OHUDHERA 37
JHIBO 118 ‘Yehova munivaheve nroromelo’
Karta nnanikavihera odidela okala oororomeleya ofiyedha omakuthulo
‘Nikale txithi ofiyedha omakuthulo ni nikanne nroromelo nimodhave nannihuna omabajho.’ — EBE. 3:14.
DHITHU NNAAHUDHERIHU
Nnere ohudhera dhithu dhinafwanyeya livuru na Eberewu wihina dhinikavihere okala oororomeleya ofiyedha omakuthulo.
1-2. a) Makathamiho baani yafwanya makiristawu yaafwanyeya oJudeya mudhidhi murumiwi Pawulo nuwalebela karta mEberewu? b) Mwahaya bwaddi nigawogaga wi karta nne naafiye mudhidhi wofwanelela?
MAKIRISTAWU yaali mEberewu yakala oJeruzale ni oJudeya yahifwanyiwa makathamiho Yesu nuukwa. Ohunavire mudhidhi wowinjhiva ogiitiwe mulogo, makiristawu wambela oharahariwa. (Dho. 8:1) Nuuvira yaka 20, makiristawu ale yahifwanyiwa makathamiho manlubale oohawa, podi wera ohawa wule watatamuwile mwaha wa dala enlubale yafwanyile. (Dho. 11:27-30) Vano muwari mwa yaka 61 M.W, makiristawu ale yahikanna mwana murenddele. Muwari mwa yaka yele, makiristawu ale yahakela karta murumiwi Pawulo avetheliwiye oleba, teto mwebaribareene karta nne, nafiyile mudhidhi wofwanelela mwaha wa dhithu dhafuna opadduwa osogolo.
2 Karta yakenle mEberewu nafiyile mudhidhi wofwanelela, mwaha mwana murenddele ole yanniwana kuwalegele. Murumiwi Pawulo wavaha dholaga makiristawu ale dhakavihere wawanana makathamiho yafwanye osogolo. Mwaha ogujhuliwa wa Jeruzale awogile Yesu wanna waddamela. (Luk. 21:20) Ebaribari wihina Pawulo ni makiristawu ale kiyanonne mudhidhi aagujhuliwe Jeruzale. Mbwenye makiristawu ale yere olabihedha mudhidhi yanniwana wihina yiwegeredhe wodhela osayela okanna dhikalelo dhapama ninga nroromelo ni ovilela. — Ebe. 10:25; 12:1, 2.
3. Mwahaya bwaddi livuru nEberewu thufuneya wa makiristawu enakalawo peeno?
3 Mohulegela nnere ofwanyiwa mahoso manlubale wakwaranya ale yaafwannye makiristawu yaali mEberewu. (Mat. 24:21; Ovuhu. 16:14, 16) Bumwahaya nnere woona dholaga Yehova aavahiliye makiristawu ale, dhinanikavihere nihiyoya.
‘NDHOWEGEVE NUNNUWELAGAVO’
4. Makathamiho baani yaafwannye maJudewu yaathomile okala makiristawu? (Osugwe fotu.)
4 MaJudewu yaathomile okala makiristawu yohowela wawerana masadduwo manlubale mwigumini mwewa, teto eyo kayali ethu yookweya. Kale maJudewu yaali nlogo nasakuliwe ni Yehova. Teto Yehova aamusakunle Jeruzale wihina atikitere omwene waye, ohiya eyo, athu yafuna omwebedha Yehova yadhowa otempulu yafwanyeya oJeruzale. MaJudewu aatene yaali oororomeleya yowahara malamulo a Moyizeji ni dhithu yahudhihiwiwa nanamasogolela gereja. Dhithu ndha yahudheriwa, dhoovolowelavo dhithu yafwaneleliwa ojha obe naari, muselu wowineliwa ni makalelo owaweeddiha athu yahali maJudewu. Mbwenye Yesu nuukwa, Yehova ohiya ovaha thima dhithu ndhe yahara maJudewu. Mbwenye maJudewu yaathomile okala makiristawu kayali ethu yokweya ohiya ohara dhilemelelo ndhe. (Ebe. 10:1, 4, 10) Teto makiristawu mamodha owithwelavo epaddi yomuzimuni ninga Peduru, yaharusa wawerana masadduwo ala. (Dho. 10:9-14; Gal. 2:11-14) Vano mwaha wa dhithu ndha dhixa yarumedhiwa, makiristawu obajha oharahariwa ni anamasogolela gereja yaali maJudewu.
Makiristawu yohowela wahudhera pamadhene madhu a Mulugu wihina yande osukuma mubuwelo wa maJudewu yiidda ebaribari (Osugwe ddima 4-5)
5. Dhithu baani makiristawu yahoweliwa okala pasope?
5 Makiristawu yakala ojudeya yanna widdiwa ni makuru menli. Nikuru noobajha naali nanamasogolela gereja yawoona makiristawu ale ninga mapostata yahiyile ohara gereja ya maJudewu. Vano nikuru nanabili, naali na maJudewu yawoga wihina yaali makiristawu mbwenye yadidenle wakongomedha makiristawu ale wahara malamulo a Moyizeji. Podi wera maJudewu ale yerana eyo mwaha wihina yoova oharahariwa. (Gal. 6:12) Mbwenye ddiniyani yakavihere makiristawu ale okala oororomeleya wa Yehova?
6. Murumiwi Pawulo aakongomedhe makiristawu yaali mEberewu wera ddi? (Eberewu 5:14–6:1)
6 Karta murumiwi Pawulo alebenliye mEberewu ahakongomedha addibila wahudhera pamadhene madhu a Mulugu. (Omwileri Eberewu 5:14–6:1.) Murumiwi Pawulo olabihedha dholebela dha Ebarayiku ni owoga mwahaya bwaddi makalelo owebedha a makiristawu yaaliwa athima opitha makalelo maJudewu yamwebedhiwa Yehova kale. a Pawulo ahinona wihina makiristawu ale yahere ehudhera ni yonelamo pamadhene ebaribari, kiyalekethiwege ni dhohudhiha dhowoota.
7. Dhoweha baani dhinanifwanya peeno?
7 Ndala ninga makiristawu yaali mEberewu, peeno ehikalawo athu enavuwiha muselu dhowoota ni yahinaavaha thima malamulo a Yehova wodhela ele eli yapama ni yabure. Athu amodha enowoga wihina Anamoona a Yehova athu orusa, mwaha wawiwelelaga malamulo eli mBibiliyani enawoga wodhela muselu wogonihana. Teto amodha enowoga wihina Anamoona a Yehova kinna odhivela mwaha enowakumiha mmulogoni ale ehinawiwelela malamulo a Yehova. Mwebaribarene, makalelo owubuwela aathu amwilaboni, onna odhowave othabwaga ohiyana ni mubuwelo wa Yehova. (Pro. 17:15) Bumwahaya, sathima onona mubuwelo ola wabure wihina nande osukuma. Kanenye wihina muthu di muthu anikwerebeyihe ni anihihe omulabela Yehova. — Ebe. 13:9.
8. Nnande aavi odidela wunnuwelavo epaddi yomuzimuni?
8 Murumiwi Pawulo ahakongomedha makiristawu yaali meberewu withwelavo epaddi yomuzimuni. Teto ni iyoya, nnohowela ohara yolaga emodhave. Negi nande okala makiristawu owithwelavo epaddi yomuzimuni, nnohowela omuhudhera Bibiliya pamadhene wihina nimunone Yehova ni makalelo aye owubuwela. Teto naarive nigabaddiziwe, nnohowela odhowagave niithwelagavo epaddi yomuzimuni. Ohiya eyo, naarive nigaali mwibaribarini muwari mwa yaka dhowinjhivadhene, iyo aatene nnohowela odidela omwileri ni omuhudhera Bibiliya malabo aamateene. (Sal. 1:2) Okanna elemelelo yomuhudhera Bibiliya, enere onikavihera olibiha nroromelo nehu, eli ekalelo murumiwi Pawulo anathabwiye osoriha va karta aalebenliye mebrewu. — Ebe. 11:1, 6.
‘MUKANNE NROROMELO WIHINA MUKANNE EGUMI
9. Mwahaya bwaddi makiristawu yaali mEberewu yohowela okanna nroromelo nooliba?
9 Makiristawu yaali oJudeya, yohowela okanna nroromelo nooliba wihina yande ovuluwa mwaha wa mahoso yaddamela. (Ebe. 10:37-39) Yesu ahawaddela anamahara aye wihina yamoona Jeruzale agarijhiwe ni anyakoddo, aliwa yohowela othawa. Vano makiristawu aatene yakala muluwani naale yakala muthemba, yohowela othawa. (Luk. 21:20-24) Mudhidhi yoole yambela koddo, athu yakalesa muthemba, yathawelesa muluwani wihina ekale oobareleyene mwaha wa txinga. Vano ohara yolaga ya Yesu yothawela mmwangoni yakala ninga otaduwa. Bumwahaya makiristawu aatene yohowela okanna nroromelo nooliba.
10. Yahere makiristawu ekanna nroromelo nooliba naathukulele wera ddi? (Eberewu 13:17)
10 Makiristawu yaali mEberewu yohowela waroromela ale Yesu aathomiliye wihina eholelege mulogo. Podi wera ale yasogolela mulogo, yahaavaha dhoholela dhowooneleyamo wodhela mudhidhi ni makalelo oothawa. (Omwileri Eberewu 13:17.) Madhu elabihedhiwe va Eberewu 13:17 owi ‘mwawiwelelege’ ni Egerego, enatapulela wi muthuya anowiwelela mwaha anomuroromela ole anavaha dhoholeladha. Obe nere, muthuya kaniwelela mwaha onona wi ole anavaha dhoholeladha ohukanna mutholo wokala namasogolela, mbwenye aniwelela mwaha anomuroromela. Bumwahaya mahoso ale ehinathi ofiya, makiristawu ale yaali meberewu yohowela ohudhera waroromela ale yaaholela. Vano akala makiristawu ale yohara dhoholela yakeliwa ni addibila yaaholela mudhidhi yoole wa murenddele, yere okala yokweya ohara dhoholela yakeligiwa mudhidhi worusa wafiya.
11. Mwahaya bwaddi peeno makiristawu enohowela okanna nroromelo nooliba?
11 Ninga makiristawu ale, nihiyoya nnohowela okanna nroromelo nooliba. Nnakalawo mudhidhi athu owinjhiva ehinarumedhiwa wihina nnakalawo malabo ookuthula. Teto aliwa enoniteya mwaha iyo orumedha wi nnakalawo malabo ookuthula. (2 Ped. 3:3, 4) Naarive Bibiliya awogaga wodhela dhithu dhimodha dhinafuna opadduwa mudhidhi wa mahoso manlubale, ebaribariya sowihina dhihikalawo dhithu dhowinjhiva nihinonnihu. Bumwahaya nnohowela okanna ebaribari wihina omakuthulo onere ofiya mudhidhi wofwanelela. Teto mudhidhi ola wafiya Yehova anere onibarela. — Hab. 2:3.
12. Enaanikavihere ddi ovuluwa mudhidhi wa mahoso manlubale?
12 Peeno iyo nnohowela okanna ebaribari wihina Yehova anna omulabihedha mudhaari oororomeleya ni athotho wihina aniholele. (Mat. 24:45) Podi wera mahoso manlubale yabajha, nnere wakela dhoholela dhinanikavihere ovulusa egumi yehu, ndala ninga makiristawu yaali mEberewu yakenliwa dhoholela anyakoddo aRomano nuumurijha Jeruzale. Bumwahaya ola mudhidhi wofwanelela wihina nihudhere waroromela ale Yehova anaalabihedhiye wihina eniholele. Akala enonirusa waroromela ni wawiwelela ale enaniholela, mwebaribarene enere okala yorusa ororomela dhoholela enaanivahigiwa mudhidhi wa mahoso manlubale.
13. Mwahaya bwaddi yolaga enfwanya va Eberewu 13:5 yaafiye mudhidhi wofwanelela?
13 Mudhidhi makiristawu ale ejheehaga waddeliwa wihina ethawe, yohowela orabela ‘odhivela korowa’ ni okanna egumi yojajala wihina yandege omulabela Yehova. (Omwileri Eberewu 13:5.) Kale amodhaya yahona goyi mwaha ofwanyiwa dala nuhawa. (Ebe. 10:32-34) Naarive makiristawu ale egandile ovilelana dala vamodha nuhawa nuuhagalala mwaha wa muthenga dhapama, podi wera amodhaya yahambela odhiveliwa korowa yubuwelaga wi dhere wabarela wihina ehifwanyiwe dala nuhawa obe ethu-sithu. Mbwenye ebaribariya sowihina korowa ndhe kadhande wavulusa mudhidhi Jeruzale aagujhuliwaga. (Tiya. 5:3) Mwebaribarene ale yaadhiveliwege korowa, yere warusa vanlubale ohiya dhoorela dhewa wihina ethawe.
14. Okanna nroromelo nooliba enaanikavihere aavi werana dhothoma dhapama wodhela muselu wa dhoreela?
14 Nakanna ebaribari wihina Yehova anere omariha dhithu dhaatedhene dhabure dhili mwilaboni muna mohilegela, kannubuwelege wi okanna korowa ni dhoorela ethu yathima. Mwaha wihina mudhidhi wa mahoso manlubale korowa kadhinakanne mabasa. Bibiliya anihina athu ‘enere orahilela parata yewa murampani,’ mwaha wihina aliwa enere wonelamo wi ‘newene parata, newene oru kadhinavuluse nlabo noowali na Yehova.’ (Eze. 7:19) Ohiya opwasedha wugela korowa dhowinjhiva, nnohowela werana dhothoma dhinanikavihere wisamalela, wasamalela amudhihu ni omulabela Yehova. Bumwahaya kayakale yapama wawerana mangawu bure-bure obe othabwa ononga mudhidhi nisamalelaga dhithu dhomwilini. Teto nnohowela okala pasope wihina nihithabwege odhivela dhithu dhomwilini ninnihuna. (Mat. 6:19, 24) Woona wi omakuthulo onowaddamela, nnohowela othoma akala nnamuroromelege Yehova obe dhoorela dhehu.
‘MUNOHOWELA OVILELA’
15. Mwahaya bwaddi makiristawu yaali mEberewu yohowela ovilela?
15 Makiristawu yaali mEberewu yohowela ovilela wihina yande owanana dhoweha dhaafwanye nuuroromeleya. (Ebe. 10:36) Naarive kale amodhaya egafwanyiwe oharahariwa, owinjhiva wa aliwa yaathomile okala makiristawu mudhidhi yanniwana mwana murenddele. Bumwahaya murumiwi Pawulo ahawubusedha wihina yohowela okala owiwegeredha wihina yande owanana oharahariwa ni okala oororomeleya ofiyedha okwa, ninga yampadduwele Yesu. (Ebe. 12:4) Mudhidhi makiristawu yenjhedhedheyaga, maJudewu yaharahara weraga othabwa otakaleliwa ni okala oowali mwaha maJudewu owinjhiva othoma okala makiristawu. Mwana yaka mundduli muthithi waathu yahimuhidda Pawulo mudhidhi alaleyaga oJeruzale. Teto maJudewu ookwaranya 40 “opangana wihina empe ni olibela othukula nibili wodhela ohujha newene ohung’wa ethu ofiyedha ompa Pawulo.” (Dho. 22:22; 23:12-14) Naarive makiristawu ale yiddiwaga ni eharahariwaga aliwa yohowela odidela otugumana, olaleya muthenga dhapama ni olibiha nroromelo newa.
16. Karta murumiwi Pawulo alebeliiye mEberewu enanikavihera aavi woona mpurelo nnakanihuna mwaha woharahariwa? (Eberewu 12:7)
16 Ddiniyani yakavihere makiristawu ale ovilele naarive eharahariwaga? Murumiwi Pawulo afuna aakavihere makiristawu ale wonelamo wi oharahariwa winodhana mpurelo. Bumwahaya adhe awogege wi makiristawu yaharahariwaga, Mulugu podi olabihedha oharahariwa wula wihina aaxagihe. (Omwileri Eberewu 12:7.) Oharahariwa obe oxagihiwa wula, were wakavihera aliwa okanna dhikalelo makiristawu enahoweliwa. Makiristawu ale yahawonege makathamiho ale ninga ethu yapama yere wakweyela ovilela. — Ebe. 12:11.
17. Murumiwi Pawulo aanonne ddi wodhela muselu woharahariwa?
17 Murumiwi Pawulo ahakongomedha makiristawu ale okala ooliba murima ni ohiselela yaharahariwaga. Murumiwi Pawulo ahinona ovaha pama dholaga wodhela muselu ole woharahariwa, mwaha kale oliye ahaharahara makiristawu, bumwahaya oliye ahinona pamadhene dhithu dhaafwanya makiristawu ale yaharahariwa. Teto nuukala mukiristawu oliye ahiharahariwa vanlubale. (2 Kor. 11:23-25) Ohiya eyo, murumiwi Pawulo ahinona pamadhene ethu makiristawu ale yahoweliwa werana wihina evilele. Oliye ahawubusedha makiristawu ale wihina yaharahariwaga yohowela omuroromela Yehova, ohiya wiroromela. Teto aliwa yere wanda owanana oharahariwa nuuliba murima, yahere yawubuwela madhu enihina: ‘Yehova dinagikavihera; kaginoove. Muthu anaagerele ddi?’ — Ebe. 13:6.
18. Ddiniyani enaanikavihere owanana oharahariwa?
18 Peeno addibilihu amodha enna oharahariwa, iyo podi wakavihera aliwa wodhela walobelela ni osayela makalelo mamodha owakavihera ni ethu-sithu enahoweliwa. (Ebe. 10:33) Mbwenye Bibiliya anowooniha pamadhene wi ‘aatene ale enaafunege omuhagalaliha Mulugu, emuharaga Yesu, enerege oharahariwa.’ (2 Tim. 3:12) Bumwahaya iyo aatene nnohowela wiwegeredha wihina nande owanana makathamiho enanifwanye osogolo. Nimakalelo yaala, nnohowela odidela omuroromela Yehova ni okanna ebaribari wihina oliye anere onikavihera wawanana makathamiho bi makathamiho enanifwanye. Iyo kannanganyedha wi mudhidhi wofwanelela Yehova anere wawobola ale enamwebedha nuuroromeleya. — 2 Tes. 1:7, 8.
19. Nnere ddi wihina niwegeredhe mahoso manlubale ehinathi ofiya? (Osugwe fotu.)
19 Karta murumiwi Pawulo aalebeliiye mEberewu, mwebaribarene nahakavihera makiristawu a nsaka noobajha okala owiwegeredhene wihina yande owanana makathamiho yaafwanye osogolo. Bumwahaya murumiwi Pawulo ahakongomedha makiristawu ale wahudhera pamadhene madhu a Mulugu wi yawonelemo pama. Mwaha yaherena ndo, aliwa yere wanda onona ni osukuma dhohudhiha dhowoota. Teto oliye wakongomedha olibiha nroromelo newa wihina yande ohara dhoholela Yesu avahiliye ni ohara dhoholela dha ale yaholela yahubuwele dila biili. Teto oliye ahakavihera makiristawu wihina yande ovilela wodhela wawubusedha wi yawonege makathamiho yafwanya ninga ofuru yoxagihiwa ni Yehova. Nihiyoya nohowela ohara dholaga ndha, nerana ndo, nnere wanda odidela okala oororomeleya ofiyedha omakuthulo. — Ebe. 3:14.
Makiristawu oororomeleya yavilenle yahireelihiwa. Nuuthawa murudda woJudeya aliwa odidela otugumana. Ki eyo enanihudhiha ddi? (Osugwe ddima 19)
Jhibo 126 Nikale a kopolo, nikome teto niisugwerege
a Va kapitulu yobajha na karta murumiwi Pawulo aalebenliye mEberewu, ohusoriha dhipaddi tanu nabiili dha dholebela dha Ebarayiku dhinoniha wihina makalelo owebedha a makiristawu bwathima opitha makalelo owebedha a maJudewu. — Ebe. 1:5-13.
