OHUDHERA 45
JHIBO 138 Thima enna dhimbwi
Nnahudhera ddi ni madhu ookuthula yasorihile adhaari oororomeleya?
‘Enna thotho baathu owuluvala, ale enna enonelo malabwiwa enowinjhiva?’ — JÓ 12:12.
DHITHU NNAAHUDHERIHU
Nnere woona makalelo wiwelela winamuthukuleliwa muthu wawakela mareeliho ovanene ni wakela egumi yohimala osogolo.
1. Iyo podi ohudhera ddi naale eli owunnuwelavo?
AATENE iyo nnohowela nikavihero naathu amodha, nafuna werana dhothoma dhathima mwigumini mwehu. Teto anamaholela mulogo ni addibila owithwelavo epaddi yomuzimuni podi onikavihera nafunaga werana dhothoma dhathima. Naarive aliwa egaali owunnuwelavo onipitha iyo, kanubuwele wihina dholaga dhewa sakale ni kadhinalabela dhithu. Yehova anafuna wihina iyo nihudherege ni addibila owunnuwelavo, mwaha wihina aliwa ehinona dhithu dhowinjhiva onipitha iyo. — Jó 12:12.
2. Ohudhera wula, nnone ddi?
2 Kale Yehova ahaalabihedha alobwana oororomeleya yaali owunnuwelavo wihina elibihe nlogo naye ni eholelege. Motajhiha, Yehova ahimulabihedha Moyizeji, Davidi ni murumiwi Juwawu wihina eholelege nlogo naye. Alobwana ala kayakalawo mudhidhi mmodhave teto egumi yewa yahihiyana vanlubale. Ehalaga neena nuukwa, aliwa yahaavaha dholaga ale yaali azombwe, ohiya eyo, kadda muthu wa aliwa ahiwoga mwahaya bwaddi sathima omwiwelela Mulugu. Teto Yehova ohenya wihina madhu aalobwana ala oororomeleya elebiwe mBibiliyani wihina enikavihere. Aatene iyo naarive akala nili azombwe obe anakalaba podi ohudhera dhithu dhowinjhiva ni madhu yasorihile alobwana ala. (Rom. 15:4; 2 Tim. 3:16) Ohudhera wula, nnere wawoona madhu ookuthula yasorihile aalobwana ala araru ororomeleya ni dhithu nnahudherihu ni madhu aliwa yasorihiliwa.
‘ONERE OKALAWO MUDHIDHI WOWINJHIVA MWILABONI’
3. Dhithu baani Moyizeji eriliyena egumaye yaatene?
3 Moyizeji ahimulabela Yehova egumaye yaatene. Oliye aali namavuhulela, namatoriha, namaholela ni namaleba. Ohiya eyo, Moyizeji ahihudhera ni dhithu dhowinjhiva dhampadduwele vamodha ni ndhe ooniliye egumaye yaatene. Motajhiha, duliyene alabihedhiwe ni Yehova wihina awobole aamwaana Ezarayeli yaali adhaari Wijipitu. Teto ahiwoona matikiniho owinjhiva a Yehova. Ohiya eyo, Yehova ahimulabihedha Moyizeji wihina aalebe malivuru 5 oobajha a mBibiliyani, ninga Salmo 90 ni podi wera Salmo 91. Ohiya eyo, enakala ninga duliye alebile livuru na Jó.
4. Moyizeji aalibihe aani, ki mwahaya bwaddi?
4 Moyizeji aganna yaka 120, ahalaga neena nuukwa, watugumana aamwaana Ezarayeli wihina awubusedhe dhaatedhene Yehova awereliye. Amwaana Ezarayeli amodha egaali azombwe yahawoona matikiniho Yehova aweriliyena ni makalelo Yehova aasinyunsiye Mejipisiyu. (Êxo. 7:4) Ohiya eyo, aliwa yahimoona Yehova afugulaga niya yofila wihina evire, teto makalelo Yehova aamutolonsiye Farawo ni anyakoddo aye. (Êxo. 14:29-31) Mudhidhi amwaana Ezarayeli egaali mwiddeddereni Yehova ahabarela ni ahasamalela. (Deut. 8:3, 4) Vano ehalaga neena wihina evolowe elabo yothomeliwa, Moyizeji opatha mudhidhi yole ahinathi okwa wihina aalibihe dila yogomihedha. a
5. Ddiniyani Moyizeji awubusedhiye amwaana Ezarayeli aawogaga madhu aye ogomihedha enafwanyeya va Deuteronómio 30:19, 20?
5 Ddiniyani Moyizeji aawogiliye? (Omwileri Deuteronómio 30:19, 20.) Moyizeji ahawubusedha amwaana Ezarayeli wihina yere okanna osogolo wapama. Ni mareeliho a Yehova, aliwa yere okala mudhidhi wowinjhivene elabo yathomeliwiwa ovahiwa ni Yehova. Elabo ele yaali yapama ni dhokuma dhoojha dhowinjhiva! Teto Moyizeji ahileba makalelo yaali elaboya egihina, munere ofwanya ‘nyumba muli dhithu dhowinjhiva dhapama muhulabelinyu, matxela muhatimbinyu, mundda dha uva ni dha olivera muhudhalilenyu.’ — Deut. 6:10, 11.
6. Mwahaya bwaddi Yehova adhe eenyege wi malogo mamodha yathukule amwaana Ezarayeli ninga adhaari?
6 Ohiya eyo, Moyizeji ahawaddela amwaana Ezarayeli ethu yahoweliwa werana yahafune okala elabo yothomeliwa mudhidhi wowinjhivene. Oliye wakongomedha wi ‘esakula egumi’ wodhela odidela omwiwelela Yehova ni ‘oparihedha mabasa’ ndhe yavuruwaniwa. Mbwenye amwaana Ezarayeli kayafuna omwiwelela Yehova, bumwahaya nuuvira mudhidhi Yehova weenya wihina akudda Asiriya ni vasogolova aBabiloniyu wathukula ninga adhaari. — 2 Reis 17:6-8, 13, 14; 2 Cró. 36:15-17, 20.
7. Nnahudhera ddi ni madhu a Moyizeji? (Osugwe fotu.)
7 Nnahudhera ddi ni madhu a Moyizeji? Wiwelela winere ovulusa egumi yehu. Ndala ninga amwaana Ezarayeli yaali neena wihina evolowe elabo yothomeliwa, nihiyoya nili neena wihina nivolowe elabo exa Yehova anipaganyiliye. Mohulegela elabo yaatene enakale Parayizu. (Isa. 35:1; Luk. 23:43) Saddana naademoniyu kinadha eniholosaga. (Ovuhu. 20:2, 3) Kaavo analekethiwege ni gereja dhowoota mwaha wihina kadhinakalewo. (Ovuhu. 17:16) Teto kaavo anoonege goyi mwaha wa anamathonga. (Ovuhu. 19:19, 20) Kawinaakale athu enanitotelege makathamiho. (Sal. 37:10, 11) Athu aatene enawiwelelege baahi malamulo a Yehova, mwaha wa yeyo, nnere okanna murenddele ni wiwanana. Ohiya eyo, enerege ororomelana ni enerege odhivelana mmodha ni mukwaye. (Isa. 11:9) Mwebaribarene iyo nnojheha nuuthabwa wawoona mareeliho ala yakwanelaga! Nadidela omwiwelela Yehova, nnere okanna ofuru wokala mparayizu elabo yela yavati. Teto kannakalegewo mudhidhi vang’ono, mbwenye nnakalegewo nimukalakala.— Sal. 37:29; Juwa. 3:16.
Naamwiwelelaga Yehova, iyo podi okala mparayizu elabo yela yavati, ohiya mudhidhi mung’onove, mbwenye ni mukalakala (Osugwe ddima 7)
8. Mpaganyo wa Yehova wodhela egumi yohimala, wimukavihere aavi misiyonariyu dhaala? (Judasi 20, 21)
8 Naroromelaga ni murima wehu waatene mpaganyo dha Yehova dhinawoga wodhela egumi yohimala, nnerege wanda omwiwelela Yehova, naarive nifwanyiwaga makathamiho bi makathamiho mwigumi mwehu. (Omwileri Judasi 20, 21.) Si mpaganyo dhendha dhinanivaha kopolo wihina nande owanana dhithu dhinanikwerebeyiha. Ddibila dhaala analaba muwari mwa yakadhene elabo yowAfrika ninga misiyonariyu, anowoga wodhela dhithu dhamukwerebeyiha mwigumini mwaaye. Oliye anowoga egi: “Nuwonelamo wihina kagavolowe mparayizu mwaha wohimwiwelela Yehova, miyo othoma owanana ethu yagikwerebeyiha ni omuloba Yehova wihina agikavihere. Vano Yehova ogikavihere, mwaha wa yeyo gahanda ogonjhiha dhithu dhagikwerebeyiha.”
‘DHAWO DHINERE WUWEDDELA PAMA’
9. Makathamiho baani yanfwannye mwene Davidi?
9 Davidi aali mwene oororomeleya vamentoni va Yehova. Oliye aali namwiba namaleba, munyakoddo ni namavuhulela. Naarive dhigaali ndo, oliye ahifwanyiwa makathamiho owinjhiva mwigumini mwaaye. Motajhiha, muwari mwa yaka dhowinjhiva oliye ahiharahariwa ni Sawuli aali mwene anrima. Teto Davidi nuukala mwene, ahiharahariwa ni mwanaye Abisalawu. Mwaha oliye afuna akale mwene vamburoni vaababe Davidi. Naarive aharahariwaga, oliye ahikanna dhithu dhamwigumini mwaaye dhamukwerebeyiha. Mbwenye Davidi ahididela okala oororomeleya ofiyedha okwa waye. Teto Yehova ohumuwoga Davidi ninga mulobwana “anahagalasa murima waye.” Bumwahaya sapama opwasedha ohara dholaga dhihile mwene Davidi! — Dho. 13:22; 1 Reis 15:5.
10. Mwaha bwaddi mwene Davidi adhe anvahege yolaga Salomawu ahinathi okala mwene?
10 Motajhiha, kasugwa yolaga mwene Davidi anvahiliye mwanaye Salomawu, aakale mwane oharela a nlogo naamwaana Ezarayeli. Yehova ahimusakula Salomawu wihina amage tempulu wi ebedhiwegemo. (1 Cró. 22:5) Salomawu ahikanna dhithu dhowinjhiva afuniye werana osogolo ni ohowela nikavihero na Yehova wihina ande othonga nlogo naamwaana Ezarayeli. Ethu baani Davidi awogiliye wihina omukavihere Salomawu? Kabeni noone.
11. Mowiwanana ni 1 Reis 2:2, 3, Yolaga baani mwene Davidi anvahiliye Salomawu, ki mareeliho baani awakeliye mwaha omwiwelela Yehova? (Osugwe fotu.)
11 Ethu baani Davidi awogiliye? (Omwileri 1 Reis 2:2, 3.) Davidi owoga ni mwanaye wi athoma omwiwelela Yehova, dhaye dherege omweddela pama. Teto mwene Salomawu ahimwiwelela Yehova muwari mwa yaka dhowinjhiva. Mwaha wa yeyo, Salomawu ahawakela mareeliho owinjhiva, teto Yehova ahimukavihera mwamakalelo ohiyana-hiyana. (1 Cró. 29:23-25) Mwene Salomawu ahimaga tempulu yoriya vanlubale, teto mBibiliyani enofwanyeya madhu owinjhiva awogiliye. Ohiya eyo, oliye ahivuwa vanlubale mwaha wa thotho ni dhoreela dhowinjhiva anniyena. (1 Reis 4:34) Mbwenye ninga aawogile Davidi, dhithudha dhamweddelege pama, Salomawu ahathome omwiwelela Yehova baahi. Yowukulihaya sowihina Salomawu nuwuluvala, oliye obajha wawebedha amulogo amodha. Mwaha wa yeyo, Yehova ohiya omureeliha Salomawu. Ohiya eyo, oliye kandile othonga nlogo ni thotho vamodha nuwogowa. — 1 Reis 11:9, 10; 12:4.
Yolaga mwene Davidi anvahiliye mwanaye Salomawu, enonikavihera wonelamo wi nathoma omwiwelela Yehova, oliye anere onivaha thotho wihina nerena dhothoma dhapama (Osugwe ddima 11-12) b
12. Nnahudhera ddi ni yolaga yamwene Davidi?
12 Nnahudhera ddi? Namwiwelaga Yehova, oliye anonireeliha ni anonikavihera. (Sal. 1:1-3) Ebaribari wihina peeno, iyo kannaakale athu ooreela ni oovuwa ndala ninga Yehova aamweriliyena Salomawu. Mbwenye nathoma omwiwelela Mulugu ehu, oliye anere onivaha thotho nnahowelihu wihina nande werana dhothoma dhapama. (Pro. 2:6, 7; Tiya. 1:5) Dholaga dha Yehova dhinonikavihera wihina nande werana dhothoma dhapama nasayelaga mabasa, dhowaredhana, muselu wa korowa ni ohudhera wa vadhulu. Teto oparihedha mabasa thotho ndha, enere onibarela wihina nahifwanyiwe makathamiho owinjhiva enaakumelelavo mwaha oherana dhothoma dhapama. (Pro. 2:10, 11) Ohiya eyo, nnere okanna akwihu oororomeleya ni nnere onona ethu nnahowelihu werana wihina nikanne emudhi yohagalasa.
13. Ddiniyani emukavihere Karmeni werana yothoma yapama?
13 Murogola Karmeni anakala elabo yoMosambiki, ubuwela wihina ohudhera wa vadhulu were omukavihera okanna egumi yokweya. Oliye wilebela eskola yohudhera oleba dezenyu yomaga nyumba. Oliye anowoga eegi: “Miyo godhiveliwa ndhe gahudherimi, mbwenye kaganna mudhidhi ni kopolo yowerana dhithu dhimodha. Mwaha miyo gambela ohudhera 7:30 ni gaweruwa mawora a 18. Kayaali yokweya woona mutugumano, vano wandana waaga ni Yehova obajha oridha. Miyo obajha wonelamo wihina mwebaribarene gaalabela anabwiya abiili.” (Mat. 6:24) Murogola Karmeni ahilobela wa Yehova ni ahisayela mmalivuruni mwehu muselu dhiwanana ni dhithu dhaapadduwela. Karmeni anowoga eegi: “Anamaholela mulogo vamodha ni amama nugivaha yolaga, miyo othoma ohiya ohudhera wule ni wavolowela mabasa amudhidhi wamutene wi gimulabelege Yehova baahi. Miyo kaginanganyedha wi giherana yothoma yapama mwigumini mwaga, mwaya wa yeyo, gihikanna egumi yohagalala.”
14. Nikongomedho baani Moyizeji ni Davidi ewogiliwa pamadhene wi niharege?
14 Moyizeji ni Davidi yomudhivela vanlubale Yehova, teto aliwa yahinona thima yomwiwelela Yehova. Mudhidhi yawogaga madhu ewa ogomihedha, aliwa wakongomedha athu amodha wi ehare yotajhiha yewa. Moyizeji ni Davidi yahiwoga pamadhene wihina ole anamusukuma Yehova, kanawakele mareeliho a Yehova. Dholaga dhivahiliwa dhinonikavihera peeno. Nuuvira yaka dhowinjhiva, mudhaari mmodha a Yehova owoga thima enna okala oororomeleya vamentoni va Yehova. Kabeni noone dhithu awogiliye.
“EYO ENOGIHAGALASA VANLUBALE”
15. Dhithu baani murumiwi Juwawu ooniliye egumaye yaatene?
15 Juwawu aali murumiwi Yesu amudhiveliye vanlubale. (Mat. 10:2; Juwa. 19:26) Juwawu eeddesa ni Yesu mudhidhi waamutene. Bumwahaya ahawona matikiniho ohiyanahiyana ni ahikala ni Yesu mudhidhi worusa. Oliye ahimoona Yesu akomeliwaga vantxikwani na goyi ni nuvenyihiwa muukwani. Teto oliye ahoona mudhidhi makiristawu yenjhedhedheyaga. Ohiya eyo, oliye ahikalawo mudhidhi wowinjhivene wihina oone “muthenga dhapama dhilaleyiwaga dhopaddusiwa dhatedhene dha veelaboni yavati.” — Kol. 1:23.
16. Makarta alebile murumiwi Juwawu, aalebela wi aakavihere aani?
16 Nuwuluvala, murumiwi Juwawu ahikanna oneti woleba livuru notikiniha na Ovuhulela. Livuru nna nnodhana ‘dhovuhulela dha Yesu Kiristu.’ (Ovuhu. 1:1) Teto Juwawu ohuleba livuru nnathukula ndina naye ni makarta mararu enoniwe ni ndina naye. Karta naye nanatharu, aamulebele mukiristawu ithaniwa Gayu, Juwawu omudhivela vanlubale oliye ni amoona ninga mwanaye. (3 Juwawu 1) Podi wera Juwawu ahikanna ahima owinjhiva oomuzimuni, aadhiveliye vanlubale. Dhithu alebile Juwawu, dhinowalibiha vanlubale anamahara a Yesu ofiyedha peeno.
17. Mowiwanana ni 3 Juwawu 4, ddiniyani enanihagalasa?
17 Dhithu baani Juwawu alebiliye? (Omwileri 3 Juwawu 4.) Juwawu ooleba wihina omwiwelela Yehova winodhana ohagalala. Mudhidhi alebaga karta naye nanatharu, athu amodha yanna ovuwiha dhohudhiha dhowoota dhatotela makathamiho mmulogoni. Mbwenye yohagalasaya sowihina amodha, yahididela “weedda mwibaribarini,” teto yahididela “wawiwelela malamulo aye.” (2 Juwawu 4, 6) Alobwana ale oororomeleya kiyahagalanse baahi murima wa Juwawu, mbwenye yahimuhagalasa vanlubale ni Yehovaya. — Pro. 27:11.
18. Nnahudhera ddi ni madhu asorihile murumiwi Juwawu?
18 Nnahudhera ddi? Nakala oororomeleya wa Yehova, nnohagalala ni nnowahagalasa athu amodha. (1 Juwa. 5:3) Motajhiha, iyo nnohagalala vanlubale mwaha onona wihina nnohagalasa murima wa Yehova. Teto Yehova anohagalala anonaga nisukumaga dhoweha dha elabo ela ni nawiwelelaga malamulo aye. (Pro. 23:15) Ohiya eyo, angero enohagalala vanlubale yaanonaga nimwiwelelaga Yehova. (Luk. 15:10) Ni iyoya, nnohagalala vanlubale nawonaga addibilihu edidelaga okala oororomeleya wa Yehova, naarive efwanyiwaga dhoweha. (2 Tes. 1:4) Teto, elabo ela ya Saddana yagujhuliwa, iyo nnere ohagalala mwaha onona wi nihanda okala ororomeleya wa Yehova ofiyedha omakuthulo.
19. Ddiniyani murogola dhaala anithaniwa Rachel awogiliye wodhela wahudhiha athu amodha ebaribari? (Osugwe fotu.)
19 Ethu emodha enanihagalasa, fuuwoga naathu amodha wodhela Yehova. Rachel, anakala oRepublika Dominikana, anowoga wihina oneti winlubale owoga wodhela Babihu oodhivela naathu amodha. Awubuwelaga athu aatene aakaviheriye ohudhera wodhela Yehova, oliye anowoga egi: “Enogirusa owoga makalelo ginakalimi ohagalalene gawoonaga athu gaakaviherimi ohudhera wodhela Yehova, esaddulaga egumi yewa ni ehudheraga omuroromela Yehova. Ohagalala wula, winogikavihera ohubuwela makathamiho maatene yagifwannye mudhidhi gahudhihaga ebaribari.”
Iyo nnohagalala vanlubale naahudhihaga athu amodha omwiwelela ni omudhivela Yehova (Osugwe ddima 19)
OHUDHERE NI MADHU OOKUTHULA YASORIHILE ADHAARI OOROROMELEYA
20. Dhithu baani nnerihuna dhiniwanana ni dhithu yerana Moyizeji, Davidi ni Juwawu?
20 Mudhidhi akalawo, Moyizeji, Davidi, ni Juwawu, ohuhiyana vanlubale ni mudhidhi wehu. Naarive dhigaali ndo, dhihikalawo dhithu dhowinjhiva dhiniwanana ni dhithu dheriwana mudhidhi wewa, eli omwebedha Mulugu ebaribari Yehova. Teto ndala ninga aliwa, iyo nnolobela wa Yehova, nnomuroromela ni nnosayela dhoholela dhaye. Ohiya eyo, ninga aliwa, iyo nihikanna ebaribari wihina Yehova anowareeliha athu aatene enamwiwelela.
21. Mareeliho baani enawakele ale anahara dholaga dha Moyizeji, Davidi ni Juwawu?
21 Nnafuna nilibihedhe oparihedha mabasa dholaga dhihile alobwana ala owunnuwelavo wodhela omwiwelela Yehova. Nerena ndo, nnere oreelihiwa vanlubale ni Mulugu ehu. Teto nnere okanna ofuru wokalawo ‘malabo owinjhiva velaboni yavati!’ (Deut. 30:20) Ni nnere okanna murenddele mwaha womuhagalasa Baabihu oodhivela Yehova, ananireelihege mwamakalelo nahinandihu wubuwela. — Efe. 3:20.
JHIBO 129 Ginerege ovilela
a Amwaana Ezarayeli owinjhiva yawone matikiniho nufiya niya yoofila, kiyavolonwe elabo yothomeliwa. (Núm. 14:22, 23) Yehova ahiwoga wi aatene yaale yanna yaka okwaranya 20 yeere okwa mwiddeddereni. (Num. 14:29) Mbwenye, Jozuwe, Kalebi, ni amwaana Ezarayeli yaali azombwe vamodha ni nihimo na Levi, yahikalawo malabo owinjhiva ni yahabuwa mwihinjhe Jordawu wihina evolowe elabo yothomeliwa. — Deut. 1:24-40.
b OTAPULELIWA WA FOTU: Moona weemara: Davidi anvahaga yolaga yogomihedha mwanaye Salomawu. Moono woojha: Addibila egaali oskola yapiyonero ni epwasedhaga ovuruwana dholaga dha Yehova
