1. Mwahaya bwaddi sapama okala epaddi ya nikuru na Yehova?

 SAPAMA vanlubale okala epaddi ya nikuru na Yehova malabo yala oorusa nnakalihu. Naarive dhithudha mwilaboni dhithabwaga orusa, Yehova anonivaha emudhi yowiwanana ya addibila ni arogola enanikavihera. (Sal. 133:1) Ohiya eyo, Yehova anonikavihera okanna emudhi yoliba ni yohagalala. (Efe. 5:33–6:1) Teto anonivaha thotho nnahowelihu wihina nande owanana othuwathuwa ni okanna murenddele mwigumini mwehu.

2. Ethu baani onahoweliwe werana, ki mwahaya bwaddi?

² Nnohowela wilibihedha wihina ndhowegeve nimulabelaga Yehova nuuroromeleya. Mwaha wa ddi? Mwaha wihina malabo mamodha nnotakaleliwa mwaha wa dhithu athu amodha enanereliwa ni enaniwogeliwa. Teto podi okala yorusa owanana dhoviriganiha dhehu, thabwathabwa nerana yoviriganiha emodhave dila dhowinjhivadhene. Ohudhera wula nnere woona dhipaddi tharu dha mwigumini mwehu, nnahowelihu woniha ovilela (1) ddibila anitheegela, (2) mamunihu obe mwadhihu anitheegela (3) nakala ookwerebeyene mwaha wa dhoviriganiha dhehu. Teto nnere woona dhopadduwa dha athu araru enasorihiwa mBibiliyani yaafwanyiwe makathamiho mamodhave ni dhithu nnahudherihu naliwa.

OVILELE DDIBILA UTHEGELA

3. Makathamiho baani enanifwanya iyo aatene?

³ Mwahaya bwaddi ekala ethu yorusa? Addibila amodha podi okanna dhikalelo dhinanitakalela. Amodhaya podi wera ehinerela ethu enitakalenle obe keneddihile nuupama. Naanamaholela mulogoya enoviriganiha. Vano eyo yapadduwa, athu amodha enoobajha wanganyedha akala nna nikuru na Yehova. Ohiya odhowagave emulabelaga Yehova mowiwanana ni addibila. Aliwa podi  othoma ohiwoga ni ale yaathegele obe ofiyedha ohudhowaga omutugumanoni. (Sof. 3:9) Nerege sapama werana eyo? Kabeni noone yopadduwa enafwanyeya mBibiliyani ya muthu aafwanyiwe makathamiho ninga yala.

4. Makathamiho baani yanfwanye murumiwi Pawulo?

⁴ Yopadduwa ya mBibiliyani. Murumiwi Pawulo ahinona wi addibile kayalogomanne. Motajhiha makiristawu mamodha a mulogo wo Jeruzale kayarumedha wihina oliye aali namahara a Yesu. (Dho. 9:26) Vasogolova, makiristawu mamodha omuwogaga obure wihina etakalihe emuthu yaye. (2 Kor. 10:10) Nlabo dhaala, Pawulo ahimoona namaholela mulogo dhaala eragana yothoma yabure yaathukulenle amodha okwakwathuwa. (Gal. 2:11, 12) Teto mukwaye mmodha eediyena ithaniwa Marku, aherana ethu yamuukunle vanlubale. (Dho. 15:37, 38) Pawulo ahafune eere wenya wihina dhithu ndha dhimuthukulele wasukuma athu yala yamuthegele, mbwenye kahi yeyo oliye eriliyena. Oliye awoona addibila ala mwamakalelo apama ni ahididela omulabela Yehova nuuviheya. Ddiniyani yamukavihere Pawulo ovilela?

5. Ddiniyani yaamukavihere Pawulo ohasukuma addibile? (Kolosense 3:13, 14) (Osugwe fotu.)

⁵ Pawulo owadhivela addibila. Vano mwaha wa odhivela wula, oliye apwasedha osugwa dhikalelo dhapama dha addibila ohiya dhoviriganiha dhewa. Teto odhivela wahimukavihera oparihedha mabasa ndhe aalebiliye va Kolosense 3:13, 14. (Omwileri.) Kasugwa makalelo murumiwi Pawulo oonihiliye odhivela numulevelela Marku. Naarive Marku agamuthawile murumiwi Pawulo mulenddoni mwaaye woobajha wemisiyonariyu, oliye kamukoyenle ntxiga. Nuuvira mudhidhi murumiwi Pawulo nuwalebela akudda Kolosense karta wihina aalibihe, oliye ahimuthetheela Marku mwaha okala ninga ‘mathuwa enalibiha.’ (Kol. 4:10, 11) Vano nuuvokedhiwa mukambura ooRoma, murumiwi Pawulo omuloba Marku wihina adhowe amukavihere. (2 Tim. 4:11) Eyo enowooniha wihina murumiwi Pawulo kaasukumme addibile. Ethu baani nnahudherihu ni murumiwi Pawulo?

6-7. Ethu baani enaanikavihere odidela wawoniha odhivela addibilihu naarive enithegelaga? (1 Juwawu 4:7)

⁶ Nnahudhera ddi? Yehova anafuna wi nawoonihege odhivela addibilihu. (Omwileri 1 Juwawu 4:7.) Ddibila aneddiha mwamakalelo abure, nikanne ebaribari wihina oliye kerilena yapudhave, ni wihina nuuliyeya anna wilibihedha wihina eerena dhithudha ninga Yehova anafuniye. (Pro. 12:18) Yehova anowadhivela adhaari aye oororomeleya naarive eviriganihaga. Naarive niviriganihaga, Oliye anodidelave okala mukwihu, teto kananikoyela ntxiga.  (Sal. 103:9) Iyo nnotamalela vanlubale mwaha Yehova anonilevelela, bumwahaya ni iyoya nnohowela omutajhiha wodhela walevelela amodha yanithegela! — Efe. 4:32–5:1.

⁷ Sathima ohuddiwala wihina nihaddamela omakuthulo wa elabo ela. Nili malabo oorusa, bumwahaya nnohowela okala owiwanana ni addibilihu. Podi wera oharahariwa winerege othabwa ni nnere ovokedhiwa mukambura mwaha wa nroromelo nehu. Eyo yapadduwa nnerege wahowela addibilihu wihina enikavihere. (Pro. 17:17) Kasugwa yampadduwele Josep, a namaholela mulogo dhaala anakala elabo yoEspanya. Oliye ni addibila amodha yahivokedhiwa mukambura mwaha ohivolosiha mpulitikani. Josep anowoga egi: “Woona wihina nakala mburo mmodhave, yaali yokweya owoga obe werana ethu yampihe mbani muthu mmodhaya. Mwaha wa yeyo, noohowela ovilelana ni olevelelana mmodha ni mukwaye. Eyo yahinikavihera okala owiwanana ni obarelana mmodha ni mukwaye woona wihina naali vaari va anyakambura amodha yahaali Anamoona a Yehova. Labo dhaala miyo wiporosa moono, mwaha wa yeyo kaganda werana dhithu dhimodha meeka. Vano ddibila aali vamodha ni miyo mukambura mune, ogikavihera ofula guwo dhaaga ni dhithu dhimodha. Miyo woona odhivela webaribari mudhidhi yoole woorusa.” Mohanganyedha nihikanna dhithu dhowinjhiva dhinanithukulela otxokotxela mowaguva muladdu bu muladdu nnakannihu ni addibilihu!

OVILELE MWADHIYO OBE MAMUNO UTHEGELA

8. Anamatelana enafwanyiwa makathamiho baani?

⁸ Mwahaya bwaddi ekala ethu yorusa? Anamatelana aatene enofwanyiwa makathamiho. Bibiliya anowoga pamadhene wodhela muselu ola egi: ‘Ale enafuna otelana, enere okanna makathamiho mwigumini mwewa.’ (1 Kor. 7:28) Mwahaya bwaddi? Mwaha matelo baathu abiili ohilogomana. Kadda muthu wa aliwa ohukanna ekalelo yaye, dhofuna dhaye ni dhothoma dhohiyana. Teto podi oleliwa ni dhilemelelo dhohiyanahiyana. Bumwahaya mudhidhi waviraga, mulobwana obe muhiyana podi obajha woona dhikalelo ahoniliye mudhidhi ehinathi otelana. Vano dhithu dhendha podi watatamulela makathamiho. Anamatelana amodha ohiya otxokotxela muladduya vamodha, enowinkedhana mmodha ni mukwaye wodhela makathamiho enakumelela vamateloni vewa, naarive aabiilene eganna muladdu. Amodhaya enofiyedha wubuwela wihina makalelo oomariha muladduya fumwalana. Nerege siyeyo enahoweleya? b Naari! Kabeni noone yopadduwa ya mBibiliyani ya muthu aavilenle naarive afwanyiwaga makathamiho vamuralani vaye.

9. Makathamiho baani Abigayili ahoweliye wawanana?

⁹ Yopadduwa ya mBibiliyani. Abigayili aateliwe ni Nabale, teto Bibiliya anawoga wihina Nabale aali muthu owali ni abure. (1 Sam. 25:3) Mwebaribarene yaali ethu yorusa vanlubale Abigayili okala ni mulobwana ninga yoola. Abigayili ahafune eere osayela makalelo oomwalana ni Nabale. Abigayili ahikanna ofuru ola woomwalana ni Nabale, mudhidhi Davidi, afuna okala mwene owIzarayeli nuuthoma wihina ampe Nabale mwaha omuruwana oliye ni alobwana aye. (1 Sam. 25:9-13) Abigayili eere othawa ni amuhiye Davidi ompa Nabale. Mbwenye kahiyo yeyo Abigayili eriliyena, ohiya eyo oliye ombebedha Davidi wihina anaampe Nabale. (1 Sam. 25:23-27) Ethu baani yamuthukulele Abigayili werana eyo?

10. Ethu baani yamukavihere Abigayili ovilelana matelo oorusa?

¹⁰ Mwaha wa odhivela Abigayili anniyena ni Yehova, oliye owariha matelo ndala ninga Yehova.  Mwebaribarene Abigayili ahinona ethu Yehova awogiliye nuwapaddusa anamatelana oobajha. (Gén. 2:24) Abigayili ahinona wihina vamentoni va Yehova matelo ethu yoweela, teto oofuna omuhagalasa Yehova. Siyeyo yamuthukulele oliye werana dhatedhene andiye wihina aavuluse athu yakala vadevaye vamodha ni mamune. Bumwahaya oliye aherana ethu-sithu mowaguva wihina amuhihe Davidi ompa Nabale. Abigayili ahifiyedha oloba nlevelelo mwaha wa ethu aheriliyena. Mwebaribarene Yehova oomudhivela muhiyana ola ooliba murima ni apweha mburo woobajha efunelo ya athu amodha. Ethu baani ahiyana eteliwe ni alobwana etenle enahudheriwa ni yopadduwa ya Abigayili?

11. (a) Ethu baani Yehova anajhehedhiye wa anamatelana? (Efeziyu 5:33) (b) Ethu baani ohudheriwe ni wilibihedha wa Carmen wihina aavuluse matelo aye? (Osugwe fotu.)

¹¹ Nnahudhera ddi? Yehova anajheha wihina anamatelana ekalege vamodha naarive akala mmodha wa aliwa anowakathamiha mateloya. Yehova anohagalala amoonaga muthu ilibihedhaga vanlubale wihina awomihedhe muladdo onakumelela vamateloni vewa ni odidela wooniha odhivela ni nriho. (Omwileri Efeziyu 5:33.) Kasugwa yopadduwa ya Carmen. Nuuvira yaka 6 agatelanne ni mamune, oliye obajha omuhudhera Bibiliya ni Anamoona a Yehova ofiyedha obaddiziwa. Mbwenye Carmen ohowela ovilela vanlubale. Teto ohowela wilibihedha vanlubale wihina aalibihe matelo aye muwari mwa yaka 50 ni odidela wooniha odhivela ni nriho. Carmen anowoga egi: “ Mamunaga kaadhiveliwe nunona wihina gahithoma okala Namoona a Yehova, Oliye oogikalela ajhe mwaha miyo okala Namoona a Yehova. Oliye oogiruwana, oogithusa ni oowoga wihina eere ogihiya. Nuuvira yakadhene, miyo obajha woonelamo makalelo mamunaga akaliye ni gowilibihedha owoga ni oliye mwamakalelo apama. Onona wihina matelo ethu yoweela vamentoni va Yehova, sithu egivaheli kopolo wihina gande wavilelana matelo aaga. Miyo kaginubuwelege omwalana, mwaha ginomudhivela Yehova.” c Akala ohukanna makathamiho vamateloni vawo, okanne ebaribari wihina Yehova anere wukavihera wavilelana.

OVILELE WAKALA OOKWEREBEYENE MWAHA WA DHOVIRIGANIHA DHAWO

12. Nerana yothega enlubale nnakala aavi?

¹² Mwahaya bwaddi ekala ethu yorusa? We podi wubuwelaga ohiya werana dhatedhene wafuniwe mwaha werana yothega enlubale. Bibiliya anawoga wihina dhoviriganiha dhehu podi onihiya ni ‘murima woothwaruwa ni wowukuwa.’ (Sal. 51:17) Ddibila dhaala anithaniwa Robert ahilibihedha muwari mwa  yaka dhowinjhivadhene wihina akale mudhaari ookavihera. Mbwenye vasogolova oliye werana yothega enlubale ni woonelamo wihina ahimukuula Yehova. Oliye anawoga egi: “Mubuwelo waaga wothabwa oginyemela, giwoona ninga gihimorela mukwegweni. Miyo gowunlesa ni golobelesa wa Yehova, mbwenye gubuwela wihina Yehova kanadha agivuruwana dila biili, mwaha wi gahimukuula vanlubale.” Nerana yothega enlubale, iyo podi othabwa okwerebeya ofiyedha wubuwelaga wihina Yehova ohuninyanyala ni kanadha anirumedha ninga adhaari aye. (Sal. 38:4) Akala we oniwoona ndo, karajhiha wubuwela yopadduwa ya mudhaari a Yehova andile ovilela ni dhoviriganiha dhaye.

13. Dhoviriganiha baani Peduru eriliyena, ki enlubaleya yaali eevi?

¹³ Yopadduwa ya mBibiliyani. Emahiyu Yesu ahinathi okwa, Peduru aherana dhoviriganiha dhowinjhiva ofiyedha werana yoviriganiha enlubale. Vobajha, Peduru oothabwa wiroromela ofiyedha owoga wi naarive anamahara amodha ekwakwathuwe oliye eere okalave oororomeleya. (Mar. 14:27-29) Vasogolova, mudhidhi egaali mburo withaniwa Jetisemani, dila dhowinjhivadhene Peduru kaandile okala mento. (Mar. 14:32, 37-41) Vano, nuufiya muthithi waathu wihina emmage Yesu, Peduru omuthawa Yesu. (Mar. 14:50) Omakuthulowa, Peduru omukoodda Yesu dila tharu, teto ahifiyedha wiwulumela ni olibela wi kamunonne Yesu. (Mar. 14:66-71) Peduru aali aavi nuwonelamo wihina aherana yothega enlubale? Oliye ahithabwa wukuuwa ofiyedha wunla vanlubale. Podi wera mwaha wivaha nibili. (Mar. 14:72) Kubuwela makalelo Peduru athabwiliye wukuuwa mwaha onona wihina Namahudhiha aye ohupiwa. Mwebaribarene, oliye ahubuwela wihina kaafwanelela!

14. Ddiniyani yamukavihere Peduru ovilela ni odidela omulabela Yehova? (Osugwe fotu.)

¹⁴ Dhithu baani dhamukavihere Peduru ovilelana dhoviriganiha dhaye ni odidelave amulabelaga Yehova? Dhithu dhowinjhiva! Ethu yobajha, oliye kaakala yekaye suthukumwee, ohiya eyo oliye ahisayela ni ahirumedha nikavihero ni olibihiwa naaddibila amodhaya. (Luk. 24:33) Teto Yesu nuvenyihiwa muukwani, omuthwanyuwela Peduru ni podi wera Yesu ahimulibiha vanlubale. (Luk. 24:34; 1 Kor. 15:5) Vasogolova, ohiya omutoriha mwaha wa dhoviriganiha dhaye, Yesu omukurumusa Peduru wodhela omwaddela wi eere wakela mutholo dhimodha. (Juwa. 21:15-17) Peduru ahinona wihina aherana yoviriganiha enlubale, mbwenye oliye kaaselele werana ele eli yapama. Mwaha wa ddi? Mwaha oliye ahikanna ebaribari wi Yesu nivanove oomudhivela. Teto anamahara amodha a Yesu yahididela omukavihera Peduru. Nnahudhera ddi ni yopadduwa ya Peduru?

15. Yehova anafuna wihina nikanne ebaribari baani? (Salmo 86:5; Romanu 8:38, 39) (Osugwe fotu.)

 ¹⁵ Nnahudhera ddi? Yehova anafuna wi nikanne ebaribari wi Oliye anonidhivela ni anonilevelela. (Omwileri Salmo 86:5; Romanu 8:38, 39.) Ebaribari wi naathega nnowivaha nibili. Teto eyo sapama, mwaha enonikavihera ohuhogolowela werana yothega emodhave. Mbwenye kanifiyedhe wubuwela wi Yehova kananidhivela ni kanadha anilevelela. Ohiya eyo, nnohowela osayela nikavihero. Ddibila Robert, asorihiwe mundduli, anowoga mwahaya bwaddi osayela nikavihero edhe ekalege ethu yofuneya. Oliye anowoga egi: “Miyo gerilena yothega mwaha gothabwa wiroromela vanlubale, okuma mudhidhi gasayelimi anamaholela mulogo, miyo woona wihina Yehova oogidhivela ni oowalabihedha addibila ala wihina agoonihe odhivela waye. Anamaholela mulogo kiyaselele ogikavihera ni yahigikavihera wonelamo wihina nivanove Yehova onogifuna ninga mudhaari aye.” Ni iyoya podi okanna ebaribari wi Yehova anonidhivela ni anonilevelela nathwaruwa ni murima wehu waatene, nasayela nikavihero ni niilibihedha wihina nihihogolowele werana yothega emodhave. (1 Juwa. 1:8, 9) Nakanna ebaribari wi Yehova anofuna onilevelela, kannahiye omulabela Oliye naarive nigerilena yothega.

16. Mwahaya bwaddi sapama ovilela ni wiikoma wihina nididele omulabela Yehova?

¹⁶ Yehova anoothabwa ovaha thima dhatedhene nnamwerelihu wihina nimulabele malabo yaala ookuthula ni oorusa nnakalihu. Nnikavihero na Yehova iyo podi wanda ovilela naarive dhithudha dhaheddaga ninga nafunelihu. Iyo podi odidela wadhivela ni walevelela addibilihu naarive enithegelaga. Teto iyo podi wooniha wi nnomudhivela Mulugu ni nnowariiha matelo wodhela osayela makalelo oomariha muladdu wakumelela vamateloni vehu. Nerana yothega iyo podi osayela nikavihero na Yehova ni orumedha wi Oliye anonidhivela ni anonilevelela teto odidela omulabela Oliye. Nerana dhithu ndha, iyo podi okanna ebaribari wi nnere oreelihiwa vanlubale ‘nahiselela werana opama.’ — Gal. 6:9.