1-2. (a) Makathamiho baani yanfwanya murumiwi Pawulo mudhidhi aalebelaga karta addibila ohEfezu? (b) Makoho baani nnafunihu wawakula muwari mwa ohudhera wula?

 NAARIVE agaali oomagiwene oRoma, murumiwi Pawulo oofuna walibiha addibile. Woona wihina kaanda wawaredhela oliye owalebela makarta. Karta nimodha thinna aalebeliye addibila ohEfezu yaka ya 60 obe 61 M.W. — Efe. 1:1; 4:1.

² Yaka kumi mundduli murumiwi Pawulo ahikala vamodha ni addibila ohEfezu, alaleyaga ni ahudhihaga muthenga dhapama. (Dho. 19:1, 8-10; 20:20, 21) Oliye owadhivela vanlubale addibila ala ni oofuna wakavihera wihina edhowegeve ekalaga oororomeleya wa Yehova. Vano mwahaya bwaddi murumiwi Pawulo adhe aalebelege addibila ohEfezu awogaga wodhela yiihi ni waara? Ki dhithu baani nnahudherihu ni yolaga aavahiliye? Nnere woona ovanene dhowakula dha makoho ala.

OKUMA OHIYIINI ODHOWA MBURO WOWAARA

3. Madhu baani murumiwi Pawulo alabihedhiye mukartani mwaaye aalebeliye addibila ohEfezu?

³ Murumiwi Pawulo ahalebela addibila ohEfezu egi: ‘Kale mwedda muyiihini, mbwenye vano munedda muwaarani.’ (Efe. 5:8) Pawulo ahilabihedha ohiyana olivo wa yiihi ni waara wihina oonihe makalelo addibila ohEfezu yasaddunliwa egumi yewa. Nnere woona mwahaya bwaddi Pawulo adhe awogege wi makiristawu ale ‘kale yeedda muyiihini.’

4. Ni makalelo baani addibila ohEfezu yaliwa muyiihini?

⁴ Gereja dhowoota. Yahinathi okala makiristawu addibila ohEfezu yorumedha dhohudhiha dha gereja dhowoota ni yowawerana  masenga. Teto luwani yohEfezu wahikala tempulu enlubale ya mulugu a muhiyana aagerego ithaniwa Artemis, teto athu owinjhiva yoona tempulu ela ninga mburo mmodha wotikiniha wa mudhidhi yole. Athu yadhowesa tempulu yela wihina yawebedhe amulugu ewa. Teto malondda yeriwana oohana ni oguliha dhikwamuthu dha mulugu ola Artemis yovaha korowa dhowinjhiva. (Dho. 19:23-27) Ohiya eyo, luwani ele yanoniwe ninga mburo wathabwa weriwana masenga. — Dho. 19:19.

5. Ni makalelo baani akudda Efezu yaliwa muyiihini mwaha wawerana mararuwo?

⁵ Mararuwo. Athu ohEfezu yothabwa wawerana mararuwo teto kiyakanna manyazo mwaha wa dhithu yeriwana. Wa aliwa othapanya wodhela muselu dha mararuwo kayali ethu yabure, ohiya baahi yakala vamathangani mbwenye ni mugerajanimwa. (Efe. 5:3) Akudda Efezu owinjhiva ‘yahiyelela ekalelo yaatene yemuthu yewa,’ ni madhu mamodha, enatapulela wi “aliwa yahikwa zandde.” (Efe. 4:17-19) Yahinathi omunona Yehova ni ohudhera ele eli yapama ni yabure, mubuwelo wewa kuwanyemela yeragana dhithu dhabure, teto aliwa kayapwatha akala dhithu yeriwana dhomuukula Yehova obe naari. Bumwahaya murumiwi Pawulo adhe awogege egi: ‘Mubuwelo wewa oli muyiihini wolapela ni egumi enadha wa Mulugu.’

6. Mwahaya bwaddi murumiwi Pawulo adhe awogege wi addibila ohEfezu ‘vano yeedda muwaarani?’

⁶ Mbwenye, yohagalasaya sowihina athu amodha yakala ohEfezu yahivenyamo muyiihini, bumwahaya murumiwi Pawulo adhe awogege egi: ‘Vano munedda muwaarani mowiwanana ni Nabuya.’ (Efe. 5:8) Aliwa yahisakula okalawo mowiwanana ni ebaribari enafwanyeya mBibiliyani eli ninga waara waweddiha. (Sal. 119:105) Addibila ala ohEfezu yahihiya dhithu dhatedhene dhiwanana ni gereja dhowoota vamodha ni wawerana mararuwo. Vano okala ‘anamatajhiha a Mulugu’ ni yaherana dhatedhene enandiwa wihina emwebedhe Yehova ni murima wewa watene ni emuhagalase. — Efe. 5:1.

7. Ni makalelo baani egumi yehu enaliganiwa ni ya makiristawu yakala ohEfezu?

⁷ Ni makalelo mamodhave, iyo nihinathi ohudhera ebaribari, naali muyiihini mwaha  wi nowawerana mararuwo ni noorumedha dhohudhiha dha gereja dhowoota. Amodha wa iyo nowajha mathanga eniwanana ni gereja dhowoota. Mbwenye numala ohudhera wodhela malagano a Yehova wodhela ele eli yapama ni yabure, iyo osaddula egumi yehu ni obajha werana dhithu dhinamuhagalasa Yehova. Vano mwaha wa yeyo iyo obajha wajhavo mareeliho owinjhiva. (Isa. 48:17) Mbwenye owoga ebaribari kahiyo ethu yokweya odhowagave nsukamaga yiihi ni odidela weedda ‘ninga ahima a waara.’ Ki nnande aavi werana eyo?

OTHAWE YIIHI

8. Mowiwana ni yolebela ya Efeziyu 5:3-5 ethu baani makiristawu yahoweliwa orabela?

⁸ Omwileri Efeziyu 5:3-5. Wihina yande okala wolapelawene wa yiihi, makiristawu ohEfezu yohowela orabela werana ethu-sithu enamutakalela Yehova, eyo kiyatapulela baahi warabela mararuwo, mbwenye yohowela orabela othapanyedha muselu dha mararuwo. Pawulo ahawubusedha makiristawu ohEfezu wihina aliwa yohowela othawa dhithu ndha akala enofuna ‘ovolowa mu Omwene wa Kiristu ni wa Mulugu.’

9. Mwahaya bwaddi nigahowela osukuma ethu-sithu eniwanana ni mararuwo?

⁹ Ni iyowa nnohowela okala pasope wihina nnavolowele ‘dhithu dhahinna mabasa enerena athu eli muyiihini.’ (Efe. 5:11) Ebaribariya sowihina muthu aajhaga mudhidhi wowinjhiva asugwaga, avuruwanaga ni awogaga wodhela muselu dha mararuwo, sokweya oliye wawerana mararuwo. (Gén. 3:6; Tiya. 1:14, 15) Elabo dhaala addibila oohiyanahiyana, opandda nikuuru mu redes socias wihina ethapanyege. Omabajhowene yathapanyedha dhithu dhomuzimuni, mbwenye yowukulihaya sowihina nuuvira mudhidhi aliwa obajha othapanyedha muselu dha mararuwo. Vasogolova owinjhiva wa addibila ale, owoga wihina othapanya wule sithu yathukulenle wawerana mararuwo.

10. Saddana anaxixa onleketha ni makalelo baani? (Efeziyu 5:6)

¹⁰ Elabo ela ya Saddana enoxixa mudhidhi waatene onleketha ofiyedha onithukulela orumedha wihina malamulo a Yehova wodhela wawerana mararuwo kahi ethu yabure. (2 Ped. 2:19) Mbwenye eyo kinanitikiniha mwaha wihina murako Saddana analabihedhiye okuma kale, fuwavunganyedha athu wihina ehandege onona ohiyaniha ethu yapama ni yabure. (Isa. 5:20; 2 Kor. 4:4) Bumwahaya filime dhowinjhiva, aporogarama enavira mutelevizorini ni sayiti, dhinovuwiha mubuwelo ohuniwanana ni malamulo owogowa a Yehova! Saddana anafuna wihina iyo nrumedhege wihina dhithu dhonyakavala ni dha mararuwo kahi dhithu dhabure teto kadhinanitotela makathamiho. — Omwileri Efeziyu 5:6.

11. Yopadduwa ya Angela enanikavihera aavi oparihedha mabasa yolaga enafwanyeya va Efeziyu 5:7? (Osugwe fotu.)

¹¹ Saddana anafuna wihina nandane ni athu yahinanikongomedha werana efunelo ya Yehova. Bumwahaya murumiwi Pawulo adhe aakongomedhege addibila ohEfezu egi: ‘Bumwahaya kamwandane ni aliwa,’ obe neere ni athu enerana dhithu dhabure vamentoni va Yehova. (Efe. 5:7) Malabo ala a peeno iyo nnohowela okala pasope wapitha addibila ohEfezu, mwaha peeno nnojha mudhidhi wowinjhiva ni athu a mwilaboni, ohiya tho-tho baahi mbwenye namulabihedhaga redes sociais. Angela, a anakala ohAziya, uhonelamo wi olabihedha redes sociais podi okala ethu yowopiha. Oliye anowoga egi: “Enakala ninga murako onamoreliwemo wahinonaga. Vano ofiya mudhidhi gahandimi wasakula pama akwaga ni gahandana ni athu yahinaariha malagano a Yehova. Omagomihedhowa  miyo obajha wubuwela wi kaavo muladdu walupa malamulo a Yehova.” Yohagalasaya sowihina anamaholela mulogo oodhivela yahimukavihera Angela osaddula mubuwelo waye. Oliye anowogave egihina: “Vano ginodhaliha mubuwelo waga ni dhithu dhomuzimuni ohiya ni dhithu dhinavuwihiwa mu redes sociais.”

12. Enaanikavihere ddi wahara malagano a Yehova wodhela ele eli yapama ni yabure?

¹² Kanihiye mubuwelo wa elabo onivolowela ofiyedha onthukulela wubuwela wihina wawerana mararuwo kahi ethu yabure. Mwaha iyo nihinona wi eyo kahi ebaribari. (Efe. 4:19, 20) Bumwahaya yere okala yapama wikoha: ‘Ginokala pasope wihina gihithabwege ojha mudhidhi wowinjhiva ni akwaaga ooskola, oomabasani obe ni athu amodha yahinaariha malamulo owogowa a Yehova? Ginowanda oliba murima wihina gibarele malamulo owogowa a Yehova naarive athu amodha yahirumedhaga obe egonaga ninga muthu oorusa?’ Ninga anooniha 2 Timotiyu 2:20-22, nnohowela okala pasope nasakulaga akwihu mmulogoni. Sapama ohidduwala wihina mmulogoni ehikalamo athu yahinanikavihere okalave oororomeleya wa Yehova.

MUDIDELE WEDDA ‘NINGA AHIMA A WAARA’

13. ‘Weedda ninga ahima a waara’ enatapulela ddi? (Efeziyu 5:7-9)

¹³ Murumiwi Pawulo ahakongomedha makiristawu ohEfezu ohiya baahi osukuma yiihi, mbwenye odhowagave yeeddaga ‘ninga ahima a waara.’ (Omwileri Efeziyu 5:7-9.) Eyo enatapulela ddi? Ni madhu ookweya, enatapulela weragana dhithudha ninga makiristawu mudhidhi wamutene. Wihina nande werana eyo, nnohowela omwileri ni omuhudhera Bibiliya malabo amaatene vamodha ni wawileri malivuru enakumihiwa nnikuru nehu. Ohiya eyo, sathima vanlubale opwasedha yotajhiha ni dhohudhiha dha Yesu Kiristu, ali “waara wa mwilaboni.” — Juwawu 8:12; Pro. 6:23.

14. Muzimu wotxena onanikavihera ni makalelo baani?

¹⁴ Akala nnofuna weddaga ninga ‘ahima a waara.’ Nnohowela nikavihero na muzimu wotxena. Mwaha wa ddi? Mwaha wi kahi ethu yokweya okala oweela obe ohawerana mararuwo mwilaboni ela nnakalihu. (1 Tes. 4:3-5, 7, 8)  Muzimu wotxena onere onikavihera owanana mubuwelo wabure wamwilaboni, ninga dhohudhiha dha filozofiya vamodha ni monelo wa athu wahiniwanana ni efunelo ya Mulugu. Teto muzimu wotxena onere onikavihera werana dhithu ‘dhatedhene dhili dhapama ni dhowogowa.’ — Efe. 5:9.

15. Dhithu baani nnahowelihu werana negi naakele muzimu wotxena? (Efeziyu 5:19, 20)

¹⁵ Makalelo mamodha owakela muzimu wotxena, fuudhela olobela nilobaga muzimu wotxena. Yesu ahiwoga wi Yehova “anere wavaha muzimu wotxena ale enamuloba!” (Luk. 11:13) Ohiya eyo, nanvuwihaga Yehova mmutugumanoni nnowakela muzimu wotxena. (Omwileri Efeziyu 5:19, 20.) Vano muzimu wotxena wanivolowela ononikavihera werana dhithu dhinamuhagalasa Yehova.

16. Ddiniyani enaanikavihere werana dhothoma dhapama? (Efeziyu 5:10, 17)

¹⁶ Nafunaga werana yothoma yathima mwigumini mwehu, nnohowela wonelamo ‘efunelo ya Yehova’ namala nerena dhithudha mowiwanana ni efunelo yaye. (Omwileri Efeziyu 5:10, 17.) Vano naafwanya malagano a mBibiliyani eniwanana ni ethu nnafunihu othoma, enakala ninga nihifwanya ethu Yehova anubuweliye wodhela muselu yole. Vano naparihedha mabasa malagano a Yehova nnowanda werana dhothoma dhapama.

17. Nnaalabihedhe aavi mudhidhi wehu mwamakalelo apama? (Efeziyu 5:15, 16) (Osugwe fotu.)

¹⁷ Pawulo ahakongomedha makiristawu ohEfezu olabihedha pama mudhidhi wewa. (Omwileri Efeziyu 5:15, 16.) “Mbure,” obe nere mwiddani ehu Saddana anafuna wi nikale oopinyamiyeya ni dhithu dha mwilaboni ofiyedha ohukanna mudhidhi wihina nimulabele Yehova. (1 Juwa. 5:19) Mukiristawu podi othabwaga othuwathuwela dhithu ninga korowa, ohudhera wa vadhulu ni mabasa, ohiya othuwathuwela wawenjhedhedha mabasa aye anampareliye Yehova, ethu ninga yeela yabajha opadduwa eyo enoniha wi muthuya ohambela wubuwela ninga athu a mwilaboni. Ebaribari wihina korowa, ohudhera wa vadhulu ni dhoreela kahiyo dhithu dhabure. Mbwenye kanithabwege osogoliha dhithu ndha mwigumini  mwehu. Akala nnafuna neddegeve ninga ‘ahima a waara,’ nnohowela ‘olabihedhaga pama mudhidhi wehu’ wodhela opwasedha werana ndhe dhili dhathima.

18. Ddiniyani Donald eriliyena wihina alabihedhe pama mudhidhi waye?

¹⁸ Osayelege makalelo owawenjhedhedha mabasa awo onampareliwe Yehova. Siyeyo Donald, anakala elabo yowAfrika du Suli eriliyena. Oliye anowoga egi: “Miyo wubuwela vang’ono wodhela makalelo galabihedhimi egumi yaga, numala miyo olobela wa Yehova ni murima waga wamutene gimulobaga wihina agikavihere wawenjhedhedha mabasa aaga oolaleya. Teto miyo omuloba wihina agikavihere wafwanya mabasa yaagivahege mudhidhi wowinjhiva wihina gandege wapara mabasa oolaleya. Nnikavihero na Yehova siyeyo yapadduwile. Vano miyo ni mwadhaaga wavolowela mabasa a mudhidhi wamutene.”

19. Nnande aavi odhowagave needdaga ninga ‘ahima a waara?’

¹⁹ Karta murumiwi Pawulo aalebenliye makiristawu ohEfezu, nahakavihera okalave oororomeleya. Teto karta nna nuvetheliwa, podi onikavihera nihiyoya peeno. Ninga nonilihu, karta nna podi onikavihera wasakula pama akwihu vamodha ni osakula dhithu dhowaredhana ni thotho. Ohiya eyo, nnonikongomedha omuhudhera Bibiliya wihina waara wa ebaribari oniholelegeve mwigumini mwehu. Teto karta nna nnowoniha thima onna muzimu wotxena, onanikavihera okanna dhikalelo dhapama. Oparihedha mabasa dhithu murumiwi Pawulo alebiliye, podi onikavihera werana dhothoma dhapama dhiniwanana ni efunelo ya Yehova. Werana dhithu ndha, winere onikavihera othawa yiihi ya elabo ela ni odhowagave needdaga mburo wowaara!