Olupe wihina wone muselu dhilimo

Olupele muselu wogwaddela

YOPADDUWA YA MWIGUMINI

Yehova ohugikavihera kadda thalo gathomimi

Yehova ohugikavihera kadda thalo gathomimi

VAALIGI mambesi nduwa neraga okuma yaka ya 1984. Mudhidhi yole nyumba gakalesimi yaali yapama, murudda woreela wo karaka, oVenezuela. Gidhowaga omabasani, miyo wambela wubuwela ethu gafwanyiligimi mu Sentinela muxa aarumile. Sentinela ola asoriha makalelo enanoona amwanddamanihu. Gisugwaga nyumba ndhe miyo wambela wubuwela: “Amwanddamani aaga enagoona avi? Enagoona ninga namalaba oorela obanku? Obe naari ninga mudhaari a Mulugu mbwenye analaba obanku wihina aajhihe amudhaaye?” Yowakulaya kiyoneleyamo newene kiyagidhivela. Vano miyo othoma wihina gisaddule egumaaga.

Miyo gibaliwe 19 a Maio a 1940, luwani enithaniwa Amioun, oLibano. Yaka vang’no, iyo otamela luwani yo Tripoli. Murala gileliwimi waali wodhivela ni wohagalala wamulabela Yehova. Naali ahima atanu miyo gaali ethogohiya, anahiyana araru ni anaalobwana abili. Ababa kiyahela mburo wobajha osayela korowa. Mudhidhi wowinjhivene najha nimuhudheraga Bibliya, woona mutugumano ni olaleya muthenga dhomwene.

Mmulogoni mwehu yahikalamo addibila owinjhiva yaari oothikitheliwa, mmodha ithaniwa Michel Aboud. Duliyene eddihesa livuru nithanihu livuru na mulogo. Michel ahudhere ebaribari o Nova York, duliyene afiyilena ebaribari o Libanu, yaka ya 1920. Nuwindo mulogo wehu wawakela arogola abili yahudhere eskola yo Jileyadi, Anne ni Gwen Beavor. Miyo ginowubuwela makalelo Michel aarihiye arogola ala ni owileva wihina akavihere. Iyo wandana pamadhene naarogola ala. Nuuvira mwana yaka, gahihagalala vanlubale omugumanana Anne elabo yo Estadu Unidu. Nuuvira mudhidhi, miyo ogumana ni Gwen alaba Beteli yo Londres, ni mamune Wilfred Gooch.

NLALEYAGA ELABO YO LIBANU

Miyo ngaali muzombwe, oLibanu kiyariwo Anamona a Yehova owinjhiva. Mbwenye mabasa oolaleya iyo kanavudhuwana. Iyo nowalaleya akwihu muthenga dha mBibliyani, naari niharahariwaga nanamaholela gereja. Miyo ginowubuwela dhithu dhinipadduwele.

Nlabo nimodha miyo ni murogolaga Sana neraga olaleya operediyuni. Nuwindo, padiri dhala odha onifwanya perediyu naarigihu. Podi wera akala muthu aamwaddelege wihina iyo nnolaleya. Padiri ole wambela omobela owali murogolaga. Vano oliye onyanyuwa ofiyedha omuthukuma Sana omorela vaskadani, oliye wiporosa. Dhendho dhereyaga muthu dhaala waligarela asupayi. Asupayi ale nuufiya, nuupama omuloba muthu wihina amusamalele Sana, nuwindo omuthukula padiri ole omudhowana odelegasiya. Asupayi ale woona wi padiri ole ahikanna futhi. Musupayi mmodha omukoha: “We oli munyapadiri baani, oneeddela dhopadiri obe oli majhuba?”

Ginowubuwela nlabo dhaala neddilegihu olenddo woolapa ndhowaga olaleya. Mulogo wehu omwalugari munibasi wihina iyo ndhowe ni addibila wolapela ni luwanihu. Dhatedhene dhera weedda pama, vano padiri a luwani yele onona wi iyo neera olaleya murudda waye. Oliye vamodha ni athu amodha awithaniliye odha wihina enigare murudda ole nalaleyihu. Ofiyedha onivonya ni mabwe. Labo nenne ababa ofiyedha opwesiwa. Ginowubuwela wi kove ya baba yaaligi nikameve. Ababa ni amama odhowa ogirati mmunibasini mune, addibila amodha yahanlege werana emodhave. Ele enanipadduwelaga labo nenne miyo kaginadduwala. Amama efufuthaga kove ya ababa, aliwa wera: “Yehova, kamwerena, kaaleveleleni athu ala. Aliwa kinona ethu eneriwa.”

Kahiyo yela baahi. Ginowubuwela labo nimodha nadhoweligihu waapada amudhihu elabo nibaliwihu. Iyo nuufiya vaade vaavo, iyo onfwanya namaholela gereja. Bispu ole ahinona wi ababa Anamona a Yehova. Naarive nganna yaka tanu baahi, oliye ogisugwa nuwindo ogikoha: “We ofiyedha peeno wahinabaddizeliwa ddi?” Miyo omwakula: “Miyo giri mwana. Wihina gibaddiziwe, enohowela gimunone pama Bibliya ni gikanne nroromelo nooliba.” Bispu ole kaadhiveliwe makalelo gaamwakulimi. Oliye wawaddela avo egi: Mudhulo ola kaleleye pama.

Dhithu ninga dhendha dhowukula, kadhithabwile ogipadduwela. Mwebaribarene, anamurala oLibano athu apama ni ehinona wawakela aleddo. Malabo owinjhivene noothapanya muselu dha mBibliyani teto owinjhivene yorumedha omuhudhera Bibliya.

IYO OTHOMA WIHINA NTAMELE ELABO EMODHA

Mudhidhi yole miyo gisuzaga oskola, ddibila dhala oVenezuela odha onaredhela oLibano. Mutugumano oonesa mmulogoni mwehu, mudhidhi vang’no, wambela onveva murogolaga Wafa. Vasogolova aliwa otelana nuwindo otamela oVenezuela. Wafa ookanna munukwela ni iyo, bumwahaya, alebaga makartaye, yowoniha wihina efunelo yaye yaali wihina ababa ni iyo ntamele oVenezuela. Nuuvira mudhidhi, iyo atene otamela oVenezuela!

OVenezuela nifiyilewo yaka ya 1953, nuwindo iyo okalaga murudda wo Karaka, waddamela nyumba ya presidente. Woona wi gaali mwanamuzombwene, miyo gootikina vanlubale gamonaga presidente aviraga ni karo yaye ya korowa, ni mutorista ayene. Mbwenye wababa kiyaali yokweya olemela elabo ele, ewogelo, mweddelo, yojhaya ni makalelo yaridhiwa ni yavihiwa. Vano, elemelelaga elabo ele opadduwa ethu yowukuula.

Ababa. Amama. Miyo ni amudhaga yaka ya 1953 nuutamela oVenezuela

IYO OFWANYIWA NGOVI

Ababa mwiili wambela wawiddela. Iyo wasegedheyana, mwaha ababa yaali athu akopolo ni yanna egumi yapama. Mwebaribarene miyo kaginawoonege ababa egaali aredda. Nuwindo, aliwa ofwanyiwana oredda onithaniwa kanser, ohiya eyo yohowela woperariwa. Yowukulihaya nuuvira sumana modha aliwa okwa.

Gubuwela okwa wa baba mulomo sinagunma. Miyo ganna yaka 13 baahi. Iyo wukuuwa vanlubale. Yakala ninga elabo ela yere ogumuwela vati. Wahivira mudhidhene, amama ehirumedhaga wihina mamuniwa kawo. Mbwenye iyo orumedha wihina kanikune moono ehinipadduwela, nnikavihero na Yehova iyo wakwaranya makathamiho ale. Miyo nuwakwaniha yaka 16, omariha osuza oKaraka. Goofuna vanlubale okavihera ojhiha emudhaaga.

Murogolaga Sana ni mamune, Rubén, yaali athu yagikavihere vanlubale wunnuwelavo epaddi yomuzimuni

Mudhidhi yola, murogolaga Sana otelana ni ddibila Rubén Araujo, ahudhere eskola yo Jileyadi nuwindo ohogolowela oVenezuela. Aliwa othoma wihina etamele oNova York. Amudhaga wera enofwanelela gidhowe gasuze universidadi yoNova York, bumwahaya miyo odhowa okalaga ni murogolaga ni mulamwaaga. Aliwa yogikavihera vanlubale epaddaga yomuzimuni. Ohiya eyo, iyo natugumanesa mulogo wa ewogelo yeespanyol o Brooklyn, mmulogoni muna mwahikala addibila owinjhiva athotho. Addibila abili gannimina ofuru wowanona aali Milton Rangel ni Frederico Francis, aabilene yalaba Beteli yo Brooklyn.

1957 labo gibaddiziwaga

Gajaga omariha ohuhudhera waaga universidade yoNova York, miyo wambela wanganyedha makalelo geddihemi egumaaga. Miyo gahileri muselu mu Sentinela dhawoga woodhela okanna dholuba dhomuzimuni ni gakirati gubuwela werana ndo. Gasugwaga mapiyonero ni mabetelita mmulogoni mwehu, gowoona wi aliwa yohagalala, miyo gagana gikale ninga aliwa. Mbwenye miyo gaali gahinabaddiziwe. Nuwindo miyo wonelamo wi ginoofwanelela opeleka egumaaga wa Yehova wihina gibaddiziwe. Siyeyo gerilimi. 30 a março a 1957, miyo werana thalo yathima mwigumini mwaaga, miyo obaddiziwa.

DHOTHOMA DHATHIMA

Miyo nuumala obaddiziwa, miyo wubuwela thalo yoharela — wabajha mabasa amudhidhi wamutene. Efunelo yaaga yokala piyonero yowunuwave kadda labo, mbwenye gowonelamo wihina werana thalo ela kiyakale ethu yokweya. Gere ddi wihina gakwanihe ohudhera wa universidadi ni wapara mabasa opiyonero? Nahithapanyedha vanlubale ni amudhaga oNova York ni oVenezuela, wihina gawonelihemo amama ni addibilaga wi gihithoma wihina ginere ohiya ohudhera o fakuldadi, gihogolowele oVenezuela wihina gaparege mabasa opiyonero.

OKaraka gihogolowelewo mweri wa Junho a 1957. Mbwenye gowonelamo wi emudhaga kayedda pama. Yohoweleya wihina muthu mmodha emudhaga alabege. Miyo gaakavihere addi? Miyo wafwanya mabasa wihina gilabege mbanku, mbwenye gafunimi fuukala piyonero. Ola waali muselu wagithukulele ohogolowela oVenezuela. Nuwindo miyo othoma wihina gerena dhabilidhene. Muwari mwa yaka dhowinjhivadhene, gihilaba mudhidhi wowinjhivene mbanku wula gilabaga ninga piyonero. Ola waali mudhidhi gapinyaminyiwimi ni mabasa, ohiya eyo wohagalasa vanlubale!

Ethu ethabwile ogihagalasa, miyo omunona murogola dhaala ithaniwa Sylvia, murogola owoma anna odhivela ni Yehova. Oliye otamela ni amudhaaye oVenezuela. Nuuvira mudhidhi iyo otelana, nuwindo wabala ahima abili, mwana mulobwanaya ithaniwa Michel ni ndina nimodha (Mik) mwana muhiyanaya ithaniwa, Samira. Ohiya eyo yohoweleya wihina gaasamalelege amama, bumwahaya gidhe gawithanege wihina edhe ekalege nihiyo. Mwaha wa mutholo yola gannimina vemudhini, yohoweleya wihina gahiye mabasa a mudhidhi wamutene, mbwenye efunelo yaaga yokala piyonero kagaddiwale. Gakuma feriya, miyo ni Sylvia nopatha mudhidhi yola iyo olaba ninga mapiyonero ookavihera.

THALO EMODHAYA YATHIMA

Anaaga yera ohudhera muskola, nupadduwa ela gisorihilimi mundduli. Ginorumedha wi miyo gaali muthu oreela. Akwaga galabesimina obanku yahiginona wi gaali muthu apama. Naarive dhigari ndo, ethu gafunesimi sowi athu egonege ninga Namona a Yehova. Mubuwelo ola kagawedha ohiya . Nuwindo miyo ni mwaraga, iyo ogirati wihina ntxokotxele makalelo oweddiha korowa. Miyo gahere gaahiya mabasa obanku, gere okanna korowa dhowinjhiva. Woona wi kananna mangawu, miyo woona wi nahakweyihe egumihu, nere okanna korowa dhowijhihana mudhidhi wowinjhivene.

Kiyaali ethu yokweya ohara thalo yela, mbwenye mwaraga odhivela ni amama ogikavihera. Dila yanabili, miyo gere owedha wapara mabasa amudhidhi wamutene. Ethu yohagalasa vanlubale! Dhithu gajheherimi osogolo dhaari dhapama, mbwenye mudhidhi vang’no iyo wakela muselu wohagalasa.

MUSELU WOHAGALASA!

Mwanihu anatharu Gabriel, waali nvaho wanihagalase vanlubale

Nlabo nimodha, medikwihu onaddela wihina Sylvia ohukanna wari. Iyo abili ohagalala vanlubale! Naarive dhigari ndo, kagadduwala thalo ela gathomilimi — yokala piyonero. Yere ogikweyela olaba mudhidhi wamutene? Iyo osaddula egumihu wihina niwananihe ni mwana afuna obaliwa. Ki porogarama ole ganpaddilimi wihina gikale piyonero?

Vano nugarati wihina nthapanyedhe dholuba dhehu, iyo wera kanidduwale ethu nathomilihu omambelelowene. Mwanihu Gabriel abaliwe Abril a 1985. Yaka emodhave mweri wa Junho miyo wahiya mabasa gaparesimi obanku, vano miyo othoma wapara mabasa amudhidhi wamutene. Nuuvira mudhidhi vang’no, miyo othomiwa wihina gikose epaddi ya Komisawu yoFiliyale. Woona wi Beteli kaali elabo yoKaraka, malabo menli obe mararu vasumanani, gowedda olenddo wowakwana 80 kilometuru wihina gifiyewo.

MASADDUWO MAMODHA

Beteli yakala luwani yo La Vitoriya. Vano, wihina naddamelewo, iyo otamela wewene. Ela yaali thalo enlubale nathomilihu. Kaginna madhu wihina gatamalele amudhaga dhatedhene egerehedhiwa. Nikavihero newa nigikavihera vanlubale. Murogolaga Baha wipeleka wihina asamalelege amama. Mike ahimala otela, mbwenye Samira ni Gabriel yakala ni iyo. Otamela o La Vitoriya yatapulela wahiya akwiwa atene mundduli. Ohiya eyo, mwaraga Sylvia, alemele okala luwani enlubale, yohowela alemele okala luwani eng’no. Iyo atene nohowela okala nyumba eng’no. Mohanganyedha, okuma oKaraka otamela o La Vitoriya yaali thalo enlubale.

Gabriel otela vano Samira okalaga yeka. Yaka ya 2007 miyo ni Sylvia, withaniwa wihina nalabege oBeteli, ofiyedha peeno nnafwanyeya wewene. Mike, mwanihu apogoya, namaholela mulogo ni analaba ninga piyonero ni mwariye, Monica. Gabriel namaholela mulogo ni anakala Witaliya, ni mwariye Ambra. Samira, ohiya okalave piyonera baahi, analaba kambilinya dhokavihera dha oBeteli.

Ni mwaraga Sylvia, oBeteli yoVenezuela. Mike, mwanihu apogoya, ni mwariye Monica. Mwanihu, Samira. Mwanihu, Gabriel, ni mwariye, Ambra

DHAHERE DHENYEYAGA OHOGOLOWELA MUNDDULI, GOWERANA DHIMODHAVE

Mwigumini mwaga, giherana dhithu dhowinjhivadhene dhathima. Mbwenye kaginsinyuwa. Dhahere dhenyeyaga ohogolowela mundduli, gowerana dhimodhave. Miyo ginotamalela vanlubale oneti ni mutholo Yehova agivahiliye mmabasani mwaaye. Nuuvira yaka dhowinjhivadhene, gihonelamo wihina ethu yathima okanna wandana wooliba ni Yehova. Akala nnofuna othoma ethu-sithu podi ekale eng’no obe enddimuwa, Yehova podi onivaha murenddele ‘onapitha mubuwelelo wa muthu.’ (Fil. 4:6, 7) Miyo ni Sylvia nihagalala vanlubale olaba oBeteli. Kananganyedha wi Yehova ohunireliha ni ohuneddiha kadda thalo nathomihu.