OHUDHERA 46
JHIBO 49 Ginere omuhagalasa Yehova
Ddibila, onna wilibihedha wihina okale mudhaari okavihera?
“Ovaha winothabwa ohagalasa opitha ovahiwa.” — DHO. 20:35.
DHITHU NNAAHUDHERIHU
Wakongomedha addibila ebaddiziwe wihina yilibihedhe okala adhaari ookavihera.
1. Murumiwi Pawulo awoona aavi adhaari ookavihera?
ADHAARI ookavihera, addibila enaapara mabasa athima mmulogoni. Murumiwi Pawulo owavaha thima alobwana ala oororomeleya. Motajhiha, alebelaga karta addibila ooFilipo, oliye wavahedhela malojhelo adhaari ookavihera ni anamaholela mulogo.— Fil. 1:1.
2. Ddibila Luis aniwoona aavi mwaha okala mudhaari ookavihera?
2 Addibila owinjhiva ebaddiziwe enna yaka dhohiyana-hiyana, enohagalala mwaha okavihera mulogo ninga adhaari ookavihera. Motajhiha, ddibila Devan athomiwe ninga mudhaari ookavihera aganna yaka 18. Vano ddibila Luis athomiwe ninga mudhaari ookavihera aganna yaka 50. Ddibila Luis anowoga eegi: “Miyo ginohagalala vanlubale okanna oneti wokavihera mulogo ninga mudhaari ookavihera, thabwathabwa gubuwelaga odhivela enagoniha addibila!” Mwebaribarene adhaari ookavihera owinjhiva enowoona odhivela waddibila ndala ninga ddibila Luis.
3. Ohudhera wula, nnawakule makoho baani?
3 Akala we ohubaddiziwa ni kunathi othomiwa ninga mudhaari ookavihera, ononamo aavi okanna yoluba ela? Mbwenye ddiniyani enukavihere okala mudhaari ookavihera? Ki ethu baani Bibiliya anawogiye onahoweliwe werana wihina okale mudhaari ookavihera? Nnere woona yowakulaya muwari mwa ohudhera wula. Mbwenye nihinathi wawakula makoho ala, kabeni nawoone mabasa enaapara adhaari ookavihera.
ADHAARI OOKAVIHERA ENAAPARA MABASA BAANI?
4. Adhaari ookavihera enaapara mabasa baani? (Osugwe fotu.)
4 Adhaari amodha ookavihera enasamalela murudda nnalaleyihu ni malivuru ehu nnalabihedhihu mmalaleyelo. Amodhaya enaakavihera mabasa oowomihedha Nyumba Yomwene. Teto adhaari amodha podi othomiwa wihina ekale anamatonyihedha a mmulogoni, olaba ni awudiyu ni vidiyu mudhidhi wa mutugumano. Adhaari ookavihera owinjhiva, enowapara mabasa ohiyana-hiyana. Mbwenye addibila ala boororomeleya ni owithwelavo epaddi yomuzimuni, teto enoparihedha mabasa ndhe enahudheriwa mBibiliyani. Ohiya eyo, aliwa enowadhivela vanlubale addibila ni arogola. (Mat. 22:37-39) Ki akala ohubaddiziwa, onere ddi wihina othomiwe ninga mudhaari ookavihera?
Adhaari ookavihera enomutajhiha Yesu ni enosamalela dhofuna dhaathu amodha (Osugwe ddima 4)
5. Ddiniyani onahoweliwe werana wihina othomiwe ninga mudhaari ookavihera?
5 Bibiliya anowoga dhikalelo ddibila anahoweliye okanna wihina athomiwe ninga mudhaari ookavihera. (1 Tim. 3:8-10, 12, 13) Ononamo aavi ohudhera dhikalelo ndha ni wilibihedha oparihedhe mabasa mwigumini mwawo? Mbwenye wahinathi wubuwela okala mudhaari ookavihera, waabihe opendda ethu enuthukulela okala mudhaari ookavihera.
DDINIYANI ENUTHUKULELA OKALA MUDHAARI OOKAVIHERA?
6. Ddiniyani enuthukulela okala mudhaari ookavihera? (Matewuji 20:28; osugwe yavakapani.)
6 Yesu ohunihiyedha yotajhiha yapama nnahowelihu ohara. Mwaha dhithu dhatedhene eriyena, eerana mwaha wa odhivela anniyena ni Yehova vamodha ni athu. Odhivela anna Yesu, wahimuthukulela wakavihera athu ni wapara mabasa owiyeviha. (Omwileri Matewuji 20:28; Juwa. 13:5, 14, 15) Ni weya weragana dhithu dhatedhene nuudhivela, Yehova anere wureeliha ni anere wukavihera wihina wande wakwanihedha yoluba yawo yokala mudhaari ookavihera. — 1 Kor. 16:14; 1 Ped. 5:5.
Yesu asuwaga manyalo aanamahara aye, afuna aahudhihe wi aliwa yohowela okala awiyeviha ni wakavihera amodha, ohiya ofunaga okala athu athima wapitha amodha (Osugwe ddima 6)
7. Mwahaya bwaddi ddibila anohowela osukuma ekalelo owithukula ni ofunaga okala ovuwa?
7 Peeno, athu owinjhiva enowaatikina athu owithukula ni enasayela okala oovuwa. Mbwenye nlogo na Yehova kanili ndo. Mudhaari ookavihera anaakavihera addibila amodha mwaha wa odhivela ndala ninga Yesu, kanasayela okala akopolo, owithukula, newene kanasayela okala athima wapitha amodha. Motajhiha, ahere ddibila owithukula athomiwa ninga mudhaari ookavihera, podi wera oliye kaarumedhe waapara mabasa owiyeviha, enahoweleya wihina mambila a Yehova esamaleliwe. Mwaha wihina oliye anoothabwa wivaha thima ni anubuwela wi kanahowela wapara mabasa owiyeviha. (Juwa. 10:12) Yehova kanareeliha athu enerana dhithudha mwaha wowithukula obe enasayela wooniwa ninga athu athima wapitha amodha.— 1 Kor. 10:24, 33; 13:4, 5.
8. Yolaga baani Yesu avahiliye anamahara aye 12?
8 Malabo mamodha anamahara a Yesu, yosayela okanna mutholo dhathima ni efunelo yabure. Motajhiha, kasugwa yapadduwe ni anamahara abiili a Yesu, Tiyagu ni Juwawu. Aliwa omuloba Yesu wihina aavahe mburo wathima Mumweneni. Mbwenye Yesu kathethenle mwaha aliwa okanna efunelo yokala athima wapitha amodha. Ohiya eyo, oliye owoga ni anamahara aye 12 eegi: “Ole anafuna okala munlubale vaari veenyu akale mudhariya, teto ole anafuna okala owambela vaari veenyu akale mudhariya.” (Mar. 10:35-37, 43, 44) Ddibila ubuwelaga okala mudhaari ookavihera ni efunelo yapama, eli wakavihera amodha, oliye anookala ninga nvaho ammulogoni. — 1 Tes. 2:8.
ONANDE AAVI WENJHEDHEDHE EFUNELO YAWO YOLABA NINGA MUDHAARI OOKAVIHERA?
9. Ki onande aavi wenjhedhedhe efunelo yawo yowakavihera athu amodha?
9 Mohanganyedha we onomudhivela Yehova ni onofuna vanlubale wakavihera athu amodha. Naarive dhigaali ndo, podi wera we kunna efunelo yolaba ninga mudhaari ookavihera. Mwaha wi ohunona wi eyo enovolowelavo waapara mabasa owinjhiva. Ki onande aavi wenjhedhedhe efunelo yawo yowakavihera athu amodha? Ethu enuukavihere, fuwubuwela ohagalala onakanniwe mwaha wakavihera addibila ni arogola. Yesu ohuwoga eegi: “Ovaha winothabwa ohagalasa opitha ovahiwa.” (Dho. 20:35) Ohiya owogave baahi, Yesu owerana ele awogiye. Bumwahaya Yesu ahikanna ohagalala webaribari, mwaha owakavihera athu amodha. Teto nihiyoya nakala athu oovaha, nnere okanna ohagalala webaribari.
10. Ethu baani enoniha wihina Yesu ohagalala mwaha wakavihera athu amodha? (Marku 6:31-34)
10 Kabeni noone ethu enoniha wihina Yesu ohagalala mwaha wakavihera athu amodha. (Omwileri Marku 6:31-34.) Nlabo dhaala Yesu ni anamahara aye yaali oogomene. Bumwahaya aliwa osayelaga mburo wopwaseya wihina yithuwe. Mbwenye yahinathi ofiya waali mburo ole, muthithi waathu ofiya, Yesu ni anamahara aye ehinafiye. Muthithi ole waathu, wafiye mburo ole wihina emujhehe Yesu wahudhiha. Yesu ahafune eere okoodda wahudhiha, mwaha oliye ni anamahara aye “kiyanna mudhidhi wowithuwa newene woojha ethu.” Obe ahafune eere owoga vang’ono baahi, nuwindo arume wihina edhowege.” Mbwenye, Yesu owadhivela athuya. Bumwahaya “oliye wambela wahudhiha dhithu dhowinjhiva.” Teto Yesu ahididela wahudhiha ofiyedha “vati oriba.” (Mar. 6:35) Kaavo amuwaddihedhe Yesu wakavihera athu ale, mbwenye oliye erilena ndo, mwaha “waweddela thagaraga.” Ethu yamuthukulela wahudhiha athu ale, waali odhivela anniyena naaliwa. Teto eyo yothabwa omuhagalasa Yesu.
11. Ethu baani emodhaya Yesu eriliyena wihina aakavihere athu ale? (Osugwe fotu)
11 Ohiya wahudhihave, Yesu ahakavihera athu ale mwamakalelo mamodha. Yesu ahisamalela muthithi ole waathu epaddi yomwilini. Labo nenne, Yesu ahawerana matikiniho wodhela wenjhedhedha pawu ni oba ni waruma anamahara aye wihina yagawele athu yafwanyeya mburo yoole. (Mar. 6:41) Ni makalelo yaala, Yesu ahahudhiha anamahara aye makalelo owakavihera athu amodha. Teto ahahudhiha wi sathima wakavihera athu amodha ni ndhe enandiwa werana. Siyeyo adhaari ookavihera enahoweliwa werana. Kubuwela ohagalala yanna anamahara ale nuumukavihera Yesu wi yagawele dhoojha athu aatene ofiyedha ojha ni orubala!” (Mar. 6:42) Ela kayaali dila yobajha Yesu opweha mburo wobajha efunelo yaathu amodha. Oliye aherana eyo, egumaye yaatene agaali velaboni ela yavati. (Mat. 4:23; 8:16) Yesu ohagalala vanlubale mwaha wahudhiha ni wapara mabasa owiyeviha. Teto ni weya, onere ohagalala vanlubale wapweha mburo wobajha efunelo ya athu amodha wodhela wilibihedha wi okale mudhaari ookavihera.
Odhivela ninnihuna ni Yehova ni efunelo yomulabela, onere onithukulela wakavihera amodha mmulogoni (Osugwe ddima 11) a
12. Mwahaya bwaddi kanahowela wubuwela wi kannande werana ethu enakavihera mulogo?
12 Athu amodha enubuwela wi kinanda werana ethu enakavihera mulogo. Akala we onubuwela ndo, kukwerebeye. Mwebaribarene we ohukanna dhikalelo dhapama dhinaakavihere addibila. Ononamo aavi wileri yolebela ya 1 Korintiyu 12:12-30, wamala olobele wodhela muselu ola! Va yolebela ela murumiwi Pawulo anowoniha wi kadda mudhaari a Yehova dathima ni anohoweleya mmulogoni. Bumwahaya, akala we kunathi okanna dhikalelo dhinahoweleya wihina okale mudhaari ookavihera, kuselele! Ohiye eyo, werena ele onandiwe wihina omulabela Yehova ni wakavihere addibila. Teto okanne ebaribari wihina anamaholela mulogo, enere wuthoma wihina werena dhithu enonniwa wihina onere wanda wakwanihedha. — Rom. 12:4-8.
13. Dhikalelo baani onahoweliwe okanna wi okale mudhaari ookavihera?
13 Kasugwa ethu emodha enukavihere wihina wilibihedha okale mudhaari ookavihera. Dhikalelo dhatedhene onahoweliwe okanna wi okala mudhaari ookavihera, si dhikalelo dhimodhave makiristawu aatene enahoweliwa okanna. Motajhiha, makiristawu aatene enohowela olibiha wandana wewa ni Yehova, wivahedhela wi yakavihere athu amodha nuuhagalala ni ononiwa ninga muthu apama. Teto podi wera we ohukanna dhikalelo ndha. Mbwenye dhithu baani dha vayekiwa dhinahoweleya wihina ddibila athomiwe ninga mudhaari ookavihera?
DHIKALELO BAANI ONAHOWELIWE OKANNA WIHINA OKALA MUDHAARI OOKAVIHERA
14. Okala ‘oororomeleya’ enatapulela ddi? (1 Timotiyu 3:8-10, 12)
14 Nnere ohudhera dhikalelo dhinahoweleya wi ddibila akale mudhaari ookavihera dhinafwanyeya mBibiliyani va yolebela ya 1 Timotiyu 3:8-10, 12. (Omwileri.) Mudhaari ookavihera anohowela okala ‘oororomeleya.’ Madhu ala podi otapulela “muthu anafwanelela orihiwa ni anilibihedha wakwanihedha mutholo dhaye.” Eyo kinatapulela wi mudhaari ookavihera kanahowela okala muthu ooteyiha obe owaredha. (Ecl. 3:1, 4) Mbwenye oliye anohowela wilibihedha wakwanihedha mutholo waye. Mudhaari ookavihera anoniwa ninga muthu anilibihedha wakwanihedha mutholo waye, oliye anerege orihiwa naaddibila owinjhiva a mmulogoni.
15. ‘Owoga ebaribari’ ni ‘ohaajhela athu amodha’ enatapulela ddi?
15 ‘Owoga ebaribari,’ enatapulela wihina kunakuwa ethu, oli muthu oororomeleya, teto malabo maatene onowoga ebaribari. We onowerana ele onaapaganyiwe athu amodha? (Pro. 3:32) ‘Ohaajhela athu amodha,’ enatapulela okala oororomeleya omabasani wawo ni wasamalelaga korowa. Teto we kunalabihedha ebewene akwawo a mmulogoni mwawo wihina okanna korowa.
16. a) ‘Ohuthabwa og’wa dhong’wa dholezeliha’ enatapulela ddi? b) Okanna ‘mubuwelo wapama’ enatapulela ddi?
16 ‘Ohuthabwa og’wa dhoog’wa dholezeliha,’ enatapulela ohaalupa manddile wang’waga dhong’wa dholezeliha, mwaha we kunoniwe ninga mulezeli. Okanna ‘mubuwelo wapama,’ enatapulela oriha ele Yehova anawogiye wihina sapama ni yabure. Ebaribari wi kuli muthu oologomana, mbwenye we ohukanna wandana wapama ni Yehova, bumwahaya ohukanna murenddele mwigumini mwawo.
17. ‘Openddiwa akala onofwanelela’ enatapulela ddi? (1 Timotiyu 3:10; Osugwe fotu)
17 ‘Openddiwa akala onofwanelela,’ enatapulela anamaholela mulogo woona akala we onosamalela pama mutholo dhawo ni akala we podi ororomeliwa. Vano anamaholela mulogo yuloba wihina wakwanihedhe mutholo bu mutholo, oharege dhoholela enafuniwa wuvaha ni dhinadhela munikuruni mwa Yehova. Osayele wonelamo dhithu onahoweliwe werana ni mudhidhi onafuniwe wamariha mabasaya. Wandaga osamalela pama mutholo onavahiwiwe, aatene mmulogoni enere wonelamo wi oli muthu oororomeleya ni owilibihedha. Bumwahaya anamaholela mulogo enohowela odidela waxagiha addibila oofuneya ebaddiziwe. (Omwileri 1 Timotiyu 3:10.) Mmulogoni mwawo, mwihikala addibila emanle obaddiziwa enna yaka 13, 14 obe yahinathi wakwaniha yaka ndha? Aliwa enowerana ohudhera wa vayeka ni enowegeredha pama mutugumano? Aliwa enovaha dhowakula dhewa yakala mmutugumanoni ni kinajhomba mmalaleyelo? Akala waakunle weegi hee, wavahe mutholo ononniwe wihina enere wanda wakwanihedha, naarive eganna yaka vang’ono. Ni makalelo yaala, aliwa enere ‘openddiwa akala enofwanelela,’ vano yakwaniha yaka 17 obe 18, aliwa podi othomiwa ninga adhaari ookavihera.
Anamaholela mulogo yavahaga mabasa addibila ebaddiziwe, aliwa ‘enowapendda akala onofwanelela’ (Osugwe ddima 17)
18. ‘Ohukanna muladdu’ enatapulela ddi?
18 ‘Ohukanna muladdu,’ enatapulela wi kaavo muthu anuwikedhe wi uherana ethu yabure. Ebaribari wi athu amodha podi wuwinkwedha wi uherana ethu yabure, wula waherilena. Eyo yahimpadduwela ni Yesu, teto oliye ahiwoga wi anamahara aye yerege winkedhiwa ebewene. (Juwa. 15:20) Mbwenye wakanna ekalelo yapama ndala ninga Yesu, addibila aatene ammulogoni enerege wuriha. — Mat. 11:19.
19. Okala ‘mulobwana a muhiyana mmodha baahi,’ enatapulela ddi?
19 ‘Mulobwana a muhiyana mmodha baahi.’ Eyo enatapulela wi onohowela wawoona matelo ndala ninga Yehova anawoniye, obe neere ninga wiwanana wa mulobwana mmodha ni muhiyana mmodha baahi. (Mat. 19:3-9) Mukiristawu kanafwanelela wawerana mararuwo. (Ebe. 13:4) Bumwahaya, we onohowela okala oororomeleya ni mwadhiyo ni ohisayela omugayela muhiyana mmodhaya. — Jó 31:1.
20. Mulobwana anaande aavi wakwanihedha pamadhene mutholo anniyena wosamalela emudhaye?
20 ‘Wasamalelege pama anawo ni emudhaawo.’ Akala we oli baabi, onohowela wakwanihedha pamadhene mutholo onniwena wosamalela emudhaawo. Wihina wande wakwanihedha mutholo ola, kujhobelege werana ohudhera weemudhi, waparege mabasa oolaleya ni mwadhiyo vamodha ni anawo sumana dhatedhene dhandeyaga. Teto wakavihera anawo okanna wandana woliba ni Yehova. (Efe. 6:4) Mulobwana anasamalela pama emudhaye, anowoniha wihina anere wanda osamalela mulogo.— Omuliganihe ni 1 Timotiyu 3:5.
21. Akala we kunathi okala mudhaari ookavihera ethu baani onahoweliwe werana?
21 Akala we kunathi okala mudhaari ookavihera, kuwerena, omuhudhere artigu ola ni olobele wodhela muselu ola. Teto ohudhera dhikalelo dhinasorihiwa mBibiliyani dhinawoga wodhela adhaari ookavihera ni wilibihedhe wihina oparihedha mabasa mwigumini mwawo. Opendde odhivela onniwena ni Yehova ni odhivela onniwena naaddibila, werana eyo, winere wuthukulela okanna efunelo yowakavihera aliwa. (1 Ped. 4:8, 10) We wakala mudhaari ookavihera, onere olawiha ohagalala onadha wowakavihera addibila ni arogola a mmulogoni. Teto okanne ebaribari wi Yehova anere oreeliha wilibihedha wawo wihina okale mudhaari ookavihera! — Fil. 2:13.
JHIBO 17 ‘Miyo ginofuna’
a OTAPULELIWA WA FOTU: Mono wemara, Yesu aakaviheraga adhaari aye; moono woojha, mudhaari ookavihera amukaviheraga ddibila owunowelavo.
