Miyo gibaliwe yaka ya 1927 luwani dhaala eng’ono waddamela oXikago, llinoyis elabo yoAmerika. Makolo aaga yaana ahima 5 yithaniwa Jetha, Don, Karl, Joy ni miyo. Aatene iyo nahithoma werana ele nnandihu wihina nimulabele Yehova. Jetha akursarile eskola ya Jiliyadi yaka ya 1943. Vano addibilaga araru yahanle, yadhowile oBeteli ya Brooklyn oNova Yorki wihina yakaviherege. Don ithaniwe oBeteli yaka ya 1944, Karl yaka ya 1947 ni Joy yaka ya 1951. Yotajhiha yewa yapama ni yamakolo aaga, yahigithukulela wawejhedhedha mabasa gamparelimi Yehova.

Makolo aaga yomwileresa Bibiliya ni yomudhivela vanlubale Mulugu. Teto aliwa onihudhiha nihiyoya omudhivelaga Mulugu. Mbwenye apapa nudhowa owaniha koddo yobajha yapele elabo yaatene, nuhogolowa aliwa ohiya oriha gereja. Woona wihina amama yaali ohagalalene mwaha apapa ohogolowela vaade apamene, amama waloba aliwa wihina edhowe wigereja. Mbwenye apapa owoga yeegi: “Miyo ginere odhowa, mbwenye kaginavolowe mwigerejamwa.” Vano amama wakoha yeegi: “Mwahaya bwaddi?” Apapa wakula yeegi: “Ngaali okoddoni gahawona anamaholela agereja yeela yalobelelaga anyakoddo a elabo emodha yawana ni iyo. Gerege Mulugu ahikavihera dhipaddi dhabilidhene?”

Nlabo dhaala amama egaali wigereja, anamoona a Yehova abiili odha vaade. Aliwa wavaha apapa malivuru 2 yanna musolo Light (waara) nawoga wodhela livuru na Ovuhulela. Apapa odhiveliwa ni orumedha. Nuwindo amama nuwona livuru nne aliwa obanjha wileri. Nlabo dhaala aliwa wiwa muselu wawoga wihina anamoona a Yehova yanna wawithana athu wihina yambele omuhudhera Bibiliya nlabihedhiwaga livuru nne nawoga wodhela Ovuhulela. Vano amama othoma odhowawo. Nuufiya mburo wahudheriwa Bibiliya, muhiyana dhaala ofugula mulago. Amama omukoha muhiyana ole yeegi: “Nyu dinahudhiha athu livuru nna?” Muhiyana ole omwakula eegi: “Hee mwanaga podi ovolowa.” Sumana yoharela amama onithukula iyo aatene wi nahudherege. Nuwindo iyo wambela odhowa sumana dhatedhene.

Nlabo dhaala nigatugumane, ddibila anihudhiha ogiloba wihina gimwileri Salmo 144:15 anihina, ale anamwebedha Mulugu boohagalala. Miyo odhiveliwa vanlubale yolebela ele. Teto miyo odhiveliwa yolebela emodha ya 1 Timotiyu 1:11 enihina Yehova ‘Mulugu ohagalala’ ni yolebela ya Efeziyu 5:1 enawoga wi “mmutajhihege Mulugu.” Miyo wonelamo wi ginohowela okala muthu ohagalala mwaha omulabela mpaddusi aaga ni ginohowela omutamalela mwaha ofuru agivahiliye womulabela. Teto ginnana wilibihedha werana eyo egumi yaga yaatene.

 Mulogo waddamenle vaade, waali woXikago walapenle makilometuru 32. Naarive dhigaali ndo, iyo nodhowesa woona mutugumano, mwaha wa yeyo miyo ohudhera dhithu dhowinjhiva. Ginowubuwela nlabo dhaala ddibila eddiha epaddiya omutonya murogolaga Jetha, oliye nuuvaha yowakulayaye, miyo wubuwela, miyo gihinona yowakula eyo, gahanonege gere ovenyiha moono wihina miyo gakule. Nuwindo miyo wambela wiwegeredha wihina givahege dhowakula dhaaga mmutugumanoni. Mbwenye yathimaya, sowihina miyo ni addibilaga nanna olibiha wandana wehu ni Yehova. Mwaha wa yeyo yaka ya 1941 miyo obaddiziwa.

Miyo ginowubuwela pamadhene musonkano wereye elabo yoKelevelandi ohiyo yaka ya 1942. Murudda dhowinjhiva dhokwaranya 50 dha elabo yo Wistadu Unidu yahivuruwana musonkano ola elabihedhaga telefoni. Emudhihu othoma okala vamodha ni addibila waddamela mburo weriwana musonkanoya. Mudhidhi yoole yanna owaniwa koddo yanabili. Teto Anamoona a Yehova yere othabwa oharahariwa. Ni mahiyu addibila yowingnaniha karo dhewa epaddi yoneliwamo wi atimbwini yere odhela epaddi yeyo. Teto yowathoma addibila wihina esugwerege karodha wihina yawoona atimbwini edhaaga erumihe buzina ni yahiddihe maluju a karodha wihina aliwa yahandege woona pama. Mwaha wa yeyo, addibila yere wanda okaviherana mmodha ni mukwaye. Nuwoona ele addibila yeriliwana, miyo wonelamo wi nlogo na Yehova nli nowegeredheyanene wihina yande ogonjhiha ethu-sithu. Mwaha wa yeyo miyo gagonne opwaseyene gahoovaga ethu, teto kavo yanipadduwele.

Nuuvira mwana yaka, miyo opendda wodhela musonkano ole, miyo wonelamo wi amama yaali opwaseyene ni kayoova ethu. Amama yomuroromela Yehova nnikuru naye. Miyo kagidha giddiwala dhithu dhatedhene yerilena amama.

Musonkano ole waddamelaga amama othoma okala piyonera a mudhidhi wamutene. Bumwahaya amama opwasedha ovuruwana mwaha wa ddibila dhaala wawoga wodhela mabasa a mudhidhi wamutene. Vano nihogolowelaga vade amama owoga yeegi: “Miyo goofuna vanlubale odidela okala piyonera, mbwenye kaginande werana eyo mudhidhi mmodhave gisamalelaga nyumba yehu meeka. Nuwindo aliwa onikoha akala iyo nere orumedha wakavihera! Iyo wawakula neegi: “Hee!” Vano aliwa onithoma wihina nixelege mmakwartu mambesi nihinathi omatabixari. Iyo nadhowa oskola, amama yowabiha osugwera kwartu dhatedhene wi yoone akala dhili dhowegeredheyadhene, vano yoona wihina dhili dhowegeredheyadhene, aliwa yodhowa mmabasani oolaleya. Aliwa yothabwa wapara mabasa owinjhiva, teto yonisamalela vanlubale. Naahogolowaga oskola ni dala, nafwanya aliwa egamwegeredhe alimosu enijhehaga. Malabo mamodha nahogolowa oskola, namala walimosari iyo nokuma vamodha naaliwa mmalaleyelo. Eyo yahinikavihera wawonelamo mabasa aapiyonero.

Miyo gambele wapara mabasa opiyonero nganna yaka 16. Naarive apapa yahile Anamoona a Yehova, aliwa yofuna onona makalelo dheedda dhithudha. Nlabo dhaala mahiyu, miyo wawaddela makalelo dhithudha dhageddeliwa, miyo owoga wihina naarive gilibihedhaga vanlubale, kaganda okanna namahudhera a Bibiliya. Nuwindo miyo wakoha apapa, munofuna omuhudhera Bibiliya? Aliwa wubuwela  vang’ono ,nuwindo orumedha omuhudhera Bibiliya. Miyo gahikanna oneti yowawudhiha apapa ninga namahudhera aaga obajha!

Iyo nahudhera livuru “A Verdade Vos Tornará Livres.” Nuuvira mwana mudhidhi, miyo wonelamo wihina apapa yanna ogikavihera wi gikale namahudhiha apama ni odidela omuhudhera Bibiliya. Motajhiha nlabo dhaala nihudheraga aliwa wileri ddima dhaala nuwindo owoga wi yahonelamo yawoga ddima ele, vano aliwa ogikoha yeegi: “We ononne aavi wi dhithu dhinawoga livuru nna sebaribari?” Mbwenye miyo gaali gihinathi wiwegeredha wihina gakule nikoho nne. Bumwahaya miyo owoga gegi: “Ginere wakula nikoho nno ohudhera winaharela.” Nowindo miyo wanda ofwanya yowakulaya, ni gahifwanya dholebela dhawoga wodhela muselu ole. Teto miyo ohudhera osayela ni wiwegeredha pama wihina nihudhere. Werana eyo, yahinikavihera miyo naapapa wunnuwelavo epaddi yomuzimuni. Apapa wambela oparihedha mabasa ndhe yahudheriwa, vano yaka ya 1952 apapa obaddiziwa.

Miyo gihile okala ni makolo aaga ngana yaka 17. Teto murogolaga Jetha a othomiwa ninga misiyonariya, vano ddibilaga Don wambela olaba oBeteli. Aabilene yodhiveliwa vanlubale mutholo dhewa, teto eyo yahigilibiha vanlubale. Bumwahaya miyo othoma oleba petisawu biili emodha yoBeteli emodhaya oJileyadi, vano miyo omuhiya Yehova othoma wafuniye ogilabihedha. Yokumelelavoya sowihina yaka ya 1946 miyo withaniwa wihina gaalabege oBeteli.

Muwari mwa yaka nda 75, gilimi oBeteli gihakela mutholo dhohiyana-hiyana ni gihudhera dhithu dhowinjhiva. Motajhiha gilaba ofabrika yowapida malivuru, okontabilidadi, departamentu yowinviyari ni wakela dhithu. Mbwenye yathimaya enathabwa ogikavihera wunnuwelavo epaddi yomuzimuni, fuwebedha wa mambesi ni mwaha dhimodha dhineriwana oBeteli.

Miyo gihudhera dhithu dhimodha ni ddibilaga amung’onoya anithaniwa Karl, abanjhe olaba oBeteli yaka ya 1947. Oliye aali namahudhera ni namahudhiha a Bibiliya apama. Ginowubuwela nlabo dhaala gamulobilimi nikavihero naye wihina agikavihere wegeredha mwaha waaga wavathaddo. Miyo omwaddela wihina gahisayela dhithu dhowinjhiva gafunimi owoga, mbwenye kaganonne oolabihedha dhithudha gafwanyimi. Mbwenye oliye werana nikoho nagikavihere vanlubale, eegi: “Joel, musolo wa mwaha wawo buuvi?” Miyo wonelamo mutomaya mohilegela. Miyo gohowela olabihedha muselu dhagikavihere otapulela musolo wa mwaha waaga, mbwenye dhithu dhimodha kagahowela olabihedha. Miyo kaginadduwala ele agihudhihile ddibilaga.

 Wihina nikanne ohagalala oBeteli, nnohowela wilibihedha wapara mabasa oolaleya. Teto werana eyo, podi onikavihera ohudhera dhithu dholibiha. Ginowubuwela nlabo dhaala gaalimi ni ddibila dhaala txiguwo. Iyo odhowa omwaredhela muhiyana akala murudda onithaniwa Bronx elabo yo Nova York. Muhiyana ole aharumedha marevista menli Namasugwera ni Mukale mento! Nufiya iyo owoga neegi: “Emahiyu ela ninna wakavihera athu ohudhera dhithu dhapama wodhela Bibiliya.” Vano oliye onaakula eegi: “Akala museluya bwa mBibiliyani podi ovolowa.” Iyo wileri dholebela ni othapanyedha wodhela muselu wa Omwene wa Mulugu ni wa elabo exa. Oliye odhiveliwa vanlubale ofiyedha wawithana amudhaaye wihina ohudhera woharela wa sumaneyo edhe evuruwane. Nuuvira mudhidhi muhiyana ole ni amudhaaye wambela omulabela Yehova nuuroromeleya.

Miyo gahithoma otela, mbwenye ganfwannye murogola oofwanelela nuuvira yaka 10. Muhunona egikavihere onfwanya muhiyana oofwanelela? Waali olobela ni wubuwela “ethu gafunimi werana gamala ootela!”

Nuwoona musonkano yaka ya 1953 wistadiyu Yankee, miyo omunona murogola dhaala ithaniwa Mary Aniol. Murogola ola akursarile eskola ya Jileyadi ni murogolaga Jetha, aliwa yalaba ninga amisiyonariya vamodha. Vano murogola Mary ogaddela nuuhagalala wodhela mabasa omisiyonariya aapariye ni anamahudhera aakaviheriye muwari mwa yakadhene oKaribi. Nuuvira mudhidhi odhivela nannihuna mmodha ni mukwaye wambela wenjhedhedheya. Vano mweri wa Abril yaka ya 1955 iyo otelana. Miyo gahoona dila dhowinjhivadhene wihina Mary aali mukono wa Yehova. Mwaha gahihudhera dhithu dhowinjhiva dhathima nuliye. Oohagalala ni mutholo bu mutholo aakeliye, owilibihedha vanlubale, owapwatha athu amodha, teto oopweha mburo wobajha Omwene wa Mulugu. (Mat. 6:33) Iyo nahilaba ninga anameeddela mulogo muwari mwa yaka, 3 teto yaka ya 1958 withaniwa wihina nalabege oBeteli.

Miyo gihudhera dhithu dhowinjhiva ni mwaadhaga Mary. Motajhiha, numala otela iyo othoma omwileri Bibiliya aatene vamodha. Iyo nileri versu 15 kadda labo. Namala wileri versu ngasi-ngasi, noothapanyedha wi noone makalelo ooparihedha mabasa mwigumi mwehu. Mwaadhaga Mary ogaddela dhithu ahudheriye oJileyadi ni mabasa aye oomisiyonariya. Dhithu gihudherimi ni mwaadhaga, dhihigikavihera owoga pama mwaha dhaaga ni walibiha arogola. — Pro. 25:11.

Mwaadhaga Mary akwile yaka ya 2013. Miyo ginofuna vanlubale omoona mwilaboni exa! Mbwenye gijhehaga mudhidhi oyo ofiya, gili owikomeene wihina gidhowegeve gihudheraga ni Yehova ni omuroromela ni murima waaga wamutene. (Pro. 3:5, 6) Gubuwela dhithu nlogo na Yehova nnafuniwa werana mwilaboni exa enogihagalasa vanlubale. Mwaha mwilaboni exa, iyo nnere ohudhera dhithu dhowinjhiva wodhela Yehova ali namahudhiha munlubale! Kaginna madhu wihina giwoge makalelo ginamutamalelimi Yehova wodhela odhivela wohigifwanelela anagonihiye.