1. Ethu baani uwerele Yehova?

OWEDHILE addi okala Namona a Yehova? Vobajha, we uhiwa “muthenga dhapama” — podi wera ulaleyile di mmudhaawo, mukwawo oskola, omabasani obe olaleyiwe vaade vawo. (Mar. 13:10) Vano muthu wilibihera waaja mudhidhi wihina uhudhihege. Mwaha woohudhihiwa we obajha omudhivela Yehova ni ohudhera wi oliye anowuudhivela. Yehova wutonyihedha ebaribari, vano we okala namahara a Yesu Kiristu ni okanna ejhehero yokalawo malabo amatene. (João 6:44) Yehova ohumweriha muthu wuhudhiha ebaribari ni ohurumedha ninga mudharaaye. We onotamalela mwaha wa yeyo?

2. Muwari mwa yohudhera ela nnaasuze ddi?

² Vano nihudherihu ebaribari, nikanna oneti wowahudhiha athu amodha wihina yitaganyihedhe ni iyo weedda dila ela enathukulela wigumini. Podi wera olaleya nyumba ni nyumba kunanirusa. Mbwenye enanrusa fuubajha omuhudhera Bibliya ni muthu. Bimakathamiho yala onniwena? Yowakula yawo yakala hee, dhithu nnahudherihu muwari mwa musolo ola dhinere wukavihera. Ni nnere woona ethu enanithukulela wahudhiha athu wihina ekale anamahara. Teto nnere ohudhera makalelo ogonjhiha makathamiho, akala kannanda omuhudhiha Bibliya. Nihinambele nnafuna nihudhere mwahaya bwaddi ohiya okala anamalaleya baahi, enohoweleya okala namahudhiha a muthenga dhapama.

3. Mwahaya bwaddi nigalaleya?

³ Yesu agaali elabo ya vati, oliye ahavaha anamaharaye mutholo minli. Vobajha, oliye ahiwoga wi aliwa yohowela olaleya muthenga dhapama dhomwene, ni watonyihedha makaleloya oolaleya. (Mat. 10:7; Luc. 8:1) Mwa dhithu dhatedhene ahudhihiye, Yesu ahawegeredha anamaharaye wihina ekanne monelo wapama yalaleyaga muthenga ola Womwene, akala athuya yerege orumedha obe naari. (Luc. 9:2-5) Oliye ahawaddela anamaharaye wego yaagomelewo mabasa oolaleya egi: ‘muthenga onere olaleyiwa wengo winafwanyeya athu.’ (Mat. 24:14; At. 1:8) Naarive athuya erumedhege obe ehirumedhaga, anamahara yohowela olaleya woodhela Omwene wa Mulugu ni dhithu onafuna werana Omwene ola.

4. Mowiwanana ni Mateus 28:18-20, ohiya olaleyave wodhela Omwene, ethu baani enahoweleya iyo werana?

⁴ Ethu yanabili Yesu arumiliye anamaharaye werana sivi? Wahudhiha ale enna efunelo wi ekale anamahara a Yesu ni wiwelela dhithu arumiliye. Ninga amodha enawogiwa, mabasa ala oolaleya ni ohudhiha yawerena bi makiristawu oobajha baahi? Naari. Yesu ohuwoga wi mabasa ala athima yerege opariwave ofiyera malabo ehu obe ‘omakuthulo wa elabo.’ (Omwileri Mateus 28:18-20.) Podi wera Yesu avahe mutholo ola nuugumana ni anamaharaye owakwana 500. (1 Cor. 15:6) Dhithu amonihiliye Juwawu, dhootonyihedha wi anamahara atene ehikanna mutholo wowakavihera athu amodha ohudhera wodhela Yehova. — Apo. 22:17.

5. Yoladdaniha baani erilena Pawulo va 1 Coríntios 3:6-9 enoniha wi olaleya ni ohudhiha onowiwanana?

⁵ Murumiwi Pawulo aliganihe mabasa owahudhiha athu wihina ekale anamahara ni mabasa owaala muthanko. Oliye ohuwoga wihina kahiyo waalave thanga baahi. Pawulo ahawubusedha addibila oKorintiyu egi: ‘Miyo waala, Apolo weka manjhe . . . Nyu dili mundda wa Mulugu.’ (Omwileri 1 Coríntios 3:6-9.) Iyo nili anamalaba ‘a mundda wa Mulugu.’ Nalaleyaga nnadhala thanga. Naahudhihaga enakala ninga nnohela manjhe. (João 4:35) Mbwenye kaadduwale wi di Mulugu anunuwiha thanga ndhe.

6. Naahudhihaga athu naakaviherege wihina yere ddi?

⁶ Iyo nnaaveda ale enna ‘efunelo yapama yegumi yohimala.’ (At. 13:48) Wihina ekale anamahara, kanihiye wakavihera (1) wonelamo, (2) orumedha ni (3) oparihedha mabasa ndhe dhinahudheriwa mBibliyani. (João 17:3; Col. 2:6, 7; 1 Tes. 2:13) Atene mmulogoni podi wakavihera anamahudhera a Bibliya. Nnerana eyo naaweddihaga nuudhivela, ni yafiya mmulogoni nawakela ni malada menli. (João 13:35) Ale enamuhudhiha muthu yajege mudhidhi ni elabihedhege kopolo wihina emukavihere namahudhera ‘obwanyula dhithu dholiba’ — obe niwoge ohiya dhilemelelo dhavolowele mmurimani mwewa. (2 Cor. 10:4, 5) Omukavihera muthu osaddula egumaye ofiyera obaddiziwa podi ovira mudhidhene. Mbwenye wilibihedha wula kahiyo weebewene.

7. Ethu baani enanithukulela wapara mabasa oolaleya ni wahudhiha athu wihina ekale anamahara?

⁷ Mwahaya bwaddi nigaaparaga mabasa oolaleya ni wahudhiha athu wihina ekale anamahara? Vobajha, mwaha nnomudhivela Yehova. Wilibihedhaga wihina wiwelele nlamulo nna nowapara mabasa oolaleya ni owahudhiha athu wihina ekale anamahara, we onowoniha odhivela ni Mulugu. (1 João 5:3) Kubuwela ela, odhivela onniwena ni Yehova wohuthukulela  olaleya nyumba ni nyumba. Eyo yahukweyela? Podi wera, naari. Onowubuwela labo noobajha wambeliwe olaleya nuugogodda musiwo oobajha? Podi wera wogurumelaga. Mbwenye we wohudhera wihina Yesu ohuniruma wapara mabasa ala, nuwindo we wiwelela anirumiliye. Mudhidhi nuuvira wapara mabasa oolaleya okala ethu yukweyela. Ki wera wahudhiha athu? Wubuwelaga thalo yela onogurumela? Akala waakule hee, olobele wa Yehova wihina ukavihere ohugurumelege. Oliye anere wuvaha efunelo yowahudhiha athu wihina ekale anamahara!

8. Mowiwanana ni Marcos 6:34, ethu baani emodha enanithukulela wahudhiha athu?

⁸ Ethu emodha enanithukulela ohudhiha ebaribari fuwadhivela athuya. Labo nimodha, Yesu ni anamaharaye yaaligi ogomene mwaha wamabasa yaparilegiwa oolaleya labo nantero. Aliwa yohowela mburo wihina yithuwe, mbwenye muthithi waathu wafwanya. Mwaha waweddela thagaraga Yesu obajha wahudhiha athu ale ‘dhithu dhowinjhiva.’ (Omwileri Marcos 6:34.) Mwebaribarene, yohowela mudhidhi yole Yesu ilibihedhe vanlubale. Mwahaya bwaddi adhe ilibihedhege? Oliye owawoona wihina athu enowona goyi ni yohowela okanna ejhehero. Yesu oofuna wakavihera. Ethu emodhave enopadduwa peeno. Podi wera naasugwaga athu enakala ninga enohagalala ni kinna muladdu. Mbwenye kanihiye ekalelo yoode onileketa. Aliwa eli ninga mambila erimele ehinna namakukula wihina asogolele. (Efé. 2:12) Murumiwi Pawulo ohuwoga wihina athu enna ekalelo yela enohowela nikavihero na Mulugu ni kinna ejhehedhelo. Aliwa eli ‘dila yorambalala, enathukulela omatolosiwelo.’ (Mat. 7:13) Nasugwa munya goyi enna athu murudda nnakalihu, odhivela ni waweddela thagaraga winonithukulela wakavihera. Makalelo apama owerana yeyo fuwaja mudhidhi wihina nimuhudhere Bibliya naaliwa.

9. Mowiwanana ni Filipenses 2:13, nikavihero baani Yehova anuvahiiye?

⁹ We ohunona wihina omuhudhiha Bibliya onohowela mudhidhi. Podi wera siyeyo enuuthukulela onyanyuwa. Akala muladduya buyoyo, omwaaddele Yehova makalelo onakaliwe. Omulobe wihina onfwanye muthu wihina omuhudhihege. (Omwileri Filipenses 2:13.) Murumiwi Juwawu ohuwoga wihina Mulugu anere wawakula malobelo eniwanana ni efunelo yaye. (1 João 5:14, 15) Bumwahaya ohanganyedhe wihina Yehova anere wukavihera okanna efunelo yowahudhiha athu wihina ekale anamahara.

10-11. Ethu baani enukathamiha wahudhiha athu Bibliya?

¹⁰ Mabasa owahudhiha athu wihina ekale anamahara iyo kanavudhuwana. Mbwenye malabo mamodha nnofwanyiwa makathamiho ehinanenya wapara mabasa ala ninga nafunelihu. Ki ethu baani nnafunihu wera wihina naagonjhihe.

¹¹ Makathamiho nnafwanyiwihu podi onithukulela ohuwedha werana ele nnafunihu. Motajhiha, anamalaleya amodha ehimala wuluvala obe mwigumini kinonamo pama. Nyu muhukanna makathamiho yala? Akala mwaakule hee, mubuwele vang’no dhithu nihudherihu ni oredda wa Koronaviru. Nihoona wihina enowenyeya omuhudhiha muthu Bibliya nlabihedhaga telefoni. Nyu podi othoma omuhudhiha muthu mugaali vaade vinyu mulabihedhaga telefoni. Ohiya eyo, athu amodha yere odhiveliwa omuhudhera Bibliya nihiyo, mbwenye onowarusa ohudhera mudhidhi addibilihu enalaleyiwa. Onowabihaga  opendda akala yere owedheya wahudhiha athu yala mudhidhi enafuniwa? We podi weenya wihina wahudhihe mudhidhi ethomiliwa, podi wera mambeseene obe mahiyu. Onowubuwela ethu yereye Nnikodemu? Oliye othoma wihina awoge ni Yesu mahiyu, teto Yesu orumedha wihina amuhudhihe mudhidhi yola.​—João 3:1, 2.

12. Ethu baani enanroromeliha wihina nnere owedha okala anamahudhiha apama a Bibliya?

¹² Kaginiwegeredhe wihina nkanne namahudhera a Bibliya. Podi wera we onubuwela wihina wegi obajhe omuhudhiha muthu, enohoweleya okanne enonelo wodhela Bibliya. Kasugwa dhithu tharu dhinukavihere ororomela wi onere wanda ohudhiha. Vobajha, Yehova osugwaga anuwoona wi we ohukanna thotho dhowahudhiha athu. (2 Cor. 3:5) Yanabili, Yesu avahiwe ‘othonga watewene wodhulu ni wavati,’ oliye duvahile mutholo ola wohudhiha. (Mat. 28:18) Yanatharu, we podi ororomela nikavihero naathu amodha. Yehova ahimuhudhiha Yesu dhithu afuniye werana, teto Yesu ororomela dhohudhiha dha ababe. We podi wera emodhave. (João 8:28; 12:49) Ohiya eyo, omulobe musogoleli awo anikuru, piyonero obe namalaleya okovelela wihina otonyihedhe makalelo obajha ohudhera wa Bibliya. Wihina wakovelele mabasa ala, waavelelege addibila yala yadhowaga ohudhiha ni wasugwege makalelo eneriwana.

13. Mwahaya bwaddi egahoweleyaga wisaddula?

¹³ Enonirusa olemela makalelo maxa obe olabihedha dhipanodha. Makalelo nnahudhihihu athu Bibliya ehisadduwa. Vano livuru nehu nathima nohudhihana thi Ofwanye ohagalala wamalabo amatene! Makalelo owegeredha ni ohudhiha kahiyo mamodhave. Nnileri ddima dhing’nove ni nnothapanya vanlubale ni namahudhera. Naahudhihaga nnolabihedha vidiyu obe dhithu dhili musayitini mwehu ninga JW Library^®. Akala kunawedha olabihedha pama dhithu ndha, omulobe ddibila wihina ukavihere wanda olabihedha. Athu yalemela ethu kinadduwala mowaguva. Kinakweya olemela ethu exa. Mbwenye nnikavihero na Yehova ni nnikavihero naathu amodha, enere onikweyela ohudhera dhithu dhixa, ni omuhudhera Bibliya naathu amodha winerege onidhivela. Ninga piyonero dhaala awogiliye, makalelo ala maxa “bapama woole anahudhihiwa vamodha nuule anahudhiha.”

14. Nalabaga murudda athu ehinarumedhiwa dhithu nnalaleyihu, nubuwelege ddi, ki 1 Coríntios 3:6, 7 ananivaha addi kopolo?

¹⁴ Murudda winakalihu kinakweya ofugula ohudhera wa Bibliya. Podi wera malabo mamodha nalaleyaga athuya kinapwatha muthenga nnawogihu newene kinafuna ovuruwana. Nalabaga murudda eliwo munyaathu yala enaanikavihere ddi? Ohuddiwale wihina egumi yaathu kinaliba osadduwa. Wubuwele wihina ale omambelelowene yahifuna ovuruwana podi osaddula mubuwelo wewa yonege wi enohowela oholeliwa ni Mulugu mwigumi mwewa. (Mat. 5:3) Eyo enopadduwa, ale yakoddesa wathukula malivuru ehu peeno ehisaddula mubuwelo wewa ni enomuhudhera Bibliya. Teto nihinona wihina Yehova dimwinya amabasa ala. (Mat. 9:38) Oliye anafuna ndhowegenave waala ni ohela manjhe thanga ndha, mbwenye muthu anunuwiha duliye. (1 Cor. 3:6, 7) Naari akala kunamuhudhiha Bibliya, kuddiwale. Yehova kananireliha mwaha athu owinjhiva naadilihu wahudhiha, mbwenye mwaha wilibihedha wehu. *

15. Muthu arumedha omuhudhera Bibliya ni aaparihedhaga mabasa mwigumini mwaaye ndhe dhinahudheriye Yehova anakala avi?

¹⁵ Yehova onohagalala muthu arumedha ebaribari ya mBibliyani, ni awaddelaga akwaye ebaribari yela ahudheriye. (Pro. 23:15, 16) Ohagalala waye winothabwa oonaga ethu enapadduwa peeno. Motajhiha, naari nigaali muwari mwa koronaviru yaka yamabasa ya 2020, ehihudhihiwa athu owakwana 7.705.765. Mwaha wa yeyo ehikaviheriwa athu owakwana 241.994 opeleka egumi yewa wa Yehova ni obaddiziwa. Teto anamahara yala axa enere wakavihera athu amodha wihina ekale anamahara amodha. (Luc. 6:40) Mohanganyedha, iyo naaparaga mabasa owahudhiha athu wihina ekale anamahara Yehova onohagalala vanlubale.

16. Yoluba baani nnafunihu okanna?

¹⁶ Wahudhiha athu wihina ekale anamahara kahiyo ethu yokweya, mbwenye nnikavihero na Yehova iyo podi wahudhiha axa omudhivela babihu oodhulu. Onubuwela avi oluba okanna namahudhera mmodha? Nahere kadda muthu nnafwanyihu nifugulaga ohudhera wa Bibliya, marelihoya yerege ootikiniha. Mohanganyedha Yehova anere oreeliha wilibihera wehu!

17. Nawedha okanna ohudhera wa Bibliya murima wehu onakala avi?

¹⁷ Olaleya ni wahudhiha athu oneti munlubale. Mabasa ala enodhana ohagalala winlubale. Murumiwi Pawulo, akavihere athu owinjhiva luwani yoTesalonika okala anamahara a Yesu, ohuwoga wodhela mubuwelo waye egi: ‘Yojhehera yehu sivi, ohagalala obe kara yehu yothaba vamentoni va nabwiya ehu, Yesu Kiristu? Mwebaribarene, iyo nnothithimihiwa ni nnohagalala mwaha weenyu.’ (1 Tes. 2:19, 20; At. 17:1-4) Owinjhiva peeno ehikanna mubuwelo mmodhave. Murogola anithaniwa Stéphanie ni mamune yakavihere athu owinjhiva ofiyera obaddiziwa onowoga egi: “Kavo ohagalala wimodha onapitha omukavihera muthu wipeleka wa Yehova.”