1. Muzimu woopokihana podi wathukulela athu werana ddi?

ELABO ya peeno, muzimu woopokihana winowathukulela athu okala anrima. Motajhiha, emperezariyu podi okunyari ni korowa wihina oliye akanne mabasa mbwenye akwaye ehikanne. Namathamaga podi omugweregwenjhula namathamaga mukwaye wihina oliye akale oobajha ofiya. Muthu anafuna omuhudhera universidade oovuwa podi okunyari wihina oliye asakuliwe. Iyo ninga makiristawu nihinona wi eyo ethu yabure, dhikalelo ninga dhendha ‘mabasa oomwiilini.’ (Gál. 5:19-21) Mbwenye wahinona wi iyo podi odhana muzimu yoyo mmulogoni nihinonaga? Enoofwanelela wubuwela ethu ninga yela, mwaha wi muzimu woopokihana podi ononga wiwanana wa mmulogoni.

2. Ohudhera wula nnaasuze ddi?

² Ohudhera wula, nnafuna niwoge dhikalelo dhabure dhaanthukulele opokihana nakala vaari va addibilihu. Vasogolova, nnere owoga dhotajhiha dha adhaari oororomeleya a mudhidhi Bibliya alebiwaga yahahile ovoloweliwa ni muzimu ola woopokihana. Nihinathi, nnafuna noone makalelo nnafunihu opendda ekalelo yehu.

3. Makoho baani enafwanelela wawerana?

³ Sapama mudhidhi wavira opendda dhikalelo dhehu. Iyo podi wikoha. ‘Mwahaya bwaddi ngiliganiha naathu amodha? Ginafuna gikale muthu athimaya? Enagithukulela omulabela Mulugu ddiniyani?’ Fuukala muthu athimaya wakwaranya athu  atene? Okala muthu athimaya omukwaranya ddibila nganna? Obe efunelo yaaga fumuhagalasa Yehova? Sapama wawerana makoho ala. Mwahaya bwaddi? Kasugwa Bibliya anawogiye.

4. Mowiwanana ni Gálatas 6:3, 4, ehikalele ddi yapama wiliganiha naathu amodha?

⁴ Bibliya ononaddela wihina kanikanne elemelelo yowiliganiha naathu amodha. (Omwileri Gálatas 6:3, 4.) Mwahaya bwaddi? Mwahaya bowi niwoonaga wi iyo nili athimaya wakwaranya addibila, nnere okanna ekalelo yowithukula. Ohiya eyo naahivahaga thima eyo podi onikwerebeyiha. Wiliganiha naathu amodha, obe ohivaha thima, mubuwelo ola kahi wapama. (Rom. 12:3) Katarina, * murogola anakala oGeresiya ohuwoga egi: “Miyo geresa wiliganiha ni arogola amodha yathabwile owoma, yaanonile pama olaleya ni yanna wandana wapama naathu amodha. Mwaha wa yeyo, miyo wambela wiwona wi kaginna thima.” Kuddiwale wihina Yehova kanithanele mwaha woowoma, mwaha wowoga pama, obe mwaha woovuwa, mbwenye mwaha wonvuruwana mwanaye anawogiye. — João 6:44; 1 Cor. 1:26-31.

5. Ohudhere ddi niile empadduwele ddibila anithaniwa Hyun?

⁵ Nikoho nimodha nnafwanelelihu werana thinna: ‘Addibila enagoona ninga muthu anadhana murenddele obe ginakala okanganave naathu amodha?’ Kasugwa yopadduwa ya ddibila anithaniwa Hyun, anakala elabo yoKoreya do Sul. Ahimala mudhidhene, awonaga addibila ninga amwiddanaaye mwaha wokanna mutholo. Oliye onosoriha egi: “Miyo gowavanyihesa addibila teto dhithu dhimodha yawogesiwa miyo kagarumedha.” Yapadduwile ddi? Hyun onorumedha: “Ekalelo yaaga ononga murenddele wa mmulogoni.” Yohagalasa sowi, akwaye a Hyun omukavihera ogonjhiha ekalelo ela yabure anniyena. Oliye osaddula ekalelo yaye, peeno namaholela mulogo apama. Noona wi nihikanna ekalelo yopokihana, ohiya odhaagana murenddele, enohoweleya osaddula mowaguva.

6. Mowiwanana ni Gálatas 5:26, dhikalelo baani dhabure dhinamuthukulela muthu okanna muzimu woopokihana?

⁶ Omwileri Gálatas 5:26. Dhikalelo baani dhabure dhaamuthukulele muthu okanna muzimu woopokihana? Ekalelo emodha fuwithukula. Muthu owithukula anafuna wi dhithu dhatedhene dhikale dhaye. Ekalelo emodha yabure thinrima. Muthu anrima anafuniye, kahiyo okannave ethu mukwaye anniyena, mbwenye anamuganiyena mukwaye fuuyelela ele anniyena. Mwebaribarene, nrima ethu yowopiha. Iyo atene nnofwanelela okosa kukuthu wihina dhikalelo ndha dhabure dhihinivolowele!

7. Nladdaniho baani nnatonyihedha pama woopiha orivo mwaha wowithukula ni wanrima?

⁷ Withukula ni nrima winaligana ni mukwita onamutakaliha gaji aviyawu. Aviyawu podi owedha ovava, mbwenye mukwita ole podi othiyela tubu munavira gajiya. Mwaha wa yeyo motoriya podi ohukanna kopolo, vang’no-vang’no aviyawu ole podi ofiyera omotha. Emodhave podi ompadduwela muthu di muthu. Oliye podi omulabelaga Yehova mudhidhi wowinjhivene. Mbwenye ekalelo yaye yakala yowithukula obe yanrima, oliye anere ohiya omulabela Yehova. (Pro. 16:18) Kanahiye omulabelave Yehova baahi, mbwenye anere witotela makathamiho mwinnya, naathu  amodhaya. Wihina nrabele muzimu ola wowithukula ni wanrima nere ddi?

8. Nnawedhe addi owanana ni ekalelo ela yowithukula?

⁸ Iyo podi ogonjhiha ekalelo ela yowithukula wodhela ohuddiwala yolaga ya murumiwi Pawulo avahiliye akudda filipenses: ‘Kamweregena ethu mwaha wowithukula obe ntxiga; mbwenye mukale athu owiyeviha, mwathithimihege athu amodha opitha mwaannya.’ (Fil. 2:3) Nawoonaga athu amodha wi bathima onipitha iyo, kannaakanne ekalelo yopokihana naale enonne dhithu dhowinjhiva onipitha iyo. Ohiya eyo, dhithu dhinapariwa dhinerege onidhivela. Thabwa-thabwa yalabihedhaga dhithu enoniliwa emulabelagana Yehova. Mudhidhi mmodhave, addibila ni arogola enonne dhithu dhowinjhiva naaliwa enoofwanelela ohara yolaga ya murumiwi Pawulo. Aliwa podi werana ndho wodhela osugwa dhikalelo dhapama ninnihuna. Iyo atene kadda muthu eragana epaddi yaye mulogo onerege odhowave okalaga wowiwanana ni wamurenddele.

9. Nnawedhe addi owanana ekalelo ela yowakalela athu amodha nrima?

⁹ Iyo podi owanana ekalelo ela yowakalela nrima athu amodha, woodhela okanna manddile obe mwaha wonona wi nihikanna dhithu nahinandihu. Nanona wi nihikanna dhithu nahinandihu, kannaafunege witonyihedha wi nihikanna dhithu dhowinjhiva wapitha athu atene a elabo ela. Ohiya eyo, nnerege ofuna ohudhera naathu amodha enonne dhithu dhowinjhiva onipitha iyo. Motajhiha, mmulogoni mwawo ohukalamo ddibila anonne owoga pama mwaha wavathaddo? Windo omukohe oliyeene makalelo anegeredhiye akanna mwaha wavathaddo. Obe ohumunona murogola anonne opiya pama? Omukohe oliyeene makalelo anegeredhiye aafunaga opiya. We ninga muzombwe enowurusa okanna akwawo? Omulobe muthu ahinarusa wandana naathu amodha wihina uwaddele makalelo owandana naathu amodha. Nerana ndo, nnere orabela okanna nrima ni nnere onona dhithu dhowinjhiva.

10. Makathamiho baani afwanyiwe Jideyawu?

¹⁰ Kubuwela empadduwele Jideyawu, aali anihimo na Manaseji naalobwana anihimo na Efarayimu. Nnikavihero na Yehova, Jideyawu ni alobwana aye 300 yahigonjhiha koddo yaathukulele aliwa withukula. Vano alobwana anihimo na Efarayimu odhowa ogumana ni Jideyawu, mbwenye kiyadhowile omutamalela yadhowile okangana nuliye. Podi wera, aliwa yahitakaleliwa mwaha obajha omambelelowene Jideyawu kawithanile adhowaga owana koddo naamwiddani a Mulugu. Aliwa yafuniwa futhithimiha nihimo newa, bumwahaya kiyawedhile woona dhithu dhapama eriliyena — Jideyawu ahikavihera othithimiha ndina na Yehova ni obarela nlogo naamwaana Ezarayeli. — Juí. 8:1.

11. Jideyawu awaddele ddi alobwana anihimo naakudda Efarayimu?

¹¹ Nuwiyeviha Jideyawu wawaddela alobwana anihimo na Efarayimu egi: ‘Miyo gerilena ddi enupithani nyu?’ Vano Jideyawu osoriha yopadduwa yooniha makalelo Yehova aakaviheriye nihimo naakudda Efarayimu. Nuwindo alobwana ale ‘okurumuwa murima.’ (Juí. 8:2, 3) Jideyawu osakula wihina ahiye ekalelo yowithukula, mbwenye akanne murenddele ni nlogo na Mulugu.

12. Nnahudhera ddi naalobwana anihimo ya Efarayimu ni Jideyawu?

¹² Nnahudhera ddi ni yopadduwa ela? Naalobwana anihimo a Efarayimu, nihihudhera wihina kanthabwege othuwathuwela withithimiha naanya, mbwenye nimuthithimihege Yehova. Akala nili musolo weemudhi obe anamaholela mulogo, iyo podi ohudhera ethu yathima ni Jideyawu. Akala muthu ohutakaleliwa nithu nerilihuna, nnofwanelela osanyiha makalelo anubuweliye. Iyo podi omutamalela muthu yole mwaha ethu yapama eriliyena. Wihina nande werana eyo nnohowela okala owiyeviha, thabwa-thabwa nanona wi muthu ole ohuviriganiha. Mbwenye okanna murenddele sithu yapama ohiya osayelaga akala muthu ole ohuviriganiha obe naari.

13. Makathamiho baani afwanyiwe Ana, ki awedhile addi wagonjhiha?

¹³ Kubuwela empadduwele Ana. Oliye ateliwe ni mulevita ithaniwa Elkana amudhivelesa vanlubale. Mbwenye muladduya bowi Elkana ahikanna muhiyana mmodha ithaniwa Penina. Elkana athabwa omudhivela Ana ohiya Penina, teto muladdu mmodha bowi ‘Penina ahikanna ahima, mbwenye Ana kanna newene mmodha.’ Mwaha wa yeyo, Penina ‘malabo atene akala omuligave, wihina ampihe mbani.’ Ana ali avi? Ali owukuwene! ‘Ana akala wunlave newene kaajha.’ (1 Sam. 1:2, 6, 7) Naari dhigarive ndo, kaavo yolebela enasoriha  wi Ana ahikangana ni Penina. Ohiya eyo, oliye onfugulela murimaye Yehova ohiya dhithu dhatedhene mmadani mwaaye. Nerege nuuvira mudhidhi Penina a ambela omweddiha pama Ana? Bibliya kanasoriha. Mbwenye nnonnihu sowi Ana ahig’welag’weleyena okannave murenddele mmurimani. Vano ‘wukuwa wule omala.’ — 1 Sam. 1:10, 18.

14. Nnahudhera ddi ni ele empadduwele Ana?

¹⁴ Nahudhera ddi ni ele empadduwele Ana? Akala muthu anofuna wuupokiha, we podi ogonjhiha muladdu ola. Kinahoweleya omuhanyedhana muladdu waye. Ohiya omuwelihedha obure ni obure, waaje murenddele. (Rom. 12:17-21) Naarive oliye ahisaddulaga mubuwelo waye, we onere okannave murenddele mmurimani.

15. Apolo ni Pawulo dhithu baani yanoonniwa dhiwanana?

¹⁵ Vogomihera, kabeni noone ethu baani nnafunihu ohudhera nnamahara Apolo ni murumiwi Pawulo. Aabilene yahinona pamadhene dholebela. Apolo ni Pawulo yahinoniwa teto yahinona ohudhiha pama. Aabilene yahakavihera athu owinjhiva okala anamahara. Mbwenye newene Apolo newene Pawulo kaavo amoona mukwaye ninga mwiddani.

16. Apolo aali aani?

¹⁶ Apolo aali ‘eelabo yo Alexandriya,’ luwani wahudheriwesa vanlubale mudhidhi yole. Podi wera oliye ahinona pamadhene owooga mwaha wavathaddo ni ‘ahinona pamadhene dholebela.’ (At. 18:24) Apolo nuumala mudhidhi wowinjhivene oKorinto, addibila amodhaya amulogo yole wambela otonyihedha wi yomudhivela vanlubale, ohiya Pawulo  ni addibila amodha yaalabile mulogo yole. (1 Cor. 1:12, 13) Nerege Apolo orumedha mubuwelo ola? Newene. Vasogolova mudhidhi Apolo nuukumawo oKorinto, Pawulo omuloba wihina ahogolowelewo. (1 Cor. 16:12) Pawulo kerena ndo, ahanone wi Apolo ootatamula muladdu mmulogoni. Eyo enowoniha wihina Apolo oolabihedha dhithu anooniye nuupama — wihina alaleye muthenga Womwene ni aalibihe addibila. Kannanganyedha wi Apolo aali muthu owiyeviha. Motajhiha, kavo epaddi ya Bibliya enawoga wihina Apolo ahitakaleliwa Akila ni Pirisila ‘nubajha omutapulela pamadhene dila ya Mulugu.’ — At. 18:24-28.

17. Pawulo enre ddi wihina mmulogoni mukale murenddele?

¹⁷ Murumiwi Pawulo ahanona pamadhene mabasa aparile Apolo. Mbwenye mabasa ala kiyamutakalela Pawulo. Pawulo aali muthu owiyeviha, ahanona manddile aye ni aali muthu athotho, eyo enowoneya yolaga avahiliye mulogo wo Korintiyu. Mudhidhi addibila amodha nuwambela osoriha yegi: ‘Miyo gili a Pawulo,’ oliye kambele withukula. Mbwenye, nthithimiho naatene onvahedhela Mulugu ni Yesu Kiristu. — 1 Cor. 3:3-6.

18. Mowiwanana ni 1 Coríntios 4:6, 7, nnahudhera ddi ni yotajhiha ya Apolo ni Pawulo?

¹⁸ Yotajhiha ya Apolo ni ya Pawulo enanihudhiha ddi? Iyo podi olaba nuuviheya naaparaga mabasa a Yehova nakaviheraga amodha ofiyera obaddiziwa. Mbwenye iyo nihinona wi dhatedhene dhinaneddela pama mwaha okaviheriwa ni Yehova. Apolo ni Pawulo enonihudhiha ethu emodhaya yathima — nakanna mutholo dhowinjhiva, nnookanna ofuru wowinjhiva woodhana murenddele. Nnotamalela vanlubale mmulogoni mwehu okanna anamaholela mulogo, naadhari ookavihera enanikavihera okala owiwanana ni okanna murenddele naakwihu, enerana ndo emulabihedhaga Bibliya wihina enilage. Aliwa kinithukula mbwenye enonitonyihedha wihina nimutajhihe Yesu Kiristu!​—Omwileri 1 Coríntios 4:6, 7.

19. Kadda muthu wahiyo anohowela wera ddi? (Osugwe kwaduru enihina “ Kamusayelege opokihana.”)

¹⁹ Kadda muthu wa iyo ohuvahiwa ni Mulugu thotho yonona ethu-sithu. Iyo podi olabihedha thotho eyo, wihina ‘naaparelege mabasa athu amodha.’ (1 Ped. 4:10) Podi wera we onubuwela wihina mabasa onapariwe kinaakwana. Mbwenye kuddiwale wihina mabasa ala onapariwe enodhana wiwanana. Onakala ninga osalu onasoniwana guwo yootala. Vowindo enofwanelela wilibihera wihina ohiye ekalelo ela yopokihana naathu amodha. Wikome werana dhatedhene onandiwe wihina mmulogoni mukale murenddele ni wiwanana. — Efé. 4:3.