Kasugwa makalelo Bibiliya anawakuliye makoho ala.

Atos 24:15, onosoriha egi: winere okalawo ‘ovenyihiwa wanookwa. waathu apama ni athu abure.’ Athu apama baale yahinathi okwa yamwiwelela Mulugu, bumwahaya mandina ewa ehilebiwa mulivuruni neegumi. (Mal. 3: 16) Athu abure baale yahinathi okwa yahanna ofuru womulabela Yehova, bumwahaya mandina ewa kilebiwe mulivuruni neegumi.

João 5:28, 29 anasoriha emodhave wodhela makuru ala mendi enasohiwa va Atos 24:15. Yesu ohuwoga egi: ‘ale yerilena dhithu dhapama’ enere ovenyihiwa ‘wihina yakele egumi, mbwenyi ale yerilena dhithu dha bure enere ovenyihiwa wihina etorihiwe.’ Athu apama yaherana dhithu dhapama yahinathi okwa. Aliwa enere ovenyihiwa wihina yakele egumi mwaha mandina ewa ehilebiwa mulivuruni neegumi. Ki athu abure? aliwa eherana dhithu dhabure yahinathi okwa. Mandina ewa kinathi olebiwa mulivuruni neeegumi, aliwa enere otorihiwa obe, openddiwa. Muwari mwa mudhidhi ola aliwa enere okanna ofuru wohudhera wodhela Yehova ni okanna mandiniwa mulivuruni neegumi.

Apocalipse 20:12, 13 anihina ateene enaavenyihiwe mukwani enere ohowela wiwelela ‘dhithu dhinalebiwe muroluni,’ rolu ndha, malamulo maxa nnawakelihu mwilaboni exa. Ahinawiwelele enere ogujhuliwa. — Isa. 65:20.

Daniel 12:2 anihina amodha enere ovenyihiwa wihina yakele — ‘egumi yohimala’ amodha wihina etotiwe ‘manyazo ni enyemuliwe ni mukalakala.’ Yolebela ela enowooga enaapadduwe omagomihedho wa yaka 1000, amodha enere wakela egumi yohimala amodha onyemuliwa wamukalakala. Ni madhu mamodha enere oyelela egumi yohimala. —Apocalipse 20:15; 21:3, 4.

Kabiha wubuwela, makalelo enafuniwa ovenyihiwa makuru ala menddi podi oladanihiwa ni anyawedda enafuna otamela elabo mmodha. Athu apama, enaladdanihiwa ni ale enafuna wawakela mabasa obe nyumba emodha vano ovahiwa ofuru. Mbwenye athu abure, baale analaddanihiwa ni anyawedda enavahiwa nyumba wihina ekalemo mudhidhi vag’ono obe yahinathi okanna mburo obe ofuru. Anyawedda ala enere ohowela woniha akala ororomeleya wihina ekalegeve elabo ele. Ni makalelo mamodhave athu abure enaavenyihiwe enere ohowela wawiwelela malamulo a Yehova ni woniha wihina athu apama, yafuna wi ekalegeve mparayizu. Naarive amodha eganna ofuru wokanna nyumba obe ekalaga ninga anyawedda, yapeddiwa podi okala anamurala, mbwenyi amodhaya podi otamihiwa. Oliye anerege openddiwa wodhela dhithu aneregiye elabo yelee. Ni makalelo mamodhave, wihina ale anaavenyihiwe yakele egumi yohimala obe ogujhuliwe ni mukalakala, enakale muwiwanana ni makalelo eneddigiwa mwilaboni exa.

Yehova Mulugu odhivela ni apama. (Deut. 32:4; Sal. 33:5) odhivela anniyena onerege woneya pamadhene avenyiha athu apama ni abure. Teto Yehova onojheha wihina ale anaavenyihiwe mukwani, yawiwelelege malamulo aye wodhela nde anafuniye ni ahinafuniye. Ale enamudhivelege Yehova ni yaparihedhaga mabasa malamulo a Yehova mwigumini mwewa, enerege okalawo ni mukalakala.