1. Yehova oonile ddi mwigumini mwehu?

KADDA muthu wa iyo amwithanile di Yehova wihina amulabelege. (João 6:44) Ela enatapulela ddi? Enatapulela wihina Yehova arajhihile opendda murima dhaathu atene eelabo yavati, vano oliye ofwanya ethu yapama mwigumini mwehu, murima wopwaseya onna odhivela nuliye. (1 Cró. 28:9) Yehova ohunona, onowoona ,dhinupadduwela ni onowudhivela. Onona eyo enonlibiha maningo!

2. Yesu onanikavihera addi wonelamo wihina Yehova ononithuwathuwela?

² Ohiya Yehova wuthuwathuwelave, oliye onowathuwathuwela addibila aatene ammuroromeloni. Moladdaniha, Yesu amuliganihe Yehova ninga namakukula mambila. Namakukula akanna mambila 100, vano nimbila nimodha nnorimelavo vanikuruni vale, onere ddi? ‘Oliye kanahiye 99 omwangoni vano adhowe asayele nne nirimele?’ Namakukula ole afwanya nimbila naaye, kanadha athukulela mmiri wihina uukuthena, mwaha woorimela, mbwenye anere ohagalala vanlubale mwaha ohufwanya. Nladdaniho nna, nnanihudhiha ddi? Vamentoni va Yehova, kadda nimbila thathima. Yesu ohusoriha egi: ‘Ababa eri odhulu, kinafuna newene mmodha a nikuru nenna ning’ono orimela.’ — Mat. 18:12-14.

3. Muwari mwa yohudhera ela, nnaasuze ddi?

³ Mwebaribarene kiyakale efunelo yehu omuukula ddibila obe murogola. Nnere ddi wihina nahakwakwathuse athu amodha? Kito akala athu amodha ewogiliwa ehinitakalela, nnere ddi? Yohudhera ela nnere wawakula makoho ala. Mbwenye nihinathi, nnafuna naanone ‘ahima’ ala baani asorihile Yesu va Mateus kapitulu 18?

4. ‘Ahima’ ala baani?

⁴ ‘Ahima’ ala enagiwana anamahara a Yesu. Kinapwatha yaka ngasi enniwana, ‘aliwa ahima’ mwaha enowenya ohudhera ni Yesu. (Mat. 18:3) Naarive yahili a elabo modhave, ekanne mweddelo ni moonelo wohiyana mmodha nimukwaye, atene yala ehikanna nroromelo ni Yesu. Bumwaha Yesu agamudhivela vanlubale kadda muthu. — Mat. 18:6; João 1:12.

5. Yehova anakala aavi, mudharaaye uukuliwa obe akwakwathusiwa?

⁵ Kadda muthu ‘waahima’ ala dathima vamentoni va Yehova. Wihina noonelemo pama mubuwelo wa Yehova wodhela muselu ola, kawubuwele ahima. Aliwa bathima vanlubale vamentoni vehu. Nnofuna wabarela mwaha aliwa kinna kopolo dhowiwakihedhana, newene dhithu dhowinjhiva kinonne, teto kinna thotho ninga apogo. Dhinonipiha mbani obe nnotakaleliwa namona muthu awonihaga goyi. Ohiya eyo mubuwelo ola onathabwa akala ahimaya kinasamaleliwa pama. Ni makalelo mamodhave, Yehova anafuna anibarele ni onowukuwa vanlubale obe onotakaleliwa amoona muthu awukulaga obe akwakwathusaga adharaaye! — Isa. 63:9; Mar. 9:42.

6. Mowiwanana ni 1 Coríntios 1:26-29, athu eelabo enawona aavi anamahara a Yesu?

⁶ Makalelo mamodha anamahara a Yesu enooneyiwa ninga ‘ahima’ baavi? Elabo enavaha thima athu oorela, oovuwa ni owedha, yala binoniwa ninga athimaya. Mbwenye anamahara a Yesu kili ndo. Bumwahaya athu eelabo ‘ahima’ ala kinaavaha thima, enawona ninga athu ohukanna mabasa. (Omwileri 1 Coríntios 1:26-29.) Mbwenye Yehova kanawona ndo.

7. Yehova anafuna wi nawonege addibilihu nimakalelo baani?

⁷ Yehova onowadhivela adharaaye atene, naari akala yambele omulabela kale obe dhino vevala. Addibila atene ni arogolaya bathima vamentoni va Yehova. Bumwahaya, nihiyoya nawonege ninga athu athima. Dholebela dhinihina ‘mwadhivelege addibilinyu atene amunroromeloni’ ohiya osakulanaga. (1 Ped. 2:17, osugwe.) Niivahedhelege ni murima watene wihina nabarele addibilihu ni nasamalelege yahowelaga ethu-sithu. Noona wihina nihawukula obe ethu niwogilihu ehatakalela, kanikalege ninga kanerilena ethu yabure, obe wubuwelaga wihina oliye onothabwiha. Noona wi mukwihu ola kanaliba otakaleliwa, kanere: Akala dhihimpa mbani oliye dinafwanelela ogilevelela. Enaathukulela athu amodha otakaleliwa ddiniyani? Mwaha wamakalelo eleliwiwa addibila amodha eniwona ninga kinna thima, bumwahaya kinaliba otakaleliwa. Amodhaya mwaha wookala axa mwibaribarini, kinahudhere makalelo ovilelana ohulogomana waddibila. Naarive nnone obe nahinonne ethu baani yathukulele otakaleliwa, naajege makalelo oonona ni othapanyedha ethu enatakalela. Teto muthu yole anna ekalelo yela yotakaleliwa bure-bure, nuliyeya anohowela wilibihera wihina asaddule ekalelo ela anniyena, eyo enere omukavihera okanna murenddele ni addibila amodha.

8. Mubuwelo baani wamaJudewu wavolowele anamahara a Yesu?

⁸ Mwahaya Yesu adhe aasorihege ‘ahima’ ala? Mwaha anamaharaye baamukohile yegi: ‘Mwebaribarene munddimuwa aMumweneni wodhulu baani?’ (Mat. 18:1) MaJudewu owinjhiva amudhidhi yole, yathabwa weekela  thima ohudhera ni okala muthu oovuwa. Namahudhera dhaala aakulelaga muselu yola onosoriha egi: “Athu yofiyedha okwa mwaha wofuna othithimihiwa, ononiwa ninga muthu apama, okala muthu oovuwa ni orihiwa.”

9. Anamahara a Yesu, yofwanelela wilibihera wihina ewanena ddiniyani?

⁹ Yesu ahinona wi anamaharaye yofwanelela wilibihera yegi ehiye muzimu ola wowiliganiha, mweddelo yola wathabwile ononiwana maJudewu. Yesu wawaddela anamaharaye wera: ‘Munddimuwa vaari veenyu, akale ninga mwana muzombwe, teto ole anaholela, akale ninga ole anaalaba akwaye.’ (Luc. 22:26) Nawonaga athu amodha ninga anlubale onikwaranya iyo, nnowiyeviha ninga ‘mwana muzombwe’. (Fil. 2:3) Neragana ndo, nnere orabela wakwakwathusa athu amodha.

10. Yolaga baani yamurumiwi Pawulo enafwanelela oparihedha pama mabasa?

¹⁰ Addibila atene ehikanna ethu-sithu enanipithiwana. Iyo nnere owedha woona nasugwaga dhikalelo dhewa dhapama. Niparihedhe mabasa yolaga yamurumiwi Pawulo avahiliye addibila oKorintiyu, enihina: ‘Anuhiyaniha ni athu amodha baani? Mwebaribarene, ethu baani onniwena wahivahiwiwe? Akala dhithu onniwena were ovahiwa, kito onithukulela ddi ekalaga ninga kuwere ovahiwa?’ (1 Cor. 4:7) Naambela wubuwela wihina iyo dili athimaya wapitha amodha nnofwanelela okala pasope. Naari akala ddibila ohunona owoga pama mwaha wavathaddo obe murogola akovelele pama makalelo ofugula ohudhera wa Bibliya, atene yala nthithimihona ndhowege wa Yehova baahi.

11. Nladdaniho na mwene ni mudharaaye nnanihudhiha ddi?

¹¹ Mudhidhi vang’ono Yesu agalagile anamaharaye wihina ehakwakwathuse amodha, oliye wawaddela nladdaniho dhala na mwene ni mudharaaye. Mwene omulevelela mudharaaye mangawu manlubale anniyena ahandiye waaliva. Vasogolova mudhaari kafunile omulevelela namalabaye mwana mangawu anniyena. Mwene nuwiwa yereye oliye onvokera mukambura mudhaari ole abure. Ela enanihudhiha ddi? Mwinyene Yesu onosoriha egi: ‘Ababa oodhulu enere wuweranani emodhave, kadda muthu wa nyu ahimulevelelaga ddibile ni murima watene.’ — Mat. 18:21-35.

12. Makathamiho baani enadha mwaha ohalevelela athu amodha?

¹² Ekalelo ya mudhaari ole kimonihile goyi oliyeneve baahi, mbwenye ehawoniha goyi athu amodhaya. Vobajha oliye kanna odhivela, teto ahimwerela ethu yabure namalabaye: “‘Onvokera mukambura ofiyedha mudhidhi yoyo ahogolosiye mangawu anniyena.’ ‘Vano adharaaye nuwoona dhaapadduwe, aliwa okwerebeya vanlubale.’” Nimakalelo mamodhave dhithu nnerihuna podi wadhelana makathamiho athu amodha. Ddibila anerela ethu yabure iyo nakoodda omulevelela enaapadduwe ddi? Yobajha iyo nnomukula, kaannampwathege obe kaanamonihege odhivela. Yanabili addibila amodha ammulogoni yoona wi kanneddihana pama nddibila ole aliwa enerege wanganyedha.

13. Ohudhere ddi ni yopadduwa ya piyonera anithaniwa Crystal?

¹³ Nalevelelaga addibilihu ni arogolihu, athu atene enokavihereya. Siyeyo piyonera anithaniwa Crysta onenliyemo. Murogola ammulogoni ahimuwogela ethu yabure. Crysta anowoga egi: “Malabo mamodha madhu aye yakala ninga anagisuva ni mbeni. Nadhowaga mmalaleyelo kagafuna ogwela karo modhave mwagweliye. Oviheya waga ni mmalaleyelo  wambela ovuguwa, vano miyo wambela okwerebeya.” Crystal ubuwela wihina ohukanna razawu mwaha onyanyuwa waye. Mbwenye oliye kaakoyile ntxiga. Ohiya eyo wiyeviha ni orumedha yolaga ya mBibliyani enafwanyeya mu Sentinela a 15 a Outubro a 1999 yohudhera enawoga “Perdoe de coração.” Crystal omulevelela murogola ole. Oliye onowoga wi: “Vano ginowonelamo wi iyo atene nnowilibihera wihina niware emuthu exa, teto Yehova ononilevelela ni murima watene malabo amatene. Yakala ninga gere orula mutholo wonyemela gapwathenlimi vamuru. Nuwindo gahiwedha ohogolowela ohagalala gannimina.”

14. Mowiwanana ni Mateus 18:21, 22, ethu baani yamurusa murumiwi Peduru, ki naafwanyiwaga makathamiho mamodhave enaanikavihere ddi?

¹⁴ Iyo nihinona wi nnofwanelela walevelela athu amodha, mwa ela siri ethu yapama yofwanelela weriwana. Naari dhigarive ndo olevelela podi okala ethu yorusa. Podi wera murumiwi Peduru malabo mamodha womurusa olevelela. (Omwileri Mateus 18:21, 22.) Akala we ohukanna makathamiho mamodhave enukavihere ddi? Ethu yobajha wubuwele dila ngasi Yehova uleveleliye. (Mat. 18:32, 33) Naari nahifwanelelaga Yehova anonilevelela malabo amatene. (Sal. 103:8-10) Ohiya eyo ‘ni iyowa nnofwanelela odhivelana mmodha nimukwaye’. Olevelelana kahiyo ethu nnerihuna nafuna. Olevelela enakala ninga mangawu ninnihuna ni addibila vamodha ni arogola. (1 João 4:11) Yanabili kagirati wubuwele mareeliho baani enakalavo walevelelaga athu amodha. Onomukavihera muthu ole aviriganihe, onodhana murenddele mmulogoni, onobarela wandana wawo onniwena ni Yehova ni onorula mutholo opwatheliwe. (2 Cor. 2:7; Col. 3:14) Yanatharu olobele omulobaga Yehova ole ananiruma wihina nlevelelege. Kuwenye wihina Saddana agujhule murenddele ninnihuna ni addibilihu. (Efé. 4:26, 27) Nnikavihero na Yehova we kunadha omorela mmurakoni mwa Ddiyabo.

15. Mowiwanana ni Colossenses 3:13, nnere ddi nona wi ddibilihu ohunuukula?

¹⁵ Kito akala ddibila ammulogoni oherana ethu yutakalele? Onere ddi? Wilibihedhe wihina vikale murenddele. Onfugulele murima wawo Yehova. Omulobe wihina amureelihe muthu ole uwukule, ohiya eyo omulobe wihina ukavihere woona ekalelo yapama anna muthu ole dhikalelo dhinamuthukulela Yehova omudhivela. (Luc. 6:28) Akala kunawedha omulevelela eriliyena waaje makalelo apama othapanya ni oliye. Sapama ohuddiwala wihina ddibilihu kerilena yapudhave. (Mat. 5:23, 24; 1 Cor. 13:7) Nlabo munathapanyedhinyu muladduya onaddiwale ela. Kito oliye ahirumedha otxokotxela muladdu ole ni miyo? ‘Mudhowegenave nvilelanaga mmodha ni mukwaye.’ Kumwidde ddibilo (Omwileri Colossenses 3:13.) Ethu yathimaya, kumukoyele ntxiga, eyo podi ononga wandana onniwena ni Yehova. Kuwenye ethu-sithu wukwakwathusa. Ni makalelo yala onere otonyihedha wihina wandana onniwena ni Yehova onookwaranya dhithu dhatedhene. — Sal. 119:165.

16. Mutholo baani anna kadda muthu wa iyo?

¹⁶ Nihikanna ofuru winlubale womulabela Yehova mowiwanana ninga ‘nikuru nimodhave nnamakukula mmodha baahi.’ (João 10:16) Livuru Organizados para Fazer a Vontade de Jeová epaddi 165, enihina: “Woona wi niweya onokavihereya mwaha wiwanana wula mutholo ola bwawo wihina wiwanana wula odhowegeve.” “Mowindo nihudhere makalelo owawoona addibila ninga Yehova anawoniye.” Vamentoni va Yehova iyo “atene nili athima.” We onawoona ndo addibila ni arogola? Yehova anovaha thima dhatedhene nnerihuna ni makalelo nnasamalelihu addibilihu. — Mat. 10:42.

17. Nihiikoma wihina neere ddi?

¹⁷ Iyo nnowadhivela addibilihu. Bumwahaya nnafuna ‘nrabele ekalelo yowakwakwathusa obe yowathegiha addibilihu.’ (Rom. 14:13) Nnawoona addibila okala athima onikwaranya iyo, teto nnafuna nalevelele ni murima watene. Kuwenye wihina muthu uukwakwathuse. Ohiya eyo wikome ‘niilibihere werana dhithu dhinadhana murenddele ni dhithu dhinanithukulela olibihana mmodha ni mukwaye.’ — Rom. 14:19.