1. Ethu baani enanihagalasa enafwanyeya va 3 João 3, 4?

ONOWANDA woona ohagalala anna murumiwi Juwawu mwaha wakavihera athu owinjhiva ohudhera ebaribari? Oliye awoona makiristawu ala ninga anaye. Naarive efwanyiwaga dhoweha dhowinjhiva aliwa kiyahiyile omulabela Yehova. Onowanda wubuwela makalelo yamuhagalasiwa murumiwi Juwawu? Peeno, nnokanna ohagalala wimodhave nawonaga anihu naabanlihu obe oomuzimuni yipelekaga wa Yehova ni edhowagave emulabelaga oliye. — Omwileri 3 João 3, 4.

2. Makarta alebile Juwawu, yoluba yaye yaali ddi?

² Yaka ya 98 mudhidhi wehu, podi wera Juwawu akalesa murudda wa Efeziyu obe waddamelawo. Podi wera oliye atamele owefesu agamanle okumihiwa mukambura o Patimu. Mudhidhi yole muzimu wotxena wa Yehova omukavihera Juwawu oleba makarta mararu. Yoluba yaye yaali yowakongomedha makiristawu eebaribari okanna nroromelo ni Yesu ni wakavihera odidela weedda mwebaribarini.

3. Makoho baani enakuliwe muwari mwa yohudhera ela?

³ Juwawu aali murumiwi oogomihedha, ni oothuwathuwa mwaha ohudhiha wowoota wavolowela mulogo. * (1 João 2:18, 19, 26) Anamahudhiha owoota ala yawoga wi nihimunona Mulugu, mbwenye kayerana ndhe Mulugu dhafuniye. Nnafuna noone dholaga Yehova anvetheliye Juwawu wi aalebe. Muwari mwa yohudhera ela nnere ofwanya dhowakula dha makoho ala: Enatapulela ddi weedda mwebaribarini? Makathamiho baani enanthukulele ohiya weedda mwebaribarini? Nnande addi okaviherana mmodha ni mukwaye okala ororomeleya?

4. Ninga munawogela 1 João 2:3-6 ni 2 João 4, 6, enohoweleya ddi wihina neddege mwebaribarini?

⁴ Naafunaga weedda mwebaribarini enohoweleya onona ebaribari eli muwari mwa madhu a Mulugu ali Bibliya. Ohiya eyo enohoweleya ‘nawiwelelege malamulo’ a Yehova. (Omwileri 1 João 2:3-6, 2 João 4, 6.) Yesu tajhiha yologomana yomwiwelela Yehova. Bumwahaya, makalelo athima omwiwelela Yehova fuuhara thalo dha Yesu ni makalelo mamodhave ninga oliye. — João 8:29; 1 Ped. 2:21.

5. Ethu baani enafuneya wi nihanganyedhege?

⁵ Wi ndidele weeddave mwebaribarini, enohoweleya orumedha wi Yehova Mulugu eebaribari, ni dhatedhene anawogiye mBibliyani, sebaribari. Teto kannanganyedha wi Yesu disakuliwe. Peeno athu owinjhiva enowanganyedha akala Yehova ohumusakula Yesu wi akale Mwene a Omwene wa Mulugu obe naari. Juwawu ahiwoga wi yere okalawo ‘anamoota’ yafuna waholosa ale yaali owiyegeredhene wi yakihedhe ebaribari ya Yehova ni ya Yesu.(2 João 7-11) Juwawu ohuleba egi: ‘Muliba woota baani, kahiyo muthu anaruna wi Yesu di Kiristu?’ (1 João 2:22) Makalelo apama owi nihilekethiwe fuukala anamahudhera apama aBibliya. Nerana ndo, nnere owedha omunona Yehova ni Yesu. (João 17:3) Vasogolova nnere woona wi nihifwanya ebaribari.

6. Makathamiho baani enafwanya azombwe?

⁶ Enohoweleya makiristawu matene ekale pasope wi enadha elekethiwe ni dhohudhiha dhaathu. (1 João 2:26) Thabwa-thabwa azombwe, ekale pasope wihina enadha emothela mmurakoni muna. Murogola anna yaka 25, anakala elabo yo França anithaniwa Alexia * anowoga: “Mudhidhi ngali mwaana, gakalesa othuwathuwene mwaha ohudhiha weelabo wodhela oruthuwa ni dhohudhiha dhaathu. Teto malabo mamodha godhiveliwa ndhe dhahudhihiwa. Vano miyo woona wi kiyakale yapama orumedha dhatene gahudherimi oskola gihimuhiyile Yehova owoga mubuwelo waaye.” Alexia ahifiyedha ohudhera livuru nnawoga A Vida — Qual a Sua Origem? A Evolução ou a Criação? Nuvira sumana vang’ono, makoho aye atene wakuliwa.  Alexia ohusorihave egi: “Gahonelamo meeka wi Bibliya anosoriha ebaribari. Teto gahonelamo wi okalawo, wula weddelaga ebaribari winohagalasa ni winodhana murenddele.”

7. Makathamiho baani enanifwanya, ki mwahaya bwaddi egahoweleya owanana?

⁷ Makiristawu atene, azombwe naale owunnuwelavo, enohoweleya okala pasope wihina ehithukule mweddelo weelabo. Juwawu ohuwoga wi kaneddege mwebaribarini wula naweragana mararuwo. (1 João 1:6) Naafunaga wi Yehova anirumedhe peeno ni osogolo, enohoweleya wubuwela wi oliye anowoona dhatedhene. Kaavo yothega Yehova ahinonniye, mwaha dhatene dhinerihuna ‘dhinowoneya vamentoni vaye’.

8. Ethu baani nnahowelihu orabela?

⁸ Nrabelege mubuwelo weelabo wodhela othega. Murumiwi Juwawu ohuleba egi: ‘Nawoga wi: ‘Kaninna yothega’, nnowileketha.’ (1 João 1:8) Mudhidhi wa Juwawu, ale esukumile ebaribari enaniwoga obure yowoga wihina muthu podi otheega pudhave ni nikanne wandana ni Mulugu. Peeno nihirijhiwa naathu ninga yayo. Athu owinjhiva enosoriha wi nnomulabela Mulugu, teto kinarumedha mubuwelo wa Mulugu wodhela otheega, thabwa-thabwa muselu wa mararuwo. Ele Yehova aneriye sotheega, aliwa enoonamo ninga ethu yapama.

9. Azombwe yahiddelela ele enonniwa wi sapama, enaakele mareeliho baani?

⁹ Azombwe, podi owaddihedhiwa woona yothega ninga munoonela akwiwa oskola obe omabasani. Siyeyo epadduwile ni Aleksandar. “Oskola anahiyana amodha yogiwadda wihina gerena mararuwo naaliwa. Aliwa yowogesa ni miyo yeraga, woona wi kunna mwenddawo eyo enatapulela wi kunya mba.” Ohufwanyiwa yoweha ninga yela? Akala ohufwanyiwa, wubuwele wi ohiddelela ele nnonihu wi sapama enere odhana mareeliho  mwigumini mwehu. Naparihedha mabasa ele anasoriha Bibliya, nnere obarela mwili wehu, egumi yehu, mubuwelo wehu ni wandana wehu ni Yehova. Wawedha ogonjhiha yoweha peeno, onere okanna kopolo yogonjhiha yoweha emodha enadha osogolo. Kahiyo odduwala wi mubuwelo wabure enna athu wodhela ogonihana muhunathi otelana onadhela wa Saddana. Bumwahaya wilibihera wihina ohawerena mararuwo, ‘onamugonjhiha Mbure.’ — 1 João 2:14.

10. 1 João 1:9 onanikavihera addi omulabela Yehova ni mubuwelo wohinyemela?

¹⁰ Iyo kannanganyedha, Yehova dinna ofuru wonaddela ethu yabure ni yapama. Teto iyo nnowilibihera vanlubale wihina niherena yotheega. Nahuna noona wi nihithega, nnoloba nikurumuwelo wa Yehova ni nlobelo. (Omwileri 1 João 1:9.) Ohiya eyenove, nerana yothega yunlubale, nnosayela okaviheriwa ni anamaholela ammulogoni, aliwa esakuliwe ni Yehova wihina enisamalelege. (Tia. 5:14-16) Teto nnokongomedhiwa wihina nikale pasope wihina nihikwerebeye ni dhothega dhakale dhinlevelele Yehova. Mwaha Babihu apama ohunivaha mwanaye wihina alevelele dhothega dhehu. Yehova awoga wihina ohumulevelela muthu otwaruwile, ohumulevelelawene. Woona wi dhili ndo, iyo podi omulabela Yehova mubuwelo ohuninyemelaga. — 1 João 2:1, 2, 12; 3:19, 20.

11. Nnande addi obarela mubuwelo wehu ndhohudhiha dhinakwerebeyiha mubuwelo?

¹¹ Nrabele ohudhiha waathu esukumile ebaribari enaniwoga obure. Wambela mudhidhi witiwe mulogo wa makiristawu, Ddiyabo onnave waharahara ni malango adhari oororomeleya a Mulugu. Bumwahaya enohoweleya iyo onona ebaribari sivi ni woota fuvi. * Mwiddani ehu podi olabihedha Interneti  wihina akwerebeyihe nroromelo nehu ninnihuna ni Yehova, ni odhivela wehu naaddibila. Kahiyo omudduwala ole onasogolela dhowoota ndha, teto onaamuhanyedhe! — 1 João 4:1, 6; Apo. 12:9.

12. Mwahaya bwaddi enohoweleya olibiha nroromelo nehu?

¹² Nafunaga omugonjhiha mwiddani ehu Saddana, nunnuwihe nroromelo nehu ni Yesu, ni niroromele makalelo a Yehova omulabihedha Yesu wihina akwanelihe efunelo yaye. Teto enofuneya wihina nroromele nikuru nolamulela Yehova analabihedhiye wi asogolele nikuru naye. (Mat. 24:45-47) Nnere wunnuwiha nroromelo nehu naamuhudheraga Bibliya malabo matene. Nerana ndo, nroromelo nehu nnere okala ninga muthanko wotibeleya onna musisi dhowitibela. Pawulo ahiwoga ethu emodhave mulogo wo Koloso egi: ‘Mowindo, woona wi muhumurumedha Yesu Kiristu, Nabuya, mweddegeve mowiwanana nuliye, mutibeleyaga ni mulibaga mwa Oliye, ni mwilibiherege munroromeloni.’ (Col. 2:6, 7) Mukiristawu ilibihedhaga pamadhene wi akanne nroromelo nooliba, newene Saddana, ne ale enavoloweliwa ni mubuwelo wa Saddana kinamuhihe weeddave mwebaribarini. — 2 João 8, 9.

13. Ethu baani nnonilihu, ki mwahaya bwaddi?

¹³ Nnone wi nnere widdiwa ni elabo. (1 João 3:13) Juwawu ononubusedha wi ‘elabo yatene eri mmadani mwa Mbure.’ (1 João 5:19) Woona wi omakuthulo winowaddamela, Saddana onothabwave onyanyuwa. (Apo. 12:12) Oliye ononirijha ni makalelo ohiyana-iyana, motajhiha, onolabihedha murako dha mararuwo obe onowalabihedha ale ehiyile ebaribari enaniwoga obure. Oliye onowalabihedha anamathonga wihina eniharahare mwa makalelo abure. Saddana ohunona wi ahanlena mudhidhi vang’ono, mwaha wa yeyo onoveda makalelo oomariha mabasa ehu oolaleya, ni okwerebeyiha nroromelo nehu. Mowindo iyo kanintikina nawoona mabasihu oolaleya ekoddihiwaga dhilabo dhowinjhiva. Naari dhigarive ndo, addibilihu ni arogolihu enakala luwani dhendha, aliwa ennodhowave ekalaga oororomeleya. Aliwa enotonyihedha wi makathamiho bimakathamiho anawerele mbure enere wanda wagonjhiha.

14. Kawogamo makalelo owakavihera addibila weeddave mwebaribarini.

¹⁴ Wi nakavihere addibilihu weeddave mwebaribarini, enohoweleya waweddela thagaraga. (1 João 3:10, 11, 16-18) Enofuneya odhivelana mmodha ni mukwaye mudhidhi watene, dhithu dheddega pama, obe dhaheddaga pama. Motajhiha, we ohumunona ddibila akweliwe mmudhaye obe mukwaye, anahowela nikavihero? Ohanona addibila epadduweliwe ngovi enahowela nikavihero novenyihedha nyumba dhewa dhomwene obe nyumba munakaliwa? Iyo Nnowoniha wi nnowadhivela addibila ni arogola ohiya niile nnonihu, mbwenye niile nnandihu werana.

15. Ninga munawogela 1 João 4:7, 8, ethu baani nnahowelihu werana?

¹⁵ Nadhivelanaga mmodha ni mukwaye, iyo nnamutajhiha babihu odhulu Yehova. (Omwileri 1 João 4:7, 8.) Makalelo odhivelana fulevelelana mmodha ni mukwaye. Motajhiha, muthu podi onitheegela vano oniloba nikurumuwelo, nnonihe wi nnomudhivela namulevelela ni naddiwala ele anereliye. (Col. 3:13). Ddibila anithaniwa Aldo ahifwanyiwa makathamiho ninga yala, amwiwaliye ddibila amuroromelesiye, aawogaga obure  athu a nlogo naye. Aldo onowoga egi: “Miyo gahilobela dila dhowinjhivadhene gimulobaga Yehova wihina agikavihere ohumona ddibila ole ninga muthu abure.” Aldo kerilena eyenove baahi, oliye ahimuloba ddibila ole wi edhowe omalaleyelo vamodha. Mudhidhi yole yaaliwa vamodha, Aldo owoga makalelo aliye mwaha wa ethu yapadduwile. Aldo onosorihave egi: “Ddibila ole nuwiwa makalelo gaalimi mwaha wa dhowoga dhaye, oliye ogiloba nikurumuwelo. Mwaha wa makalelo aye owoga, miyo gahiwedha wonelamo wi oliye ahitwaruwa. Iyo nahithapanyedha muladduya vano olevelelana ni odduwala yapadduwile.”

16-17. Ethu baani nnafunihu wi nerena?

¹⁶ Murumiwi Juwawu owadhivela addibile amunroromeloni ni owilibihera vanlubale wihina akavihere epaddi yewa yomuzimuni. Eyo enowoneya wa dholaga avahiliye addibile, dhili mmakartani mwaaye mararu avetheliweye oleba. Sohagalasa onona wi alobwana ni ahiyana oodhivela ninga Juwawu ehisakuliwa wi yathonge ni Kiristu odhulu! — 1 João 2:27.

¹⁷ Sathima wiwelela dholaga nivahiwihu muwari mwa yohudhera ela. Othome weeddave mwebaribarini, ni omwiwelela Yehova wa dhatene oneriwe. Omuhudhere Bibliya ni ororomele dhinahudheriwe. Olibihe nroromelo nawo ni Yesu. Okoodde dhohudhiha dhaathu ni dhaale esukume ebaribari enaniwoga obure. Kuwanganyedhiwege akala oli Namona a Yehova obe naari, newene kuwonege yotheega ninga ethu yovudhuwana. Wiwelelege malamulo a Yehova. Wakavihere addibila wi yeddegeve mwebaribarini wodhela walevelela ni wakavihera ale enahowela. Nerana ndo, naari nifwanyiwaga makathamiho, nnerege odhowave neddaga mwebaribarini.