1. Mwahaya bwaddi kale pawu yaali yojha yathima?

 KALE pawu yaali yojha yathabwa ojhiwa kadda labo. (Gén. 14:18; Luk. 4:4) Mwebaribarene pawu yaali yoojha yathima mudhidhi yoole, bumwahaya Bibiliya malabo mamodha, anowalabihedha madhu owi pawu wihina awoge yojha si yojha. (Mat. 6:11; Dho. 20:7) Yesu ahawerana matikiniho owenjhedhedha pawu dila biili mburo dhohiyana-hiyana. Teto eyo enowoniha wi pawu yaali yojha yathima mudhidhi yoole. (Mat. 16:9, 10) Juwawu kapitulu 6, anowaawoga matikiniho Yesu aweriliyena owenjhedhedha pawu. Bumwahaya wahudheraga yopadduwa ela, osayele woona ethu onahudheriwe wihina oparihedhe mabasa mwigumini mwawo.

2. Mudhidhi baani muthithi waathu yahoweliwa yojha?

² Anamahara a Yesu yere ohogolowa mmabasani oolaleya, teto yohowela withuwa. Bumwahaya Yesu wathukulela mburo mmodhaya ni mwanddeya waddamela niya yoGalileya. (Mar. 6:7, 30-32; Luk. 9:10) Aliwa odhowa mburo womaleya, waddamela sidadi yithaniwa Betizayida. Mbwenye muthithi waathu nunona mburo waaliwa, aliwa odhowa wi yagumane ni Yesu. Vano Yesu nuuwawona kisijhedhile ekalaga ninga kawonile athu ale. Ohiya eyo, Yesu wawakela nuudhivela ni wahudhiha dhithu dhowinjhiva wodhela Omwene wa Mulugu ni wavulumusa aredda. Nuwindo vati viribaga, anamahara a Yesu othuwathuwa ni athu ale, yubuwelaga makalelo oofwanya yoojha wihina aathu aatene ejhe. Podi wera mudhidhi yoole, athu amodha yahidhana yojha vang’ono. Mbwenye athu owinjhiva kiyadhilena dhoojha, bumwahaya yohowela oosayela yojha. (Mat. 14:15; Juwa. 6:4, 5) Yesu eere ddi wihina akavihere muthithi ole waathu wi ekanne yoojha?

 MATIKINIHO YESU AWERILIYENA OWENJHEDHEDHA PAWU

3. Ddiniyani Yesu arumiliye anamahara aye werana? (Osugwe fotu yavakapani.)

³ Yesu owoga ni anamahara aye eegi: “Aliwa kinahowela odhowa, nyuwene mwavahe yoojha.” (Mat. 14:16) Mburo ole yahikalavo alobwana owakwana 5 000, teto yahere yakontari ahiyana ni ahima, podi wera yere wakwana 15 000. Mwaha wa yeyo, wajhiha athu aatene yaali mburo yoole kayali ethu yokweya. (Mat. 14:21) Bumwahaya Andire adhe awogege eegi: “Vala ukalavo muzombwe anna pawu tanu dha Sevada ni mwana oba biili. Dhendha baahi dhinere wawakwana athu yaala aatene?” (Juwa. 6:9) Pawu yaSevada, yaali yoojha ya athu oohawa, yajhiwa malabo aamateene. Teto oba ndhe podi wera dhahekiwa mwinnyu wihina dhahivudde. Naarive dhigaali ndo, pawu ni oba anna muzombwe ole kadhakwane wihina muthithi ole waathu ejhe.

4. Nnahudhera ddi ni yolebela ya Juwawu 6:11-13? (Osugwe fotu.)

⁴ Yesu aheddiha muthithi ole waathu nuudhivela. Oliye waloba wihina ekarati mwamakalelo owegeredheya. (Mar. 6:39, 40; mmwileri Juwawu 6:11-13.) Nuwindo, ninga munawogela Bibiliya, Yesu othukula pawu olobela wa Yehova ni werana emodhave ni oba. Mwebaribarene Yesu oohowela omutamalela Yehova, mwaha dhoojha dhatedhene ndhe dhadhela wa Yehova. Yesu ohuhiya yotajhiha yapama aatene iyo nnahowelihu ohara. Malabo aamateene nafunaga oojha, nnohowela olobela wa Yehova nimutamalelaga, naarive akala nili yekihu obe akala nili vaari va athu. Numala olobela, Yesu wagawela yoojha athu aatene ofiyedha aliwa ojha ni orubala. Teto yahihala dhoojha dhowinjhiva, mbwenye Yesu kafuna wi dhoojha ndhe dhirahiliwe. Vano Yesu waloba anamahara aye wihina  eddoddele dhoojha dhahanle wi ejhe mudhidhi mmodhaya. Vala nnohudhera ethu emodhaya yathima, nnahowelihu ohara. Yahala yoojha kannafuna orahila, ohiya eyo nnafuna nlabihedhe ni thotho dhithu ninnihuna. Akala oli baabi, ononamo aavi olabihedha yopadduwa ela wihina wahudhihe anawo thima yolobela yahinathi ojha ethu-sithu, teto we podi wahudhiha ekalelo yokala anamakela aleddo ni onona ovaha ndala ninga Yesu.

5. Muthithi ole waathu yafuna emwerena ddi Yesu, ki ddiniyani oliye eriliyena?

⁵ Mudhidhi yoole, athu aatene yahitikina vanlubale ni dhohudhiha dha Yesu vamodha ni matikiniho aweriyena. Yakadhene mundduli, Moyizeji ahiwoga wihina Mulugu eere omudhiha namavuhulela munlubale. Teto aliwa yahinona wodhela muselu yoola. Bumwahaya aliwa wambela wubuwela yeegi: “Mwebaribareene ola di namavuhulela ajhehiwa odha mwilaboni.” (Deut. 18:15-18) Akala aliwa yubuwela ndo, podi wera yahikanna ebaribari wi Yesu eere okala namathonga apama, mwaha oliye erege wanda ojhiha nlogo naatene. Bumwahaya mohilegela aliwa obajha omusayela Yesu wihina “emuhabihe omwene.” (Juwa. 6:14, 15) Yesu ahere arumedha ohaba omwene, oliye eere wivolosiha ni muselu dha pulitika dha maJudewu ni aRomano. Mbwenye Yesu kaarumedhe wivolosiha mpulitikani newene ohaba omwene. Ninga anawogela Bibiliya, Yesu “ovenyavo odhowa omwangoni.” Naarive Yesu awaddihedhiwaga wivolosiha mpulitikani, oliye kaarumedhile. Ddiniyani nnahudherihu ni ele erilena Yesu?

6. Nnande aavi omutajhiha Yesu? (Osugwe fotu.)

 ⁶ Ebaribari wi peeno kavo ananilobe wi nawerena matikiniho owenjhedhedha pawu obe wavulumusa aredda. Teto kaavo ananiwaddihedhe wi nikale amwene. Mbwenye iyo podi owaddihedhiwa osakula partidu obe okavihera mubuwelo wa athu amodha, enubuwela baani anakale namathonga apama. Mbwenye yopadduwa ya Yesu enonikavihera werana yothoma yapama. Oliye ahikoodda wivolosiha mpulitikani. Teto nlabo dhaala oliye ahifiyedha owoga eegi: “Omwene waaga kahiyo weelabo yela.” (Juwa. 17:14; 18:36) Ninga makiristawu nnafuna nubuwelege ndala ninga Yesu. Bumwahaya iyo nnakavihera baahi Omwene wa Mulugu. Teto nnalaleya ni nnalobela wodhela omwene yoola. (Mat. 6:10) Vano nnere woona ethu emodhaya nnahudherihu ni matikiniho awerilena Yesu owenjhedhedha pawu.

“YOTAPULELA YA PAWU”

7. Ddiniyani Yesu eriliyena, ki anamahara aye yaali aavi? (Juwawu 6:16-20)

⁷ Yesu numala ojhiha muthithi waathu, oliye waloba anamahara aye wihina edhowe oKafarnawu ni mwanddeya, mbwenye Yesu othoma ohala. Nuwindo odhowa yeeka omwangoni. Ni makalelo yaala, oliye ahanda wasukuma athu yafuna omuhabiha omwene. (Mmwileri Juwawu 6:16-20.) Mudhidhi Anamahara ale yabuwaga niya, wambela nipevo ninlubale naatonte otekuma wa niya. Vano Yesu odhowa waaliwa eeddaga vadhulu vamanjhe. Oliye omwithana murumiwi Peduru wihina adhowe waali Yesu eeddaga vadhulu va manjhe. (Mat. 14:22-31) Vano Yesu nuugwela mmwanddeyani nipevo nne omaalawo. Anamahara ale otikina vanlubale ofiyedha owoga yeegi: “Mwebaribarene, nyu muli Mwaana a Mulugu.” a (Mat. 14:33) Sotikiniha onona wi anamahara ale, yawonge wi Yesu mwana Mulugu numoona eeddaga vadhulu va manjhe, ohiya mudhidhi enjhedhedhiye pawu. Kasugwa ethu yootikiniha asorihile Marku. Oliye onowoga eegi: “Aliwa otikina vanlubale, mwaha kayonelemo yotapulela wodhela pawu ndhe, mmurimani mwewa yaali ehinonelemo.” (Mar. 6:50-52) Mwebaribarene, anamahara ale kayanda wonelamo kopolo dhatedhene Yehova anvahiliye Yesu wihina aweregena matikiniho ninga yaale. Nuuvira mwana mudhidhi, Yesu ohogolowela owoga wodhela matikiniho a pawu. Madhu asorihiliye enonihudhiha ethu emodha yathima.

8-9. Mwahaya bwaddi muthithi ole waathu edhe emuharege Yesu oKafarnawu? (Juwawu 6:26, 27)

⁸ Nlabo noharela, muthithi ole waathu ohogolowela mburo ole Yesu aweriyena matikiniho ale a pawu. Mbwenye Yesu ni anamahara aye, kiyaali mburo yoole. Vano athuya ogwela mwanddeya wadhela oTiberiyadi ni odhowa omusayela Yesu oKafarnawu. (Juwa. 6:22-24) Nerege aliwa yamusayele Yesu ni efunelo wovuruwana muthenga wOmwene alaleyesiye? Yowakulaye sowihina, naari! Mwebaribarene aliwa yamusayela, mwaha yanna dala ni yafuna wi Yesu aavahe pawu wi ejhe. Ddiniyani enanithukulela owoga ndo?

⁹ Kasugwa ethu yapadduwe muthithi ole waathu nufiya mburo waali Yesu waddamela oKafarnawu. Yesu wawaddela pamadhene athu ale wihina yamusayela mwaha yafuna etakune pawu. Oliye owoga wihina aliwa “yahitakuna pawu ofiyedha orubala.” Vasogolova, Yesu wawaddela wihina pawu ele yatakuniwa yaali ninga “yojha enuudda.” Nuwindo oliye wakongomedha wi yilibihedhege osayela “yojha enakalawo malabo aamateene.” (Mmwileri Juwawu 6:26, 27.) Yesu owoga wihina yojha ele enakalawo malabo aamateene yavahiwe ni Baabe Yehova. Kubuwela makalelo athu aatene yaaliwa ootikineene, Yesu nuwoga wihina yahikalawo yojha yakavihere okalawo malabo aamateene! Yesu aagana yojha baani, ki aliwa yafwanye wuuvi yojha eyo?

10. Wihina athu ale yakele “egumi yohimala” yahowela yere ddi?

¹⁰ Enakala ninga maJudewu ale yahonelamo  wihina yeegi yakele yojha ele, yohowela werana ethu-sithu. Podi wera aliwa yawubuwela mabasa nlamulo na Moyizeji naalobiwa wihina yeregena. Mbwenye Yesu wawaddela wodhela mabasa awagiyena eegi: “Ala bimabasa a Mulugu: mmuroromele Mulugu yole agirumile.” (Juwa. 6:28, 29) Ela kiyaali dila yobajha Yesu awogiliye naaliwa wi yeegi “ekanne egumi yohimala” yohowela omuroromela ole Mulugu amurumiliye. (Juwa. 3:16-18, 36) Teto va Juwawu 17:3, Yesu ahihogolowela owoga wodhela ethu yahoweliwa werana wi yakele egumi yohimala.

11. Ethu baani enoniha wihina maJudewu yasayela yojha yomwilini baahi? (Salmo 78:24, 25)

¹¹ Ddiniyani athu ale yahoweliwa werana wihina yakele egumi yohimala? Majudewu ale kiyamuroromela Yesu, aliwa yahifiyedha omukoha Yesu yeegi: “Nabwiya yintelelo baani munafuninyu werana wihina iyo noone ni nurumedheni?” (Juwa. 6:30) Nuwindo aliwa owoga wihina mudhidhi wa Moyizeji, amwaana Ezarayeli yahaawakela motikiniha yojha yithaniwa mana yaali ninga pawu yajhiwa malabo maatene. (Nee. 9:15; mmwileri Salmo 78:24, 25.) Eyo enowoniha wihina aliwa yasayela yojha yomwilini baahi. Bumwahaya Yesu nuwoga wodhela “pawu yeebaribari enadhela odhulu,” yaavahe egumi yohimala, teto yaali yohiyana ni mana, aliwa newene kiyasayenle omukoha yotapulelaya. (Juwa. 6:32) Aliwa yahithabwa othuwathuwela yojha yomwilini, ofiyedha ohonelamo ebaribari yathima Yesu ahudhihiye. Nnahudhera ddi?

DDINIYANI ENAHOWELA OKALA YATHIMA MWIGUMINI MWEHU?

12. Mowiwanana ni dhohudhiha dha Yesu, ddiniyani nnahowelihu opweha mburo wobajha mwigumini mwehu?

¹² Ethu yathima nnahudherihu va Juwawu kapitulu 6, sowihina nnohowela othuwathuwela dhithu dhomuzimuni mwigumini mwehu. Yesu nuwehiwa ni Saddana, oliye ahiwoga thima yopweha dhithu dhomuzimuni mburo wobajha mwigumini mwehu. Mudhidhi yoole, Yesu wooniha wihina omwiwelela Yehova sathima opitha dhithu dhomwilini. (Mat. 4:3, 4) Awogaga mwaha waye wavamwangoni, Yesu owoga wihina nnohowela okanna wandana wooliba ni Yehova. (Mat. 5:3) Bumwahaya nnohowela wikoha: Makalelo gineddihimi egumi yaaga, enowoniha wihina ginathuwathuwela olibiha wandana ginnimina ni Yehova obe ginathuwathuwela dhofuna dhaaga dhomwilini?’

13. a) Mwahaya bwaddi kahiyo ethu yabure odhiveliwa oojha? b) Yoxagiha baani murumiwi Pawulo anihiyedhiliye? (1 Korintiyu 10:6, 7, 11)

¹³ Kahiyo yabure olobela nilobaga dhithu nnahowelihu kadda labo, newene ohagalala ni dhithu ninnihuna. (Luk. 11:3) Bibiliya anowoga wihina sapama ‘ojha, ong’wa ni wajhavo mabasa onapariwe,’ teto anowoga wihina dhatedhene ndha ‘dhinadhela wa Mulugu eebaribari.’ (Ecl. 2:24; 8:15; Tiya. 1:17) Mbwenye nnohowela okala pasope wihina dhithu dhomwilini dhinanivolowele ofiyedha okala dhathima mwigumini wehu. Iyo podi ohudhera ni ele murumiwi Pawulo alebenliye makiristawu ooKorintiyu. Oliye ahiwoga dhithu dhapadduwele amwaana Ezarayeli ni dhithu dhapaddunwe mudhidhi egaali waddamela mwango Sinayi. Nuwindo oliye wawaddela makiristawu aatene wihina “nihifunege werana dhithu dhabure, ninga [amwaana Ezarayeli.]” (Mmwileri 1 Korintiyu 10:6, 7, 11.) Yehova ahawerana matikiniho wihina aavahe amwaana Ezarayeli yojha, mbwenye mwaha aliwa ovaha thima dhoojha, eyo watotela makathamiho.” (Núm. 11:4-6, 31-34) Ohiya eyo, aliwa nuuthoma webedha ekwamuthu, yanna wooniha wihina yavaha thima dhoojha, dhong’wa ni dharedhelo, ohiya omwiwelela Yehova. (Êxo. 32:4-6) Murumiwi Pawulo olabihedha yopadduwa yamwaana Ezarayeli wihina awaddele makiristawu yakalawo mudhidhi Jeruzale aliye neena nugujhuliwa. Peeno iyo nnakalawo waddamela  omakuthulo wa dhithu ndha dhabure. Bumwahaya, nnohowela opwasedha ovuruwana yolaga awogile murumiwi Pawulo ni oherana dhithu dhabure yerilena amwaana Ezarayeli.

14. Bibiliya anawoga ddi wodhela dhoojha nnakanihu, mwilaboni exa?

¹⁴ Yesu nuhudhiha makalelo oolobela eegi: “munivahe yoojha ya labo na peeno,” oliye ahiwoga wihina nilobelege nilobaga wi efunelo ya Mulugu yereye “elabo yavati, ni odhulu.” (Mat. 6:9-11) Onowanda wonelamo makalelo enakale elabo, nlobelo nna nnakuliwa? Bibiliya anihina efunelo ya Yehova wodhela elabo sowihina wikale mbwabwadda ni mbwabwadda wa dhoojha. Isaías 25:6-8 anowoniha wihina athu enerege ojha ‘festa dhilivo dhoojha dhohiyana-hiyana dhodhiva.’ Teto Salmo 72:16 anopaganya eegi: “Velaboni yavati kaavo anaahowelege yojha. Dhoojha dhinere odelebuwa veelaboni ya vati.’ We kunahagalala wubuwelaga, olabihedha dhoojha ndha wihina opiye ethu-sithu onniwena munukwela woojha, obe opiya yojha wahinajhegiwe? Teto kudduwale wi onerege ojha dhithu onadhaliwe. (Isa. 65:21, 22) Mwebaribarene athu aatene enere wajhavo mareeliho ala.

15. Athu enaavenyihiwe muukwani enahudhere ddi? (Juwawu 6:35)

¹⁵ Omwileri Juwawu 6:35. Kabiha wubuwela muthithi ole waathu yajhele pawu ni oba Yesu enjhedhedhiye mwamakalelo otikiniha. Mudhidhi yoole aliwa kiyamuroromela Yesu. Naarive dhigaali ndo, podi wera aliwa enere ovenyihiwa muukwani ni onere wanona amodhaya. (Juwa. 5:28, 29) Teto athu yaala enere okana ofuru wohudhera yotapulela ya pawu Yesu asorihiliye eegi: “Miyo gili pawu, yegumi muthu yole anadha wa miyo kanadha akanna dala.” Aliwa enere ohowela ororomela mukutho wa yowobola erilena Yesu ni okanna nroromelo wi Yesu anikwenle iyo aatene. Mudhidhi oyo wafiye, winere okala porogarama owahudhiha athu aatene enavenyihiwege muukwani ni ale enaabaliwege mwilaboni exa. Onakale mudhidhi wohagalasa vanlubale wakavihera athu ohudhera dhithu dhotikiniha wodhela Yehova ni efunelo yaye. Wakavihera athu ni makalelo yaala, enakale ethu yohagalasa opitha yojha yomwilini. mwebaribarene dhithu dhomuzimuni dhinakale dhathima opitha ethu-sithu.

16. Ohudhera winaharela nnahudhere ddi?

¹⁶ Ohudhera wula, noonili dhithu vang’ono dhinafwanyeya va Juwawu kapitulu 6. Mbwenye Yesu ahikanna dhithu dhowinjhiva wihina anihudhihe wodhela “egumi yohimala.” Mwebaribarene maJudewu yohowela opwasedha nde awoga Yesu. Mbwenye vano dihiyo anahowela opwasedha dhithu ndha. Bumwahaya ohudhera winaharela, nnere opwasedha osanyiha yolebela ela ya Juwawu kapitulu 6.