MIYO gibaliwe yaka ya 1934. Makolo aaga boSuwisa mbwenye otamela luwani yo Timmins, provinsiya yo Ontariyu elabo yo Kanada, luwani watibiwa mabwe oojerimela. Yaka ya 1939 amama wambela omwileri Namasugwera ni woona mutugumano dha Anamoona a Yehova. Teto amama yadhowaga omutugumanoni yogithukula miyo vamodha ni addibilaga 6. Wahinavire mudhidhi wowinjhiva amama obaddiziwa ninga Namoona a Yehova.

Mbwenye apapa kiyadhiveliwe mwaha amama othoma okala Namoona a Yehova. Naarive dhigaali ndo amama yodhiveliwa ebaribari ni yahithoma odidela okala oororomeleya wa Yehova. Teto aliwa yahithoma werana eyo omabajho wa yaka ya 1940, mabasa a Anamoona a Yehova nuukoddihiwa oKanada. Ohiya eyo, amama yowaweddiha apapa nuupama vamodha ni nriho, naarive malabo mamodha apapa yaweeddihaga ni makalelo abure. Yotajhiha yapama ya amama ehigikavihera miyo vamodha naaddibilaga orumedha ebaribari. Yohagalasaya sowihina nuuvira mudhidhi, apapa osaddula ekalelo yewa ni obajha oneeddiha nuupama.

Yaka ya 1950 miyo woona musonkano wanna musolo “Aumento da Teocracia” luwani yo Nova Yorki. Vano nuuthapanya naaddibila vamodha naarogola a dhilabo dhimodha ni nuvuruwana dhokohedha dha addibila yakursari Eskola ya Jileyadi, miyo ofunaga vanlubale wawenjhedhedha mabasa gamparelimi Yehova. Dhithu aliwa yawogiliwa dhahidahinya vanlubale murima waaga ofiyedha miyo othoma wavolowela mabasa a mudhidhi wamutene. Vano nufiya vaade miyo operenxeri petisawu ya piyonero a mudhidhi wamutene. Beteli yo Kanada wakela petisawu gaalebilimi ni owoga wihina goohowela obaddiziwa gihinathi wavolowela mabasa a mudhidhi wamutene. Vano nlabo na 1 a Outubro yaka ya 1950, miyo obaddiziwa. Nuwindo miyo okala piyonero ni othomiwa wihina gaalabege luwani ya Kapuskeyisi, ola waali  mutholo wobajha gakenlimi nubaddiziwa. Luwani gathomeliwimi wahilapela vanlubale nuwaanihu.

Yaka ya 1951, Beteli wawithana addibila yanonne owoga Efranseji wihina yakavihere oKebeki eli provinsiya yo Kanada enawogiwawo Efranseji, murudda yole wohowela anamalaleya. Woona wihina miyo gunnuwile giwogaga Efranseji ni engeleji, miyo omurumedha konviti ole ni othomiwa wihina gakavihere luwani yoRuwani. Mbwenye luwani yele kagamunonnewo muthu, ethu gannimina yaali papeli yagithonyihedha mburo gafunimi okalagawo ninga giwogilimi omambelelo. Mbwenye dhaatedhene dhahigeddela pama, miyo ni Marcelo nahandana vanlubale. Miyo gahithabwa odhiveliwa vanlubale olaba oKebeki muwari mwa yaka nayi, muwari mwa yaka dhendha gihilaba ninga piyonero a vayeka.

Ngaali oKebeki, gahihagalala vanlubale mwaha omwakela konviti wihina gakursare turma 26 a eskola ya Jileyadi luwani yo Salfilanzi elabo yo Nova Yorki. Gimanle okursari eskola ya Jileyadi labo na 12 a Fevereiro a 1956, vano miyo othomeliwa elabo dhaala peeno enoniwe ninga Gana, wAfrika enakala epaddi yomayelo nduwa. b Mbwenye gihinathi odhowa oGana gohowela ohogolowela oKanada wihina gamuthukule pasaporti aaga.

Miyo gubuwela wi gere omala mwana sumana ngaali o Kanada, mbwenye kahiyo yeyo yapadduwile. Mwaha gahimala mweri 7 gijhehaga dukumento naaga okuma. Mudhidhi yole gaali vaade va ddibila Kripisi, oliye vamodha ni emudhaye yaali athu oodhivela. Vano mudhidhi gikalaga vaade va ddibila Kripisi miyo omunona mwaniwa Xeyila, iyo obajha ofunana. Gihalaga neena wihina gimulobe Xeyila wi nitelane dukumento naaga okuma. Miyo ni Xeyila olobela vanlubale wodhela muselu ole teto iyo othoma wi miyo gidhowe oGana. Ohiya eyo, iyo othoma wihina nerege othapanya nlabihedhaga karta ni neere ojheha wihina noone akala omwenddi wehu were onthukulela otelana. Ele kayali yothoma yokweya, mbwenye nuuvira mudhidhi iyo wonelamo wi ele yaali yothoma yapama nerilihuna.

Nuuvira mweri wantero geeddaga olenddo ni kumboyu, aviyawu ni naviyu miyo ofiya Ahakara elabo yoGana. Nufiya elabo yele miyo othomiwa  ninga superintendente de distrito. Wihina gande wakwanihedha mutholo ola gaavahiwimi goohowela weedda elabo yaatene yoGana vamodha ni elabo yoCosta do Marfim, peeno enoniwe ninga Kodivuwar ni Togu. Dila dhowinjhivadhene geeddesa olenddo meeka ni karo yoBeteli. Miyo goodhiveliwa vanlubale weedda olenddo wi gaapaade addibila.

Omakuthulo wa sumana miyo gokannesa mutholo wihina gakwanihedhe, musonkanoni wa murudda. Iyo kananna nyumba ya musonkano, bumwahaya addibila yosasanya mwana musasa wihina nitugumanemo, elabihedhaga mulazi ni makupu a munazi wihina addibila ekanne murinti. Woona wihina departamentu yasamalela dhoojha kiyanna konjeladori wihina epwehemo nyama, addibila yaadhana anenyama amentweene wihina yahowelaga oojha nyama yaape.

Malabo mamodha, musonkano weddaga dhopadduwa dhithu dhoteyiha. Motajhiha, nlabo dhaala ddibila Herb Jennings, c aali misiyonariyu awogaga mwaha waye, ng’ombe otapuwa ni othawela otiribuna. Vano ddibila Herb omaaliha mwaha waye mwaha ng’ombe ele yahidhalavo. Vano addibila annayi 4 akopolo, wanda ohidda ng’ombe ele ni ohogolosela departamentu yasamalela dhoojha. Vano addibila yaali vamusonkanoni vale, wambela wawoba mada.

Vaari va sumana gowawoniha athu amurudda yoole filime enna musolo, A sociedade do Novo Mundo em ação. Wihina gande wawoniha filime ela, galabihedhesa lensori ninlubale nootxena namagiwesa osogolo ni makina dhaala enithaniwa projetori. Athu a murudda yoole, yodhiveliwa woona filime ele. Owinjhiva waaliwa, ele yaale filime yobajha woona mwigumini mwewa. Aliwa yowawoba mada yawonaga mvidiyuni athu owinjhiva ebaddiziwaga. Filime ele yowakavihera athu wonelamo wihina nili nikuru nowiwanana wapela elabo yatene.

Nuuvira yaka biili ngaali wAfrika, gahihagalala vanlubale nuukanna oneti wowona musonkano munlubale, wereye elabo yoNova Yorki yaka ya 1958. Gahihagalala vanlubale mwaha ogumana ni Xeyila aadhile woona musonkano ole munlubale, teto alaba ninga piyonera avayeka. Miyo ni Xeyila nathapanyesa wodhela makarta, mbwenye vano nahigumana thoo-thoo. Vano miyo omuloba wihina nitelane. Nuwindo Xeyila orumedha. Vano, miyo omulebela karta ddibila Knorr d gimokohaga akala eere orumedha murogola Xeyila omukurusari Jileyadi, nuwindo iyo othomiwe wihina nalabege vamodha wAfrika. Ddibila Knorr orumedha. Nuuvira mudhidhi, Xeyila ofiya oGana. Iyo nitelane ohAkara, nlabo na 3 mweri wa Outubro  yaka 1959. Iyo nahona makalelo Yehova anireelihiliye mwaha ompweha mburo obajha mwigumini mwehu.

Yaka ya 1961, iyo othomiwa wihina nalabege oKamaronji, wAfrika. Miyo gahithabwa opinyaminyeya, mwaha gahithomiwa wiita sede exa oKamaronji. Vano woona wihina dimiyo aholela mabasaya, gohowela ohudhera dhithu dhowinjhiva. Vano yaka ya 1965 iyo wonelamo wihina Xeyila ahikanna wari. Wubuwela mutholo wokala babi kiyaali ethu yokweya wahiyo. Mbwenye nahithabwa ohagalala woona wihina nere okanna mwana. Vano nawegeredhaga wihina nihogolowele oKanada, opadduwa ethu nahijhehedhihu.

Wari ya mwaadhaga omothamo. Mediku onaddela wi mwaanaya aali mwana mulobwana. Dhihivira yaka 50, mbwenye Iyo kannanda odduwala ethu epadduwile. Naarive nigaali owukuwene, iyo nahididela wapara mabasa nathabwihu waadhivela.

Addibila yakala okamaronji dila dhowinjivadhene yoharahariwa mwaha wohivolosiha mmuseluni dha pulitika. Dhithudha dhathabwa orusa mudhidhi woovotari. 13 a Maio 1970, ethu natabwihu woova opadduwa, mabasihu olaleya wambela okoddihiwa elabo yoKamaronji. Dhigavinre mweri 5 nikalaga Beteli yoriya namaaliho omaga, anamathonga onigaramo. Ehinavire sumana a misiyonariyu aatene vamodha ni iyo wigariwawo elabo yoKanada. Kiyaali ethu yokweya wahiya addibila woona wihina iyo nowathuwathuwela vanlubale. Iyo nowikohesa nnere ddi?

Omambelelowene, nahimala mweri 6 nikalaga Beteli yoFransa. Ngaali Beteli yeele gowanda wakavihera addibila yaali elabo yoKamaronji. Mweri wa Dezembro ya yaka yele, iyo othomiwa wihina nalabege Beteli yoNijeriya, Beteli yoNijeriya yowakavihera mabasa yapariwa oKamaronji. Addibila oNijeriya yahinaakela pama, teto iyo nahidhiveliwa vanlubale olaba yaka dhowinjhiva oNijeriya.

Yaka ya 1973, iyo naherana yothoma yorusa vanlubale. Mwadhaaga Xeyila wambela ofwanyiwa makathamiho mwigumini mwaaye. Nigaali oNova Yorki wi noone musonkano, mwadhaaga Xeyila wonelamo wihina kaande odhowa woona musonkano ole. Mwaha wa yeyo, oliye owoga egi: “Miyo kaginafuna okala ndala, teto gihigooma, mudhidhi waamuteene ginakala obulelave.” Muwari mwa yaka 14 miyo ni madhaaga Xeyila nahilaba vamodha wAfrika epaddi ya omayelo nduwa. Teto goohagalala vanlubale mwaha wa mabasa aapariye nuuroromeleya, mbwenye nohowela wawerana masadduwo. Vano nuupendda dhithu nahowelihu werana ni nuulobela wodhela muselu yoole, iyo othoma ohogolowela oKanada. Mwaha elabo yeele yere onikweyela osamalela oredda wa Xeyila. Wahiya mabasa a mudhidhi waamutene ni mabasa oomisiyonariyu, kayaali ethu yokweya.

Nuufiya oKanada, mukwaaga dhaala gamunonnimi yaka dha mundduli, ogikavihera wafwanya mabasa. Oliye ahikanna empereza yaye yakala muluwani waaddamela oToronto. Iyo walugari nyumba ni ogulelamo dhithu dhaalabihedhiwe. Naherana dhithu dhaatedhene dhendha nahawerilena mangawu. Iyo nafuna nijajalihe egumi yehu, njhehedhaga wihina nlabo nimodha nnere wahogolowela mabasa ehu a mudhidhi waamutene. Yotikinihaya sowihina, nahahogolowela mabasa ehu a mudhidhi waamutene, mudhidhi nahajhehedhihu.

 Miyo obajha olaba ninga namakavihera oomaga Nyumba dha Musonkano masabadu aatene, oNorval, elabo yOntariyu. Vano vasogolova miyo othomiwa ninga namasogolela oomaga Nyumba dha Musonkano. Woona wihina Xeyila anna ovulumuwa vang’ono vang’ono, iyo othoma orumedha mutholo ole. Nuwindo mweeri wa Junho yaka ya 1974, iyo otama. Nahihagalala vanlubale mwaha wahogolowela mabasa a mudhidhi waamutene.

Yohagalasaya Xeyila anna odhowave avulumuwaga. Nuuvira yaka biili, iyo orumedha mutholo woolaba ninga anameeddela mulogo. Murudda neddelihu ninga anameeddela mulogo, wafwanyeya provinsiya yaManitoba, elabo yoKanada, peeno enoniwe ninga elabo yothabwa oriidha. Nodhiveliwa okala vamodha ni addibila a murudda yoole, aliwa yaali addibila oodhivela. Iyo nihudhera wihina kinapwatha mburo bu mburo nnathomeliwihuwo, yathimaya fudidela omulabela Yehova.

Nuuvira yaka dhowinjhiva gilabaga ninga nameeddela mulogo, yaka ya 1978, iyo withaniwa wihina nalabege Beteli yoKanada. Nuuvira mudhidhi miyo ohudhera ethu yathima, mbwenye yahali yokweya. Miyo othomiwa wihina gawoge mwaha wa vathaddo wanna wora modha ni meya. Mutugumanoya waali wavayeka ni wawogiwe ni ewogelo ya Efranseji murudda wo Montreyali. Yowukulihaya, athu aatene yavuruwane mwaha waaga, kiyandile opurelamo ethu. Bumwahaya ddibila dhaala alaba departamentu ya mabasa oBeteli, ogivaha yolaga wodhela makalelo gawogilimi mwaha waaga. Owoga ebaribari, gubuwela wihina gihinona owoga pama mwaha wa vathaddo, bumwahaya kagarumendhe yolaga ele mwamakalelo apama. Miyo gahitakaleliwa vanlubale mwaha gubuwela wi ddibila ole anodhiveliwa watoriha akwaye, ohiya watamalela. Miyo gaherana ethu yabure mwaha ohurumedha yolaga ddibila ole agivahiliye, mwaha wa makalelo oliye aagivahiliye yolagaya, teto kagamonelamo ddibila ole aagivahile yolagaya.

Nuuvira mwana malabo, ddibila dhaala a komisawu yoFiliyale odha othapanya ni miyo mwaha wa ethu ele yapadduwile. Miyo gahonelamo wihina kagarumedhile pama yolaga agivahile ddibila ole. Miyo gahikubanya vanlubale mwaha wa ele yapadduwile. Nuwindo miyo odhowa othapanya ni ddibila ole aagivahile yolaga gimulobaga wihina agikurumuwele. Nuudhivela ddibila ole ogilevelela. Yopadduwa ela ehigihudhiha okala muthu owiyeviha, teto kaginadha gidduwalaga. (Pro. 16:18) Miyo gahilobela dila dhowinjhivadhene wa Yehova wihina agikavihere okala muthu owiyeviha. Bumwahaya gihithoma werana dhaatene ginandimi wihina girumedhege mwamakalelo apama, dholaga ginavahiwimi ni athu amodha.

Dhihivira yaka okwaranya 40 gilabaga Beteli yoKanada. Obajaha yaka ya 1985, gihikanna oneti wolaba Komisawu ya Filiyale yoKanada. Yowukulihaya sowihina mweri wa Fevereiro yaka ya 2021, mwadhaaga oofuneya Xeyila okwa. Ohiya owanana baahi okwa wa mwadhaaga, miyo ginowanana oredda waaga. Naarive gifwanyiwaga makathamiho ala, ginohagalala mwaha woodidela omulabela Yehova. Mwaha wa yeyo, kaginathabwa wubuwela ‘malabo vang’ono ginnimina velaboni yavati.’ (Ecl. 5:20) Naarive ngafwanyiwe makathamiho oohiyanahiyana mwigumini mwaaga, kinaligana ni mareeliho owinjhiva gawakenlimi mwigumini mwaaga. Ompweha Yehova mburo wobajha mwigumini mwaaga ni ovira yaka 70 gaaparaga mabasa a mudhidhi waamutene, ohugivaha ofuru wowakela mareeliho owinjhiva mwigumini mwaaga. Vano ginoolobela wihina addibila ni arogola eli azombwe edhowegeve empwehaga Yehova mwigumini mwewa. Mwaha gihikanna ebaribari wihina naaliwaya, enere okanna ohagalala mwigumini mwewa ni enere wawakela mareeliho owinjhiva yampweha Yehova mburo wobajha mwigumini mwewa.