WAHUDHIHA ATHU WI EKALE ANAMAHARA
MUSOLO 10
Wilibihedhege wihina wahudhihe athuya
Nlagano: ‘Efunelo yehu kiyari wulaleyani baahi muthenga dhapama dha Mulugu, mbwenye nihivelela egumi yehu wihina nukavihereni, mwaha wi nnowudhivelani vanlubale.’ — 1 Tes. 2:8.
Ethu erilena Yesu
1. Osugwe VIDIYU obe omwileri Juwawu 3:1, 2. Wamala wawaakule makoho enaharela:
-
Mwahaya bwaddi Nikodemu adhe amwaredhelege Yesu mahiyu? — Omusugwe Juwawu 12:42, 43.
-
Yesu ahirumedha omwaakela Nikodemu mahiyu. Eyo enoniha aavi wihina Yesu owilibihedha wahudhiha athu wi ekale anamahara?
Nnahudhera ddi ni Yesu?
2. Nilibihedhaga wahudhiha athu wi ekale anamahara, nnowooniha wihina nnowadhivela.
Omutajhihe Yesu
3. Omuhudhihege muthuya mburo ni mudhidhi anaasakule mwanamuralaya. Oliye podi osakula ohudhera labo obe mudhidhi anathomiye. Oliye anafuna ahudherege wuuvi: omabasani, vade vaye obe mburo vinathabwa oviriwa? Dhandeyaga, podi omusaddula porogarama awo wihina wande omuhudhiha mburo ni mudhidhi anasakuliye.
4. Muhudherege sumana dhatedhene. Akala onere weedda olenddo, kumuhiye ndo namahudherawo. Mbwenye wubuwele:
-
Dhere wandeya omuhudhiha labo nimodha, mbwenye muwari mwa sumana modhave?
-
Dhere wandeya omuhudhiha ni telefoni obe ni xamada ya vidiyu?
5. Olobele wihina okanne monelo wapama. Omulobe Yehova wihina ukavihere ohuselela omuhudhiha namahudhera awo naarive ahihudheraga sumana dhatedhene obe alegelaga oparihedha mabasa ndhe anahudheriye. (Fil. 2:13) Podi wera namahudhera awo ohukanna dhikalelo dhapama, olobele olobaga wihina wandege woona dhikalelo ndho.
OSUGWE DHIMODHA
Pro. 3:27; Dho. 20:35; 2 Cor. 12:15
