 João 1:8, 9.

16. Negi nikanne mubuwelo wohinyemela enahoweleya nere ddi?

¹⁶ Nihikanna mubuwelo wohinyemela. Mubuwelo wehu ononinyemela nerana ethu yabure, mbwenye kanubuwelege wi kaninna thima obe ejhehedhelo vamentoni va Yehova. Akala nihimuloba Yehova wi anilevelele nnofwanela ororomela wi onere onivuruwana ni onere onilevelela. (Hebreus 9:13, 14) Yehova kanafuna wi noovege omwaddela dhatedhene dhinanikathamiha. (Hebreus 4:14-16) Namuloba nlevelelo, nnere okanna murenddele ni Mulugu ni mubuwelo wohinyemela.

17. Mareliho baani nnawakelihu mwaha okwa wa Yesu?

¹⁷ Nihivahiwa ofuru wokanna egumi yohimala. ‘Yoliva ya yothega fuukwa, mbwenye nvaho wamahala Mulugu onavahiye si egumi yohimala wodhela Yesu Kiristu, nabwiya ehu.’ (Romanos 6:23) Woona wi Yesu ohukwa mwaha wahiyo, nnere okalawo malabo amatene ni egumi yohagalasa elabo yela yavati. (Apocalipse 21:3, 4) Mbwenye negi nawakele mareliho ala enahoweleya nere ddi?

18. Nnonne addi wi Yehova ononidhivela?

¹⁸ Wubuwele makalelo onahagalaliwe wavahiwa ethu yapama. Yowobola ethu yathima nivahiwihu. Enofwanelela omutamalela Yehova wodhela nvaho yola. João 3:16 onawoga wi ‘Mulugu ohudhivela vanlubale elabo, ofiyedha omuleva mwanaye mmodha.’ Hee, nihinona wi Yehova ononidhivela vanlubale, mwaha ohumuleva mwanaye Yesu. Iyo nihinona wi Yesu ononidhivela mwaha wi ohuvelela egumi yaye wi akwe mwaha wa iyo. (João 15:13) Yowobola, enowuvaha ebaribari wi Yehova ni Yesu enowudhivela.—Gálatas 2:20.

19, 20. (a) Onande addi wandana ni Mulugu? (b) Onatonyihedhe addi wi onororomela mukutho wa Yesu?

¹⁹ Woona wi ohumala ohudhera odhivela winlubale wa Mulugu, onande addi wandana nuliye? Kahi yokweya omudhivela muthu wula ohumonaga. João 17:3 onawoga wi iyo podi omunona Yehova. Wamunona Yehova, odhivela onniwena nuliye onere othabwa ni onerege ofunave omuhagalasa. Mowindala kuselele ohudhera wodhela Yehova mBibliyani.—1 João 5:3.

²⁰ Ororomele mukutho wa Yesu. Bibliya annawoga wi ‘ole onamuroromela Mwana ohukanna egumi yohimala.’ (João 3:36) Ororomela enatapulela ddi? Enatapulela werana nde Yesu ahudhihiliye. (João 13:15) Kahiyo owogave baahi wi nnomuroromela Yesu. Wihina nrumedhe yowobola, nnofwanela werana ethu-siithu wodhela nroromelo nehu. Tiago 2:26, annawoga wi: ‘Nroromelo nahikanna mabasa nihikwa.’

21, 22. (a) Mwahaya bwaddi egahoweleya yaka dhatedhene iyo odhowa omuthuponi wowubuwela okwa wa Yesu? (b) Musolo wa 6 ni 7 nnahudhere ddi?

 ²¹ Okalevo vamuthuponi wowubuwela okwa wa Yesu. Omahiyu wogomihera Yesu ahinakwe, ahiwoga wi ntugumanege wihina nubuwelege okwa waye. Iyo nnowerana eyo yaka dhatedhene, vamuthuponi onithaniwa ‘Yojha ya Nabwiya.’ (1 Coríntios 11:20; Mateus 26:26-28) Yesu annafuna wihina nubuwelege wi oliye ohuvaha egumi yaye yologomana ninga yowobola. Yesu ohuwoga egi: ‘Mudidele werana ndala mugubuwelaga miyo.’ (Omwileri Lucas 22:19.) We wadhowa omuthuponi wowubuwela okwa wa Yesu, onotonyihedha wi onovaha thima yowobola ni odhivela winlubale Yehova ni Yesu enniwana ni athu atene.—Osugwe wonelamo 16.

²² Yowobola nvaho munlubale wofwanelela wakela. (2 Coríntios 9:14, 15) Ki nvaho ola wathima, onakavihere addi matxikwi ni matxikwi aathu ekwile? Musolo wa 6 ni 7 onere otapulela pama.