Miyo gibaliwe yaka ya 1954, luwani ya Saint Paul, Minnesota, elabo yo Estados Unidos. Miyo ni emudhaga nili a katolika nili ahima atanu mbwenye miyo gili mwana anabili. Miyo gisuzale eskola enlubale yaakatolika ni gahikanna mutholo. Nari dhigarive ndo, kagamunonne pamadhene Bibliya. Miyo gahinona wi Mulugu ohukalawo, ni di mpaddusi a dhithu dhatedhene, teto kaganna nroromelo ni gereja.

Yaka yoroma ngali o fakuldadi gisuzaga okala adivogadu, Mulobwana ni mwariye Anamona a Yehova ofiya vaade. Woona kaganna mudhidhi mwaha gafula guwo dhaaga, miyo waloba wi ehogolowe mudhidhi mmodha, aliwa orumedha ni mukalelo apama. Anamatelana ale nuhogolowa, miyo wakoha: “Mwahaya bwaddi athu apama dhewa dhihaweddelaga pama?” ni “Enahoweleya ddi wi nikale ohagalala?”. Miyo orumedha livuru A Verdade Que Conduz à Vida Eterna ni Bibliya Tradução do Novo Mundo das Escrituras Sagradas, anna kapa a mataba. Vadhuluva miyo orumedha omuhudhera Bibliya. Mwebaribarene eyo yahifugula mento aaga. Miyo ohagalala mwaha onona wi, Omwene wa Mulugu bunamarihe makathamiho atene aathu. Miyo woona wi  yaka dhatene onamathonga waathu olabiliwa kutxovile, gahona wi onamathonga ola wahisaddula elabo okala mburo wa goyi ovoreyiwa ohogowa ni ngovi.

Miyo giperekile egumaaga wa Yehova yaka ya 1982 ni gibaddiziwe mweri dhoharela va musonkano wa malabo mararu “A verdade do Reino”, wereye mburo onithaniwa Centro Cívico de Saint Paul. Sumana yoharela miyo owelela Centro Cívico wi galebe exami wihina gikale adivogadu. Omambelelo wa mweri wa Outubro

miyo wiwa wi gahipasari exami ele galebilimi, vano gaalabege ninga adivogadu.

Va musonkano gibaddiziwimi “A verdade do Reino”, gahifiyedha omunona Mike Richardson. Oliye alabesa o Beteli yo Brooklyn ni ogaddela wi ere wiita kanblinya yokavihera owoga muladdu o Sede mundial. Miyo wawubuwela madhu anamalaba ovuwa owetiyopiya eli va Atos 8:36 vano miyo wikoha: ‘Enagihalela ddi wi gilabe kambilinya yowoga muladdu?’ Vano, miyo oleba petisawu ovahedha oBeteli.

Apapa ni amama kiyadhiveliwe miyo okala Namona a Yehova. A papa ogikoha akala olaba o Tore de Vigia were odhana mareeliho wodhela mabasa aaga ohadivogadu. Miyo wawaddela wi mabasa aaga yaali mabasa ookavihera. Ni gerege ovahiwa korowa dhowakwana 4 650 Mt vamwerini, yaali korowa yakaviheriwana aBetelita

Gigamarihe wapara mabasa aaga gathomeliwimi, miyo wambela olaba oBeteli yo Brooklyn, Nova York,yaka ya 1984. Miyo othomeliwa olaba kambilinya yokavihera owoga muladdu. Dhithu gahudherimi omabasani waaga, dhahigegeredha wa ndhe dhaadhe osogolo.

Nyumba yo Stanley mwasasanyiwa teyaturu, eli o Jersey City, Nova Jersey, eguliwe yaka ya 1983 mweri wa novemburu. Addibila yahiloba wi ewomihedhe epaddi ya maluju ni epaddi ya manjhe. Addibila egagumane ni anamathonga a murudda, aliwa yahawaddela wi yafuna elabihedhe nyumba ele ya Stanley okala mburo wa mutugumano wa Anamona a Yehova. Mbwenye eyo yahitota muladdu. Munlamuloni na murudda ya luwani, perediyu anyagereja enatugumaniwamo dhasasanyiwa murudda winakaliwa. Mbwenye perediyu ya Stanley yaali murudda winakosiwa malondda. Mwaha wa yeyo anamathonga ale okoodda ele yalobile addila.

Addibila ale okalela ntidi wihina ependde pama muselu ole, mbwenye aliwa newene kiyafunile. Sumana yaaga yoroma olaba oBeteli, addibila  odhowa osuma o tiribunale enlubale. Woona wi gahamariha mabasa aaga o adivogadu a yaka bili o tiribunale enlubale yo Saint Paul, Minnesota, gahinona pama muladdu ninga yole. Adivogadu ehu mmodha oliye owoga wi nyumba ya Stanley yahilabihedhiwa dila dhowinjhivadhene wihina yeriwemo mathanga owinjhivene ninga osasanyiwamo vidiyu, wibiwamo jhibo dha roki. Mwahaya bwaddi kiyakale ethu yapama othugumanamo wi nisuze muselu dha Mulugu? Tiribunale enlubale opendda museluya aliwa woona wi anamathonga ale a murudda yaakadeliha addibila otugumanamo kiyanna razawu. Anamathonga ale a Tiribunale enlubale aliwa oruma wi anamathonga ale a murudda yaavahedhele addibila majhangala yahoweleya. Vano miyo oroma woona wi Yehova oreeliha mabasa a kambilinya yokavihera owoga muladdu ya nikuru. Miyo okala ohagalalene mwaha okavihera!

Addibila oroma osasanyedha nyumba ele. Yaka ya 1985 mweri wa Dezembro, vigavirile mweri modha egambeliwe osasanyiwa nyumba ele ya Stanley, yahimala ni anaskola a turma 79 o Jileyadi yahisuzamo. Wa miyo okavihera mabasa Oomwene epaddi yowoga muladdu waali oneti munlubale. Ohagalala ginnimina mwaha okavihera wula, ohukwaranya ohagalala gannimina mmabasani aaga o adivogadu gihinadhe oBeteli. Miyo kagubuwela wi Yehova ere ogilabihedha wihina gikavihere mabasa owoga muladdu.

Yaka ya 1980, amediku ni dhispitale, kiyaariha Anamona Yehova yathoma wi kannafuna wakela nikame. Thabwa-thabwa ahiyana yakanna wari, mwaha anamathonga yawogesa wi ahiyana kiyanna oneti wokoodda ovahiwa nikame. Aliwa yawogesa wi kiyakale yapama wihina mwaana ahikanne mayi mwaha wi amaye yere okwa mwaha okoodda ovahiwa nikame.

Labo na 29 na Dezembro yaka ya 1988, murogola Denise Nicoleau numala obala wambela orahila nikame. Oliye ahanlena nikame vang’onove, vano Dotori aye omuloba wi anvahe nikame. Murogola Denise okoodda. Vati nuusa menfermero Espitale ele oveda makalelo nanamathonga wi emuwaddihedhe murogola ole ohukoodda ovahiwa nikame. Ehithapannye ni murogola Denise newene ni mamune, anamathonga ale othoma murogola ole avahiwe nikame.

Labo na xixano, 30 a Dezembro, nikuru naamediku Espitale ele onvaha murogola ole nikame. Aliwa yenrena yoyo podive amudhaaye vamodha ni mamune egakooddile wi murogola ole avahiwe nikame. Omahiyu yole, amudhi murogola Denise owinjhivene, podi wera nanamaholela mulogo abili yahivolosihiwa mukambura. Aliwa yahinkedhiwa wi yohiha nikuru naamediku nne wi  envahe nikame murogola Denise. Omambesini wa Sabadu, 31 a Dezemburu, ovokeriwa mukambura waaddibila ale weraga owogiwa munotisiyariyuni a Nova York ni Long Island.

Mambesi a txiposi, miyo owoga nnamathonga a Tiribunale enlubale ithaniwa Milton Mollen, miyo omwaddela makalelo dhapadduwiwa. Miyo omwaddela wi namathongaya athomile wi murogola ole avahiwe nikame karajhihile omuloba. Namathonga Mollen ogiloba wi gihogolowele okambilinya waaye mudhidhi mmodha wi nthapanyedhe pama museluya ni malamulo enavolowelavo. Mahiyu, miyo ni namasogolela aaga Philip Brumley, iyo odhowa okambilinya wa namathonga Mollen. Teto namathonga Mollen ahimwithana adivogadu ospitale wihina adhe oonele muladdu ole. Omahiyu yole muladduya wunnuwa. Mudhidhi vang’ono, ddibila Philip ogilebela karta nawoga wi “okurumuwe”. Eyo yaali yolaga yapama, mwaha miyo gahinyanyuwa, givanyihaga dhawoga adivogadu ospitale.

Egavirile woora modha, namathonga Mollen wera muselu ole wakale ethu yoroma mangwaana. Nivenyagawowene okambilinya wa namathonga Mollen oliye wera: “Mangwaana adivogadu ospitale dhaye dhinere omurusa.” Obe adivogadu onere okanna mutholo wowogamo mwahaya bwaddi edhe ethomiwege wi athu evahiwe nikame podi ehifunaga. Mudhidhi yole, miyo woona wi Yehova ere ogaddela wi nnere oganyari razawu. Sotikiniha woona makalelo Yehova ananilabihedhiye wi efunelo yaye yereye!

Nnerege osedha nihudheraga wihina naakihedhe ni makalelo apama muselu ole. Woona wi tiribunale enlubale yakala vokwivelavene ni Beteli yo Brooklyn, addibila owinjhiva yalaba ni iyo o kambilinya yokavihera owoga muladdu yadhowilege ni mweddo. Anamathonga annayi wiwa dhowoga dhehu, vano aliwa onvaha razawu murogola Denise. Aliwa owoga wi namathonga ole ooroma ahiviriganiha, kaathome wi muthu avahiwe nikame ahiwonge nuliye obe naale enamusamalela, yereya ndo enere woniha wi oliye ohaviriganiha malamulo.

Mudhidhi vang’ono, tiribunale enlubale ya Nova York owoga wi murogola Denise ahikanna oneti wojha murombwe dhospitale ahivahiwe nikame. Numala ogonjhiha muladdu wa murogola Denise, gahikanna oneti wokavihera muladdu dhimodha miraru dhanna muselu wovahiwa  nikame dhawogiwe otiribunale enlubale ya murudda. (Osugwe kwaduru enawoga “ Marazawu nnavahiwihu mmatiribunale dhinlubale.”) Teto miyo gihilaba nihadivogadu amodha oBeteli wodhela owoga walela ahima, omwalana, ogawana dhoobo ni owoga dha manddile a terenu.

Gimunonaga Dawn, mwaraga, oliye ahimwalana ni mamune. Vadhuluva oliye aalela ahima araru, oolaba teto aali piyonera. Dawn ahifwanyiwa makathamiho owinjhiva mwigumini mwaaye, mbwenye miyo gahitikina makalelo aye ofuna omulabela Yehova. Yaka ya 1992, iyo odhowa omusonkanoni wa malabo mararu wanna musolo wawoga “Portadores de Luz”, vano miyo wera ginowufuna okale mwenddaga. Yaka modha nuvira iyo otelana. Dawn nvaho wa Yehova ginnimina. Oliye ohukanna mubuwelo womuzimuni ni onoteya niimwerumweru. Miyo podi owoga wi oliye aali muhiyana agerela opama mudhidhi nikanlihu vamodha. — Pro. 31:12.

Nitelanaga ni Dawn, mwana oroma anna yaka 16, anabili anna 13, anatharu anna 11. Miyo gafuna wi gikale babi apama waaliwa, vano miyo ohudhera pamadhene mmalivuruni mwehu muselu dhinawoga wodhela walela ahima owafwanya. Malabo mamodha nokanna makathamiho, mbwenye gakalesa ohagalalene onona wi ahimaya yagoona ninga mukwiwa ni yagoona ninga baabiwa. Vaadevihu noorumedhesa wi anihu yadhenavo akwiwa. Wawona azombwe owinjhiva vaade ehagalalaga yaali yapama!

Yaka ya 2013, miyo ni Dawn otama odhowa luwani yo Wisconsin wi naasamalele makolwihu owuluvala. Miyo otikina giwalimi wi mabasaaga oBeteli kiyagome. Miyo withaniwa wi giwelele okavihera mabasa owoga muladdu.

Setembro a 2018, miyo woona wi gihinathi owoga gokotomolesa bure. Mediku aaga ogombeza, mbwenye koonile oreddaya. Vano mediku ole owoga wi ginvede mediku mmodhaya, anasamalela oredda wogogo. Janero a 2019, mediku ole anasamalela oredda wogogo ogaddela wi podi wera gahikanna oredda wahithambwile ononiwa, onithaniwa paralisia supranuclear progressiva (PSP).

Malabo mararu nuvira, miyo odhowa osereneya mujeluni vano miyo ogurugunyula nlada noojha. Miyo otikina makalelo gamothilimi mwaha gahilemela osereneya mujeluni. Vano miyo woona wi gili muredda. Wambela labo nenne oreddaga othabwaga, kagandesa owoga newene wamira mara.

Miyo ginohagalala vanlubale mwaha olabihedha ndhe gihudherimi wi gikavihere mabasa Omwene ni mabasa o wadivogadu. Miyo ginohagalala mwaha waleba marevista ni ovaha dhoxagiha wodhela epaddi yomediku adivogadu elabo yatene. Mudhidhi yola gihikavihera mulogo wa Yehova osakula ojha murombwe dhospitale ehivahiwe nikame. Dhigarive ndo, ginorumedha madhu elebiwe va Lucas 17: 10 enawoga ‘Gili mudhaari ohufwanelela. Gerilimmina siyeyo yahoweleya werana.’