ENOWURUSA werana ohudhera wawo wavayeka sumana dhaatedhene? Malabo mamodha ononamo wi omuhudhera Bibiliya winogomiha? Ebaribariya sowihina malabo mamodha iyo aatene enonirusa ohudhera sumana dhaatedhene, teto ohudherawa kunanihagalasa. Mbwenye kubuwela dhithu nnerihuna Malabo aatene ninga ohaba. Wihina nande ohaba malabo aatene, nnohowela mwana mudhidhi ni wilibihedha wihina nihabe, mbwenye iyo niilibihedha mwiili wehu onakala wapameene! Ni makalelo mamodhave, nilibihedha wihina nimuhudhere Bibiliya, eyo enere onikavihera vanlubale.” (Efe. 5:26) Kasugwa dhoxagiha ndha dhinukavihere ohujhombela ohudhera wawo wavayeka:

• Osakule nlabo ni maworaya owerana ohudhera wawo wavayeka. Werana ohudhera wehu wavayeka ‘ethu yathima’ mwigumini mwehu. (Fil. 1:10) Wihina onadduwale mawora ni nlabo oneriwena ohudhera wawo wavayeka, we podi olebela vapapelini windo, obandihe papeliya vasirini obe mburo bu mburo onandiwe woona. Obe we podi omwativari alarmi mutelefonini mwawo wihina awubusedhege mawora awo owerana ohudhera wavayeka.

• Osakule mudhidhi ni makalelo oohudhera enuukweyela. Enowukweyela okala oopwaseyene muwari mwa mudhidhi wowinjhivene ohudheraga obe enukweyela fuhudhera muwari mwa mudhidhi vang’ono? We podi othoma ethu enukweyela mowiwana ni mudhidhi onafwanyeyiwe. Akala kunakanna efunelo yohudhera mudhidhi yafiya mawora wathomeliwe wihina ohudhere, we podi oxixa ohudhera mutala 10 baahi, ebaribariya sowihina naarive ogandile ohudhera muwari mwa mutala mung’onove baahi, onere ohudhera dhithu dhowinjhiva. Teto podi wera dhavira mutala ndhe 10 ohudheraga we podi okanna efunelo yohudheragave. — Fil. 2:13.

• Osakule dhithu onafuniwe ohudhera ohunambele. Akala we onabajha wubuwela dhithu baani onafuniwe ohudhera wafiya mudhidhiya wohudhera, podi wera “kunalabihedha pama mudhidhi wawo.” (Efe. 5:16) Ononamo aavi olebela dhithu onafuniwe ohudhera. Motajhiha, wakanna nikoho wodhela muselu ohunandiwe wonelamo pama, we podi olebela nikohona wihina ohudhere nlabo noohudhera wawo nafiya.

• Wiisaddulege mowaguva yahoweleyaga. Sapama ohidduwala wihina ethu yathima fuhudhera sumana dhaatedhene. Mbwenye wihina wandege werana eyo sumana dhaatedhene, podi wera malabo mamodha enerege ohoweleya osaddula labona, maworaya, mudhidhiya onamaliwe ohudheraga ni museluya onahudheriwe.

Neragana ohudhera wehu sumana dhaatedhene, nnerege wawakela mareeliho owinjhiva. Motajhiha, wandana wehu ni Yehova onere oliba vanlubale, nnerege ohudhera werana dhothoma dhapama mwigumini mwehu ni nnakalege oolibeene. — Jos. 1:8.