1. Pawulo anonile ddi?

MURUMIWI Pawulo malabo mamodha ofwanyiwa dhego dhamukwerebeyiha. Oliye owonelamo wi mwili waaye ‘woonyowa’, teto ookukuthuwa wihina erena ethu yapama ni malobelo aye kiyakuliwa ninga mwafuneliye. (2 Cor. 4:16; 12:7-9; Rom. 7:21-23) Pawulo ahinona wi amwiddani aye yubuwela wi oliye dokwerebeya. * Nari dhigarive ndo, Pawulo keenyile dhowoga dhaathu amodha ni makathamiho aye omugonjhiha. —2 Cor. 10:10-12, 17, 18.

2. Ninga munawogela 2 Coríntios 12:9, 10, ethu baani yathima ahudhere murumiwi Pawulo?

² Murumiwi Pawulo ahonelamo wi — muthu akwerebeya podi okala akopolo. (Omwileri 2 Coríntios 12:9, 10.) Yehova ahimwaddela Pawulo egi: ‘Kopolo dhaaga dhinoomukavihera muthu akwerebeya.’ Madhu ala Yehova afuna ere kopolo dhaye dhere omukavihera Pawulo. Vobajha nnafuna noone mwahaya bwaddi ehihoweleyaga othuwathuwa naaruwaniwaga ni amwiddani.

3. Mwahaya bwaddi nihagalalaga naaruwaniwaga?

³ Kaavo anadhiveliwa oruwaniwa. Mbwenye amwiddani ehu enokala nuniligawa, nahilibaga onyanyuwa ni dhego enawoga amwiddanihu nnere okwerebeya. (Pro. 24:10) Ki vano, nnere ddi naaruwaniwaga naawiddanihu? Ninga Pawulo  nikalege ‘oohagalalene . . . naaruwaniwaga.’ (2 Cor. 12:10) Mwahaya bwaddi? Mwahaya bowi oruwaniwa ni oharahariwa onowoniha wi nili anamahara a Yesu. (1 Ped. 4:14) Yesu ahiwoga naanamaharaye wi yere oharahariwa (João 15:18-20) Siyeyo yapadduwile nsaka noobajha. Nsaka nenne, athu yavoloweliwe ni dhilemelelo dho Geregu yawoona makiristawu ninga athu okwerebeya ni opwaza. Ajudewu, yomoona Peduru ni Juwawu vamodha ni makiristawu mamodha okala ninga athu ‘yahahudhere malamulo.’ (Atos 4:13) Makiristawu yaali ninga athu oolodhowa, mwaha kiyivolosiha mpulitikani newene kiyadhowa okoddoni. Athu atene ansaka nenne yahiwidda makiristawu

4. Makiristawu oobajha yonamo avi oharahariwa yanniwana waale yawidda?

⁴ Makiristawu ansaka noobajha yaahiya olaleya mwaha oharahariwa? Newene. Motajhiha murumiwi Peduru ni Juwawu yowona wi oharahariwa mwaha omuhara Yesu ni olaleya dhohudhiha dhaye waali oneti munlubale. (Atos 4:18-21; 5:27-29, 40-42) Anamahara a Yesu kiyanna manyazo. Mwebaribarene makiristawu ale owiyeviha yahakavihera athu owinjhiva, mbwenye amwiddani ewa kiyamukavihere muthu. Motajhiha, dhithu ndhe makiristawu amodha evetheliwiwa oleba dhinowakaviherave athu peeno okanna ejhehedho yosogolo. Omwene yawogesiwa ohubajha othonga, mbwenye ovanene onerege othonga elabo yavati. (Mat. 24:14) Anamathonga yaharahare makiristawu obajha ehimala okwa. Teto kahiyo eyenove baahi, makiristawu oothikitheliwa amodha ehambela othonga ni Yesu odhulu peeno. Podi aliwa yere ovenyihiwa muukwani enere ohoweleya wiwelela omwene walaleyiwe naale yaaharaharesiwa. — Apo. 5:10.

5. Ninga munawogela João 15:19, mwahaya bwaddi adhari a Yehova ehifuniwaga naathu amwilaboni?

⁵ Peeno athu amodha kinanifuna ni enoniteya, aliwa enubuwela wi adhari a Yehova boolodhowa ni opwaza. Mwahaya bwaddi egubuwela ndo? Mwaha kannahanyedha mubuwelo waathu amwilaboni. Iyo nnowilibihedha okala owiyeviha apama ni owiwelela. Yabureya sowi elabo enadhiveliwa athu owithukula, abure, ni ohiwelela. Mbwenye dhendho iyo kannadhiveliwana kannivolosiha mpulitikani newene kannadhowa okoddoni. Makalelo ehu owubuwela kahiyo ninga athu amwilaboni, bumwahaya athu amodha yanisugwaga enanoona ninga anamwani. — Omwileri João 15:19; Rom. 12:2.

6. Yehova analabihedha nikuru naye wi yapare mabasa baani?

⁶ Naarive nihifuniwaga naathu amwilaboni, Yehova ononilabihedha wihina neregena dhego dhinlubale. Nnikuru naye Yehova onna olaleya muthenga wapela elabo yatene. Adhari a Yehova peeno, enna wasasanya marevista enatapuleliwa dhiwogelo dhowinjhiva wapela elabo yatene, teto enomulabihedha Bibliya wihina yakavihere matxikwi ni matxikwi aathu okanna egumi yapama. Mabasa yala atene onathithimihiwa di Yehova. Oliye onalabihedha nikuru naathu enakala ninga oolodhowa wihina yapare mabasa ala manlubale. Ki we ononamo avi? Yehova podi wukavihera ofiyedha owedha wapara mabasa yala? Enahoweleya ddiniyani wihina wakele  nikavihero nna? Nnafuna noone dhego tharu nihudherihu ni yotajhiha ya murumiwi Pawulo.

7. Ethu baani nnahudherihu ni Pawulo?

⁷ Ethu modha nnahudherihu ni Pawulo sowi: kahiyo ororomela kopolo dhawo ni ele onandiwe werana wihina omulabele Yehova. Ni moonelo waathu ohulogomana, murumiwi Pawulo owanda werana dhithu dhohiyana-iyana dhaamuthukulele okala muthu owithukula ni owiroromela. Oliye unnuwile o Tarsu luwani yunlubale yo Roma. Tarsu yaali luwani yoreela ni dhahikalawo eskola dhavadhulu. Pawulo ari muthu osuza vanlubale, oliye ahisuzihiwa ni purusori athithimihiwa vanlubale ithaniwa Gamaliyeli. (Atos 5:34; 22:3) Wahifiya mudhidhi Pawulo andanniye vanlubale naaJudewu. Mwinyene ohusoriha egi: ‘Miyo gowunuwelavo mwejudewu wapitha owinjhiva wa nlogo naaga a yaka dhimodhave ni miyo.’ (Gál. 1:13, 14; Atos 26:4) Mbwenye Pawulo kiiroromela yeka.

8. Ninga munawogela Filipenses 3:8 nota, Pawulo oona ni makalelo baani dhoreela dha mwilaboni, ki mwahaya bwaddi ‘oohagalala akala okwerebeya’?

⁸ Ni murima watene, Pawulo ahileva dhatedhene dhamuthukulela okala ovuwa. Ebaribari sowi, athu yonamo ninga dhego dhathima mbwenye Pawulo asugwa ninga dhithu ‘dhonyakavala.’ (Omwileri Filipenses 3:8.) Pawulo ahona goyi mwaha omuhara Yesu. Oliye ahifiyedha widdiwa ni nlogo naye. (Atos 23:12-14) Athu a murudda wadheliye oRoma, yahimuhidda ombubudda onvokera mukambura. (Atos 16:19-24, 37) Ohiya eyenove Pawulo ahona goyi mwaha wa dhego ahandiye werana. (Rom. 7:21-25) Mbwenye Pawulo keenyile ogonjhihiwa naamwiddani vamodha ni makathamiho aye. Ohiya eyo oliye ‘oohagalala akwerebeya’. Ki mwahaya bwaddi? Mwaha malabo matene akala okwerebeya owoona kopolo dha Mulugu dhimukaviheraga mwigumini mwaaye. — 2 Cor. 4:7; 12:10.

9. Makathamiho ehu nawonege ni makalelo baani?

 ⁹ Yehova kananikavihere mwaha okanna kopolo, ohudhera, dhoreela, obe ovuwa, kahiyo dhithu dhendha dhinanivaha thima vamentoni va Yehova. Mwebaribarene vaari vaadhari a Yehova peeno ‘vamentoni vaathu baaliba ehinna thotho, oolodhowa, ehibaaliwe mwemudhi yaathu oorela.’ Yehova ohusakula olabihedha ‘dhithu dholodhowa’. (1 Cor. 1:26, 27) Kuhiye makathamiho wuhiha omulabela Yehova. Mbwenye woonege makathamiho ala ninga ofuru womulabela Yehova ni woona kopolo dhaye mwigumini mwawo. Motajhiha, akala onowawova amwiddani awo olobele wa Yehova omulobaga nikavihero wihina wakihedhe nroromelo nawo (Efé. 6:19, 20) Akala ohufwanyiwa oredda wowopiha, omulobe Yehova kopolo onahoweliwe wihina wande wapara mabasa omwene. Woona wi Yehova anowawakula malobelo awo nroromelo nawo nnere okala nooliba.

10. Mwahaya bwaddi sapama ohudhera dhotajhiha dha dhaari oororomeleya a Yehova elebiwe va Hebreus 11:32-34?

¹⁰ pawulo oovaha thima dhohudhera dha mbibliyani. Mwaha wa yeyo, ohiya ohudherave dhithu dhowoneya baahi Pawulo ohudhera dhotajhiha dhaathu oororomeleya elebiwe mBibliyani. Karta aalebeliye makiristawu ale, Pawulo wakongomedha meberewu wihina ehudherege dhotajhiha dha adhari a Yehova akale. (Omwileri Hebreus 11:32-34.) Osugwe yotajhiha ya Mwene Davidi. Amwiddani a Davidi ni ale yaali akwaye yomuharahara nuubure. Mohanganyedha, ohudhera yotajhiha ya Davidi podi wera yahimukavihera Pawulo, ni iyowa peeno nahudhera yotajhiha ya Davidi enere onikavihera.

11. Mwahaya bwaddi Davidi akala ninga oolodhowa ohiyana ni Goliya?(Osugwe fotu ya vakapani)

¹¹ Goliya amoona Davidi ninga muthu oolodhowa, Goliya numoona Davidi ‘kanvahile thima.’ Mwebaribarene Goliya aali munddimuwa ni akopolo ompitha Davidi teto oliye ahinona makalelo owana koddo. Mbwenye Davidi aali muzombwe, kanna thotho yowana koddo ni oniwa ninga muthu oolodhowa. Mbwenye Davidi ahoniha wi kaali oolodhowa. Oliye ororomela kopolo dha Yehova vano ompa Goliya. — 1 Sam. 17:41-45, 50.

12. Makathamiho mamodha yanfwanyile Davidi baavi?

¹² Davidi ahifwanyiwa yoweha emodha yamukwerebeyihe. Davidi aali namalaba a mwene o Ezarayeli ithaniwa Sawuli athomiwe ni Mulugu. Omambelelo Mwene Sawuli omuriha Davidi. Teto nuuvira mudhidhi mwaha withukula wambela omukalela nrima Davidi, vano Sawuli wambela omoniha goyi Davidi ni oveda makalelo ompa. — 1 Sam. 18:6-9, 29; 19:9-11.

13. Ethu baani erilena Davidi mudhidhi yole atabusiwaga ni Sawuli?

¹³ Naarive Sawuli amonihaga goyi Davidi, oliye omuriha mwaha Sawuli aali mwene asakuliwe ni Mulugu. (1 Sam. 24:6) Davidi kiddanne ni Yehova mwaha ndhe Sawuli amwereliye. Ohiya eyo, Davidi oororomela wi Yehova ere onvaha kopolo wihina agonjhihe dhithu ndhe. — Sal. 18:1, cabeçalho.

14. Makathamiho baani yanfwanyile Pawulo ooligana ni a Davidi?

¹⁴ Murumiwi Pawulo ahifwanyiwa makathamiho ooligana ninga a Davidi. Amwiddani a Pawulo yaali a kopolo ompitha  oliye. Anamaholela gereja owinjhiva a mudhidhi yole yomwidda Pawulo. Dila dhowinjhivadhene, yaharuma athu wihina emuhidde Pawulo, embubudde ni envokere mukambura. Ninga yampadduwela Davidi, Pawulo ahonihiwa goyi naale yafwanelela wandana nuliye. Yabureya oliye ahifiyedha widdiwa naathu ammulogoni. (2 Cor. 12:11; Fil. 3:18) Naari dhigarive ndo Pawulo ahanda wagonjhiha ale yamwidda. Ni makalelo baani? Oliye ahididela olaleya naari afwanyiwaga dhoweha. Naari addibila ni arogola emuhogoloselaga mundduli, oliye odidelave okanna odhivela naaliwa. Teto vadhuluva, oliye ahididela okala oororomeleya ni Mulugu ofiyedha okwa waaye. (2 Tim. 4:8) Pawulo ahigonjhiha makathamiho owinjhiva mwaha okaviheriwa ni kopolo dha Yehova.

15. Yoluba yawo sivi, ki onande addi werana?

¹⁵ Ki we? Onowonihiwa goyi obe onoharahariwa naale enasuza ni we oskola, onalabiwena vamodha omabasani, obe amudhawo ehili anamona a Yehova? Onowabihaga wonihiwa goyi ni ddibila ammulogoni? Akala dhendho dhihereya mwigumini mwawo, kudduwale tajhiha ya Davidi ni ya Pawulo. We podi odidelave ‘ogonjhiha obure ni opama.’ (Rom. 12:21) Yoluba yawo, kahiyo yowapa amwiddanaawo, mbwenye wakavihera wonelamo madhu a Yehova. We podi wanda werana eyo, wodhela ohara thalo ndha: omuroromela Bibliya wakulaga makoho aathu, waariha ale ehinuwakula pama ni wawerela opama athu atene naleya enuwidda. — Mat. 5:44; 1 Ped. 3:15-17.

16-17. Ethu baani Pawulo ahadduwaliye?

¹⁶ Pawulo ahinathi okala namahara a Kiristu, oliye owaharahara ni owanyemula anamahara a Yesu. (Atos 7:58; 1 Tim. 1:13) Mudhidhi yole Pawulo ndina naye naali Sawulu, ni owaharahara makiristawu. Yesu ahimugonjhiha Pawulo. Agaali odhulu Yesu owoga ni Pawulo ni omuddendderula mento. Wihina ahogolowele woona,  Pawulo waddeliwa wi alobe nikavihero alene aharahariye. Pawulo wiyeviha orumedha nikavihero na Ananiya aali namahara a Kiristu amukavihere oliye ohogolowela woona. — Atos 9:3-9, 17, 18.

¹⁷ Nuvira mudhidhi Pawulo okala mukiristawu ononiwa. Mbwenye Pawulo kadduwale ndhe Yesu amwaddeliye adhowaga o Damasku. Oliye okalave owiyeviha, ni oorumedha nikavihero naaddibila ni arogola ammulogoni. Pawulo ahinona wi addibila ni arogola yaali ‘mathuwa yamulibiha’. — Col. 4:10, 11, nota.

18. Mwahaya bwaddi egarusa orumedha nikavihero naathu amodha?

¹⁸ Nnahudheravo ddi wodhela tajhiha ya Pawulo? Nubajha omuhudhera Bibliya podi wera noorumedha mokweya nikavihero naathu amodha, epaddi yomuzimuni nakala ninga ahima enahowela okaviheriwa. (1 Cor. 3:1, 2) Ki peeno? Naarive niganna yaka dhowinjhiva nimulabelaga Yehova, nnorumedha nikavihero naathu amodha? Podi wera dhinorusa, thabwa-thabwa akala muthuya ananivaha dholaga onoromawene omulabela Yehova. Yehova malabo owinjhivene onowalabihedha addibila ni arogola wihina enivahe kopolo nnahowelihu. (Rom. 1:11, 12) Akala nnofuna nikavihero na Yehova, nubuwelege wi Yehova onowalabihedha athu ang’ono wihina enikavihere.

19. Ethu baani yamukavihere Pawulo werana dhithu dhathima?

¹⁹ Pawulo numala okala mukiristawu aherana dhithu dhathima. kMwahaya bwaddi? Mwahaya bowi, oliye ahisuza wi mareeliho kinadha mwaha wa kopolo dhehu, osuza, dhoorela obe ovuwa. Mareeliho enadha mwaha wiyeviha ni omuroromela Yehova. Mwaha wa yoyo osakule omutajhiha Pawulo (1) wodhela omuroromela Yehova, (2) ohudhera dhotajhiha dha mBibliyani, ni (3) orumedha nikavihero naathu amodha. Werana ndo naarive wakwerebeya Yehova anere wukavihera wi okale muthu a kopolo!