Mwebaribarene Yehova anafuna athu abili yatelana ekale ohagalala egumiwa yatene ni yandane pamadhene mmodha ni mukwaye. (Mat. 19:4-6) Akala we onofuna otela obe oteliwa onaafwanye wani muthu ofwanelela? Mpaddusi ehu Yehova ohunona ethu enanikavihera weddiha omwenddi ni makalelo apama ofiyera otela obe oteliwa. Mowindo, we walabihedha mwigumini mwawo dholaga oliye ananivahiye onere okanna mareeliho apama. Kasugwa emodha wa dholaga ndha.

Yobajha, iyo nnohowela onona wi ‘Murima bonyengetha vanlubale ohiyana ni ethu-sithu eli yatene teto kunapwaseya.’ (Jer. 17:9) Murima wehu ohukanna ekalelo yonithamaga nanfwanya mulobwana obe mwihiyana anidhivele, mwaha wa yeyo podi ofiyedhaga wubuwela wi gihinfwanya muthu ganvedimi, oofwanelela omutela obe ogitela, eyo podi onthukulela ohiwa ele mubuwelwihu onawogiwa. Athu yale enatelana mwamakalelo yala mwamarulu mudhidhi wavira enokanna makathamiho. (Pro. 28:26) Bumwahaya kahiyo zelu yapama mulobwana ni mwihiyana ehinonanne pama owoga wi kabe nrome omwenddi.

Provérbios 22:3 anawoga egi: ‘Muthu athotho onowoona obure orabela, mbwenye athu ehinna thotho enopwaza obure vano enoofwanyiwa makathamiho.’ Yowopiha baani erivo nalabihedhaga site dha omwenddi? Yowuukuliha sowi amodha ehifwanyiwa makathamiho yala wodhela ale enafuna oganyalela mwamakalelo abure site ndha. Ohiya eyo athu ohiroromeleya enofugula konta musayitini mwemwene wihina yaajhelege korowa athu oolodhowa. Anamoota ala enawoga wi nili anamona a Yehova.

Yowopiha emodhaya siila: Site dhoomwenddi dhinomulabihedha porogarama obe konta, wihina yoone akala athu abili enovahana wihina etelane. Mbwenye kaavo ethu enooniha wihina eyo ebaribari. Kubuwela pama, matelo ethu bavayekiwa, onubuwela wi wafunaga omusakula muthu oomutela obe owutela, were omuroromela porogarama akomputadori itiwe ni muthu? Eyoya ebaribari? Porogarama akomputadori itiwe ni muthu, onowiwanana ni malagano amBibliyani? Pro. 1:7; 3:5-7.

Va Provérbios 14:15 vihikala nlagano nimodha na thima nnawoga: ‘Muthu oolodhowa  onorumedha dhatedhene dhiniwiye, mbwenye muthu ooxaga onorajhiha wubuwela pamadhene aniwiye.’ Wihina onone akala muthu anere okala mulobwana apama obe muhiyana apama, enohoweleya omunona pamadhene muthuya. Mbwenye kinawedheya omunona pamadhene muthu ni interneti. Nyu podi wonihagana fotu dhenyu, obe winviyarelena mensaje, mbwenye eyo kinatapulela wihina muhunonana pama. Athu yubuwela wihina ehifwanya odhivela webaribari, yahirurumuwa nuugumana thoo-thoo dila yobajha.

Namaleba Salmo ohuwoga: ‘Kaginakirati ni athu owoota, ginowarabela ale enakuwa emuthu yewa.’ (Sal. 26:4) Wihina ekalege ninga athu owoma, athu amodha enowota, wekavo fotu ehiri eyeno va perfiliniviwa, obe apilikativo omwenddi. Yalebelaga athu amodha mensaje aliwa enokuuwa dhikalelo dhewa dhabure, bumwahaya enohoweleya wikoha: Naarive muthu awoge wi giri namona a Yehova, oliyeya ohubaddiziwa? Muthu owithwelavo epaddi yomuzimuni? Ohukanna wandana woliba ni Yehova? Ohunoniwa ninga muthu apama mmulogoni, obe ohukanna ‘mweddelo wabure’? (1 Cor. 15:33; 2 Tim. 2:20, 21) Ebaribarene muthu oyo katelile obe kateliwe? Wihina onone yowakulaya, enohoweleya othapanya ni namona a Yehova amunonne pamadhene muthu yoyo onanfuniwe. (Pro. 15:22) Mudhaari oororomeleya a Yehova, kadha ubuwela wagumaniha matelo ni ‘muthu ahinamulabela Yehova.’ — 2 Cor. 6:14; 1 Cor. 7:39.

Ninga nonilihu, omulabihedha Site obe apilikativo omwenddi ethu yowopiha, mbwenye ehikalawo makalelo apama oomunona muthu onafuniwe omutela obe wutela. Onamugumele wuvi muthu apama? Wakala mudhidhi wapama, Anamona a Yehova enogumanesa mmutugumanoni, musonkano minddi dha nlabo nimodha ni musonkano wamalabo mararu.

Yahandeyaga werana mutugumano ndha, ninga mudhidhi ola wa koronaviru, iyo nnatugumana ni interneti. Mutugumano ndha dha mwinternetini, addibila naarogola eri addiye ehikanna ofuru wononana mmodha ni mukwaye. Ohiya yeyove, enowona makalelo kadda muthu aneriyena epaddi yaye, ni enowoniha nroromelo newa wodhela dhowakula dhewa. (1 Tim. 6:11, 12) Ohiya yeyove, enowedheya othapanya naaddibila amodha mutugumano dhamala, mbwenye nimulabihedhaga interneti. Watugumanaga ni Anamona a Yehova mwinternetini onokanna ofuru womoona muthu onanfuniwe, ni makalelo anaweddihiye athu amodha. Eyo enere wukavihera omunona pamadhene. (1 Pe 3:4) Wavira mudhidhi ni mwanonana pamadhene, enere okweya woona akala muhukanna dholuba dhimodhave ni akala aabilene munowawiwelela malamulo a Mulugu.

Addiye yenya oholeliwa ni malagano a mBibliyani yaafunaga otela, enere okanna egumi yohagalala, enapadduwa siila elebiwe va Provérbios ‘Muthu anamugumela muhiyana apama ohufwanya ethu yapama, ni anere orumedhiwa vamentoni va Yehova.’ — Pro. 18:22.