1. Dhithu baani Davidi awogiliye wodhela wiyeviha wa Yehova?

IYO podi owoga wi Yehova dowiyeviha? Hee. Kasugwa ele awogile Davidi wodhela Mulugu: ‘Nyu munogivaha yowibarelana yenyu enavulusa ni wiyeviha wenyu winogunuwiha.’ (2 Sam. 22:36; Sal. 18:35) Davidi aawogaga madhu ala podi wera oliye owubuwela labo namavuhulela Samuweli adhowiligiye vaade vaababe Davidi, wi amuthikithele okala mwene oharela owizarayeli. Davidi anna addibile atanu nabili oliye ali ethogohiya podi dhigalive ndo Yehova ahimusakula wi ahabe mpaddo wa mwene Sawuli. — 1 Sam. 16:1, 10-13.

2. Yohudhera ela ya peeno nnaasuze ddi?

² Davidi ahikanna mubuwelo mmodhave ninga aanna namaleba a Salmo 113 awogile wodhela Yehova egi: ‘Oliye onoworoma wihina asugwe odhulu ni elabo yavati, ononvenyiha muthu owiyeviha onthubini, ononvenyiha muthu ohawa wihina amukaratihe vili athu orela.’ (Sal. 113:6-8) Yohudhera ela nnafuna nisuze dhipaddi Yehova oonihiliye wi dowiyeviha, ni none ethu baani nnahudherihuvo. Namala nnere ohudhera vang’ono yotajhiha ya mwene Sawuli, namavuhulela Daniyeli, ni Yesu wodhela omwiwelela Yehova.

3. Yehova ananeddiha ni makalelo baani, ki eyo enoniha ddi?

³ Iyo podi ohudhera dhithu dhowinjhiva wodhela makalelo Yehova anaweddihiye adharaaye ohulogomana. Yehova kananirumedha baahi ninga adharaaye, mbwenye oliye ononona ninga akwaye. (Sal. 25:14) Wihina nikanne wandana wapama ni Yehova oliye ohunivaha mwanaye ninga mukutho wihina nleveleliwe dhothega dhehu. Ela enowoniha wi Yehova onowakubanyedha athu ni onowaweddela thagaraga! Dhithu dhatedhene ndha dhinowoniha wi Yehova Mulugu owiyeviha.

4. Yehova anivahile ddi, ki mwahaya bwaddi?

 ⁴ Kasugwa ethu emodha enoniha wi Yehova dowiyeviha. Mwaha okala mpaddusi, oliye eere othoma kadda muthu makalelo anafuniye weddihaga egumi yaye. Mbwenye oliye kerilena ndo. Yehova ohunipaddusa moligana ni oliye ni ohunivaha oneti wosakula, naari oliye aganonne wi iyo nili ang’ono ni kaninna kopolo ooligana nuliye. Mwaha wi oliye kanafuna wi nimulabelege mowaddihedhiwa mbwenye nimulabelege mwaha omudhivela ni mwaha woonona mareeliho baani nnawakelihu naamulabelaga. (Deut. 10:12; Isa. 48:17, 18) Sapama omulabela Mulugu owiyeviha!

5. Yehova ananisuziha ni makalelo baani okala athu owiyeviha (Osugwe fotu yavakapani)

⁵ Makalelo Yehova anaweddihiye athu enonihudhiha wi nnohowela okala athu owiyeviha. Elabo yodhulu ni yavati kavo onna enonelo omukwaranya Yehova. Podi dhigalive ndo, oliye onorumedha monelo wa athu amodha. Motajhiha, Yehova ahirumedha wi Yesu amukavihere opaddusa dhithu dhimodha. (Pro. 8:27-30; Col. 1:15, 16) Podi aganna kopolo dhatedhene oliye onowathomela mabasa athu amodha. Oliye ohumuthoma Yesu wihina akale mwene a omwene waye, ni ohavaha mutholo makiristawu oothikitheliwa owakwana 144 mil enathongege ni Yesu. (Luc. 12:32) Mwebaribarene Yesu ahinakale mwene ni namakutha, Yehova arajhihile omuxagiha. (Heb. 5:8, 9) Teto oliye ohaxagiha ale enafuna othongaga ni Yesu. Mbwenye Yehova kanazondda dhatedhene eneriwana wihina yakwanelihe mabasiwa. Oliye onororomela wi aliwa enere werana yofuna yaye. — Apo. 5:10.

6-7. Yotajhiha baani nnahudherihu ni Yehova wodhela wathomela amodha mutholo?

⁶ Akala Yehova anna kopolo dhatedhene  onowathomela mabasa athu amodha, kinahoweleya iyovano omutajhiha oliye? We oli mulobwanaya vamuralani obe oli namaholela Mulogo? Weregena ninga Yehova. Wathomele mabasa athu amodha ni kuzonddege kadda ethu eneriwana wihina yapare mabasiwa. We wamutajhiha Yehova kunathomele baahi athu amodha mabasa, mbwenye onere ohagalala woona wi aliwa enowapara mabasaya, ni onere wakavihera okala athu ororomeleya. (Isa. 41:10) Ethu baani emodha ale enaasogolela athu amodha enafuniiwa ohudhera ni Yehova?

⁷ Bibliya onowoga wi Yehova onowiwa balume dhaangero. (1 Reis 22:19-22) Ababi munawedhe addi omutajhiha Yehova? Yenyeya mwakohe aninyu balume yewa enniwana wodhela muselu munathapanyedhinyu. Yowakula yewa yariyela mweddihe muselu ole ninga aliwa ewogiliwa.

8. Yotajhiha ya Abaraawu ni Sara enoniha addi wi Yehova doovilela?

⁸ Yehova onowoniha wi dowiyeviha mwaha ovilela. Motajhiha Yehova onowoniha ovilela, adhari aye yavaha monelo wewa wodhela muselu ehinoneliwamo pama. Abaraawu konelamo pama mwahaya bwaddi Yehova adhe athomege ogujhula sidadi ya Sodoma ni Gomora. (Gén. 18:22-33) Vano oliye ovaha monelo waye Yehova onvuruwana. Yehova owoga wi Sara ere okanna wari ammbale mwana naari aguluvale, Sara wambela oteya mbwenye Yehova kaamunyanyuwele. (Gén. 18:10-14) Ohiya omunyanyuwela Yehova ahimweddiha pama Sara.

9. Ababi ni anamaholela Mulogo enawedhe addi omutajhiha Yehova?

⁹ Oli babi obe oli namaholela Mulogo? Onande addi omutajhiha Yehova? Wubuwele makalelo onakaliwe, mwanawo obe ddibila ammulogoni aanganyedhaga wodhela yothoma weriliwena. Ethu enuudhela mmusoloni mowaguva sowi oonvanyihe? Obe onoveda makalelo owonelamo balume yewa. Ale enaasogolela athu amodha yamutajhiha Yehova okala owiyeviha emudhi ni mulogo enere okanna murenddele. Ofiya vala nihoona makalelo nnafunihu otajhiha wiyeviha wa Yehova. Voharela nnafuna nihudhere makalelo owerana ele enamudhivela Yehova wodhela ohudhera dhotajhiha dhilebiwe mBibliyani.

10. Yehova ananisuziha ni makalelo baani?

¹⁰ Yehova ‘namahudhiha ehu munlubale’ ohuhiya dhotajhiha mbibliyani wihina iyo nihudherena dhithu dhowinjhiva. (Isa. 30:20, 21) Mbibliyani nnofwanyamo dhotajhiha dhaathu yonihe dhowima dhapama Yehova anarumeedhiye, ninga werana ele enamudhivela oliye. Teto Bibliya onowoga dhotajhiha dhaathu amodha eherilena ndhe dhinamudhivela Yehova Mulugu ni onowoga ethu yapadduwele. Napendda dhotajhiha ndha nnohudhera dhithu dhowinjhiva. — Sal. 37:37; 1 Cor. 10:11.

11. Yotajhiha yabure ya Sawuli enanihudhiha ddi?

¹¹ Wubuwele yampadduwele Mwene Sawuli. Omambelelowene oliye aali muzombwe erana dhithu dhamudhivela Yehova. Oliye oonona pama wi ohowela okanna manddile, teto oliye ahifiyedha okoodda okanna mutholo dhimodha. (1 Sam. 9:21; 10:20-22) Mbwenye nuvira mudhidhi oliye okala muthu owithukulela. Emanya ela oliye ambele woniha nuukala mwene. Labo nimodha Sawuli kandile omujheha namavuhulela Samuweli. Ohiya werena ele enamudhivela Yehova ni aroromele wi ere okosa ele nlogo nafuniwa, Sawuli wapara mabasa ahathomeliwiye oliye  onvaha mukutho Yehova. Ki nuwera ndo epadduwe ddi? Yapadduwe sowi, Sawuli oyelela wandana anniyena ni Yehova ni ohihiwa okala mwene. (1 Sam. 13:8-14) Mwebaribarene nnohowela ohudhera ni yotajhiha ela ni onona wi kanubuwele okala athu owithukula ninga Sawuli.

12. Daniyeli onihe nimakalelo baani wi owerana ele enamudhivela Mulugu?

¹² Ohiya yotajhiha yabure ya Sawuli, kasugwa yotajhiha yapama ya namavuhulela Daniyeli. Egumaye yatene Daniyeli aali mudhari owiyeviha erana ele yamudhivela Mulugu. Mudhidhi watene oliye oveda onona monelo wa Yehova. Daniyeli nuulabihedhiwa ni Yehova wi atapulele dhoroha dha Nabukodonosori, oliye kaavedile othithimihiwa. (Dan. 2:26-28) Nnahudheravo ddi ni yotajhiha ela? Iyo natamaleliwa mwaha okosa diskurso ni makalelo a pama obe nawakela mareeliho mwaha mabasa nnaparihu mmalaleyelo ninvahege nthithimiho Yehova. Ninone wi kanande werana dhatedhene Yehova ahere ahinikavihere. (Fil. 4:13) Nerana ndo, kanamutajhiha Daniyeli baahi, mbwenye nnomutajhiha Yesu. Ni makalelo baani?

13. Va João 5:19, 30 nnahudheravo ddi wodhela Yesu?

¹³ Podi agali mwana ologomana a Mulugu Yesu owoniha wi ohowela nikavihero na Yehova (Omwileri João 5:19, 30.) Oliye kanubuwelege wawakiha Omwene Ababe. Filipenses 2:6 anawoga wi Yesu ‘kubuwele okala vamburoni va Mulugu, obe, okala ooligana ni Mulugu.’ Ninga mwaana owiwelela Yesu ahinona wi ohukanna manddile ni ooriha onamathonga Wababe.

14. Egamulobile ethu oliye ahaniyena oneti wowavaha Yesu erile ddi?

¹⁴ Wubuwele makalelo Yesu aaliye murumiwi Tiyago, Juwawu ni mamiwa yamulobiliwa ethu Yesu ahaniyena oneti wowavaha. Oliye wawaakula wi Babe baahi odhulu dinna oneti wothoma baani anakale mono wojha obe weemara mumweneni. (Mat. 20:20-23) Yesu ahanona manddile aye, oliye owerana ethu yamudhivela Yehova. Oliye kanalupege manddile wa ele ahudhihiwiye ni Yehova. (João 12:49) Nnawedhe addi omutajhiha Yesu?

15-16. Nnawedhe addi ovirihamo yolaga enafwanyeya va 1 Coríntios 4:6?

¹⁵ Iyo nnawedhe omutajhiha Yesu wodhela  werana ele enamudhivela Yehova navirihagamo yolaga eli va 1 Coríntios 4:6 enawoga wi ‘Kamulupe manddile wodhela ndhe dhilebiwe.’ Muthu aniloba yolaga kaniwogege ethu enanidhela mmusoloni mowaguva newene kaniwogege mubuwelo wehu. Ohiya eyo, nimulabihedhege Bibliya ni ndhe dhinawoga malivuru ehu, nerana ndo nnere woniha wi nihikanna manddile. Werana ndhe dhinamudhivela Mulugu dhinonivaha ebaribari wi ‘Malamulo owogowa’ a Yehova a kopolo dhatedhene bathima opitha yolaga yehu nnafunihu onvaha muthu. — Apo. 15:3, 4.

¹⁶ Nakala athu enerana ethu enamudhivela Yehova nnere omuthithimiha oliye. Mbwenye dhikalawo dhithu dhimodha dhapama negi nande otonyihedha dhikalelo ndha. Vano nnafuna nihudhere makalelo baani wiyeviha ni werana ele enamudhivela Yehova onnivahiwa ohagalala ni onanikaviheriwa wandana ni amodha.

17. Mwahaya bwaddi athu owiyeviha ni enerana ele enamudhivela Mulugu ekalaga ohagalala?

¹⁷ Nakala owiyeviha ni neragana ele enamudhivela Yehova nnere okala ohagalala. Mwahaya bwaddi? Mwahaya bowi, nanona wi nihikanna manddile, nnotamalela ni nnohagalala athu amodha yanivaha nikavihero. Motajhiha onowubuwela labo Yesu nuwavulumusa athu owakwana kumi, yanna oredda wa maranya? Muthu mmodha baahi dahogolowege wihina adhe amutamalele Yesu mwaha ovulumusiwa oredda ole wowopiha. Oliye kaande ovulumuwa ahikaviheriwe ni Yesu. Wiyeviha ni werana ele enamudhivela Yehova yahimuthukulela mulobwana ole otamalela ni omuthithimiha Mulugu mwaha nikavihero avahiwiye. — Luc. 17:11-19.

18. Wiyeviha ni werana ele enamudhivela Mulugu onnadhana mareeliho baani? (Romanos 12:10)

¹⁸ Muthu owiyeviha ni oneerana ele enamudhivela  Mulugu ohukanna ofuru wokanna wandana woliba naathu amodha. Mwahaya bwaddi? Mwahaya bowi, athu owindala enowanda woona dhikalelo dapama dhaathu amodha ni waroromela ni makalelo okweya. Athu owiyeviha ni enerana ele enamudhivela Mulugu enohagalala yawona athu amodha dhewa dhaweeddelaga pama mmabasani bi mabasa oomwene ethomeliwiwa. Teto aliwa kinahiya watamalela amodha obe wathithimiha. — Omwileri Romanos 12:10.

19. Enohoweleya owanana ekalelo yowithukulela, mwahaya bwaddi?

¹⁹ Athu owithukula bohiyana ni athu owiyeviha. Athu owithukula onowarusa watamalela amodha, aliwa enafuniiwa fuutamaleliwa baahi. Aliwa ehikanna ekalelo yowiliganiha ni amodha ni ehikanna ekalelo yopokihana mmodha ni mukwaye. Ohiya waxagiha athu amodha ni wathomela mabasa, aliwa enubuwela ayi: “naafunaga wi mabasihu yeedde pama neregena yekihu.” Aliwa enubuwela ayi, “wihina dhithudha dhedde pama enohoweleya opariwa ninga aliwa munafuneliwa.” Athu owithukula enosilila dhithu dhaanya ni enokalela nrima ninga yawakihe annya dhikale dhewa. (Gál. 5:26) Athu owindala kinna wandana woliba. Iyo napendda, nona wi nihikanna ekalelo yowithukulela enohoweleya nimulobe Yehova wihina anikavihere ‘osaddula mubuwelwihu.’ Nerana ndo, ekalelo yowithukulela kinakanne musisi mmurimani mwehu. — Rom. 12:2.

20. Mwahaya bwaddi sofuneya okala owiyeviha ni werana ele enamudhivela Mulugu?

²⁰ Nnotamalela vamlubale mwaha okanna yotajhiha ya Yehova. Nnowona makalelo Yehova aliye muthu owiyeviha, wodhela makalelo anaweddihiye adhari aye. Vano iyo nnafuna nimutajhihe. Ohiya eyenove nnofuna watajhiha athu elebiwe mBibliyani yerilena dhithu dhinamudhivela Yehova. Nerana ndo, nnere omukokorela ni onvaha nthithimiho nnafwaneleliye. (Apo. 4:11) Teto iyo podi weedda ni Babihu oodhulu Yehova malabo matene, ole anaadhivela ale eniyeviha ni enerana ele anafuniye.