Va livuru na 1 Coríntios 15:8, murumiwi Pawulo ohuwoga egi: ‘Omagomihedhowa oliye ogifwanya miyo ninga muthu abaliwe mudhidhiya wahinafiye.’ Malivuru ehu yowoga wihina podi wera Pawulo aagana mudhidhi yole amoniliye Yesu agali vampaddoni vaye va Omwene. Yakala ninga oliye ahikanna nthithimiho noobaliwa ni ovenyihiwa muukwani wihina akalege odhulu mudhidhiya wahinafiye. Mbwenye vano nusanyiha pamadhene yolebela ela, nihoona makalelo oosaddula mubuwelo wehu.

Pawulo aagana yowoona oonihiwiye mudhidhi adhowaga oDamasku. Mbwenye mwebaribarene Pawulo afuna awoge ddi ni madhu ala owi ‘gibaliwe mudhidhiya wahinafiye’? Kasugwa dhowakula ndha.

Makalelo Pawulo akanliye mukiristawu, yaali mwa makalelo oorulumusa ni ootikiniha. Obaliwa mudhidhiya wahinathi ofiya podi okala worurumusa. Siyeyo yapadduwe ni Sawulu (vasogolova ithaniwa Pawulo) mudhidhi adhowaga oDamasku wihina aharahare makiristawu, oliye kuubuwela wihina eere omoona Yesu avenyihiwe muukwani. Makalelo Pawulo akanliye mukiristawu kiyamurulumuse oliyeneve baahi, mbwenye ni makiristawuya oDamasku. Yapadduwe ni murumiwi Pawulo yaali ethu athu yahajhehedhiwa ni yorulumusa, ofiyedha oliye omala mudhidhene ahoonaga. — Atos 9:1-9, 17-19.

Pawulo ali mukiristawu ‘mudhidhi wahijhehedhiwa.’ Ni ewogelo yeEgerego madhu owi ‘obaliwa mudhidhiya wahinafiye’ podi otapulela ninga ‘obaliwa mudhidhi wohijhehedheya.’ Bibiliya a Almeida arevizariwe ni aatuwalizariwe anihina: ‘Ninga muthu aabaliwe mudhidhi wohijhehedheya.’ Mwaha Yesu nudhowa odhulu bu mudhidhi yoyo Pawulo aliye mukiristawu. Ale esorihiwe versikulu dhobajha yamoonile Yesu ahinathi odhowa odhulu. (1 Cor. 15:4-8) Wula epaddi ya Pawulo amoonile Yesu mudhidhi agali odhulu, mudhidhi yole wakala ninga ‘mudhidhi wohijhehedheya.’

Pawulo ookala pasope awogaga wodhela oliye. Mowiwanana ni anamahudhera amodha, madhu anasoriha Pawulo vala podi onubuwelihaga wihina oliye kiivaha thima. Akala mubuwelo wa Pawulo waali yoyo, enowoniha wihina oliye kifwaneliha ofuru wokala murumiwi. Oliye ohufiyedha owoga egi: ‘Vaari va arumiwi aatene, miyo gili ole ahinna thima ni kaginafwanelela withaniwa murumiwi mwaha gihithabwa oharahara nlogo na Mulugu. Mowindo wodhela opama wohinifwanelela wa Mulugu gili ndala gilimi.’ — 1 Cor. 15:9, 10.

Vano podi wihina Pawulo awoga wodhela dhithu tharu, yobajha, makalelo anfwanye Yesu yaali ohujhehedheya, yanabili makalelo akanliye mukiristawu mudhidhi wohijhehedheya, yanatharu wodhela wiwona ninga kafwanelela okala murumiwi. Kannonne ebaribariya Pawulo afuniye owoga, mbwenye nnonnihu sowihina Pawulo oovaha thima ele oonihiwiye. Teto si yowonihiwa yela yanvahile murumiwi Pawulo ebaribari wihina Yesu ahivenyihiwa muukwani. Kannatikina wihina oliye owalaleya athu amodha wodhela ovenyihiwa wa Yesu. — Atos 22:6-11; 26:13-18.