Timotiyu agaali namaholela mulogo, murumiwi Pawulo ahimulebela karta eegi: ‘Miyo ginowukongomedha vamentoni va Mulugu, va Yesu Kiristu ni va angero oosakuliwa wihina oharege dhoholela ndha ohumutanyaga newene ohumusakulaga muthu.’ — 1 Tim. 5:21.

Vobajha, nnere woona angero ala baani. Angero ala kinaagiwana a 144 000. Mwaha mudhidhi yole murumiwi Pawulo amulebelaga karta nna Timotiyu, ovenyihiwa wa makiristawu othikitheliwa yanna ejhehedhelo yodhowa odhulu, waali wahinathi obajha. Teto arumiwi ni makiristawu amodha othikitheliwa yaali yahinathi okala angero. Bumwahaya angero ala enasorihiwa va 1 Timotiyu 5:21 kahiyo 144 000. — 1 Kor. 15:50-54; 1 Tes. 4:13-17; 1 Juwa. 3:2.

Ohiya eyo, ‘angero oosakuliwa’ kinaagiwana ale yamurugunuwele Mulugu mudhidhi wa mutokora malabo a Nowe. Mwaha angero ale yasakule okala epaddi ya Saddana, bumwahaya aliwa okala ademoniyu ni amwiddani a Yesu. (Gén. 6:2; Luk. 8:30, 31; 2 Ped. 2:4) Osogolo aliwa enere ofugeliwa mukambura ni Saddana muwari mwa yaka 1 000. Yamala enere otolosiwa vamodha ni Saddana. — Juda. 6; Ovuhu. 20:1-3, 10.

Nimakalelo yaala ‘angero oosakuliwa’ enasorihiwa va 1 Timotiyu 5:21, baale enalaba ni ‘[Yehova] vamodha ni Yesu Kiristu’ odhulu.

Ehikalawo matxikwi ni matxikwi angero oororomeleya. (Ebe. 12:22, 23) Ela enowoniha wi Yehova kanaavaha mutholo mmodhave angero aatene. (Ovuhu. 14:17, 18) Motajhiha, Yehova ahimuruma mungero mmodha wihina aatolose anyakoddo owasiriya owakwana 185 000. (2 Reis 19:35) Angero amodha podi wera ehakela mutholo “wotugumana dhithu dhaatedhene Mumweneni mwa [Yesu] dhinakwakwathusa, naaleya enaalupa malamulo.” (Mat. 13:39-41) Amodhaya podi wera ehikana mutholo “owatugumanya oosakuliwa” enna ejhehedhelo yodhowa odhulu. (Mat. 24:31) Teto angero amodha ehakela mutholo ‘wonibarela mudila mwehu mwatemwene.’ — Sal. 91:11; Mat. 18:10; omuliganihe Matewuji 4:11; Lukaji 22:43.

Enakala ninga angero oosakuliwa enawogiwa va 1 Timotiyu 5:21, baale yarumiwe wihina esamalelege mulogo. Mwaha madhu asorihile murumiwi Pawulo va yolebela ela, enowoniha wi oliye aavaha yolaga anamaholela mulogo wodhela makalelo oosamalela mulogo ni wihina mulogoya wohowela waweddiha anamaholela mulogo ni nriho. Mwebaribarene anamaholela mulogo enohowela osamalela mutholo enniwana yahinna ‘nsakulo newene ehimutanyaga muthu di muthu,’ teto aliwa enohowela werana dhothoma nupwaseya. Ethu enaathukulele anamaholela mulogo ohara yolaga ya murumiwi Pawulo, sowihina dhatedhene eneriwana, enerana vamentoni va ‘Mulugu, va Yesu Kiristu ni va angero oosakuliwa.’ Vano nnowanda wonelamo wihina angero amodha ehikanna mutholo wosamalela mulogo. Teto aliwa enowerana dhithu dhimodha ninga, wabarela adhaari a Mulugu, wasamalela mabasa oolaleya ni omwaddela Yehova dhithu enooniwa. — Mat. 18:10; Ovuhu. 14:6.