1-2. Mareeliho baani muthu anawakeliye amala obaddiziwa?

 SOHAGALASA vanlubale obaddiziwa ni okala epaddi ya Yehova. Ale yandile obaddiziwa ni enna wandana wooliba ni Yehova enorumedha ele Davidi awogiliye egi: ‘Oohagalala duule munamusakulinyu [Yehova] wihina akale vamodha ni nyu. Ni wi akalege vaade veenyu.’ — Sal. 65:4.

² Yehova anowasakula pama athu anafuniye wihina ekale epaddi ya emudhi yaye. Ninga noonilihu ohudhera ovirile, Oliye anawithana ale enafuna okanna wandana wooliba nuliye. (Tiya. 4:8) We wipeleka wa Yehova ni wabaddiziwa onokanna wandana wavayeka ni Yehova. Teto we podi okanna ebaribari wi wamala obaddiziwa Yehova anere ‘wureeliha ofiyedha ohujhombela ethu.’ — Mal. 3:10; Jer. 17:7, 8.

3. Mutholo baani munlubale anakanna mukiristawu ipelekile ni abaddiziwe? (Eclesiastes 5:4, 5)

³ Obaddiziwa fumambelelo wa omulabela wehu Yehova, mwaha wamala obaddiziwa we onerege ohowela wilibihedha wihina okaleve oororomeleya naarive ofwanyiwaga makathamiho obe dhoweha. (Omwileri Eclesiastes 5:4, 5.) Ninga namahara a Yesu, we onere wilibihedha wihina ohare dhatedhene oliye ahudhihiliye. (Mat. 28:19, 20; 1 Ped. 2:21) Ohudhera wula onere wukavihera ohara dhatedhene Yesu ahudhihiliye.

ODHOWEGEVE OMUHARAGA YESU NAARIVE OFWANYIWAGA MAKATHAMIHO NI DHOWEHA

4. Ni makalelo baani anamahara a Yesu yahoweliwa othukula “ntxikwa newa na goyi?” (Lukaji 9:23)

⁴ Kuwubuwele wi wamala obaddiziwa kunadha ofwanyiwa makathamiho mwigumini mwawo. Mwebaribarene Yesu ahawaddela pamadhene anamahara aye wihina aliwa yere othukula “ntxikwa neewa na goyi.” Teto aliwa yere othukula ntxikwa  nna “malabo aamateene.” (Omwileri Lukaji 9:23.) Nerege Yesu afuna awoge wi anamahara aye yerege woona goyi malabo aamateene? Naari, kahi yeyo. Oliye afuna awonelihemo wihina ohiya wawakela mareelihove, anamahara aye yerege ofwanyiwa makathamiho, teto makathamiho mamodhaya yerege okala oorusa vanlubale. — 2 Tim. 3:12.

5. Mareeliho baani Yesu aapaganyiliye ale enaleva ethu-sithu wihina emulabele Yehova?

⁵ Podi wera we onowiddiwaga ni amudhi awo mwaha okala Namoona a Yehova obe mwaha oleva dhoreela dhawo wihina opwehe Omwene wa Mulugu mburo wobajha mwigumini mwawo. (Mat. 6:33) Akala siyeyo, okanne ebaribari wi Yehova ohunona dhithu dhatedhene weriliwena wihina omulabele. (Ebe. 6:10) Mwebaribarene we uhonelamo wi madhu ala a Yesu beebaribari: “Kaawo muthu anahiye nyumba yaye, addibile, arogoliye, amaye, ababe, anaaye obe mundda dhaye, mwaha waaga ni mwaha wa muthenga dhapama, ahakela okunamo mudhidhi yola, nyumba, addibile, arogoliye, amaye, anaaye, mundda dhaye, ni oharahariwa ni osogolo egumi yohimala.” (Mar. 10:29, 30) Mwebaribarene mareeliho wawakeliwe ehithabwa winjhiva opitha ethu-sithu oleviliwe. — Sal. 37:4.

6. Mwahaya bwaddi ogahowela odhowagave owanagana “munigwa wa mwiili” wamala obaddiziwa?

⁶ Wamala obaddiziwa, onere ohowela odhowagave owanagana “munigwa wa mwiili.” (1 Juwa. 2:16) Mwaha oli odhuulu wohilogomana wa Adawu. Malabo mamodha we podi wiwonaga ninga murumiwi Pawulo aalebile egi: ‘Miyo ginowadhivela vanlubale malamulo a Mulugu, mbwenye ginowoona mmwiilini mwaaga nlamulo nimodha niwanaga ni nlamulo na mubuwelo waaga nigithukulelaga okala mudhaari a nlamulo na yothega eli mmwiilini mwaaga.’ (Rom. 7:22, 23) Malabo mamodha we podi okala owukuwene mwaha wa dhoviriganiha dhawo. Mbwenye wubuwela ethu ompaganyiliwe Yehova mudhidhi wipelekaga wa Oliye, sithu enuvahe kopolo wihina wande owanana yoweha si yoweha enufwanye. Ebaribariya sowihina mpaganyo omwereliwe Yehova onere wukavihera owanana dhoweha. Ni makalelo baani?

7. Ni makalelo baani wipeleka wawo wa Yehova winukaviheriwa okalave oororomeleya wa Oliye?

⁷ Wipelekaga wa Yehova, we onikoodda wamwinnyo. Eyo enatapulela wi onere okoodda werena ethu-sithu yamuukule Yehova. (Mat. 16:24) Bumwahaya wafwanyiwa yoweha kunajhe mudhidhi wowinjhiva wubuwelaga ethu onahoweliwe werana, mwaha wihina we ohunona ethu othomiliwe werana, eli okala oororomeleya wa Yehova. We onere odidela okala txithi wihina omuhagalase Yehova. Ni makalelo yala onere omutajhiha Jo, naarive nufwanyiwa makathamiho manlubale oliye ahiwoga egi: ‘Ginoofiyedha okwa waga gahiselele nroromelo naaga!’ — Jó 27:5.

8. Opendda nlobelo weriliwena wipelekaga wa Yehova winuukavihere aavi owanana dhoweha?

⁸ Opendda wodhela nlobelo weriliwena wipelekaga wa Yehova, sithu enuvahe kopolo wihina wande owanana yoweha. Motajhiha, we were omugayela muthu ononniwe wihina ohuteliwa obe ohutela? Mwebaribarene naari! Mwaha we ohumpaganya Yehova wi kuwerena ethu ninga yela. Wahenya mubuwelo dhabure wuvolowela, kunivahe mabasa wubuwelaga makalelo oosukuma mubuwelo oyo wabure. Ni makalelo yala onere wanda ‘Orabela dila ya athu abure.’ — Pro. 4:14, 15.

9. Opendda nlobelo weriliwena wipelekaga wa Yehova winuukavihere aavi opweha dhithu dhomuzimuni mburo wobajha mwigumini mwawo?

⁹ Ki wahavahiwe mabasa yuvahege korowa dhowinjhiva, mbwenye yuthukulele ohanda woona mutugumano dhatedhene? We  kunathuwathuwe wubuwelaga ethu onafuniwe wera. Mwaha wihina ohunathi ovahiwa mabasa ala, we wahithoma wi kuwenye ethu-sithu wuhiha woona mutugumano dhatedhene. Bumwahaya kuxixe warumedha mabasa ala, wubuwelaga wihina onere osayela makalelo oowomihedha dhithudha wihina wandege woona mutugumano. Opendda yopadduwa ya Yesu podi onikavihera vanlubale nafwanyiwa yoweha ninga yela, oliye ahiikoma wihina ahagalase Ababe malabo aamateene, teto ndala ninga Yesu nihiyoya nnafuna nimuhagalasege Babi ehu Yehova. — Mat. 4:10; Juwawu 8:29.

10. Yehova anukavihere aavi odhowagave “omuharaga” Yesu wamala obaddiziwa?

¹⁰ Makathamiho ni dhoweha dhinere wuvaha ofuru wowoniha wihina we ohuthoma “omuharegeve” Yesu. Teto okanne ebaribari wi Yehova anere wukavihera odhowagave omuharaga Yesu. Bibiliya anihina: ‘Mulugu dororomeleya ni kanuhiyeni wehiwa ni dhithu muhinandinyu ovilelana, mbwenye yadha yowehaya oliye anere wukaviherani wihina mwakwanihe.’ — 1 Kor. 10:13.

ONANDE AAVI ODHOWAGAVE OMUHARAGA YESU?

11. Makalelo mamodha apama oodhowagave nimuharaga Yesu baavi? (Osugwe fotu.)

¹¹ Yesu ahimulabela Yehova ni murima waye waatene, teto oolobela wa Yehova. (Luk. 6:12) Akala onofuna omuharagave Yesu wamala obaddiziwa, sathima weragana dhithu dhinuwaddameliha ni Yehova. Bibiliya anowoga egi: ‘Mwamakalelo aatene, naarive nunnuwelagavo ni makalelo ohiyanahiyana, nididele weedda dila yela.’ (Fil. 3:16) Malabo mamodha onerege wiwa dhopadduwa dha addibila ni arogola ethomile wawenjhedhedha mabasa ewa enampareliwa Yehova. Podi wera aliwa ikursari  Eskola ya Anamalaleya Oomwene obe ehitamela murudda wahoweleya anamalaleya. Akala egumi yawo enowuwenya, we podi okanna dholuba ninga dhendha. Adhaari a Yehova enosayela wawenjhedhedha mabasa ewa oolaleya. (Dho. 16:9) Ki akala mudhidhi yola kunanda wawenjhedhedha mabasa awo? Kuwubuwele wi kunna thima wiliganiha ni addibila amodha enawenjhedhedha mabasa ewa oomulabela Yehova, yathimaya fudhowagave ovilelaga. (Mat. 10:22) Kuddiwale wi Yehova anohagalala ni ele onandiwe werana mowiwanana ni mudhidhi onafwanyeyiwe. Onvaha Yehova ele onandiwe sithu enukavihere odhowagave omuharaga Yesu wamala obaddiziwa. — Sal. 26:1.

12-13. Onere ddi woona wihina oviheya wawo ni dhithu dhomuzimuni winnovuguwa? (1 Korintiyu 9:16, 17) (Osugwe kwaduru “ Kuselele othamaga.”)

¹² Ki wavira mudhidhi wonelamo wihina malobelo awo kahiyo a vati va murima, mbwenye onalobela ninga elemelelo baahi? Obe akala onapara mabasa oolaleya ninga ethu onahoweliwe werana baahi, obe kunadhiveliwa omwileri Bibiliya ninga kale. Dhupadduwela dhithu ninga dhendha wamala obaddiziwa, kuwubuwele wi kunna muzimu wotxena wa Yehova. Ninga athu ohulogomana malabo mamodha makalelo nnoonihu dhithu dhomuzimuni podi osadduwa. Oviheya wawo ni mabasa oomuzimuni wavuguwa, we podi wubuwela yopadduwa ya murumiwi Pawulo. Oliye owilibihera wihina amutajhihe Yesu, mbwenye Pawulo ahinona wihina malabo mamodha kaakanne efunelo enlubale yowerana ndhe afuniye. (Omwileri 1 Korintiyu 9:16, 17.) Oliye ahifiyedha owoga egi: ‘Naarive gaaparaga wula gihinna efunelo, ginna wakwanihedha mutholo githikeliwimi.’ Ni madhu mamodha, Pawulo ahithoma wapara mabasa oolaleya, ahipwathile makalelo aaliye.

¹³ Ni makalelo mamodhave kuwerena  dhothoma mwaha wa makalelo oliwe, ohiya eyo wikome werana ele eli yapama naarive ohufunaga. Wadidela werana dhithu dhapama mubuwelo wawo podi osadduwa ni obajha odhiveliwa dhithu oneriwena. Teto kuddiwale wi, omwileri Bibiliya, werana ohudhera wawo wavayeka, olobela, woona mutugumano ni wapara mabasa oolaleya si dhithu dhinukavihere omuharagave Yesu wamala obaddiziwa. Ohiya eyo addibila yoona ovilela wawo mwaha odidela omulabela Yehova, naliwa enere okala ooliba murima. — 1 Tes. 5:11.

‘MUDIDELE WIPENDDA . . . MUDIDELE WOONA EMUTHU YENYU’

14. Mudhidhi waviraga niipenddege ni makalelo baani? Ki mwahaya bwaddi? (2 Korintiyu 13:5)

¹⁴ Ethu emodha enukavihere wamala obaddiziwa, fuudhela opendda emuthu yawo. (Omwileri 2 Korintiyu 13:5.) Malabo mamodha sapama opatha mudhidhi wihina woone akala onolobela malabo aamateene, onomwileri ni omuhudhera Bibiliya malabo aamateene, woona mutugumano dhatedhene ni wapara mabasa oolaleya. Osayele makalelo oopurelamo dhithu dhatedhene ndha. Motajhiha, wikohe: ‘Miyo ginowanda wahudhiha athu amodha muselu dhokweya dha mBibiliyani? Ginohowela werana ethu-sithu wihina mabasa oolaleya egihagalasege? Malobelo aaga enakuma vati va murima ni enowoniha wihina ginomuroromela Yehova ni murima waga wamutene? Ginowoona mutugumano dhatedhene? Ginande addi opwasedha ni ovaha dhowakula dhapama gakala mmutugumanoni?’

15-16. Ethu baani ohudheriwe ni Robert wodhela ogonjhiha dhoweha?

¹⁵ Ethu emodhaya yathima enukavihere wamala obaddiziwa fuunona dhithu dhinukwerebeyiha. Ddibila dhaala anithaniwa Robert ohuwoga yopadduwa eniwanana ni muselu ola, oliye ohuwoga egi: “Nganna yaka 20 gahikanna mabasa gaaparesimi epaddi modha ya nlabo. Vano labo dhaala nuweruwa omabasani, namwali dhaala alabesa ni miyo ogithana wihina gaaredhe owaniwe, oliye owoga wihina naakale yekihu owaniwe ni nere ‘waredha vanlubale.’ Omambelelowene gahisayela makalelo ookoodda, mbwenye omakuthulo miyo omwaddela mwahaya bwaddi gidhe gikoddege.” Robert ahanda ogonjhiha yoweha ele, teto eyo sapama. Mbwenye nuuvira mudhidhi, nuwubuwela ele yapadduwile, Robert wonelamo wihina eere werana dhithudha mwamakalelo mamodha. Oliye anowoga egi: “Miyo gohowela omukodda namwali ole omambelelo ni murima waga watene ndala ninga Juze aamukoddiliye mwadha Potifare. (Gén. 39:7-9) Mwebaribarene miyo gahitikina vanlubale nuwonelamo wihina  kiyaali ethu yokweya omukoodda namwali ole. Yopadduwa ele yahigikavihera wonelamo wihina goohowela olibiha wandana waga ni Yehova.”

¹⁶ Ndala ninga Robert, sathima opendda pamadhene mubuwelo wehu. Naarive ogandile ogonjhiha yoweha, wikohe: ‘Gahilegela vanlubale wihina gande okoodda?’ Wonelamo wihina onohowela wiwomihedha kukubanye, ohiya eyo ohagalale mwaha wanda onona ethu enukwerebeyiha. Olobele wa Yehova wodhela ethu enukwerebeyiha ni weregena dhithu dhinalibihe efunelo yawo yomwiwelela Yehova. — Sal. 139:23, 24.

17. Oororomeleya wa Robert othithimihile aavi ndina Yehova?

¹⁷ Iyo podi ohudhera ethu emodha ni yopadduwa ya Robert. Oliye anowogave egi: “Miyo numukoodda namwali ole, oliye owoga egi: ‘Parabens we ohanda ogonjhiha yoweha!’ Miyo omukoha, ethu baani oliye afuniye owoga. Vano namwali ole owoga wi mukwaye aahiyile okala Namoona a Yehova, ahiwoga wihina Azombwe aatene eli Anamoona a Yehova kahi oororomeleya, yakanna ofuru wowerana ethu yabure aliwa enowerana. Vano namwali ole omwaddela mukwaye ole aahiyile okala Namoona a Yehova, wihina eere ogeeha miyo wihina oone akala ele awogiliye yaali ebaribari. Miyo gahihagalala vanlubale mwaha onona wihina gahanda othithimiha ndina na Yehova.”

18. Ethu baani othomiliwe werana wamala obaddiziwa? (Osugwe kwaduru enna musolo “ A artigu abiili enuudhivele vanlubale.”)

¹⁸ Wipelekaga wa Yehova ni wabaddiziwa, we onowoniha wihina onofuna othithimiha ndina na Yehova wahipwanthe ethu enaapadduwe. Teto okanne ebaribari wihina Yehova ohunona pamadhene dhoweha dhatedhene ni makathamiho aatene enuufwanya. Teto Oliye anere oreeliha wilibihedha wawo mwaha okala oororomeleya. We podi okanna ebaribari wihina Yehova anere olabihedha muzimu waye wootxena wi uvahe kopolo onahoweliwe. (Luk. 11:11-13) Nnikavihero na Yehova we podi wanda omuharagave Yesu wamala obaddiziwa.