OHUDHERA 51
JHIBO 3 Murenddele, kopolo dhinadha wa nyu Yehova
Yehova onowiwa wunla wawo ni onowuthuwathuwela vanlubale
‘Kamwerena, mpwehe mitori dhaaga muthumbani mweenyu. Kadhilebiwe mulivuruni mweenyu?’ — SAL. 56:8.
DHITHU NNAAHUDHERIHU
Muwari mwa ohudhera wula, nnere wubusedhiwa wihina Yehova onowoona nakala owukuwene ni anere onivaha ele nnahowelihu wihina nikanne murenddele.
1-2. Dhithu baani dhinanithukulela wunla?
IYO aatene nnowabihaga wunla. Malabo mamodha nnomoriha mitori mwaha wa ohagalala. Motajhiha, iyo podi omoriha mitori mwaha opadduwa ethu yohagalasa ninga obaliwa wa mwana, obe mwaha wubuwela ethu yapama enipadduwenle mwigumini mwehu, obe mwaha omoona mukwihu nnathabwihu omudhivela obe nimanlihu mudhidhi wowinjhiva nihimoonile.
2 Mbwenye malabo owinjhiva, iyo nnunla mwaha okala owukuwene obe mwaha wa goyi nnoonihu. Motajhiha, iyo podi wunla mwaha wereliwa ethu yabure, mwaha wa oredda, obe mwaha omuyelela muthu nnamudhivelihu muukwani. Malabo mamodha iyo podi wiwoonaga ninga Jeremiya. Mudhidhi aBabiloniyu nugujhula luwani yoJeruzale, oliye owoga eegi: “Ginakala wunlave . . . Mento aaga kinamaala omothiha mitori.” — Lam. 3:48, 49.
3. Yehova anakala aavi awonaga adhaari aye yonaga goyi? (Isaías 63:9)
3 Yehova ohunona pamadhene dila gaasi nnulihu mwaha wa makathamiho enanipinyaminya. Bibiliya anowoga wihina Yehova onowawona makathamiho maatene enaafwanya adhaari aye ni onowavuruwana yamulobaga nikavihero naye. (Sal. 34:15) Mbwenye ohiya Yehova wavuruwanave ni wawoona makathamiho enaafwanya adhaari aye, oliye onowerana ethu emodhaya. Oliye di Baabihu ni ononidhivela vanlubale. Bumwahaya oliye aanoonaga iyo nunlaga, onowukuwa ni ononikavihera mowaguva.— Mmwileri Isaías 63:9.
4. Dhopadduwa baani dha mBibiliyani nnafunihu woona, ki ddiniyani nnafunihu ohudhera wodhela Yehova?
4 MBibiliyani, Yehova onowoga makalelo aaliye nuwawoona adhaari aye akale yulaga mwaha wa makathamiho. Motajhiha, iyo podi onona makalelo Yehova aaliye, nahudheraga ele yampadduwele Ana, Davidi ni mwene Ezekiya. Nnere ohudhera mwaha bwaddi aliwa edhe yunlege? Nimakalelo baani Yehova aakaviheriye? Ni nnere woona makalelo Yehova ananitodoliye nakala owukuwene, nereliwa ethu yabure obe noonaga wihina kaninna makalelo.
WUUKUWA
5. Makathamiho baani yanfwanya Ana, ki aali aavi?
5 Ana ahifwanyiwa makathamiho ohiyana-hiyana yamuthukulela wunla. Ethu yobajha yamuthukulela wukuuwa yaali ovalanyiwa, teto mwanamayaye ithaniwa Penina, omwidda vanlubale. Teto yothabwaya, Ana kaabaala, mbwenye Penina oobaala. (1 Sam. 1:1, 2) Ohiya eyo, mudhidhi wamutene Penina akala omuteyave Ana mwaha ohubaala. Ahakale we, weere ddi? Ana ahukuuwa vanlubale, ‘akala wunlave [teto] kaajha.’ Ohiya eyo, murima waye ‘wahithabwa wukuuwa.’ — 1 Sam. 1:6, 7, 10.
6. Ddiniyani yamutodonle Ana?
6 Ddiniyani yamutodole Ana? Yaali odhowa otabernakulu waali mburo webedhiwa Yehova. Nuufiya otabernakulu, Ana ‘obajha olobela wa Yehova unlaga mohihiyedhedha.’ Teto oliye omuloba Yehova wihina ‘asugwe osegedheya waye ni ahimudduwale.’ (1 Sam. 1:10b, 11) Ana onfugulela murima waye Yehova ni nlobelo. Vano Yehova nuwoona mitori dhaye, wukuuwa. Mwebaribarene Yehova ahimutodola Ana!
7. Ana aali aavi numala olobela anfugulelaga murima waye Yehova?
7 Ana onfugulela murima waye Yehova ni nlobelo, nuwindo namakutha munlubale Eli ompaganya wihina Yehova eere wiwa nlobelo naye. Ana aali aavi numala olobela? Bibiliya anihina: ‘Oliye omaruwa odhowaga ni wambela ojha, wukuuwa wule omala.’ (1 Sam. 1:17, 18) Ebaribari wi makathamiho yafwanya Ana yaali yahinathi omala, mbwenye vano kathabwa wukuuwa. Ana ahimuroromela Yehova, bumwahaya adhe aahiyege makathamiho aamateene mmadani mwaaye. Yehova ahawona makathamiho yanfwanya Ana ni ahiiwa wunla waye. Mwaha wa yeyo, omureeliha wodhela onvaha ahima.— 1 Sam. 1:19, 20; 2:21.
8-9. Mowiwanana ni Eberewu 10:24, 25, mwahaya bwaddi nigahowela wilibihedha odhowa omutugumanoni naarive nigaali owukuwene? (Osugwe fotu.)
8 Nnahudhera ddi? We onna wawanana makathamiho enurusa wavilelana ni enuthukulela wunla? Podi wera oli owukuwene mwaha omuyelela muukwani mukwawo obe mmudhaawo onamudhiveliwe. Mudhidhi ninga yoyo, podi wera ethu onafuniwe fuukala weeka. Mbwenye ndala ninga Ana aatodoliwe mwaha odhowa otabernakulu, niweya podi otodoliwa mwaha odhowa omutugumanoni, naarive ogaali oogomene, owukuwene obe wihina efunelo yodhowawo. (Mmwileri Eberewu 10:24, 25.) Nakala omutugumanoni nnowiwa dholebela dhohiyana-hiyana, dhinanikavihera wubuwela dhithu dhinanilibiha ni dhinanihagalasa. Nimakalelo yaala, Yehova ononikavihera wi nihubuwelege dhithu dhabure dhinanukula. Ndala nnowanda osugwera dhithu dhinanukula ni okanna murenddele, naarive makathamihoya yahimanle.
9 Mmutugumanoni, iyo nnokala ni addibilihu enandhivela vanlubale, enanitodola ni enanihagalasa. Iyo nnohagalala nakala vamodha naliwa. (1 Tes. 5:11, 14) Kasugwa yotajhiha ya piyonero dhaala amuyelele mwadhiye muukwani. Oliye ohuwoga eegi: “Malabo mamodha miyo ginohowela okala meeka mwaha kaginamaala wunla. Miyo ginokanna munukwela ninga gimoone mwaadhaga. Mbwenye gadhowa omutugumanoni ginohagalala vanlubale. Madhu oolibiha enawoga addibila ni arogola ni dhowakula enavahiwa mmutugumanoni, dhinogitodola vanlubale. Naarive ngaali othuwathuwene, gadhowa omutugumanoni ginowadduwala makathamiho aaga.” Nakala omutugumanoni, Yehova podi walabihedha addibila ni arogola wihina anikavihere.
Iyo podi opwaaseya mwaha wavuruwana madhu oolibiha addibila ni arogola (Osugwe ddima 8-9)
10. Nnaamutajhihe aavi Ana nakala owukuwene?
10 Ana nuulobela wa Yehova amwaddelaga dhithu dhatedhene dhampadduwela, Yehova amotodola. Nimakalelo mamodhave, ‘nivokedhe Mulugu dhosimwela dhehu’ ni nroromele wi anere onivuruwana. (1 Ped. 5:7) Murogola dhaala ali maamukwele mwaha mamune opiwa ni ambava, anowoga eegi: “Gahithabwa wukuuwa ofiyedha wubuwela wi kagahogolowele okanna murenddele. Mbwenye galobela wa baabi aaga Yehova anathabwa ogidhivela vanlubale, miyo gokanna murenddele. Malabo mamodha yogirusa owaga owoga mwamakalelo owoneleyamo ele yagipadduwela. Naarive dhigaali ndo, Yehova owonelamo dhagipadduwela. Mudhidhi gubuwelimi wi kaganna manera, miyo golobela gimulobaga Yehova wihina agivahe murenddele. Gerana ndo, gokanna murenddele ni kopolo.” Wanfugulela murima wawo Yehova ni wamwaddela dhithu dhatedhene dhinuwukula, oliye anowoona wukuuwa wawo ni anowonelamo pamadhene makalelo oliwe. Naarive makathamihoya yahimanle, Yehova podi okurumusa murima wawo ni wukavihera okanna murenddele. (Sal. 94:19; Fil. 4:6, 7) Yehova anowoona wilibihedha wawo wodhela odidela okala oororomeleya ni anere wureeliha mwaha wa dhithu dhatedhene oneriwena. — Ebe. 11:6.
NERELIWA ETHU YABURE
11. Davidi aali aavi nuweddihiwa mwamakalelo abure?
11 Davidi ahifwanyiwa makathamiho oorusa yamuthukulela wunla mwigumi mwaaye. Oliye oowawanana makathamiho yamutotala athu amodha ni ahifiyedha orugunuweliwa ni akwaye aaroromeliye. (1 Sam. 19:10, 11; 2 Sam. 15:10-14, 30) Davidi ahifiyedha owoga egi: ‘Gihigoma mwaha wa makathamiho, emahiyu yaatene kamaaga enoonyetha mwaha wa mitori, ginowunla ofiyedha onyethiha ni mitori mburo ginagonimi.’ Mwahaya bwaddi Davidi adhe uukuwege ndala? Oliye onowoga eegi: ‘Mwaha wa athu yaale enagoniha goyi.’ (Sal. 6:6, 7) Athu owinjhiva yahimwerela Davidi dhithu dhabure. Eyo yahimpiha mbani Davidi ofiyedha ohandaga omaala wunla.
12. Mowiwanana ni Salmo 56:8, Davidi anna ebaribari baani wodhela Yehova?
12 Naarive Davidi afwanyiwaga makathamiho oohiyana-hiyana, oliye kaanganyedha wihina Yehova Mulugu oomudhivela. Oliye ohuleba eegi: ‘Yehova aneere ovuruwana wunla waaga.’ (Sal. 6:8) Mudhidhi mmodhaya Davidi ahaleba madhu ooriya enafwanyeya va Salmo 56:8. (Mmwileri.) Dhithu Davidi asorihiliye va yolebela ela dhinodahinya murima, mwaha dhinowoniha makalelo Yehova ananidhiveliye ni ananithuwathuweliye. Wa Davidi yakala ninga Yehova anakoya mitori dhaye muthumbani obe analeba mulivuruni mudhidhi wamuteene unliye. Davidi ahikanna ebaribari wihina Yehova owoona goyi yaye ni ompwatha vanlubale. Teto ahinona wihina Baabi aye oodhivela Yehova, owonelamo dhithu dhatedhene dhampadduwela ni makalelo aaliye.
13. Athu amodha yanerela ethu nahinajhehedhihu, ethu baani nihinahowelihu odduwala? (Osugwe fotu.)
13 Nnahudhera ddi? We oli owuukuweene mwaha muthu wamuroromeliwe ohuwerela ethu wahajhehedhiwe? Podi weera ohuukuwa mwaha omwenddi wawo obe matelo awo omala mwamakalelo wahajhehedhiwe obe muthu wamudhiveliwe uhiya omulabela Yehova. Ddibila dhaala mwadhiye akumile mba, anowoga eegi: “Kagarumedha dhithu ndhe dhagipadduwela. Miyo gaali owukuwene, oonyanyuweene, teto gubuwela wihina giherana ethu yabure.” Akala we uheddihiwa mwamakalelo abure obe muthu wamudhiveliwe ohurugunuwela, kudduwale wi Yehova kanadha unyanyala. Ddibila ole mwadhiye akumihiwe mba, onowogave eegi: “Miyo wonelamo wi athu amodha podi okala ohiroromeleya, mbwenye Yehova dororomeleya, mwaha oliye nikungu nothawelawo. Naarive dhinipadduwelaga dhithu dhohiyana-hiyana Yehova kanadha aninyanyala. Teto Yehova kanasukuma ale eli oororomeleya wa oliye.” (Sal. 37:28) Ohiya eyo kudduwale wihina odhivela Yehova anniyena ni we, munlubale opitha odhivela wa muthu di muthu. Naarive egaali ethu yopiha mbani, ninga mamunihu obe mwadhihu okuma mba, obe akala were weddihiwa mwamakalelo abure, kudduwale wihina Yehova di mmodhave. Oliye anowuthuwathuwela vanlubale, teto we oli athima vamentoni vaye. (Rom. 8:38, 39) Ethu nnahudherihu sowihina: Naarive athu amodha yoweddihaga mwamakalelo abure, Baabi awo oodhivela Yehova, anowuudhivela vanlubale.
Livuru na Salmos nnonipaganya wi Yehova kali wolapela ni ale eli ookwerebeyene (Osugwe ddima 13-14)
14. Salmo 34:18 ananipaganya ddi?
14 Weddihiwaga mwamakalelo abure we podi otodoliwa mwaha wawileri madhu oriya a Davidi enafwanyeya va Salmo 34:18. (Mmwileri.) Niwogaga wodhela Salmo ola, livuru dhaala nnowoga wihina ale eli ‘ookwerebeyene’ podi wagiwagana “athu yahinna ejhehedhelo yapama wodhela osogolo.” Ki Yehova anere ddi wihina akavihere athu eneddihiwa mwamakalelo abure? Ndala ninga baabi anamukubarela mwanaye wihina amutodole mudhidhi wa makathamiho, Yehova aali ‘vokwivelavene’ ni ale eli ookwerebeyene. Oliye anoneeddela thagaraga ni ononikavihera nakala owukuwene mwaha wokwerebeya, nereliwa obure obe nayelela ethu-sithu. Yehova anofuna vanlubale onitodola ni onikurumusa nakala othuwathuwene obe nereliwa ethu yabure. Teto oliye onopaganya onivaha dhithu dhapama nnajhehihu wakela osogolo ni dhinanikavihera wavilelana makathamiho enanifwanya peeno. — Isa. 65:17.
OHUKANNA EJHEHEDHELO
15. Ethu baani yamuthukulele mwene Ezekiya wunla?
15 Mwene Ezekiya ooJuda aganna yaka 39, oliye onona wi ahikanna oredda wahanna murombwe. Vano Yehova omuruma namavuhulela Izayiya wihina amwaddele mwene Ezekiya wi eere ookwa mwaha wa oredda anniyena. (2 Reis 20:1) Mwaha wa oredda anna mwene Ezekiya, oliye iwoona ninga kanna ejhehedhelo yoovulumuwa. Oliye nuwiwa muselu ole awogile namavuhulela Izayiya, obajha wunla vanlubale. Nuwindo mwene Ezekiya olobela wa Yehova nuviheya. — 2 Reis 20:2, 3.
16. Yehova akunle aavi nlobelo na mwene Ezekiya?
16 Vano Yehova numoona mwene Ezekiya alobelaga mwaha wa oredda ole, Yehova omweddela thagaraga ni owoga eegi: ‘Gihiwa nlobelo nawo ni gihoona mitori dhawo. Bumwahaya ginere wuvulumusa.’ Yehova omweddela thagaraga mwene Ezekiya ni ompaganya amulabihedhaga namavuhulela Izayiya, wihina eere omwenjhedhedha mwana yaka ngasi-ngasi ni eere omoobola Jeruzale mmadani mwakudda Asiriyu. — 2 Reis 20:4-6.
17. Nafwanyiwa oredda nnonihu wi kannavulumuwe, nnonihe aavi wi nnomuroromela Yehova? (Salmo 41:3) (Osugwe fotu.)
17 Nnahudhera ddi? We onna owanana oredda ononiwe wi kunadha ovulumuwa? Akala oni hee! Olobele wa Yehova naarive wunlaga ni ohandaga owoga ethu-sithu. Bibiliya ononipaganya wi “Baabi a thagaraga ni Mulugu ootodola watewene” anere onitodola mmakathamihoni mwehu mwatemwene. (2 Kor. 1:3, 4) Ebaribari wi peeno Yehova kanaamarihe makathamiho maatene enanifwanya. Mbwenye iyo podi omwaddela dhithu dhaatedhene dhinanipadduwela wihina anikavihere ni anitodole. (Mmwileri Salmo 41:3.) Yehova onolabihedha muzimu waye wotxena wihina anivahe kopolo, thotho ni murenddele wi nande wawanana makathamiho oohiyana-iyana. (Pro. 18:14; Fil. 4:13) Makalelo mamodha Yehova ananilibihiye fudheela ejhehedhelo enafwanyeya mBibiliyani enawoga wi mohulegela anere omariha dhiredda dhatedhene ni kaawo anaabulelege. — Isa. 33:24.
Yehova anere wawakula malobelo ehu wodhela onivaha kopolo, thotho ni murenddele webaribari (Osugwe ddima 17)
18. Ehikalawo yolebela enukurumusa wafwanyiwaga makathamiho? (Osugwe kwaduru enna musolo “ Madhu a Yehova enakurumusa murima wehu.”)
18 Ezekiya ahitodoliwa ni madhu a Yehova. Nihiyoya podi otodoliwa namwilerigi Bibiliya. Yehova ohenya wihina mBibiliyani mwilebiwe madhu enanikurumusa ni enanihagalasa naafwanyiwaga makathamiho. (Rom. 15:4) Kasugwa yopadduwa dhaala ya murogola anakala elabo yowAfirika akalesa wunlave nuunona wi ahikanna oredda wa Kanser. Oliye anowoga eegi: “Yolebela yagitodola yaali ya Izayiya 26:3. Mwebaribarene iyo kannanda osugwera makathamiho maatene enanifwanya. Mbwenye yolebela ela enogubusedha wi Yehova podi ogivaha murenddele webaribari onaagikavihere wawanana makathamiho enagifwanya.” Ki we? Ehikalawo yolebela enukurumusa wafwanyiwaga makathamiho enakala ninga kinadha emala?
19. Mareeliho baani nnafunihu wawakela osogolo?
19 Iyo nnakalawo mudhidhi wothabwa orusa, eli malabo okuthula. Mwaha wa yeyo, nnerege ofwanyiwa makathamiho othabwa orusa enanthukulelege wunla. Mbwenye ninga nonilihu ni yopadduwa ya Ana, Davidi ni mwene Ezekiya, Yehova anowoona mitori dhehu dhatedhene ni anowukuwa anonaga nunlaga. Mitori dhehu sathima vamentoni va Yehova mwaha dhinowoniha wi nnomuroromela, naarive nifwanyiwaga makathamiho. Bumwahaya wafwanyiwaga makathamiho, olobele wa Yehova onfugulelaga murima wawo, ojhege mudhidhi naaddibila ni arogola, omwilerigi Bibiliya wihina otodoliwe ni wafwanye madhu okurumusa a Yehova. Teto okanne ebaribari wihina wadidela ovilela ni omuroromela Yehova, oliye anere wureeliha. Teto mareeliho anafuna wuvaha Yehova onovolowelavo mpaganyo anafuna wakwanela mohilegela. Ohiya eyo, Yehova anere ofufutha mitori dhaatedhene dhinadha mwaha wa goyi. (Ovuhu. 21:4) Mudhidhi oyo wafiya, nnere wunla, mbwenye kinakale mwaha wa makathamiho, enakale mwaha wohagalala.
JHIBO 4 ‘Yehova dinamakukula’
