OHUDHERA 40
“Athu owinjhiva enere othukuleliwa mburo wapama”
‘Ale enakavihera athu okala owogowa enere waara ninga thendderi malabo amatene.’—DAN. 12:3.
JHIBO 151 Oliye anere wawithana
DHITHU NNAAHUDHERIHU *
1. Dhithu baani dhotikiniha dhinapadduwe mwari mwa onamathonga wa Yaka Txikwi?
ONOWUBUWELA Makalelo enakale athu yambela ovenyihiwa muukwani elabo ela yavati mwari mwa Yaka Txikwi! Mwebaribarene ola onaakale mudhidhi wohagalasa. Aatene yayelele amudhiwa ehikanna munukwela Wawona dila biili ni Yehovaya ohukanna munukwela. (Jó 14:15) Kubuwela ohagalala onakanne athu aatene mwaha ohogolowela okala ni amudhiwa ni naakwiwa ekwile. Ninga nonilihu ohudhera wivirile athu ‘apama’ obe ale elebiwe mandina ewa mulivuruni negumi, enere ovenyihiwa ‘wihina yakele egumi.’ (Atos 24:15; João 5:29) Podi wera athu nayelelihu mukwani enere ovenyihiwa mudhidhi armajedo avira. * Ohiya eyo nikuru nimodha nnere ovenyihiwa, ‘athu abure’ baale yahanna ofuru womulabela Yehova yahinathi okwa, ‘athu ala enere ovenyihiwa wihina etorihiwe.’
2-3. a) Mowiwana ni Isaías 11:9, 10, Porogarama baani anakungiwe mwilaboni exa? b) Ohudhera wula nnaasuze ddi?
2 Aatene enaavenyihiwe enere ohowela ohudhihiwa. (Isa. 26:9; 61:11) Aatene enaavenyihiwe enere onvolowela porogarama oohudhiha wapela elabo yatene yavati. (Omwileri Isaías 11:9, 10.) Mwahaya bwaddi aliwa enere ohowela ohudhihiwa? Mwaha athu abure enaavenyihiwe enere ohowela ohudhera wodhela Yesu, wodhela Omwene wa Mulugu, wodhela mukutho wa Yesu, wodhela ndina na Yehova ni dhithu dhatedhene dhiniwanana ni Omwene waye. Ni athu apama enere ohowela wubusedhiwa wodhela efunelo Yehova anniyena ni elabo yavati. Athu owinjhiva yaali oororomeleya wa Yehova yahikwa Bibiliya ahinathi omala olebiwa. Athu apama ni abureya enere okanna dhithu dhowinjhiva enaahudheriwa.
3 Ohudhera wula nnere woona dhowakula dha makoho ala: Porogarama ola owahudhiha athu aneereye aavi? Porogarama ola anavolowele ni makalelo baani wodhela ale enalebiwe ndina newa mulivuruni negumi? Dhowakula dha makoho ala sathima mwigumini mwehu. Teto nnere woona dhovuhulela dhinafwanyeya mu livuruni na Daniyeli ni Apokalipisi dhinanikavihere wonelamo pamadhene enaapadduwe ddi anookwa yavenyihiwa. Mbwenye vobajha nnere woona dhovuhulela dhotikiniha dhinapadduwe dhili va Daniel 12:1, 2.
“ATHU EKWILE ENERE OVENYIHIWA”
4-5. Daniel 12:1 anawoga ddi wodhela enaapadduwe osogolo?
4 Omwileri Daniel 12:1. Livuru na Daniyeli nnoosoriha makalelo dhithudha dhinereyiwa osogolo. Motajhiha, Daniel 12:1 Anowoga wi Migeli ali Yesu Kiristu ali owimelene, ‘wihina abarele nlogo na [Mulugu].’ Epaddi ela ya yovuhulela yambele wakwanela yaka ya 1914 Yesu nuukala mwene.
5 Mbwenye Daniyeli ohusoriha egi Yesu anere ‘ovenya’ mudhidhi ‘worusa wahinakalegewo wambela wibanjhe okalawo malogo ofiyedha mudhidhi yole.’ Mudhidhi ola ‘worusa’ winatapulela ‘ohoseya winlubale’ winasorihiwa va Mateus 24:21. Yesu anere ovenya wihina abarele nlogo na Mulugu. Oliye anere werana eyo omakuthulo wa malabo ala oorusa, obe mudhidhi wa Armajedo. Livuru na Apokalipisi ‘nnowoga wodhela nlogo na Mulugu ninga muthithi munlubale enakuma muhoseyani winlubale.’ — Apo. 7:9, 14.
6. Nnone addi wihina ovenyihiwa wanookwa winasorihiwa va Daniel 12:2 winere wereya? Wodhela muselu wovenyihiwa mukwani. (Osugwe “Revista nenna makoho anamileri.”)
6 Omwileri Daniel 12:2. Mudhidhi wamakathamiho wavira enaapadduwe ddi ni muthithi munlubale? Yovuhulela ela kinawoga wodhela ovenyihiwa womwilini obe womuzimuni, kinaagana ovenyihiwa wa malabo yala okuthula ninga nonelesihumo kale mbwenye osogolo. * Mwebaribarene yovuhulela ela ya Daniyeli enagana ovenyihiwa wa anookwa winereye osogolo mwilaboni exa. Mwahaya bwaddi nigawoga ndo? Madhu owi ‘nthubi’ enolabihedhiwa va Yolebela ya Jo 17:16 enagiwana ‘mahame.’ Eyo enoniha wi Daniel 12:2 anasoriha wodhela ovenyihiwa wanookwa winereye Armajedo avira.
7. (a) Ni makalelo baani amodha enavenyihiwiwa wi yakele ‘egumi yohimala’? (b) Mwahaya bwaddi nigawoga wi ovenyihiwa wula “fwebaribariwa”?
7 Daniel 12:2 Anafuna awoge ddi awogaga wi amodha enere ovenyihiwa wihina yakele ‘egumi yohimala’? Eyo enatapulela wi ale enaavenyihiwe mwari mwa Yaka Txikwi enere okanna ofuru wohudhera wodhela Yehova ni Yesu, ni wawiwelela, yerana ndo finakeliwa egumi yohimala, bumwahaya naarive athu apama yavenyihiwa enere ohowela wilibihedha wihina yakele egumi yohimala. (João 17:3) Wula winaakale ‘ovenyihiwa wa ebaribariwa’ ohiyana ni wereyile kale, athu amodha yavenyihiliwa athu mukwani. (Heb. 11:35) Mwahaya bwaddi nigawogaga ndo? mwaha athu ale yavenyihiwe kale yahihogolowela okwa.
8. Yawogiwaga madhu owi ‘Amodha enere ovenyihiwa wihina etotiwe manyazo ni enyemuliwe ni mukalakala enatapulela ddi’?
8 Mbwenye kahi aatene enaavenyihiwe enaafunege ohudhera wodhela Yehova. Yovuhulela ya Daniyeli enihina: ‘Amodha enere ovenyihiwa wihina etotiwe manyazo ni enyemuliwe ni mukalakala.’ Mwaha okanna mubuwelo wabure athu yala kinaalebiwe mandina ewa mu livuruni na egumi teto newene kinakele egumi yohimala. Ni madhu mamodha aliwa enere ‘onyemuliwa ni mukalakala’ obe enere ogujhuliwa. Teto Daniel 12:2 onowoga enaapadduwe ni ale enaavenyihiwe muukwani mowiwanana ni dhithu eneregiwana yavenyihiwa muukwani. * (Apo. 20:12) Amodha enerege okanna egumi yohimala amodha naari nota.
“ATHU OWINJHIVA ENERE OTHUKULELIWA MBURO WAPAMA”
9-10. Baani ‘anaarege ninga odhulu’, ki dhinapadduwe alini?
9 Omwileri Daniel 12:3. Ethu baani enaapadduwe ‘mudhidhi woorusa wavira’? Ohiya ele nonilihu va Daniel 12: versu 2, 3 vinowoga dhithu dhimodha dhipadduwe ohoseya winlubale wavira.
10 Baani “enaarege ninga odhulu”? Mateus 13:43 anonikavihera ofwanya yowakulaya. Yolebela ela eni: ‘Mudhidhi yoyo athu apama enerege waara pamadhene ninga nduwa Mumweneni mwa Baabiwa.’ Ninga enawogela yolebela ela nnowona wihina Yesu awagana ahima a Mumweneni eli athu othikitheliwa enakale ni oliye Mumweneni. (Mat. 13:38) Vano Daniel 12:3 podi wera anawagana athu othikitheliwa ni mabasa enaapariwa muwari mwa Yaka Txikwi.
A 144 000 enere olaba vamodha ni Yesu wihina epariwe mabasa ala owahudhiha athu muwari mwa Yaka Txikwi (Osugwe ddima 11)
11-12. Mabasa baani enapare a 144 000 muwari mwa Yaka Txikwi?
11 Ni makalelo baani athu othikitheliwa enaathukuleliwa ‘athu owinjhiva’ mburo wapama? Athu ala othikitheliwa enere olaba vamodha ni Yesu Kiristu wi epariwe mabasa ala owahudhiha athu muwari mwa Yaka Txikwi. A 144 000 kinakale ninga mamwene baahi, mbwenye enere okala ninga anamakutha. (Apo. 1:6; 5:10; 20:6) Vano woona wihina enaalabege ninga anamakutha enerege ‘wavulumusa athu owinjhiva’ obe — aliwa enere wakavihera vang’ono vang’ono malogo okala ologomana. (Apo. 22:1, 2; Eze. 47:12) Mohaganyedha mudhidhi oyo onere wahagalasa vanlubale makiristawu ala othikitheliwa!
12 Mbwenye ‘athu ala’ apama enathukuleliwe mburo wapama baani? Baale enaavenyihiwe mukwani, enaavulusiwe mukoddoni ya Armajedo ni anamwani enaabaliwege mwilaboni exa. Omagomihedho wa Yaka Txikwi, aatene enakalege mwilaboni ya vati enere okala ologomana. Ki mudhidhi baani athu ala enalebiwiwa mandiniwa mu livuruni na egumi ni mukalakala?
WEHIWA WOGOMIHEDHA
13-14. Ethu baani athu aatene enakale mwilaboni yavati enahoweliwa wooniha ehinathi wakela egumi yohimala?
13 Kanubuwele wi muthu anere wakela egumi yohimala mwaha okala ologomana. Kamubuwele Adawu ni Eva. Aliwa yaali ologomana, mbwenye wihina ekanne egumi yohimala yohowela omwiwelela Yehova. Mbwenye mowukuula aliwa kiyandile omwiwelela Yehova. — Rom. 5:12.
14 Omagomihedho wa Yaka Txikwi aatene enakale mwilaboni enakale ologomana. Nerege athu aatene ologomana enakalege mwilaboni yavati enerege omwiwelela Yehova ni mukalakala? Obe enakale ninga Adawu ni Eva — yahandile omwiwelela Yehova? Nnere wawakula makoho ala, ni makalelo baani?
15-16. a) Athu aatene enatonyihedhe wihina boororomeleya wa Yehova alini? b) Mareeliho baani nnawakelihu wehiwa wogomihedha wavira?
15 Muwari mwa Yaka Txikwi Saddana anakale mukambura. Mudhidhi yoyo oliye kanandege waleketha athu. Vano omagomihedho wa Yaka Txikwi Saddana anere okuma mukambura ni anere oxixa waholosa athu. Mudhidhi yoyo athu aatene enakale ologomana, mudhidhi yoyo aatene enere okanna ofuru wowoniha akala enothithimiha ndina na Yehova ni onamathonga waye. (Apo. 20:7-10) Dhithu eneregiwana muwari mwa yoweha yogomihedha dhinere wooniha akala ndina newa nnere olebiwa mu livuru na egumi ni mukalakala.
16 Bibiliya anowoga egi athu amodha enakale ohuroromeleya ninga Adawu ni Eva, newene kiniwelelege onamathonga wa Yehova. Ki vano enapadduwele ddi? Apocalipse 20:15 anowoga egi: Ale yahinafwanyiwe mandiniwa mulivuruni na egumi enere orahileliwa mu niya ya mootho. Aatene yaale enakale opokiha enere otolosiwa ni mukalakala. Mbwenye athu owinjhiva enere okala ororomeleya. Teto mandina ewa enere olebiwa nimukalakala mu livuruni na egumi.
MUWARI MWA ‘MALABO OKUTHULA’
17. Mungero amwaddele ddi Daniyeli wodhela dhithu dhaapadduwege malabo ehu? (Daniel 12:4, 8-10)
17 Sohagalasa wubuwela dhithu dhinapadduwe osogolo! Mbwenye iyo podi obajha ohagalalaga ovanene, Daniyeli ahakela ni mungero muthenga dhathima dha ‘malabo yala okuthula.’ (Omwileri Daniel 12:4, 8-10; 2 Tim. 3:1-5) Mungero owoga ni Daniyeli egi: ‘Enonelo yeebaribari kinarameye.’ Obe nlogo na Mulugu nerege woonelamo pamadhene dhovuhulela dha livuru na Daniyeli. Mungero ole owoga egi: ‘Athu abure yerege othabwa werana dhithu dhabure teto kaavo oonelegemo dhinapadduwege.’
18. Enapadduwele ddi ni athu abure mohulegela?
18 Peeno podi okalaga ninga athu enerena dhithu dhabure kinasinyusiwa. (Mal. 3:14, 15) Mbwenye Yesu anere watoriha ale eli ninga mbuzi ni ahiyanihe naale eli ninga mambila. (Mat. 25:31-33) Athu abure kinaavulusiwe muwari mwa ohoseya winlubale newene kinavenyihiwe mwilaboni exa. Mandina ewa kinaalebiwe mu ‘livuruni nowubuweliwa’ ninga anasoriha Malaquias 3:16.
19. Ola mudhidhi wowera ddi, ki mwahaya bwaddi? (Malaquias 3:16-18)
19 Vano ola bu mudhidhi nnafunihu otonyihedha ni dhowera dhehu wi kanili athu abure. (Omwileri Malaquias 3:16-18.) Yehova anna watugumana ale eli ‘athima vamentoni vaye,’ obe ale enahagalasa murima waye. Mohaganyedha iyo nnafuna nikale mwimodhani naaliwa.
Enakale yohagalasa omoona Daniyeli, amudhihu akwihu ni athu amodha ‘evenyihiwaga’ wihina yakele egumi yohimala mwilaboni exa (Osugwe ddima 20)
20. Yehova ampaganyile ddi Daniyeli, mwahaya bwaddi ogafuna woona mpaganyo ola wakwanelaga?
20 Mwebaribarene iyo nnakala mudhidhi wohagalasa. Teto mohilegela dhinere opadduwa dhithu dhimodha dhothabwa ohagalasa. Nindo nnere woona omagomihedho wa dhithu dhabure. Namala nnere woona yovuhulela ya Daniyeli yakwanelaga: ‘Vano we . . . onere ovenya wihina wawakele mareeliho awo.’ (Dan. 12:13) Mwebaribarene onna ojhehedha nuuthaba mudhidhi ‘onawakeliwe’ amudhawo, akwawo teto ni Daniyeliya anere ovenya. Bumwahaya wilibihedhe okala mudhaari ororomeleya a Yehova, werana ndo ndina nawo nnerege odhowave nigalebiwe mu livuruni na egumi na Yehova.
JHIBO 80 Mmulawihe Yehova wi moone opama
^ Ohudhera wula nnere woona makalelo osaddula mubuwelo wehu mowiwanana ni yolebela ya Daniel 12:2, 3. Dhinawoga wodhela porogarama munlubale ahinakalegewo owahudhiha athu. Nnere ohudhera mudhidhi baani enaapadduwiwa ni baani anaakavihere mabasa yala. Teto nnere woona makalelo porogarama ola owahudhiha athu onakaviheriye aatene a velaboni yavati wiwegeredhaga mwari mwa Yaka Txikwi, ejheehaga otorihiwa omagomihedho wothonga wa Yesu.
^ Nota: Podi wihina enambele ovenyihiwa muukwani mwari mwa Yaka Txikwi baale ogomihedha okwa malabo okuthula yaali ororomeleya. Vano evenyihiwe ale ekwile kale malogo ni malogo. Akala ovenyihiwa winaakale ni makalelo yala athu owinjhiva enere okanna ofuru wowakela athu yanoonniwa. Naarive dhigaali ndo Bibiliya anowoga wihina ale enaavenyihiwe wihina yakalege odhulu “enakale owegeredheyene,” eyo enatonyihedha wihina aatene yaale ekwile enaavenyihiwe wihina ekale mwilaboni yavati enaavenyihiwe mwamakalelo owegeredheya. — 1 Cor. 14:33; 15:23.
^ Nota: Ola muselu nonenlihumo ovanene. Onafwanyeya mu livuruni Preste Atenção à Profecia de Daniel! kapitulu 17, nNamasugwera a 1 Julho, 1987, epaddi. 21-25.
^ Nota:epaddi emodha ‘Athu apama’ ni ‘Athu abure’ enawogiwa va Atos 24:15 teto ‘athu yerilena dhithu dhapama’ ni ‘yerilena dhithu dhabure’ enafwanyeya va João 5:29 makalelo enalabihedhiwa wodhela dhithu yerilena athu enaavenyihiwe muukwani mudhidhi yahinathi okwa.
