1. Oneti baani ninihunna?

IYO atene nihikanna oneti munlubale: wokanna mburo mmulogoni mwa Yehova. Iyo nnakala parayizu oomuzimuni mwidhalile addibila ni arogola a murenddele ni oohagalala. Mburo wawo mmulogoni buvi?

2. Nladdaniho baani murumiwi Pawulo awogiliye mmakartani mwaaye amodha alebiliye?

² Iyo podi ohudhera wodhela muselu yoyo ni nladdaniho niwogiwe mmakartani mamodha a murumiwi Pawulo. Makarta Yehova anvetheliye murumiwi Pawulo waleba, oliye oliganiha mulogo ninga mwili wa muthu. Teto oliye omuliganiha kadda muthu mmulogoni ninga yano dha mwili. — Rom. 12:4-8; 1 Cor. 12:12-27;Efé. 4:16.

3. Yohudhera ela nnaasuze dhithu baani tharu?

³ Muwari mwa yohudhera ela nnere woona dhithu tharu nnasuzihuvo ni nladdaniho na Pawulo. Voobajha, nnafuna nihudhere wi kadda muthu wa iyo ohukanna mburo * mmulogoni mwa Yehova. Yanabili, nnere woona ethu baani nnafunihu wera noona wi kaninna thima mmulogoni. Yanatharu, nnere woona mwahaya bwaddi ekala yoofuneya wapara mabasa athima enithomele Mulugu mmulogoni mwaaye.

4. Romanos 12:4, 5 ananihudhiha ddi?

⁴ Ethu yobajha nnahudherihuvo ni nladdaniho na Pawulo sowi, kadda muthu wa iyo ohukanna mburo wathima  mwimudhini mwa Yehova. Pawulo ohubajha owoga nladdaniho naye eraga: ‘Mowindo, woona wi mwili mmodha ohukanna yano dhowinjhiva, mbwenye kadda yano kinaapara mabasa mamodhave, ni makalelo mamodhave, iyo podi niginjhivaane nili mwili mmodhave, mowiwanana ni Kiristu, mbwenye nili yano dhinakaviherana mmodha ni mukwaye.’ (Rom. 12:4, 5) Pawulo afuna awoge ddi? Afuna ere kadda muthu wa iyo ohukanna mutholo wohiyana ni mukwe mmulogoni, mbwenye atene nili athima.

5. ‘Gari’ baani Yehova anavahiye mulogo waaye?

⁵ Yawogiwaga wodhela ale enna mburo mmulogoni, podi wera ethu enuudhela mmusoloni baanamaholela mulogo. (1 Tes. 5:12; Heb. 13:17) Eyo ebaribari, amulabihedhaga Yesu, Yehova ohuvaha mulogo waye ‘alobwana ninga gari.’ (Efé. 4:8) Vaari va ‘alobwana yala evahiwe ninga gari’ ehikalavo athu a Nikuru Nolamulela, anamakavihera a Nikuru Nolamulela, anameeddela mulogo, anamahudhiha a Eskola ya bibliya, anamaholela mulogo ni adhari ookavihera. Addibila ala atene enathomiwa ni muzimu wotxena, teto aliwa ehikanna mutholo wowasamalela mambila a Yehova ni olibiha mulogo. —1 Ped. 5:2, 3.

6. Ninga munawogela 1 Tessalonicenses 2:6-8, ale ethomiwe ni muzimu wotxena enaapara mabasa baani?

⁶ Addibila enothomiwa ni muzimu wotxena wihina esamalelege mutholo dhohiyana-iyana. Ninga mada, manyalo ni yano dhimodha dhinalabiwa wihina ekavihere mwili, addibila ala enolaba ni kopolo wihina elibihe mulogo. Efunelo yewa kahiyo yowivuwiha, mbwenye enowilibihedha wihina yakavihera addila ni arogola olibiha nroromelo newa. (Omwileri 1 Tessalonicenses 2:6-8.) Nnomutamalela Yehova mwaha onivaha alobwana owithwelavo omuzimuni ni enaapara mabasa apama!

7. Mareeliho baani addibila ni arogola owinjhiva enaapara mabasa a mudhidhi wamutene enawakeliwa?

⁷ Mmulogoni ehikalamo ale enathomiwa ninga amisiyonariyu, apiyonero avayekiwa, ni apiyonero a mudhidhi wamutene. Mwebaribarene addibila ni arogola a elabo yatene ehithoma wapara mabasa olaleya ninga mabasiwa a mudhidhi wamutene. Mwamakalelo yala aliwa enowedha wakavihera athu owinjhiva okala anamahara a Yesu Kiristu. Woona wi ale enaapara mabasa a mudhidhi wamutene kinna dhithu dhokalana dhowinjhiva, Yehova onowavaha mareeliho owinjhiva. (Mar. 10:29, 30) Iyo nnowadhivela addibila ni arogola ala oofuneya ni nnotamalela mwaha aliwa okanna mburo mmulogoni.

8. Mwahaya bwaddi kadda namalaleya akala athima vamentoni va Yehova?

⁸ Niwogege wi addibila enna mutholo mmulogoni ni enaapara mabasa amudhidhi wamutene binna mburo Mmulogoni baahi? Naari. Kadda namalaleya da thima vamentoni va Mulugu ni da thima mmulogoni. (Rom. 10:15; 1 Cor. 3:6-9) Nubuwelege wi mutholo wehu mmulogoni fudhowa wasuziha athu wihina ekale anamahara a Yesu Kiristu. (Mat. 28:19, 20; 1 Tim. 2:4) Atene enatugumana ni mulogo, anamalaleya obaddiziwa ni ohubaddiziwa enowilibihedha wihina yaweke mabasa olaleya mburo woroma mwigumini mwewa. — Mat. 24:14.

9. Arogolihu ammulogoni bathima, mwahaya bwaddi?

⁹ Ahiyana enovahiwa mburo wa thima ni Yehova mmulogoni. Oliye onowavaha thima athu ninga, Amayi, amamukwele, arogola  eli addiye, mbwenye enamulabela oliye ni oliba murima. Aliwa enowogiwa pama mwaha dhikalelo dhewa ninga thotho, nroromelo, oviheya wewa, oliba murima ni okala athu oovaha. (Luc. 8:2, 3; Atos 16:14, 15; Rom. 16:3, 6; Fil. 4:3; Heb. 11:11, 31, 35) Mohanganyedha nnomutamalela Yehova mwaha okanna arogola mmulogoni mwehu enoniha dhikalelo dhenda dhapama.

10. Mwahaya bwaddi addibila owunnuwelavo ekala athima?

¹⁰ Teto nnowakela mareeliho mwaha okanna athu owunnuwelavo mmulogoni mwehu. Addibila ni arogola amodha owunnuwelavo ehilabihedha egumiwa wihina emulabele Yehova. Amodha ehudhere ebaribari ovanene. Podi ale owunnuwelavo ehudhere ebaribari ovanene obe ehudhere wale aliwa enofwanyiwa makathamiho ninga oredda, mwaha wowuluvala. Mwaha wa makathamiho yala, aliwa podi ohandaga okosa dhithu dhowinjhiva mmulogoni obe mmalaleyelo. Podi dhigalive ndo, athu owunnuwelavo enowilibihedha wihina yapare mabasa olaleya, waxagiha ni walibiha amodha mmulogoni. Woona wi aliwa biromile obaliwa iyo podi ohudhera dhithu dhowinjhiva naaliwa. Mwebaribarene addibila ni arogola owunnuwelavo boofuneya vamentoni va Yehova ni boofuneya mmulogoni. — Pro. 16:31.

11-12. We ononamo avi ni yotajhiha ya azombwe a mulogo wawo?

¹¹ Kawubuwele azombwe ammulogoni. Kahiyo masika azombwe ogonjhiha elabo ela enathongiwa ni Saddana Ddiyabo ni dhohudhiha dhaye. (1 João 5:19) Ohiya eyenove, nnakala oolibene nawonaga azombwe evahaga dhowakula dhewa mmutugumanoni, yilibihedhaga mmalaleyelo ni yaakihedhaga ni oliba murima ndhe dhinarumedhiwa mBibliyani. Azombwe! Nyu muhukanna mburo wa vayekiwa mmulogoni mwa Yehova. — Sal. 8:2.

¹² Mbwenye addibila ni arogola amodha onowarusa orumedhe wi aliwa boofuneya mmulogoni. Ethu baani enaanikavihere  onona wi iyo nili athima mmulogoni? Kasugwa ethu enaanikavihere.

13-14. Athu amodha enubuwela wi kinna thima mmulogoni mwahaya bwaddi?

¹³ Wone ethu yanabili nnahudherihuvo ni nladdaniho na Pawulo. Oliye onowoga wodhela muladdu athu owinjhiva enniwana peeno: Owinjhiva onowarusa orumedha wi boofuneya mmulogoni. Pawulo ohuleba: ‘‘Nnyalo nahere niwoga wi, ‘woona wi kagili mada, kaginakosa epaddi ya mwili, kahiyo yeyo yamuthukulele ohukosa epaddi ya mwili. Teto nibaru nahere niwoga wi, ‘woona wi kagili mento kaginakosa epaddi ya mwili’, kahiyo yeyo yamuthukulele ohukosa epaddi ya mwili.’’ (1 Cor. 12:15, 16) Pawulo afuna awoge ddi?

¹⁴ Wiliganiha mmulogoni ni athu amodha podi wuthukulela we ohona thima onniwena. Podi wera mmulogoni mwawo ehikalamo addibila enasuziha pama, obe enaapada addibila ni makalelo apama. We podi wubuwelaga wi, miyo kaginande okala ninga aliwa. Wubuwela ndo sapama mwaha wi enowoniha wihina oli owiyeviha ni ohaanona manddile awo. (Fil. 2:3) Mbwenye okale pasope. Mwaha wi wiliganihaga ni ale enna mutholo dhowinjhiva mmulogoni podi wonaga wi kunna thima. Ninga awogile Pawulo we podi wonaga wi kunna thima mmulogoni obe kuli elobwene. Nnagonjhihe ni makalelo baani mubuwelo ola?

15. Ninga anawogela 1 Coríntios 12:4-11, ethu baani nnafunihu onona wodhela gari nivahiwihu?

¹⁵ Kubuwela: Yehova ahavaha makiristawu a nsaka noobajha gari yokosa matikiniho, mbwenye aliwa yakele gari dhohiyana mmodha ni mukwe (Omwileri 1 Coríntios 12:4-11.) Yehova avahile gari ni enonelo yohiyana kadda muthu ni mukwaye, mbwenye oliye owawoona makiristawu atene okala ofuneya. Peeno kannavahiwa gari ya muzimu wotxena. Mbwenye nlagano nna ninna olabave. Kadda muthu ohunona ethu mukwaye  ahinoniliye, mbwenye iyo atene nili ofuneya vamentoni va Yehova.

16. Yolaga baani ya murumiwi Pawulo nnafunihu ohara?

¹⁶ Ohiya wiliganihaga ni addibila amodha, nihare yolaga anivahile Pawulo: ‘Kadda muthu apendde dhowera dhaye mowindo onere woona akala ohukanna dhithu dhofuna omuhagalaliha oliyeene ohiya wiliganihaga ni athu amodha.’ — Gál. 6:4.

17. Mareeliho baani nnakanihuna nahara yolaga ya murumiwi Pawulo?

¹⁷ Nahara yolaga ya murumiwi Pawulo ni napendda dhithu nnerihuna nnere woona wi iyo nihikanna gari, ni enonelo yofuneya. Podi wera namaholela mmodha ammulogoni kananda owoga pamadhene mwaha wa vathaddo. Mbwenye oliye ohunona pama wasuziha athu wihina ekale anamahara a Yesu. Obe podi wera oliye kaniyegeredha ninga anamaholela amodha ammulogoni eniyegeredhiwa. Mbwenye oliye ohunoniwa ninga namakukula apama ni oodhivela, muthu anaddameleya ni anamalaleya amodha wihina emulobe dholaga. Obe oliye ohunoniwa ninga namakela aleddo. (Heb. 13:2, 16) Iyo noonaga enonelo ninnihuna ni dhithu dhinandihu opara nnere woona wi nili athu athima mmulogoni. Teto nnere woona wi iyovano podi okavihera vanlubale mmulogoni. Ohiya eyo kannasililege addibila mwaha okanna gari obe enonelo yohiyana ni iyo.

18. Enanikavihera ddi wapara mabasa olaleya ni makalelo apama?

¹⁸ Mburo buumburo ninnihuna mmulogoni, enohoweleya wilibihedha wihina nunnuwihege enonelo yehu. Yehova ononikavihera oliye onolabihedha nikuru naye wihina anixagihe pamadhene. Motajhiha mutugumano dha vaari va sumana dhinonikavihera wapara mabasa olaleya pamadhene. We onna oparihedha mabasa dhithu onahudheriwe omutugumanoni wula?

19. Ethu baani enukavihere odhowa Eskola yanamalaleya oomwene?

¹⁹ Oxagihiwa wimodha wa thima fuuskola yanamalaleya oomwene. Enadhowa Eskola ela baale enaalaba mabasa a mudhidhi wamutene enna yaka 23 ofiya 65. Mbwenye we podi wubuwelaga wi odhowa Eskola ela ethu yorusa. Ohiya wubuwelaga wi kunande odhowa Eskola ela onona avi wubuwelaga dhithu dhinukavihere odhowa eskola ela? Wamala osayele makalelo owerana dhithu dhinuthukulele odhowa Eskola ela. Wilibihedha wawo nnikavihero na Yehova onere wanda werana ethu ononiwe wi soorusa.

20. Nnahudheravo ddi ni Romanos 12:6-8?

²⁰ Ethu yanatharu nnahudherihuvo ni nladdaniho na murumiwi Pawulo enafwanyeya va Romanos 12:6-8. (Omwileri.) Vala Pawulo onowoga dila yanabili wihina mmulogoni ohukanna gari yohiyana ni mukwaye. Podi dhigalive ndo Pawulo ononikongomedha wi kadda muthu alabihedhe gari si gari anniyena wihina akaviherena mulogo okala woliba.

21-22. Nnahudhera ddi ni yotajhiha ya Robert ni Felice?

²¹ Osugwe yotajhiha ya ddibila anithaniwa Robert. Numala mudhidhene alabaga mabasa oomwene elabo yoweddela, wahifiya mudhidhi oliye othomiwa wihina alabege Beteli ya elabo yaye. Podi aganonile wi karumiwe mwaha werana ethu yabure, Robert anowoga eraga: “Dhahivira mweri dhowinjhivadhene gubuwelaga wi miyo kaginna thima. Malabo mamodha miyo gowubuwela wi givenyewo obeteli.” Oliye agonjhihe ni  makalelo baani mubuwelo ela? Namaholela mulogo mmodha omubusedha Robert wi kadda mabasa Yehova anivahiye mundduli afuna anegeredhe wa mabasa nnaparihu ovanene. Yofuneya wi Robert ahubuwelege dhithu dhipadduwe mundduli, mbwenye ubuwelege mabasa afunegiye wapara mudhidhi yole.

²² Ddibila Felice Episcopo ohufwanyiwa makathamiho mamodhave, oliye ni mwariye yahidhowa ohudhera Eskola yojiliyadi yaka ya 1956 nuumala aliwa othomeliwa olaba elabo yoBoliviya. Vano yaka ya 1964 aliwa okanna mwana. Felice onowoga egi: “Kayali yokweya wahiya mabasa naparesihu. Yahivira yaka yantero giikubanyedhaga. Mbwenye nnikavihero na Yehova miyo ogonjhiha okubanya wule, ni miyo orumedha mutholo waaga wokala Babi.” Ki we ohufwanyiwa makathamiho mamodhave ninga a Robert obe Felice? We woona wi kunapara mabasa oomwene ninga waparesiwe mundduli, onakala ookwerebeyene? Akala makathamiho awo baayene orugunuse mubuwelo wawo, okale jhithi wi werena ele onandiwe wihina omulabele Yehova ni addibilo. Waparege mabasa ni olabihedhe nde onooniwe wihina wakaviherena addibilo ammulogoni. Werana ndo we onere okala ohagalala ni onere olibiha mulogo.

23. Mwahaya bwaddi egahoweleya oveda mudhidhi, ki sumaneyo nnaasuze ddi?

²³ Kadda muthu wa iyo dofuneya vamentoni va Yehova. Oliye anafuna wi iyo nikose epaddi ya emudhaye. Navedaga mudhidhi wopendda makalelo baani nnafunihu wakavihera addibilihu, ni nilibihedhaga omulabela Yehova nnere woona wi nihikanna mburo mmulogoni. Ki owoga dha mburo waathu amodha mmulogoni? Nnonihe addi wi nnovaha thima? Ohudhera wa sumaneyo nnere othapanyedha muselu yoyo wa thima.