OHUDHERA 47
JHIBO 103 Anamaholela nvaho wa Yehova
We onofuna okavihera mulogo ninga namaholela mulogo?
‘Akala muthu onowilibihera wihina akale namaholela, anowasayela mabasa apama.’ — 1 TIM. 3:1.
DHITHU NNAAHUDHERIHU
Nnere woona dhikalelo ddibila anahoweliye oparihedha mabasa mwigumini mwaaye wihina akale namaholela mulogo.
1-2. Anamaholela mulogo enaapara mabasa baani?
AKALA onna okavihera mulogo muwari mwa mudhidhi wowinjhiva ninga mudhaari ookavihera, mwebaribarene we ohilibihedha vanlubale wihina okanne dhikalelo dhinukavihere olaba ninga namaholela mulogo. Onofuna waapara ‘mabasa apama’ aanamaholela mulogo enaapariwa? — 1 Tim. 3:1.
2 Anamaholela mulogo enaapara mabasa baani? Aliwa enowasogolela mabasa oolaleya, enolaba nuviheya wihina yakukule mambila a Yehova, teto enohudhiha ni enokavihera mulogo wodhela ndhe enawogiwa ni eneriwana. Bumwahaya Bibiliya agawogaga anamaholela mulogo ninga ‘alobwana [eli ninga] nvaho.’ — Efe. 4:8.
3. Ddiniyani onahoweliwe werana wihina okale namaholela mulogo? (1 Timotiyu 3:1-7; Titu 1:5-9)
3 Ddiniyani onahoweliwe werana wihina okale namaholela mulogo? Osayela dhikalelo onahoweliwe okanna, kinaligana ni osayela dhikalelo wi orumedhiwe vamabasani. Sokweya orumedhiwa vamabasani wakanna dhikalelo dhinahoweliya vamabasaniva. Mbwenye akala onofuna othomiwa ninga namaholela mulogo, ethu enahoweleya kahiyo baahi onona ohudhiha ni olaleya pama, onohowela okanna dhikalelo Bibiliya anasorihiye dhinafwanyeya va 1 Timotiyu 3:1-7 ni Titu 1:5-9. (Omwileri.) Ohudhera wula nnere woona dhithu tharu dha vayekiwa ddibila anahoweliye okanna wihina athomiwe ninga namaholela mulogo: (1) okanna ekalelo yapama ode ni mmulogoni, (2) okala yotajhiha yapama wodhela onona osamalela pama emudhaye ni (3) okala owiwegeredhene wihina akavihere mulogo.
OKANNA EKALELO YAPAMA
4. Okala ‘muthu ahinna muladdu,’ enatapulela ddi?
4 Wihina okale namaholela mulogo onohowela okala ‘muthu ahinna muladdu.’ Eyo enatapulela wihina we ohukanna ekalelo yapama mmulogoni, mwaha kaavo anuwinkedhe wodhela ethu yabure. Ohiya eyo, onohowela ‘ononiwa ninga muthu apama naathu ode.’ Ebaribari wi athu amodha podi wuteyaga mwaha we okala mukiristawu. Mbwenye kaavo anahowela wanganyedha akala we oli oororomeleya ni akala oli muthu apama. (Dan. 6:4, 5) Wikohe, “miyo ginoniwa ninga muthu apama naaddibila vamodha ni athu oode?”
5. Ddiniyani onahoweliwe werana wihina ‘odhiveliwege opama?’
5 Akala we ‘onodhiveliwa opama,’ mwebaribarene onerege osayela dhikalelo dhapama dha athu amodha ni onerege watamalela mwaha wa dhikalelo dhewa dhapama. Teto onohowela waweddiha athu amodha nuupama, malabo mamodha wodhela werana dhithu aliwa yahajhehedhiwa. (1 Tes. 2:8) Mwahaya bwaddi sathima addibila anafuna okala namaholela mulogo odhiveliwa opama? Mwaha enere wakavihera olabihedha mudhidhi wewa wowinjhiva yakukulaga mambila a Yehova ni wakwanihedha mutholo dhewa nuuhagalala. (1 Ped. 5:1-3) Naarive eyo yahile ethu yokweya, aliwa enohagalala vanlubale mwaha wakavihera amodha. — Dho. 20:35.
6. Onere ddi wihina okale ‘namaakela aleddo?’ (Eberewu 13:2, 16; osugwe fotu.)
6 Onohowela woniha wihina ‘oli muthu anawakela aleddo’ wodhela waweddiha athu amodha nuupama, naaleya wahanonniwe pama. (1 Ped. 4:9) Livuru dhaala na referensiya, nnowoga wodhela muthu ali namakela aleddo neegi: “Mulago wa vaade vaye ni wa mmurimani mwaaye, onohowela okala wofuguwene wihina awakele aleddo ahanonniye.” Bumwahaya wikohe: “Miyo gihinoniwa ninga muthu anawakela nuupama athu enadhela waredhela mulogo waaga?” (Omwileri Eberewu 13:2, 16.) Mulobwana ali namakela aleddo, anowawoniha opama ni anogawana ele anniyena naathu aatene enadha omwaredhela. Ninga ale eli oohawa, addibila nnawithanihu wihina edhe ewoge mwaha mmulogoni mwehu ni addibila enalaba vanlubale wihina yalibihe addibilihu ninga anameeddela mulogo.— Gén. 18:2-8; Pro. 3:27; Luk. 14:13, 14; Dho. 16:15; Rom. 12:13.
Anamatelana eli anamakela aleddo emwakelaga, nameeddela mulogo ali ni mwariye (Osugwe ddima 6)
7. ‘Ohudhiveliwa korowa’ enatapulela ddi?
7 ‘Kudhiveliwege korowa.’ Eyo enatapulela wi kuthabwege ovaha thima dhoreela. Naarive akala oli ooreela obe ohawa. Teto we onowilibihedha opweha mburo wobajha omwene wa Mulugu mwigumini mwawo. (Mat. 6:33) Mwebaribarene we onolabihedha kopolo, mudhidhi wawo ni dhithu dhimodha wihina omulabele Yehova ni osamalele emudhi yawo ni mulogo. (Mat. 6:24; 1 Juwa. 2:15-17) Vano we podi wikoha: “Monelo waaga buuvi wodhela korowa? Gili ohagalalene ni dhithu ginnimina? Obe ginothuwathuwela okanna korowa dhowinjhiva ni dhoreela?”— 1 Tim. 6:6, 17-19.
8. Okala muthu ‘owipimelela weragana dhithudha,’ ni ‘owihiha,’ enatapulela ddi?
8 Wakala ‘owipimelela weragana dhithudha’ ni ‘owihiha,’ eyo enatapulela wi dhithu dhatedhene oneregiwena mwigumini mwawo, oneregena mowipimelela. Eyo enovolowelavo wipimelela wodhela muselu wong’wa, makalelo owara, dhoojha ni yaredhelo. Teto we kunahara mweddelo waathu yahinamulabela Yehova. (Luk. 21:34; Tiya. 4:4) Ohiya eyo, we onowanda okala oopwaseyene athu amodha yuligaga obe yuweddihaga mwamakalelo abure. Teto kuthabwege ‘ong’wa dhong’wa dholezeliha,’ newene ononiwa ninga muthu oolezela. Wikohe: “Makalelo ginalabihedhimi egumi yaaga, enowoniha wihina gili muthu owipimelela geeragana dhithudha ni ginowihiha?”
9. Okala muthu ‘athotho’ ni ‘owegeredheya’ enatapulela ddi?
9 Wakala “athotho,” onerege walabihedha malagano a mBibiliyani wafunaga werana yothoma si yothoma. Teto enatapulela osayela mudhidhi wihina wubuwele pama, makalelo kadda yolebela eniwananiwa ni museluya. Ni makalelo yaala, onere wonelamo museluya ni werana yothoma yapama. We kunande wonelamo pama museluya, wahisayele mudhidhi wihina wonelemo pama. (Pro. 18:13) Mbwenye wonelamo pama museluya, onere wande werana yothoma yapama ni wubuwela ninga Yehova. Vano okala ‘owegeredheya,’ enatapulela onona wisamalela pama ni onona obeha. We ohunoniwa ninga muthu oororomeleya ni anahara dhoholela? Okanna dhikalelo ndha, winere wukavihera wooniwa ninga muthu apama. Vano, kabeni noone dhikalelo dhinasorihiwa mBibiliyani ddibila anahoweliye okanna wi akale yotajhiha yapama ya namasogolela emudhi.
OKELE YOTAJHIHA YAPAMA YA NAMASOGOLELA EMUDHI
10. Mulobwana anoonihe aavi wi ‘anosamalela pama’ emudhi yaye?
10 Akala we ohutela ni onofuna okala namaholela mulogo, emudhi yawo enohowela okanna ekalelo yapama. Bumwahaya, ‘onohowela osamalela pama emudhaawo.’ Obe onohowela wooniwa ninga muthu apama anonne osamalela emudhi nuudhivela vamodha nuupama. Teto eyo, enatapulela ojhiha emudhaawo epaddi yomuzimuni. Mwahaya bwaddi werana eyo sathima? Murumiwi Pawulo ohuwoga mwahaya eegi: ‘Akala mulobwana kananda osamalela pama emudhaye, anaande aavi osamalela mulogo wa Mulugu?’ — 1 Tim. 3:5.
11-12. Mwahaya bwaddi ekalelo ya ahima enowapatha abaabi enafuna okala anamaholela mulogo? (Osugwe fotu.)
11 Akala oli baabi, onande aavi wahudhiha anawo wihina ‘ekale ooleleya ni oowiwelela?’ Onohowela waxagiha ni wahudhiha anawo nuudhivela. Ebaribari wi onofuna vanlubale wihina anawo ekale oohagalala ni yaredhege ninga ahima amodha, mbwenye makalelo onaxagihiwe, winere wakavihera aliwa okala ahima oowiwelela, anriho ni ooleleya. Ohiya eyo, onohowela wilibihedha wihina wakavihere anawo okanna wandana ni Yehova, wahara malagano a mBibiliyani ni wunnuwelavo epaddi yomuzimuni ofiyedha obaddiziwa.
12 ‘Ekanne ahima enarumedha ebaribari ni ehinafwanyiwana muladdu.’ Ki mwaana ali Namoona a Yehova eerana yothega enlubale, eyo enapatha aavi makolo aye? Akala baabi a mwaana yoola, kamulenle pama ni kamusumulunle, oliye kanafwanelela okala namaholela mulogo.— Omusugwe Sentinela a 15 a Outubro a 1996, epaddi 21 ddima 6-7.
Abaabi eli makiristawu enohowela wahudhiha aniwa wihina yandege omulabela Yehova ni okavihera mulogo (Osugwe ddima 11)
OSAMALELA MULOGO
13. Onande aavi okala muthu ‘ookweya’ ni ‘oohithukula’?
13 Addibila enna dhikalelo dhapama, ehikanna thima mmulogoni. Mulobwana ali ‘okweya,’ anowilibihedha okala muthu amurenddele. Akala we onofuna ononiwa ninga muthu ookweya, wavuruwanege athu amodha yawogaga ni okalege otapuwene wihina wonelemo enubuwela athu amodha. Motajhiha, wahakale vaari va mutugumano wa anamaholela mulogo, were orumedha mubuwelo waddibila oniwanana ni malagano a mBibiliyani, naarive oganna mubuwelo mmodha? Teto onohowela okala muthu ‘ohithukula’ obe nere, ahinadidela werana dhithudha ninga munafuneliye. (Gén. 13:8, 9; Pro. 15:22) Teto kukale muthu ‘oowali ni onyanyuwa bure-bure.’ Mbwenye ohiya okala muliba ovanya, okale muthu ookweya ni owogege ni murenddele. Werana ndo, onerege wukweyela odhana murenddele, naarive dhithudha dhirusaga. (Tiya. 3:17, 18) Wakanna elemelelo yowoga naathu aatene nuupama naaleya ehili addibila, onere wakavihera okala athu oopwaseya ni kinatakaleliwege bure-bure. — Jui. 8:1-3; Pro. 20:3; 25:15; Mat. 5:23, 24.
14. Okala ‘muthu obaddiziwe ovanene’ ni ‘oororomeleya’ enatapulela ddi?
14 Wihina ddibila athomiwe ninga namaholela mulogo, ‘kaakale muthu obaddiziwe ovanene.’ Eyo enatapulela wi onohowela ovira mwana mudhidhi wihina alibihe wandana waye ni Yehova ni ohudhera omulabihedha pama Bibiliya wihina andege werana dhothoma dhapama. Ohunathi othomiwa ninga namaholela mulogo, onohowela omutajhiha Yesu wodhela okala muthu oovilela ni owiyeviha ojhehaga mudhidhi wofwanelela wihina Yehova uvahe mutholo dhimodha mmulogoni. (Mat. 20:23; Fil. 2:5-8) Wooniwa ninga muthu ‘oororomeleya’ enatapulela oparihedha mabasa malamulo ni malagano a Yehova mwigumini mwawo ni ohara dhoholela onakeliwe munikuruni mwa Yehova. — 1 Tim. 4:15.
15. Anamaholela mulogo aatene enowanda owoga pama mwaha dhewa dhavathaddo, owogemo.
15 Bibiliya anowoga mohihiyedhedha wihina anamaholela mulogo enohowela ‘onona ohudhiha pama.’ Eyo enatapulela wi anamaholela mulogo aatene enowanda owoga pama mwaha dhavathaddo? Naari! Anamaholela mulogo amodha, naarive yahandaga owoga pama mwaha dhewa, aliwa enowanda wahudhiha pama athu enafwanyiwa mmalaleyelo, teto enowawaredhela addibila wihina yalibihe. (Omuliganihe 1 Korintiyu 12:28, 29 ni Efeziyu 4:11.) Naarive ohandaga owoga pama mwaha dhawo, onohowela wilibihedha wihina wandege ohudhiha pama. Mbwenye onande aavi okala namahudhiha apama?
16. Onande aavi okala namahudhiha apama? (Osugwe fotu.)
16 ‘Ahiddelele pamadhene madhu oororomeleya.’ Wihina okale namahudhiha apama, omulabihedhege Bibiliya malabo aamateene wafunaga ohudhiha ni ovaha yolaga. Okale namahudhera apama a Bibiliya ni malivuru ehu. (Pro. 15:28; 16:23) Wahudheraga, opwasedhege woona makalelo malivuru ehu enatapuleliwa versu dha mBibiliyani. Eyo enere wukavihera oparihedha mabasa ndhe onahudheriwe mwamakalelo apama. Teto wahudhihaga, wilibihedhe oodahinya murima dha athu enuvuruwana. Ohiya eyo, we podi waloba anamaholela mulogo amodha enonne ohudhiha pama wihina yukavihere owomihedha makalelo awo ohudhiha. (1 Tim. 5:17) Anamaholela mulogo enohowela ‘walibiha’ addibila ni arogola. Teto malabo mamodha aliwa enohowela wavaha yolaga obe ‘wasumulula.’ Mbwenye yasumululaga obe yaalibihaga addibila, aliwa enohowela werana eyo nuudhivela. Wakala ookweya, oodhivela ni wamulabihedhaga Bibiliya wahudhihaga, onere okala namahudhiha apama. Mwaha wihina onaamutajhihege namahudhiha Munlubale Yesu Kiristu. — Mat. 11:28-30; 2 Tim. 2:24.
Mudhaari ookavihera ahudheraga ni namaholela mulogo makalelo owalibiha addibila amulabihedhaga Bibiliya. Oliye egeredhaga mwaha waaye iisugwaga va espelyuni (Osugwe ddima 16)
ODIDELE WERANA ELE ONANDIWE
17. a) Enaamukavihere ddi mudhaari ookavihera wilibihedha wihina akanne dhikalelo dhinahoweleya wi akale namaholela mulogo? b) Ddiniyani anamaholela mulogo enahoweliwa wubuwela yavahaga mutholo ddibila? (Osugwe kwaduru enna musolo “ Kujhehege wihina ddibila eregena dhithu dhaatedhene mologomana.”)
17 Numala woona dhikalelo onahoweliwe okanna wihina okale namaholela mulogo, adhaari ookavihera amodha podi wubuwelaga wihina kinande okanna dhikalelo ndha. Kudduwale wihina Yehova nnikuru naye, kinajheha wihina addibila ekale ologomana wihina yonihe dhikalelo ndha. (1 Ped. 2:21) Mbwenye muzimu wotxena, onere wukavihera wihina okanne dhikalelo ndha. (Fil. 2:13) Ononamo wi ehikalawo ekalelo onahoweliwe okanna? Akala siyeyo, olobele wa Yehova omulobaga wihina ukavihere okanna ekalelo onilibihedhiwe okanna. Osayele mmalivuruni mwehu muselu anawoga wodhela ekalelo eyo ni omulobe namaholela mulogo wihina ukavihere woona makalelo okanna ekalelo eyo.
18. Ddiniyani adhaari okavihera aatene enahoweliwa werana?
18 Ohiya anamaholelave mulogo baahi, nihiyoya nnohowela wilibihedha okanna dhikalelo dhisorihiwe muwari mwa ohudhera wula. (Fil. 3:16) Akala we oli mudhaari ookavihera, wilibihedhe wi okale namaholela mulogo! Omulobe Yehova wihina uxagihe ni ukavihere okanna dhikalelo dhinahoweleya wihina odidele olabihedhiwa mmulogoni. (Isa. 64:8) Mwebaribarene Yehova anere woona wilibihedha wawo ni anere wukavihera wihina okale namaholela mulogo.
JHIBO 101 Nimulabele Yehova mowiwanana
