1-2. Ethu baani enanithukulela iyo ninga adhaari a Yehova ohagalala? (Tiya. 1:22-25)

 YEHOVA vamodha ni mwanaye Yesu, enofuna wi nikale athu oohagalala. Namaleba a Salmo 119:2, ohuwoga egi: ‘Oohagalala baale enaparihedha mabasa dhoolaga dhaaye, ni enamusayela ni murima wewa waateene.’ Teto Yesu ahiwoga egi: “Oohagalala baale enawiwa madhu a Mulugu ni yaaparihedhaga mabasa!” — Luk. 11:28.

² Iyo nnothabwa ohagalala mwaha okala adhaari a Yehova. Mwaha waddi? Iyo nihikanna dhithu dhowinjhiva dhinanthukulela ohagalala, mbwenye ethu yathimaya, sowihina iyo nnomwileri Bibiliya malabo aamateene ni nnowilibihedha oparihedha mabasa dhithu nnahudherihu. — Omwileri Tiyagu 1:22-25.

3. Mareeliho baani nnawakelihu mwaha oparihedha mabasa dhithu nnilerihu mBibiliyani?

³ ‘Navirihagamo madhu enawogiwa’ nnowawakela mareeliho owinjhiva. Motajhiha, naparihedhaga mabasa ndhe nnahudherihu mBibiliyani, nnomuhagalasa Yehova ni nnohagalala. (Ecl. 12:13) Teto naparihedha mabasa dhithu nnahudherihu mBibiliyani, nnokanna egumi yohagalala vamuralani ni nnothabwa wandana naaddibilihu ammulogoni. Podi wera ohoona eyo epadduwaga mwigumini mwawo. Ohiya eyo, iyo nnowarabela makathamiho owinjhiva enaafwanya athu ehinamulabela Yehova. Mwebaribareene iyo nnorumedha ele mwene Davidi awogiliye. Mudhidhi ibaga wodhela malamulo ni makalelo ootoriha a Yehova oliye okuthula jhibwaaye egihina: ‘Ehikalavo yowakela enlubale wa ole onavirihamo.’ — Sal. 19:7-11.

4. Mwahaya bwaddi kahiyo ethu yookweya omwileri Bibiliya ni oparihedha mabasa dhithu nnahudherihu?

⁴ Ebaribariya sowihina kahiyo ethu yookweya omwileri Bibiliya ni oparihedha mabasa dhithu nnahudherihu. Mwaha neegi noonelemo dhithu Yehova anafuniye wihina neregena, nnohowela ogula mudhidhi kadda labo ni ohenya wi ethu-sithu evunganyedhe mudhidhi  wehu nnafunihu omwileri Bibiliya. Ohudhera wula, nnere woona dhithu dhinanikavihere omwileri Bibiliya malabo aamateene. Teto nnere woona dhithu dhinanikavihere opendda dhithu nnilerihu. Ohiya eyo, nnere woona makalelo ooparihedha mabasa mwigumini mwehu dhithu nnahudherihu mBibiliyani.

OSAYELEGE MUDHIDHI WIHINA OMWILERI BIBILIYA

5. Mwahaya bwaddi adhaari owinjhiva a Yehova egeedda oopinyaminyeyeene?

⁵ Adhaari owinjhiva a Yehova eneedda oopinyaminyeyeene, mwaha enojha mudhidhi wowinjhiva yeragana dhithu dhathima Bibiliya anawogiye wihina enohowela werana. Motajhiha, owinjhiva wa iyo nnohowela olaba wihina nisamalele emudhihu ni iyo nannya. (1 Tim. 5:8) Teto addibila owinjhiva enohowela wasamalela amudhiwa eli anakalaba ni aredda. Ohiya eyo, iyo aatene nnohowela mwana mudhidhi wihina nisamalele egumi yehu. Ohiya wakwanihedha dhithu ndha baahi, iyo nihikanna mutholo dhimodha mmulogoni. Teto mutholo wathima ninnihuna wihina naakwanihedhe, fuwapara mabasa oolaleya. Nnande aavi okanna mudhidhi wihina nimwileri Bibiliya malabo aamateene, opendda ndhe nnilerihu ni oparihedha mabasa ndhe nnahudherihu, wula niganna mutholo dhimodha?

6. Nnonihe aavi wi omwileri Bibiliya ethu yathima mwigumini mwehu? (Osugwe fotu.)

⁶ Omwileri Bibiliya ethu ‘yathima’ mwigumini mwa makiristawu, bumwahaya nnohowela opweha mburo woobajha mwigumini mwehu. (Fil. 1:10) Yolebela ya Salmo 1:1, 2 enihina muthu oohagalala duule ‘anadhiveliwa madhu a Yehova, teto anawileri malamulo aye ni ndhu na vati-vati, mutana ni mahiyu.’ Ela ethu enoniha wihina nnohowela osayela mudhidhi wi nimwileri Bibiliya. Mbwenye mudhidhi wofwanelela wihina nimwileri Bibiliya buuvi? Kadda muthu podi osakula mudhidhi wofwanelela wihina amwileri Bibiliya. Mbwenye sapama ohuddiwala wi mudhidhi wofwanelela buyole onandiwe omwileri Bibiliya malabo aamateene. Ddibila dhaala anithaniwa Victor anowoga egi: “Miyo ginadhiveliwa omwileri Bibiliya mambeseene, mbwenye owoga ebaribari kaginadhiveliwa ovenya mambeseene. Teto mudhidhi yoola boomaleya ni sokweya omwileri Bibiliya. Ohiya eyo, mubuwelo waaga onakala wopwaseya ni ginowanda  opwasedha dhithu ginahudherimi.” Ni weya onofwanyiwa makathamiho ninga yaala? Akala siyeyo, karajhiha wikoha: “Mudhidhi wofwanelela wihina gimwileri Bibiliya buuvi?”

OPENDDEGE DHITHU OMANLIWE WILERI

7-8. Ddiniyani yanthukulele ohupurelamo dhithu nnilerihu? Owogemo.

⁷ Malabo mamodha iyo podi wileri dhithu dhowinjhiva, mbwenye nahande opurelamo ethu. Onowabihaga wileri ethu, nuwindo oddiwala ndhe wileriwe? Eyo enowapadduwela athu owinjhiva. Yowukulihaya sowihina ethu ninga yeela podi onipadduwela namwilerigi Bibiliya. Podi wera ohukanna yoluba yowileri kapitulu dhowinjhiva dha Bibiliya kadda labo. Teto eyo sapama! Mbwenye wihina nipurelemo wileri wehu wa Bibiliya, nnohowela okanna yoluba ni wilibihedha wakwanihedha yolubaya. (1 Kor. 9:26) Omwileri Bibiliya ethu yapama, mbwenye fumambelelo wa dhithu dhatedhene. Wihina nipurelemo ndhe nnahudherihu mBibiliyani nnohowela werana ethu emodhaya.

⁸ Kubuwela yotajhiha ela: Muzongwe doofuneya wihina egumi ekalewo velaboni yavati, mbwenye arubwa muzongwe owinjhiva muwari wa mudhidhi vang’ono elaboya enodhaala manjhe. Eyo yapadduwa, naarive muzongweya adidelave orubwa, anarubwela ebewene. Bumwahaya sapama muzongweya aarubwaga vang’ono vang’ono, mwaha anokavihera theya ovaha dhoojha dhowinjhiva. Ni makalelo mamodhave, kahiyo yapama omwileri Bibiliya naguvihaga, mwaha nerana ndo, kannande opurelamo newene wubuwela ndhe nimanlihu wileri. — Tiya. 1:24.

9. Wonelamo wihina onamwileri Bibiliya omwaaguvihaga, onere ddi?

⁹ Enowupadduwelaga omwilerigi Bibiliya vano we wonelamo wihina wamwileri waguvihaga? Akala ethu ninga yela enowupadduwela, onere ddi? Wilerigi vang’ono vang’ono wihina wande opurelamo ndhe onileriwe. Teto kahi ethu yorusa werana eyo. Akala enowurusa opendda dhithu onileriwe, kuthuwathuwe, mwaha wihina opendda enatapulela wubuwelela dhithu onileriwe. Wafuna we podi ovugula mudhidhi ni kapitulu onileriwe wihina okanne mudhidhi wowubuwelela ndhe onileriwe mBibiliyani. Ddibila Victor anowogave egi: Va ohudhera waaga wa Bibiliya, ginileri kadda labo kapitulu modha baahi. Woona wihina ginavenya mambeseene wihina gimwileri Bibiliya, ginowanda wubuwela dhithu gilerimi  nlabo nantero.” Naarive egaliwo makalelo ohiyanahiyana oomwileri Bibiliya, yathimaya fumwileri wihina wande opurelamo ndhe onileriwe. — Sal. 119:97. Osugwe kwaduru enna musolo “ Wawubuwele makoho ala.”

10. Owoge yotajhiha enoniha makalelo ooparihedha mabasa dhithu nnilerihu. (1 Tesalonisense 5:17, 18)

¹⁰ Naarive ogathomme omwileri Bibiliya mudhidhi bu mudhidhi obe ogathomme omwileri muwari mwa mudhidhi wowinjhiva obe naari, yathimaya fusayela makalelo ooparihedha mabasa dhithu omanliwe wileri. Wilerigi epaddi si epaddi ya Bibiliya wikohe: “Ginande aavi oparihedha mabasa peeno obe osogolo dhithu ndha ginilerimi?” Motajhiha, kabiha wubuwela wilerigi yolebela ya 1 Tesalonisense 5:17, 18. (Omwileri.) Vano, wamala wileri versu ndha biili, we podi wubuwela dila ngasi onalobeliwe kadda labo ni dhithu baani onasorihiwe walobelaga. Teto we podi wubuwela dhithu baani onatamaleliwe vanlubale. We podi othoma omutamalela Yehova wodhela dhithu tharu dhathima. Wasayela mudhidhi wihina opendde ndhe onahudheriwe mBibiliyani, eyo enere wukavihera omoonelamo Bibiliya ni oparihedha mabasa ndhe onahudheriwe. Wawubuwele mareeliho onaawakeliwe mwaha womwileri Bibiliya mwamakalelo yala. Mohanganyedha, wamwilerigi Bibiliya mwamakalelo yala, onere okala namavirihamo a madhu enawogiwa. Mbwenye onere ddi, wafwanya dhithu dhowinjhiva onahoweliwe owomihedha mwigumini mwawo?

OKANNE DHOLUBA ONANDIWE WAKWANIHEDHA

11. Mwahaya bwaddi malabo mamodha iyo podi okala ookwerebeyeene? Owoge yotajhiha.

¹¹ Podi wera omambelelowene onere okwerebeya vang’ono wabajha omwileri Bibiliya, mwaha woona dhithu dhowinjhiva onahoweliwe owomihedha mwigumini mwawo. Kabiha wubuwela wilerigi livuru na Tiyagu kadda labo kapitulu modha, vano nlabo noobajha we wileri wodhela muselu wohukanna nsakulo. (Tiya. 2:1-8) Nuwindo we wonelamo wihina onohowela osaddula makalelo awo owaweddiha athu amodha. Teto eyo sapama! Vano labo nanabiili, onowileri epaddi emodha enawoga wodhela makalelo oosugwera dhithu onawogiwe. (Tiya. 3:1-12) Nuwindo we wonelamo wihina nlabo dhaala wahiwoga dhithu dhokwerebeyiha. Mwaha wa yeyo, onothoma wilibihedha owoga dhithu dholibiha. Nlabo nanatharu, onowileri epaddi enawoga wihina sowopiha wandana ni elabo. (Tiya. 4:4-12) Mwaha wa yeyo, onoothoma osakula pama yaredhelo yawo. Yahinavire malabo owinjhiva, we ohunfwanya dhithu dhowinjhiva onahoweliwe osaddula mwigumini mwawo.

12. Woonelamo wihina dhihikalawo dhithu dhowinjhiva onahoweliwe owomihedha mwigumini mwawo, onere ddi? (Osugwe nota.)

¹² Woonelamo wihina dhihikalawo dhithu dhowinjhiva onahoweliwe owomihedha mwigumini mwawo, kuthuwathuwe. Mwaha wihina eyo  enowoniha wihina oli muthu owiyeviha ni ohukanna efunelo yosaddula egumi yawo. Muthu owiyeviha ni oororomeleya aamwilerigi Bibiliya, yoluba yaye fufwanya ethu anahoweliye owomihedha mwigumini mwaaye. a Teto kudduwale wi owara “emuthu exa” ethu nnahowelihu odidela weragana egumihu yaatene. Mwaha wihina nnerege okanna dhithu nnahowelihu osaddula mwigumini mwehu. (Kol. 3:10; Osugwe nota noomuhudherana Bibiliya ninna musolo “sendo renovada.”) Ddiniyani enukavihere okala namavirihamo a madhu a Mulugu?

13. Onande aavi wakwanihedha yoluba yoparihedha mabasa dhithu onahudheriwe mBibiliyani? (Osugwe fotu.)

¹³ Ohiya wawerana masadduwo maatene mudhidhi mmodhave, osayele oparihedha mabasa mwigumini mwawo ethu modha obe biili ohudhenriwe. (Pro. 11:2) We podi oleba lista na dhithu onahoweliwe osaddula, nuwindo osakule modha obe biili wihina oparihedhe mabasa, vano dhimodha ohiye wihina wakwanihedhe osogolo. Ki akala dhithu olebeliwe va listani dhihithabwa winjhiva, ethu baani onahoweliwe obajha oparihedha mabasa mwigumini mwawo?

14. Ethu baani onahoweliwe obajha oparihedha mabasa mwigumini mwawo?

¹⁴ We podi obajha wodhela osakula ele eli yokweya oparihedha mabasa mwigumini mwawo. Obe we podi wambela ni yoluba ononniwe wihina enohoweleya vanlubale mwigumini mwawo. Wafwanya yoluba yawo, osayele mmalivuruni mwehu muselu onawoga wodhela yoluba yawo. Obe we podi omulabihedha Índice das Publicações da Torre de Vigia obe Guia de Pesquisa para Testemunhas de Jeová. Ohiya eyo, olobele wodhela yoluba yawo, omulobaga Yehova wihina uvahe ‘efunelo ni kopolo yowerana anafuniye.’ (Fil. 2:13) Nuwindo obajhe werana dhithu ohudhenriwe. Wanda wakwanihedhe yoluba yobajha, onere okanna efunelo yowakwanihedha dholuba dhimodha.  Vano wonelamo wi ohanda wawerana masadduwo mwigumini mwawo obe owomihedha ekalelo yawo yekiristawu, onere okanna efunelo yodhowagave waweragana masadduwo mwigumini mwawo ni enere okala yokweya wakwanihedha dholuba dhimodha osogolo.

WAHIYE WIHINA MADHU A MULOGU YUDAHINYE MURIMA

15. Mwahaya bwaddi adhaari a Yehova ehiyana ni athu owinjhiva enawoga wi enomwileri Bibiliya? (1 Tesalonisense 2:13)

¹⁵ Athu owinjhiva enowoga wihina ehimwileri Bibiliya dila dhowinjhivadhene. Mbwenye nerege aliwa enorumedha ndhe anawoga Bibiliya? Aliwa enoparihedha mabasa mwigumini mwewa ndhe enahudheriwa mBibiliyani? Yowukulihaya sowihina athu owinjhiva kinaparihedha mabasa dhithu enasuziwa mBibiliyani. Mbwenye kahiyo yeyo, enerana adhaari a Yehova, mwaha wi aliwa enamuhudhera Bibiliya ni efunelo yoparihedha mabasa mwigumini mwewa. Ndala ninga makiristawu a nsaka noobajha, iyo nnamoona Bibiliya ninga ‘madhu a Mulugu.’ Teto yathimaya, iyo nnowerana dhithu dhatedhene nnandihu wihina niparihedhe mabasa mwigumini mwehu dholaga nnafwanyihu mBibiliyani. Omwileri 1 Tesalonisense 2:13.

16. Enaanikavihere ddi okala anamavirihamo a madhu a Mulugu?

¹⁶ Owoga ebaribari kahiyo ethu yookweya omwileri Bibiliya ni oparihedha mabasa dhithu nnahudherihu. Podi wera makathamiho enanifwanya fuuhukanna mudhidhi womwileri Bibiliya obe ninna elemelelo yoowileri naguvihaga ni ohupurelamo ethu nnilerihu. Obe iyo podi okwerebeya mwaha ofwanya dhithu dhowinjhiva nnahowelihu owomihedha mwigumini mwehu. Naarive ofwanyiwaga makathamiho bi makathamiho, onere wanda wagonjhiha nnikavihero na Yehova. Bumwahaya orumedhe nikavihero na Yehova wihina ohikale muthu onadduwala dhiwaliye, mbwenye onaparihedha mabasa madhu a Mulugu. Mohanganyedha nadhowagave nimwilerigi Bibiliya wula niparihedhaga mabasa ndhe nnahudherihu nnere okala athu oohagalala. — Tiya. 1:25.