OHUDHERA 44
JHIBO 33 Onvokedhe mutholwawo Yehova
Onande aavi ovilela, naarive weddihiwaga mwamakalelo abure
“Kuhiye obure wugonjhiha, mbwenye odidele ogonjhiha obure nuupama.” — ROM. 12:21.
DHITHU NNAAHUDHERIHU
Nnere woona ethu baani nnahowelihu werana, neddihiwaga mwamakalelo abure.
1-2. Mwahaya bwaddi peeno iyo kannatikina neddihiwaga mwamakalelo abure?
NLABO dhaala Yesu owoga nladdaniho wodhela mwihiyana dhaala aadhowile owoga ni namatoriha, alobaga wihina eeddihiwe mwamakalelo apama. Podi wera yoladdaniha ela yahadahinya murima anamahara a Yesu, mwaha mudhidhi yole yaali yokweya wawoona athu yeeddihiwaga mwamakalelo abure. (Luk. 18:1-5) Teto yoladdaniha ela podi onikavihera nihiyoya. Mwaha peeno nnowawoona athu owinjhiva yeeddihiwaga mwamakalelo abure.
2 Peeno athu owinjhiva enowawoniha goyi athu amodha, bamrima ni bansakulo. Bumwahaya kannatikina neddihiwaga mwamakalelo abure. (Ecl. 5:8) Teto ethu nahinajhehedhihu, fuweddihiwa mwamakalelo abure naaddibilihu. Mbwenye mohujhehedha eyo podi opadduwa. Ebaribariya sowihina addibilihu kinafuna oneeddiha mwamakalelo abure, aliwa enoneddiha mwamakalelo abure mwaha ohulogomana. Mbwenye iyo podi ohudhera ni yotajhiha ya Yesu ni dhaathu amodha. Mwaha aliwa yahivilela, naarive yeeddihiwaga mwakalelo abure. Akala nnowanda ovilela naarive weddihiwaga ni athu yahinamulabela Yehova, mwebaribarene nnohowela wilibihedha wavilelana addibilihu. Yehova anakala aavi aanoonaga neddihiwaga mwamakalelo abure naathu yahinamulabela ni oonaga makalelo enaneddiha addibilihu? Nerege Yehova anonipwatha dhaanipadduwelaga dhithu ninga dhendha?
3. Nnonne aavi wi Yehova anowapwatha adhaari aye yeddihiwaga mwamakalelo abure, ki mwahaya bwaddi?
3 Yehova anonipwatha vanlubale oonaga makalelo athu amodha enaneddihiwa. Mwaha wi ‘Yehova anadhiveliwa opama.’ (Sal. 37:28) Yesu ohupaganya wihina Yehova “[anere] weenya wihina athu aye yeddihiwe nuupama. . . Mohulegela,” wafiya mudhidhi wofwanelela. (Luk. 18:7, 8) Teto mohulegela Yehova anere omariha dhithu dhatedhene dhinanitatamulela makathamiho ni obure waateene oliwo peeno. — Sal. 72:1, 2.
4. Ddiniyani Yehova aneriyena ovanene wihina anikavihere neddihiwaga mwamakalelo abure?
4 Mbwenye nnohowela ojheha mudhidhi Yehova anafuniye wamariha makathamiho mateene. Wula nimujhehaga, oliye anonihudhiha ethu nnahowelihu werana neddihiwaga mwamakalelo abure. (2 Ped. 3:13) Yehova anonihudhiha ethu nnahowelihu werana wihina nahitatamulele makathamiho. Ohiya eyo, amulabihedhaga mwanaye Yesu, Yehova onihiyedha yotajhiha yapama nnahowelihu ohara neddihiwaga mwamakalelo abure. Teto ohunivaha dholaga dhinafwanyeya mBibiliyani dhinanikavihera ononona ethu baani nnahowelihu werana neddihiwaga mwamakalelo abure.
POLE-POLE WERANA ETHU YAHILI YAPAMA WEDDIHIWAGA MWAMAKALELO ABURE
5. Mwahaya bwaddi nigahowela okala pasope neddihiwaga mwamakalelo abure?
5 Iyo podi okala owukuwene ni ootakaleliwene neddihiwaga mwamakalelo abure. (Ecl. 7:7) Adhaari owinjhiva a Yehova yaali oororomeleya, ninga Jo ni Abakuki yaheddihiwa mwamakalelo abure, teto aliwa yahukuuwa ni yaali ootakaleliwene. (Jó 6:2, 3; Hab. 1:1-3) Bumwahaya okala owukuwene ni ootakaleliwene neddihiwaga mwamakalelo abure, kahi ethu yabure. Mbwenye nnohowela okala pasope wihina naherena ethu-sithu yanitatamulele makathamiho mamodha.
6. Yopadduwa ya Abisalawu enanihudhiha ddi? (Osugwe fotu.)
6 Neddihiwaga mwamakalelo abure obe namonaga muthu nnamudhivelihu eeddihiwaga ni makalelo yaala, ethu nnubuwelihu fumuwelihedha kunyawunya obe werana ethu-sithu wihina nimusinyuse muthuya. Mbwenye nerana ndo, podi wera nnere othabwiha dhithudha. Kasugwa yopadduwa ya Abisalawu, mwaana a mwene Davidi. Oliye ahitakaleliwa vanlubale nuunona wihina ddibile Amuno ohumugoniha murogoliye Tamara. Mowiwanana ni malamulo a Moyizeji Amuno, ohowela ookwa mwaha wa ele eriliyena. (Lev. 20:17) Mwebaribarene Abisalawu ahikanna razawu mwaha otakaleliwa, mbwenye kanna ofuru woompa Amuno. — 2 Sam. 13: 20-23, 28, 29.
Abisalawu kandile wiisugwera nutakaleliwa mudhidhi murogoliye Tamara nugonihiwa (Osugwe ddima 6)
7. Salmista aali aavi nuwona obure othabwaga?
7 Malabo mamodha, enakala ninga athu enaneddiha mwamakalelo abure, kinasinyusiwa. Mwaha wa yeyo, iyo podi wambela wanganyedha akala niherana yothoma yapama ohumuwelihedha muthuya kunyawunya. Kasugwa yaapadduwe ni Salimista dhaala, oliye owawoona athu yerana dhithu dhabure dhewa dhoweddelaga pama, mbwenye ale yerena dhithu dhapama yakala ninga dhewa kadhaweddela pama. Oliye owoga eegi: ‘Ala baathu abure yahinathuwathuwela ethu.’ (Sal. 73:12) Oliye ahithuwathuwa vanlubale mwaha woona obure ofiyedhe wanganyedhaga akala yaali yapama omulabela Yehova. Oliye ofiyedha owoga egi: ‘Nuuxixa wonelamo dhithudha, kagandile wonelamo ethu.’ (Sal. 73:14, 16) Oliye ahifiyedha wonelamo nuwoga wihina ‘miyo, manyalwaga yaali neena nukwakwathuwa, teto gaahanle neena nuumotha.’ (Sal. 73:2) Ethu emodhave, yahipadduwela ddibila dhaala nnafunihu omwithana Alberto.
8. Ddiniyani yampadduwele ddibila Alberto mwaha othabwa otakaleliwa ni weddihiwa mwamakalelo abure?
8 Ddibila Alberto winkedhiwa wi oowiya korowa dha mmulogoni. Mwaha wayeyo, oliye oyelela mutholo waye mmulogoni, teto addibila yanonne wodhela muselu ole ohiya omuriha. Oliye anowoga egi: “Miyo gahitakaleliwa vanlubale ni gahithabwa wuukuwa.” Ddibila Alberto ahithuwathuwa vanlubale mwaha wa muselu ole ofiyedha oridha epaddi yomuzimuni ni odduddumadha muwari mwa yaka 5. Ethu epadduwile ni ddibila Alberto, enowoniha ethu baani enaapadduwe nahiya wihina otakaleliwa mwaha weddihiwa mwamakalelo abure onigonjhiha.
OMUTAJHIHA YESU WEDDIHIWAGA MWAMAKALELO ABURE
9. Nimakalelo baani Yesu eddihiwiye mwamakalelo abure? (Osugwe fotu.)
9 Yesu ohunihiyedha yotajhiha yapama nnahowelihu ohara neddihiwaga mwamakalelo abure. Kubuwela makalelo eddihiwiye mwamakalelo abure naathu amodha ni vemudhini vaye. Amudhaaye amodha yubuwela wihina Yesu eere osavuwa, teto anamaholela gereja yawoga wihina oliye ahikanna ademoniyu. Ohiya eyo, anyakoddo aaRomanu yomuteya ni yahimoniha goyi ofiyedha ompa. (Mar. 3:21; 14:50, 55; 15:16-20, 35-37) Naarive dhigaali ndo, Yesu ahanda ovilelana obure ole ahiwelihedhe kunyawunya. Nnahudhera ddi ni yopadduwa ya Yesu?
Yesu ohunihiyedha yotajhiha yapama wihina niharege neddihiwaga mwamakalelo abure (Osugwe ddima 9-10)
10. Yesu andile aavi ogonjhiha obure? (1 Peduru 2:21-23)
10 Omwileri 1 Peduru 2:21-23. Yesu ohunihiyedha yotajhiha yapama nnahowelihu ohara neddihiwaga mwamakalelo abure. Oliye ahinona mudhidhi wowoga ni mudhidhi womala. (Mat. 26:62-64) Oliye kasayela wiwakihedha, athu amodha yamwinkedhaga. (Mat. 11:19) Teto oliye awogaga, kamuthusa newene kamuruwana muthu. Yesu owiisugwera mwaha oliye ‘amuroromela Ole anatoriha mowogowa.’ Ohiya eyo, Yesu ahinona wihina Yehova owawoona makathamiho mateene yanfwanya. Teto oororomela wi Yehova eere wamariha makathamiho mateene mudhidhi wofwanelela. a
11. Neddihiwaga mwamakalelo abure, nnande aavi omutajhiha Yesu wodhela osugwera ndhe nnawogihu? (Osugwe fotu.)
11 Neddihiwaga mwamakalelo abure, iyo podi omutajhiha Yesu wodhela osugwera ndhe nnawogihu. Malabo mamodha muthuya aniwogela obe anerela ethu yabure, mbwenye noonelamo wi museluya kuthabwile onipiha mbani, iyo podi othoma odduwala muladduya. Mwaha nathoma owoga ethu-sithu, iyo podi othabwiha muladduya. (Ecl. 3:7; Tiya. 1:19, 20) Mbwenye malabo mamodha, iyo podi othoma omwakihedha muthu aneeddihiwa mwamakalelo abure obe wakihedha ebaribari. (Dho. 6:1, 2) Mbwenye naakihedhaga ethu-sithu, nnohowela wilibihedha wihina niwoge nupwaseya nonihaga nriho. — 1 Ped. 3:15. b
Neddihiwaga mwamakalelo abure, iyo podi omutajhiha Yesu wodhela othoma ethu baani nnafunihu owoga ni mudhidhi wowoga ethuya (Osugwe ddima 11-12)
12. Ddiniyani nnahowelihu werana wihina noonihe wi nnomuroromela ‘Ole anatoriha mowogowa?’
12 Iyo podi omutajhiha Yesu wodhela omuroromela, ‘Ole anatoriha mowogowa.’ Athu amodha yaneeddihaga obe yanitorihaga mwamakalelo abure, iyo podi ororomela wi Yehova anowoona dhinapadduwa. Okanna nroromelo nna, enere onikavihera ovilela naatorihiwaga obe neddihiwaga mwamakalelo abure. Mwaha iyo nihikanna ebaribari wi Yehova anere omariha obure waateene. Nahiya dhithu dhaatedhene mmadani mwa Yehova, nnosukuma otakaleliwa ni wakoyela ntxiga athu amodha. Okoya ntxiga ni otakaleliwa, podi onthukulela werana ethu yabure, oyelela ohagalala ni ononga wandana wehu ni Yehova. — Sal. 37:8.
13. Ddiniyani enanikavihera ovilela neddihiwaga mwamakalelo abure?
13 Ebaribari wi kannande ohara pamadhene yotajhiha ya Yesu. Mwaha wihina malabo mamodha iyo podi owoga obe werana ethu yanthukulele othwaruwa. (Tiya. 3:2) Malabo mamodha podi okala yorusa odduwala makalelo athu amodha eneddihiliwa mwamakalelo abure. Akala we onoweddihiwaga mwamakalelo abure, okanne ebaribari wihina Yehova ohunona makalelo oliwe. Teto woona wihina Yesu aheeddihiwa mwamakalelo abure, okanne ebaribari wi nuliyeya anere wonelamo makalelo oliwe. (Ebe. 4:15, 16) Ohiya onivahave yotajhiha ya Yesu wihina nihare, Yehova anonivaha dholaga dhinafwanyeya mBibiliyani dhinanikavihera ovilela neddihiwaga mwamakalelo abure. Kabeni noone versu biili dha yolebela ya Romanu, dhinanikavihere neddihiwaga mwamakalelo abure.
“MMWIHIYE MULUGU OONIHE OWALI WAYE”
14. Madhu owi “omwihiye Mulugu oonihe owali waye” enagana ddi? (Romanu 12:19)
14 Omwileri Romanu 12:19. Murumiwi Pawulo nuwavaha yolaga makiristawu wihina “emwihiye Mulugu oonihe owali waye,” oliye afuna awoge ddi? Mowiwanana ni mubuwelo wa yolebela ela, murumiwi Pawulo aagana ovaha mburo owali wa Yehova. Iyo nnovaha mburo owali wa Yehova, nahiya wihina Yehova erena ele anafuniye mudhidhi wofwanelela. Ddibila dhaala anithaniwa John eeddihiwe mwamakalelo abure anowoga egi: “Miyo gohowela wiisugwera wihina gaherena dhithudha mwamakalelo gafunimi, mwaha gahithabwa otakaleliwa. Mbwenye kayali yokweya werana eyo. Yolebela ya Romanu 12:19, yahigikavihera odidela omujheha Yehova.”
15. Mwahaya bwaddi sapama omujheha Yehova wi aamarihe makathamihoya? Owogemo.
15 Namujheha Yehova wi aamarihe makathamihoya, nnere wawakela mareeliho owinjhiva. Nahiya dhithudha mmadani mwa Yehova, nnohiya okala ootakaleliwene ni kannasayele werana dhithudha yekihu. Yehova anopaganya wi anere onikavihera. Bumwahaya neddihiwaga mwamakalelo abure, enakala ninga Yehova anawoga ni iyo eegi: “Ohiye muladduya mmadani mwaaga miyo ginere weddiha.” Iyo naroromela mpaganyo wa Yehova onihina “ginere omuhogolosela” Iyo podi ohiya muladduya ovira, nroromelaga wihina Yehova anere werana ethu-sithu mudhidhi wofwanelela. Siyeyo yamukavihera ddibila John asorihiwe mundduli. Oliye anowoga eegi: “Miyo gowubuwela ayi, gahiya wihina Yehova atxokotxele muladduya, yokumelelavoya enere okala yapama opitha makalelo gafunimi otxokotxela muladduya.”
“ODIDELE OGONJHIHA OBURE NUUPAMA”
16-17. Olobela winanikavihera aavi “ogonjhiha obure nuupama?” (Romanu 12:21)
16 Omwileri Romanu 12:21. Murumiwi Pawulo ahakongomedha makiristawu wihina “edidele ogonjhiha obure nuupama.” Mudhidhi Yesu awogaga mwaha waye wavamwangoni, oliye ahisoriha eegi: “Mwadhivelege amwiddani enyu ni mwalobelelege ale enuharaharani.” (Mat. 5:44) Teto siyeyo Yesu eriliyena. We onowabihaga wubuwela goyi Yesu ooniliye mudhidhi anyakoddo aaRomanu emukomelaga vantxikwani na goyi? Mwebaribarene iyo kannanda wonelamo goyi yaatene Yesu ooniliye mudhidhi yole, mwaha ahithabwa wonihiwa goyi ni aheeddihiwa mwamakalelo abure.
17 Yesu kaahiile okala ororomeleya ni oodhivela, naarive eeddihiwaga mwamakalelo abure. Ohiya omuloba Yehova wihina asinyuse anyakoddo ale yamoniha goyi, Yesu ahalobelela eegi: “Babani, kaaleveleleni, eneriwa kinoona.” (Luk. 23:34) Nalobelelaga ale enaneddiha mwamakalelo abure, nnorabela okoya ntxiga nuutakaleliwa, teto eyo podi onikavihera wawonaga mwamakalelo apama athu enaneddiha mwamakalelo abure.
18. Malobelo emukavihere aavi ddibila Alberto ni John ovilelana obure?
18 Ethu emukavihere ddibila John ni Alberto ovilelana obure, yaali malobelo. Ddibila Alberto anowoga eegi: “Miyo gowalobelela addibila yageeddihile mwamakalelo abure. Miyo gomuloba Yehova wihina agikavihere odduwala dhithu dhatedhene dhaapadduwile.” Yohagalasaya sowihina ddibila Alberto ohuhogolowela omulabela Yehova nuuroromeleya. Vano ddibila John anowoga eegi: “Dila dhowinjhivadhene gomulobelela ddibila agiwogele madhu oopiha mbani. Mwaha wa malobelo gawerimina, Yehova ogikavihera omulevelela, ohutakaleliwa nuliye ni ohimutoriha. Teto malobelo ale yahigikavihera okanna murenddele mwigumi mwaaga.”
19. Woona wi nnakala mwilaboni muna yabure ddiniyani nnahowelihu werana? (1 Peduru 3:8, 9)
19 Woona wi nnakala mwilaboni muna yabure, nlabo nimodha nnere weddihiwa mwamakalelo abure. Mbwenye naarive needdigiwaga mwamakalelo abure, kahiye omuloba Yehova nikavihero. Ohiya eyo, nididele oparihedha mabasa malagano a mBibiliyani, teto kanidduwale omutajhiha Yesu neddihiwaga mwamakalelo abure. Neragana dhithu ndha, nikanne ebaribari wi Yehova anere onireeliha nimukalakala. — Omwileri 1 Peduru 3:8, 9.
JHIBO 38 Yehova anere wukavihera okala akopolo
a Va 1 Peduru kapitulu 2 ni 3 murumiwi Pawulo anowoga dhithu dhowinjhiva dhabure dhafwanya makiristawu. Motajhiha, amodha yaali adhaari ni yoweddihiwa mwamakalelo abure ni anabuya ewa. Teto ahiyana amodha yowonihiwa goyi ni amamuniwa yahaali makiristawu. — 1 Ped. 2:18-20; 3:1-6, 8, 9.
b Osugwe vidiyu enafwanyeya mu jw.org enna musolo Makalelo odhivela onadhiwana murenddele webaribari.
