OHUDHERA 39
Ndina nawo nihilebiwa ‘mulivuruni neegumi’?
‘Vano olebiwa livuru ni mandina aale yamoova Yehova.’ — MAL. 3:16.
JHIBO 61 Kamuselele olaleya!
DHITHU NNAAHUDHERIHU *
Okuma Abeli ofiyedha peno, Yehova anna waleba mandina aathu mulivuruni neegumi (Osugwe ddima 1-2)
1. Mowiwanana ni Malaquias 3:16, livuru baani Yehova analebiye, ki muwarimwa enafwanyeyamo ddi?
YEHOVA anna oleba livuru nathima, oliye abanjhe werana eyo yaka dhowinjhivadhene mundduli. Mwebaribarene livuru nno nihikanna lista na mandina aadhaari oororomeleya nnabajha ni mudhaari oororomeleya Abeli. * (Lucas 11:50, 51) Okuma venvo Yehova wawenjhedhedhagave mandina aadhaari oororomeleya. Ofiyedha peno mulivuruni mmo ehikalamo matxikwi ni matxikwi a mandina aadhaari oororomeleya. Mbibiliyani livuru nno nnithaniwa ‘livuru nowubusedha,’ ‘livuru neegumi,’ ni ‘Rolu yegumi.’ Ohudhera wula nnere owoga livuru nno ninga ‘livuru neegumi.’ — Omwiileri Malaquias 3:16; Apo. 3:5; 17:8.
2. Mulivuruni neegumi mandina elimo bawani, ki nnahowela nere ddi negi nikanne ndina mulivuruni neegumi?
2 Mulivuruni muna ehikalamo mandina aadhaari a Yehova enamulabela ni murima wewa watene ni enathithimiha ndina naaye. Ayo binna ejhehedhelo yowakela egumi yohimala. Nihiyoya podi olebiwa mandina ehu mulivuruni muna neegumi, wihina eyo yandeye, nnohowela okanna wandana woliba ni Yehova ni ororomela mukutho wa Yesu. (João 3:16, 36) Naarive niganna ejhehedhelo yokala elabo yavati obe yodhulu — iyo aatene nnofuna wihina ndina nehu nlebiwe mu mulivuruni muna!
3-4. a) Ndina nehu nakala mulivuruni na egumi ovanene vala eyo enatapulela wihina nnere wakela egumi yohimala niherilena ethu-sithu? Owogemo. b) Ohudhera wula ni winaharela nnasunze ddi?
3 Nerege, ale elebiwe mandina ewa mulivuruni neegumi kinahowela werana ethu-sithu yegi yakele egumi yohimala? Yowakulaya nnofwanya mudhidhi Yehova athapanyiye ni Moyises va Êxodo 32:33. Yehova onowoga egi: ‘Ginamuthimiha mulivuruni mwaaga ole agithegele.’ Eyo enatapulela wihina mandina elebiwe mulivuruni neegumi podi othimihiwamo, enakala ninga Yehova analabihedha lapiji wihina alebena mandina ayo. (Apo. 3:5, nota.) Nnohowela werana dhatedhene wihina ndina nehu nikalegemove mulivuruni neegumi obe ofiyedha olebiwa ni kaneta ni makalelo yayo kannadha nthimihiwaga.
4 Eyo podi onanganyedhihaga. Motajhiha, dhithu baani Bibiliya anasorihiye wodhela ale elebiwe mulivuruni na egumi naale yahilebiwe? Ki ale elebiwe mandina ewa mulivuruni na egumi enaakele egumi yohimala alini? Ki ale ekwile yahimunonne Yehova ejhehedhelo baani enniwana? Aliwa ehikanna ofuru wokanna ndina nna nigalebiwe mulivuruni na egumi? Nnere woona yowakulaya va ohudhera wula ni ohudhera winaharela
MANDINA BAANI ENAFWANYEYA MULIVURUNI NA EGUMI?
5-6. a) Mowiwanana ni Filipenses 4:3, baani anna ndina naaye mulivuruni na egumi? b) Fihalini mandina ewa enadhiwa elebiwe ni mukalakala mulivuruni neegumi?
5 Baani alebiwe ndina naaye mulivuruni na egumi? Nnere wawoga makuru matanu ni nnere woona nikuru baani ninna mandina mulivuruni na egumi.
6 Nikuru noobajha baale esakuliwe ni Yesu wihina yathongege nuliye odhulu. Nerege mandiniwa ehilebiwa mu livuru na egumi? Hee ehikalamo. Mowiwanana ni murumiwi Pawulo ‘awogiliye ni addibila’ oFilipo, mandina aale eli othikitheliwa ehilebiwa mu livuruni neegumi. (Omwileri Filipenses 4:3.) Mbwenye aliwa enohowela okala oororomeleya, wihina mandina ewa yahithimihiwemo mu livuruni neegumi. Alobwana ala othikitheliwa enalebiwe mandina ewa ni mukalakala yamala wakela selu yogomihedha. Selu ela aliwa podi wakela yahinathi okwa obe ohoseya winlubale wahinabajhe. — Apo. 7:3.
7. Fihalini muthithi wa Mambila mamodha enalebiwiwa mandina ewa mulivuruni na egumi nimukalakala? Apocalipse 7:16, 17
7 Nikuru na nabili muthithi waathu enoniwe ninga Mambila mamodha. Ki athu a nikuru nenna ehikanna mandina ewa mulivuruni na egumi? Hee. Ki armajedo avira mandina ewa enerege ofwanyeya mu livuruni na egumi? Hee.(Apo. 7:14) Yesu ohuwoga egi ale enaladdanihiwa ni mambila ‘yere wakela egumi yamukalakala.’ (Mat. 25:46) Mbwenye aliwa kinakele egumi ya mukalakala ohoseya winlubale wavira. Mwaha mandina ewa elebiwe ni lapiji, teto podi othimihiwa. Muwari mwa onamathonga wa Yaka Txikwi, ‘anere wukukulani ni anere wuthukulelani vantxelani negumi.’ Ale eniwelele dhoholela dha Yesu, ni enakale oororomeleya vamentoni va Yehova, mandina ewa enere olebiwa ni, mukalakala mulivuruni neegumi. — Omwileri Apocalipse 7:16, 17.
8. Athu baani Yahinna mandina ewa mulivuruni neegumi, ki enapadduwele ddi?
8 Nikuru na natharu niliganihiwe ni mbuzi ennatolosiwe mu koddo ya armajedon. Mandina ewa kinafwanyeyamo mulivuruni muna. Yesu ohuwoga egi: ‘Ala enere ogujhuliwa ni mukalakala.’ (Mat. 25:46) Nuvetheliwa, murumiwi Pawulo oliye owoga egi: ‘Ala enere woona goyi mwaha osinyusiwa wodhela ogujhuliwa ni mukalakala.’ (2 Tes. 1:9; 2 Ped. 2:9) Podi owogiwaga emodhave wa ela etheegele muzimu wotxena yapudhave, ala mwebaribarene kinakele egumi yohimala mbwenye enere ogujhuliwa ni mukalakala. (Mat. 12:32; Mar. 3:28, 29; Heb. 6:4-6) Vano kabeni nawone makuru menli enaavenyihiwe wihina ekalege mwilaboni ya vati.
BAANI ANAVENYIHIWE
9. Mowiwanana ni Atos 24:15, makuru baani menli enaavenyihiwe wihina ekalege mwilaboni yavati, ki ohiyana baani olivo wodhela makuru ala menli?
9 Bibiliya onowawoga makuru menli enaavenyihiwe, enna ejhehedhelo yokalawo ni mukalakala mwilaboni yavati, ‘athu apama’ ni ‘athu abure.’ (Omwileri Atos 24:15.) ‘Athu apama’ baale mudhidhi ahinakwe yamulabela Yehova nuroromeleya. “athu abure” baale ekwile ehimunonne Yehova obe ekwile ehihudhere ebaribari wodhela Yehova. Mwebaribarene athu ala abure eherana dhithu dhowinjhiva dhahiwanana ni malagano a Yehova. Woona wihina makuru ala mamelene enere ovenyihiwa, nerege mandina ewa ehilebiwa mulivuruni na egumi? Wihina nnone yowakulaya kabeni nihudhere kadda nikuru.
10. Mwahaya bwaddi Yehova enaavenyihiwe ‘athu apama,’ ki mutholo baani amodha waaliwa enakeliwa? (Muselu dhimodha osugwe muwari wa revista nenna “Makoho anamileri.”)
10 ‘Athu apama,’ nikuru nanennayi yahinathi okwa mandina ewa yalebiwe mulivuruni neegumi. Nerege aliwa nuukwa mandina ewa ehithimihiwa? Naari, mwaha Yehova onowawubuwela aliwa. Teto Yehova kahi ‘Mulugu anookwa mbwenye aathu eliwo, mwaha monelo waye aatene ehikalawo.’ (Luc. 20:38) Eyo enatapulela wihina athu apama yavenyihiwa mandina ewa enere olebiwa mulivuruni na egumi, mbwenye omabajho enalebiwe ni lapiji. (Luc. 14:14) Nahanganyedhaga, amodha enaavenyihiwe enere wakela mutholo wokala amusadoro elabo yatene.’ — Sal. 45:16.
11. Ethu baani athu abure enahoweliwa werana wihina mandina ewa elebiwe mulivuruni neegumi?
11 Omagomihedho, nnere woona nikuru nanetanu, ‘athu abure.’ podi wera aliwa kiyanonne malagano a Yehova, bumwahaya aliwa kiyaparihendhe mabasa mwigumini mwewa. Mwaha wa yeyo mandina ewa kilebiwe mulivuruni neegumi. Mbwenye Yehova anere wavenyiha athu yala wihina avahe ofuru wa olebiwa mandina ewa mulivuruni neegumi. Yahinathi ‘okwa’ athu ala yaherana dhithu dhabure ni dhowoopiha, bumwahaya enere ohowela wahudhera malamulo a Yehova ni waparihedha mabasa wigumini mwewa. Teto Omwene wa Mulugu onere omukosa porogarama ohudhiha ahinakalegewo.
12. a) Baani anahudhihege athu abure? b) Enapadduwele ddi ale enahudhera, mbwenye kinafuna osaddula mweddelo wewa?
12 Mbwenye anahudhihe baani athu ala abure? Onaakale muthithi waathu apama evenyihiwe mukwani. Yegi mandina ewa elebiwe mulivuruni neegumi enohowela wilibihera okanna wandana ni Yehova ni ovelela egumi yewa. Yesu kiristu ni adhaari othikitheliwa enerege Wawona athu ala abure mudhidhi enahudheregiwa. (Apo. 20:4) Olene anaakodde waparihedha mabasa malagano a Yehova mwigumini mwaye — anere oyelela gari yokalawo ni mukalakala naarive aganna yaka 100. (Isa. 65:20) Yehova ni Yesu enowoona ele eli mmurimani mwa kadda muthu ni kidha emuhiya muthu erana ele eli yabure mwilaboni exa.— Isa. 11:9; 60:18; 65:25; João 2:25.
OVENYIHIWA WA EGUMI NI OTORIHIWA
13-14. a) Kale yolebela ya João 5:29 noonelamo aavi? b) Madhu baani athima aawonge Yesu nnahowelihu wapwasedha?
13 Yesu ohawoga ale yavenyihiwe wihina ekalege mwilaboni yavati. Motajhiha oliye ohuwoga egi: ‘Muhitikine ni ndha, mwaha wi onere ofiya mudhidhi aatene eli mmahame enubuweliwa (ni Yehova) enere wiwa ndhu naaye, ni enere ovenya: ale yerilena dhego dhapama, enere ovenyihiwa ekalena egumi; ale yerilena dhego dhabure, enere ovenyihiwa wihina etorihiwe.’ (João 5:28, 29) Yesu afuna awoge ddi?
14 Kale nuubuwela wihina madhu awonge Yesu yatonyihedha dhowera dha ale enaavenyihiwe muukwani. Nubuwela wihina yavenyihiwa amodha yeregena dhithu dhapama amodha dhithu dhabure. Mbwenye Yesu kawogile wihina ale yavenyihiwe mukwani ‘yerege werana dhithu dhapama’ obe ‘dhithu dhabure’. Oliye awonge dhithu dhamundduli ohiya dhosogolo. Oliye aawoga ale yerilena dhithu dhapama ni ale yerilena dhithu dhabure, obe athu ala yerilena dhithudha yahinathi okwa ohiya nuvenyihiwa. Enowoneleyamo kahiyo? Mwilaboni exa kavo anaarumedhiwe werana dhithu dhabure. Athu ala abure yerilena dhithu dhabure mudhidhi yahinathi okwa. Ki vano Yesu afuna awoge ddi wodhela ‘ovenyihiwa wa egumi’ ni ‘ovenyihiwa wotorihiwa’?
15. Enaavenyihiwe ‘wihina yakele egumi baani,’ ki mwahaya bwaddi?
15 Athu apama yerana efunelo ya Mulugu yahinathi okwa, ‘enere ovenyihiwa wihina yakele egumi.’ Mwaha mandina ewa ehilebiwa mulivuruni neegumi. Eyo enatapulela wihina ovenyihiwa wa ele yerilena dhithu dhapama, ninga enawogela yolebela ya João 5:29 fuvenyihiwa wimodhave enawoga yolebela ya Atos 24:15. Eyo enowiwanana niile enawoga yolebela ya Romanos 6:7, enihina: ‘ole akwile dhothega dhaye dhihithimihiwa.’ Ni madhu mamodha Yehova ohalevelela athu ale abure wodhela dhithu dhonyakavala yeriwana. Mbwenye kanadduwala dhithu dhapama yeriwana mudhidhi ehinakwe. (Heb. 6:10) Ebaribari wihina athu apama yavenyihiwa enere ohowela okala ororomeleya yafuna wihina mandina ewa yahithimihiwe mulivuruni neegumi.
16. ‘Ovenyihiwa Wotorihiwa’ enatapulela ddi?
16 Ki ale yerilena dhithu dhabure yahinathi okwa? Naarive dhothega dhewa dhigathimihiwe mudhidhi yahinathi okwa, aliwa kayamulabela Yehova nuuroromeleya. Bumwahaya mandina ewa kinafwanyeya mulivuruni neegumi. Ovenyihiwa wa ale yerilena dhithu dhabure winaakale wimodhave ni ale yahamunonne Yehova enafwanyeya va Atos 24:15. Baayene enavenyihiwe wihina etorihiwe ni ependdiwe ni Yesu Kiristu. * (Luc 22:30) Wavira mudhidhi, Yesu anere onona akala enohoweleya waleba mandina ewa mulivuruni neegumi. Wihina eyo epadduwe enohowela osukuma mweddelo yanniwana kale ni ovelela egumi yewa wa Yehova.
17-18. Ethu baani athu enaavenyihiwe mukwani enahoweliwa ‘werana,’ mowiwanana ni yolebela ya Apocalipse 20:12, 13 dhithu baani dhinapadduwe?
17 Athu apama ni athu abure yamala ovenyihiwa enere ohowela wawiwelela malamulo a rolu dhixa dhinalabihedhiwege mwari mwa yaka txikwi. Murumiwi João ahileba dhithu ooniliye: ‘Gihawoona anookwa, anlubale ni ang’ono, egimenle vampaddoni va Mulugu ni ofuguliwa rolu. Anookwa ala yatorihiwa ni dhithu dhalebiwe muroluni, mowiwanana ni dhowera dhewa. Niya yahapeleka ale yakwelemo, okwa ni mahame yahapeleka anookwa yaali wengo; kadda marafula ahithongiwa moligana ni dhowera dhaye.’ — Apo. 20:12, 13.
18 Nimakalelo baani ale evenyihiwe mukwani enatorihiwiwa? Nerege enere otorihiwa mwa dhithu yeriliwana yahinathi okwa? Naari, kudduwale wihina muthu onoleveleliwa dhothega dhaye akwa. Bumwahaya athu ale enaavenyihiwe muukwani kinatorihiwe mwaha wa dhithu yeriliwana yahinathi okwa. Ale enaavenyihiwe mukwani enere otorihiwa ni makalelo oopenddiwa wodhela ndhe enahudheriwa mwilaboni exa. Teto alobwana oororomeleya akale ninga Nowe Davidi Samuweli ni Daniyeli enere ohowela ohudhera wodhela Yesu kiristu ni okanna nroromelo wodhela mukutho waye. Akala alobwana ala ororomeleya enere ohowela ohudhera dhithu dhowinjhiva, kananganyedha wihina athu abure enere ohowela ohudhihiwa!
19. Enapadduwele ddi ale ehinarumedhe ofuru womulabela Yehova?
19 Enapadduwele ddi ale ehinarumedhe ofuru munlubale womulabela Yehova? Apocalipse 20:15 anihina: ‘Ale yahafwanyiwe mandiniwa mulivuruni neegumi yahirahileliwa mu niya ya mootho.’ Siyeyo enapadduwele, kinadha ekalawo. Bumwahaya sapama wilibihedha wihina ndina nehu nlebiwe mu livuruni neegumi ni teto nidhowegeve nigalimo!
Ddibila awogaga ni athu amodha wodhela porogarama ohudhiha onereye muwari mwa yaka txikwi (Osugwe ddima 20)
20. Mabasa baani ohagalasa onapariwe mwari mwa yaka txikwi? (Osugwe fotu yavakapani.)
20 Onamathonga wa Yaka Txikwi onaakale mudhidhi wohagalasa! Dhithu dhowinjhiva dhapama dhinere opadduwa teto anere obajha porogarama munlubale owahudhiha athu ahinakalegewo. Teto bumudhidhi yola athu apama ni athu abure enapenddiwiwa. (Isa. 26:9; Atos 17:31) Mbwenye mabasa ala owahudhiha athu enapariwe ni makalelo baani? Ohudhera winaharela nnere woona makalelo enapariwe mabasa ala athima.
JHIBO 147 Egumi yohimala mpaganyo wohagalasa
^ Ohudhera wula nnere woona makalelo osaddula mubuwelwihu wodhela madhu awonge Yesu enafwanyeya va João 5:28, 29 Yesu awogiliye wodhela ‘ovenyihiwa wegumi’ ni ‘ovenyihiwa wotorihiwa.’ Ni nnere othabwa ohudhera wodhela makalelo ala akadda ovenyihiwa.
^ Livuru nna nibanjhe olebiwa mudhidhi ‘elabo nupaddusiwa.’ (Mat. 25:34; Apo. 17:8) Vano podi wera Abeli doobajha olebiwa mulivuruni muna.
^ Kale madhu ala owi otorihiwa esorihiwe vala, yatapulela ninga ‘otorihiwa’ ni makalelo abure. Mwebaribarene madhu ala podi otapulela ninga yeyo, mbwenye ninga munawogela João 5:29 Enakala ninga Yesu alabihedhe madhu ala: ‘Otoriha’ ni makalelo owoneleyamo anoonihaga wihina enohoweleya omusugwa pamadhene muthuya. Obe ninga enawogela disiyonariyu Egerego amBibliyani, ‘enatapulela ompendda muthuya.’
