1-2. Mwahaya bwaddi Yehova adhe anipaddusege ni ekalelo yohagalala naakaviheraga athu amodha?

 YEHOVA anipaddusile ni ekalelo yothabwa ohagalala mwaha wakavihera athu amodha. (Dho. 20:35) Eyo enatapulela wi iyo kannahagalala naavahiwaga ethu? Naari, kahi yeyo. Aatene iyo nnohagalala naavahiwaga ethu-sithu, mbwenye nnathabwa ohagalala naavahaga athu amodha ethu-sithu. Teto sapama onona wihina Yehova anipaddusile ni makalelo yaala. Mwahaya bwaddi?

² Mwaha Yehova ohunivaha ofuru wothoma akala nnafuna nikale athu oohagalala obe naari. Iyo podi othoma okala athu oohagalala wodhela osayela makalelo owakavihera athu amodha. Kunoonelamo wi sapama Yehova onipaddusa ni ekalelo yela yovaha? — Sal. 139:14.

3. Mwahaya bwaddi Yehova agithaniwaga “Mulugu oohagalala”?

³ Bibiliya anowoga wihina wawerela opama athu amodha winothabwa ohagalasa. Bumwahaya kannatikina Bibiliya aamwithanaga Yehova ninga ‘Mulugu oohagalala.’ (1 Tim. 1:11) Mwaha Yehova doobajha wawerela opama athu amodha, teto kaavo muthu anavaha omukwaranya Yehova. Mwaha woliye “nihikanna egumi, nnowiddiginya ni nnokalawo,” ndala ninga murumiwi Pawulo awogiliye va Dhowera Dhaarumiwi 17:28. Ebaribariya sowihina ‘dhego dhatedhene dhapama ni nvaho wapama dhinakuma odhulu,’ obe neere, dhinadha wa Yehova. — Tiya. 1:17.

4. Ddiniyani enaanikavihere odidela okala athu oohagalala?

⁴ Mohanganyedha iyo aatene nnofuna ohagalala mwaha wawerela opama athu amodha. Iyo podi wanda okala athu oovaha wodhela omutajhiha Yehova. (Efe. 5:1) Nahudheraga yotajhiha ya Yehova, nnere woona ethu nnahowelihu werana noonelamo wihina athu amodha kinanitamalela naarive nawerelaga dhithu dhapama. Teto ohudhera yotajhiha ya Yehova, enere onikavihera odidela wawerela opama athu amodha ni wenjhedhedha ohagalala wehu naarive athu amodha ehinitamalelaga.

 OKALE MUTHU OOVAHA NINGA YEHOVA

5. Dhithu baani Yehova ananivahiye?

⁵ Ni makalelo baani Yehova aliye Mulugu oovaha? Kabiha wubuwela dhotajhiha ndha. Yehova anonisamalela epaddi yomwiilini. Yehova podi ohunivaha dhithu dhatedhene nnafunihu, mbwenye oliye anere onivaha ele nnahowelihu. Motajhiha, Yehova anonivaha yoojha, yowara ni mburo wokala. (Sal. 4:8; Mat. 6:31-33; 1 Tim. 6:6-8) Nerege Yehova ananivaha dhithu nnahowelihu mwaha wowaddihedhiwa? Naari! Ki mwahaya bwaddi Yehova aganivaha dhithu nnahowelihu?

6. Nnahudhera ddi ni Matewuji 6:25, 26?

⁶ Yehova ananivaha dhithu nnahowelihu mwaha anonidhivela vanlubale. Kasugwa ethu awogile Yesu va Matewuji 6:25, 26. (Omwileri.) Va yolebela ela Yesu awogaga wodhela balame, oliye osoriha egi: “Balame dhodhulu, kadhinaala, kadhinahadda newene kadhinalogolela yoojha vasasarani.” Mbwenye kasugwa ethu aasorihiliye vasogolova: “Babinyu oodhulu anoojhiha.” Nuwindo Yesu owoga egi: “Nyu ni balame anna thima baani, kahi nyu?” Nnahudhera ddi ni yoladdaniha ela? Vamentoni va Yehova adhaari aye bathima wapitha anenyama. Akala Yehova anowasamalela anenyama, iyo podi okanna ebaribari wihina Yehova anerege onisamalela malabo amatene! Ndala ninga baabi anasamaleliye emudhaye, Yehova anere onisamalela mwaha anonidhivela vanlubale. — Sal. 145:16; Mat. 6:32.

7. Nnande aavi otajhiha makalelo oovaha a Yehova? (Osugwe fotu.)

⁷ Ndala ninga Yehova anasamaleliye athu mwaha wadhivela vanlubale. Iyo podi wakavihera athu amodha ni dhithu enahoweliwa epaddi yomwilini. Motajhiha, we ohumunona ddibila obe murogola anahowela yoojha obe yowara? Yehova podi wulabihedha we wihina omukavihere ddibila oyo. Nlogo na Yehova nihinoniwa ninga athu oovaha thabwathabwa yapadduwa ngovi. Motajhiha, mudhidhi wa mutipa wa Koronaviru addibila ni arogola owinjhiva, yahakavihera athu amodha yahowela nikavihero ni dhoojha, dhowara ni dhithu dhimodha. Teto owinjhiva yaherana dhovelela wihina yakavihere mabasa ehu enapariwa wapela elabo yaatene. Teto dhovelela ndha dhihilabihedhiwa wihina ekaviheriwena addibila yaafwanyiwe ngovi. Addibila ala oovaha, ehiparihedha mabasa ele enafwanyeya va yolebela ya Eberewu 13:16 enihina: ‘Kamuddiwale werana opama ni ogawana ele munninyuna, mwaha Mulugu onodhiveliwa mukutho ndho.’

8. Makalelo mamodha Yehova ananikaviheriye baavi? (Filipense 2:13)

 ⁸ Yehova anonivaha kopolo. Yehova anohagalala vanlubale mwaha wavaha adhaari aye oororomeleya kopolo enahoweliwa. (Omwileri Filipense 2:13.) Onowabihaga olobela omulobaga Yehova wi uvahe kopolo wihina wande owanana yoweha obe makathamiho enuufwanya? Podi wera onolobaga kopolo wihina wande owanana makathamiho a kadda labo. Vano nlobelo nawo nuwakuliwa, podi wera wahirumedha ele enasoriha yolebela ya Filipense 4:13, enihina: “Mwadhatedhene gihikanna kopolo mwaha wa ole onagivaha kopolo.”

9. Nnande aavi omutajhiha Yehova wodhela olabihedha kopolo dhehu wi naakavihere athu amodha? (Osugwe fotu.)

⁹ Naarive nigaali athu oohilogomana, iyo podi omutajhiha Yehova wodhela makalelo oolabihedha kopolo anniyena. Ebaribari wi iyo kannande wavaha athu amodha kopolo ninnihuna, mbwenye iyo podi olabihedha kopolo ninnihuna wihina naakavihere athu amodha. Motajhiha, iyo podi wakavihera addibila owunnuwelavo obe ale eli aredda wodhela odhowa omerkado wi nakavihere ogula ethu-sithu enahoweliwa obe wodhela wakavihera ni mabasa a vaade. Teto dhandeyaga iyo podi wakavihera mabasa ooxela ni oowomihedha Nyumba Yomwene. Mwebaribarene nalabihedha kopolo dhehu ni makalelo yaala, nnere wakavihera vanlubale addibilihu vamodha naarogola.

10. Nnande aavi walibiha amodha wodhela dhithu nnawogihu?

¹⁰ Kuddiwale wihina madhu ehikanna kopolo. Motajhiha, onomubuwela muthu anahagalale mwaha womutamalela ni murima wawo wamutene? Obe ohumunona muthu anahowela otodoliwa? Akala siyeyo, onoonamo aavi omwaddela muthuya wi onomudhivela vanlubale? We podi omwaddela muthuya thoo-thoo obe wodhela omuligarela, omwinviyarela mensaje ni emeyili obe karta. We kunahowela othuwathuwa vanlubale wasayelaga madhu onafuniwe wawoga. Madhu ookweya, mbwenye enadhela vati va murima podi okala ethu enaamukavihere ddibila wavilelana makathamiho a kadda labo obe ahogolowele okanna ejhehedhelo. — Pro. 12:25; Efe. 4:29.

11. Nimakalelo baani Yehova ananivahiye thotho?

¹¹ Yehova anonivaha thotho. Murumiwi Tiyagu ohuleba egi: ‘Akala muthu anohowela thotho, adidele omuloba Mulugu, mwaha oliye onowavaha aatene mwamahala, kanamwimana muthu, anere onvaha.’ (Tiya. 1:5;nota.) Madhu ala enowoniha wihina Yehova kanakalela nrima thotho dhaye, ohiya eyo, oliye anowavaha athu aatene enamuloba. Teto yolebela ela enowoniha wihina Yehova avahaga thotho dhaye, oliye anowerana eyo ‘ahimwimanne muthu’  obe ahimotorihile.’ Yehova kanafuna wihina iyo noovege omuloba thotho. Mwebaribareene oliye anonikongomedha omuloba thotho dhaye. — Pro. 2:1-6.

12. Ofuru baani ninnihuna wowawaddela athu amodha dhithu nnonihu?

¹² Iyo podi omutajhiha Yehova wodhela wawaddela athu amodha dhithu nnonnihu. (Sal. 32:8) Nlogo na Yehova nihikanna ofuru munlubale yowawaddela athu amodha dhithu enahudheriwa. Motajhiha, iyo nnowaxagiha anamalaleya axa wihina yandege wapara pama mabasa oolaleya. Teto nuuvilela anamaholela mulogo enowaxagiha adhaari ookavihera ni addibila emanle obaddiziwa wihina yandege wakwanihedha mutholo dhewa dha mmulogoni. Addibila enonne wapara pamadhene mabasa oomaga ni oosamalela Nyumba Dhomwene, enowaxagiha ale eli axa onona wapara pama mabasa ala oomaga Nyumba Dhomwene dhinalabihedhiwege wihina athithimihiwegemo Yehova.

13. Nnande aavi omutajhiha Yehova nafunaga waxagiha athu amodha?

¹³ Omutajhihege Yehova wafunaga waxagiha athu amodha. Kudduwale wihina Yehova kanakalela nrima dhithu anonniye. Ni makalelo mamodhave, iyo kannafuna okalela nrima dhithu nnonnihu mudhidhi naxagihaga ale eli axa, noovaga wihina osogolo aliwa enere ohala vamburoni vehu. Teto kannafuna wubuwela negi: “Miyo kaginaxagihiwege ni muthu, bumwahaya oliye anere osayela makalelo owerana dhithudha yeeka.” Ninga adhaari a Yehova kannahowela wubuwela ni makalelo yaala. Ohiya eyo, iyo nnohagalala vanlubale, ohiya baahi mwaha wawaddela dhithu nnonnihu, mbwenye mwaha ovelela egumi yehu wihina naakavihere ale nnaxagihihu. (1 Tes. 2:8) Iyo nnajheha wihina aliwa ‘yandege wahudhiha athu amodha.’ (2 Tim. 2:1, 2) Iyo aatene nakala athu oovaha wodhela wawaddela athu amodha dhithu nnonnihu, nnere wathukulela amodha okala athu oovaha ni oohagalala.

ONERE DDI AKALA ATHUYA KINANDA WUTAMALELA?

14. Ddiniyani athu owinjhiva eneriwana nawerelaga dhithu dhapama?

¹⁴ Nakala athu oovaha thabwathabwa naavahaga addibilihu, aliwa enerege onitamalela. Podi wera aliwa enere osayela makalelo mamodha oonitamalela ninga onilebela karta obe werana ethu-sithu. (Kol. 3:15) Vano aliwa yanitamalelaga, iyo nnohagalala vanlubale mwaha onona wi nihawerela ethu yapama.

15. Ddiniyani nnahowelihu ohidduwala akala muthu kanatamalela mwaha iyo omwerela ethu yapama?

¹⁵ Mbwenye nnohowela ohuddiwala wi malabo mamodha, athu amodha kinaanitamalelege mwaha wa dhithu dhapama nnawerelihu. Teto malabo mamodha, iyo podi wonelamo wihina muthuya kavahile thima dhithu nnongilihu wihina nimwerele dhithu dhapama. Motajhiha, oliye podi ohonelamo wi nihinonga korowa, kopolo ni mudhidhi wehu wihina nimukavihere. Ethu ninga yeela yanipadduwela, nnere ddi wihina nahiyelele ohagalala obe nahikwerebeye? Wawubuwele madhu enafwanyeya va Dhowera Dhaarumiwi 20:35 eli yolebela vikumihiwe ohudhera wula. Ohagalala wehu kunadha mwaha athu onitamalela obe naari, iyo podi osakula okala athu oovaha naarive athu amodha ehinitamalelaga. Nnande aavi werana eyo? Kasugwa ethu enaanikavihere okala athu oovaha naarive nahitamaleliwaga.

16. Ddiniyani nnahowelihu opwasedha?

¹⁶ Kudduwale wihina okala muthu oovaha makalelo oomutajhiha Yehova. Yehova anowavaha dhithu dhapama athu aatene, naarive amodhaya yahimutamalelaga. (Mat. 5:43-48) Teto Yehova anopaganya wihina naavahaga athu amodha “nahijhedhaga ohogoloseliwa, . . . mareeliho ehu enere winjhiva.” (Luk. 6:35) Madhu owi “nahijhedhaga” enovolowelavo otamaleliwa. Bumwahaya akala athu amodha kinuutamalela mwaha wa dhithu dhapama  onawereliwe, kukwerebeye. Teto kudduwale wihina Yehova anere wureeliha ni dhithu dhapama mwaha wakavihera athu amodha ni okala “namavaha oohagalala.” — Pro. 19:17; 2 Kor. 9:7.

17. Ddiniyani enanithukulela wakavihera athu amodha? (Lukaji 14:12-14)

¹⁷ Ethu emodha nnahowelihu werana wihina nimutajhihe Yehova, fuwubuwela ele Yesu awogiliye va Lukaji 14:12-14. (Omwileri.) Kahiyo yabure omwithana muthu nnonnihu wihina podi onerela ethu emodhave wi adhe vaadevihu wi nijhe vamodha. Mbwenye ki noonelamo wihina ninna wawerela dhithu dhapama athu amodha, wula nijheehaga wihina enihogolosele ethu nawerelihu. Noonelamo wihina ninna werana eyo, iyo podi othoma omwerela ethu yapama muthu di muthu nnonnihu wihina kanande onihogolosela ni onerela ethu emodhave. Nathoma werana ndala, nnere ohagalala vanlubale mwaha ninna omutajhiha Babihu Yehova. Ohiya eyo, okanna monelo ola siithu enaanikavihere odidela okala athu ohagalala ni odhowagave nawerelaga dhithu dhapama athu amodha, naarive ehinitamalelaga.

18. Ddiniyani enaanikavihere ohubuwela wi athu amodha kinonne otamalela?

¹⁸ Kuwubuwelege wihina athu amodha kinonne otamalela. (1 Kor. 13:7) Muthu di muthu ahutamalela mwaha wa ethu yapama omwereliwe, wikohe: Muthu ola kanatamalela obe eere oddiwala ogitamalela? Podi wera ehikalawo ethu-sithu emuthukulele ohitamalela. Athu amodha enofuna otamalela, mbwenye enowarusa vanlubale owoga wi ginotamelela. Podi wera athu amodha enowarusa okaviheriwa, mwaha kale baaliwene yaakaviheresa athu amodha. Ebaribariya sowihina iyo naadhivelaga addibilihu ni murima wehu waatene, kannubuwelege wihina aliwa kinatamalela. Ohiya eyo, nnere odidela wakavihera amodha nuuhagalala. — Efe. 4:2.

19-20. Mwahaya bwaddi sapama ovilela nawerela dhithu dhapama athu amodha? (Osugwe fotu.)

¹⁹ Okale muthu oovilela. Awogaga wodhela ovaha, mwene Salomawu ohusoriha egi: ‘Ovokedhe pawu yawo mmanjheni, mwaha wihina yavira malabo owinjhivene onere ofwanya.’ (Ecl. 11:1) Ninga enawogela yolebela ela, podi  wera amodha enanitamalela ‘wavira mudhidhi wowinjhivene.’ Kasugwa yopadduwa ya murogola dhaala onile eyo empadduwelaga.

²⁰ Yaka dha mundduli, mwadha nameeddela mulogo dhaala omulebela karta nolibiha murogola dhaala aabaddiziwe muwari mwaha yaka vang’ono. Karta nne nnawoga wihina sathima okala oororomeleya wa Yehova. Nuuvira yaka 8, murogola ole aakenle karta nne, wakula kartana wodhela owoga egi: “Miyo goofuna vanlubale wulebela karta wihina guwaddele makalelo madhu ale egilibihiliwa muwari mwa yaka ndha 8. Mwebaribareene karta nawo nihigilibiha vanlubale, thabwathabwa yolebela wekiliwevo yahiddahinya murima waaga. Miyo kaginadduwalege yolebela ele.” a Vano numala wawoga makathamiho aafwanyiwiye, murogola ola owoga egi: “Malabo mamodha, gowubuwela ohiya omulabela Yehova, ohiya mutholo dhaaga ni ohiya dhithu dhatedhene. Mbwenye gahikoya mmurimani mwaaga yolebela ele walebiliwe, teto si yolebela yeela yagikavihera ohiselela. Muwari mwa yaka ndhe 8, karta nne thagikavihenre odidela ovilela.” Vano kubuwela makalelo mwadha nameeddela mulogo ole, aaliye oohagalalene nuwakela karta nne, nuuvira ‘mudhidhi wowinjhiva!’ Nimakalelo mamodhave, podi wera nihiyoya nnaatamaleliwe ni muthu nimukaviherihu wavira mudhidhi wowinjhivene.

21. Mwahaya bwaddi nigafuna odidela otajhiha ekalelo yovaha ya Yehova?

²¹ Ninga nonilihu, Yehova anipaddusile mwamakalelo avayeka, wihina nihagalalege mwaha okala athu oovaha, ohiya mwaha ovahiwa. Teto iyo nnohagalala mwaha wakavihera addibilihu. Mwebaribareene sapama wawoona addibilihu enitamalelaga mwaha wa dhithu dhapama nnawerelihu. Mbwenye, naarive amodha ehinitamalelaga mwaha wa ele nnawerelihu, iyo nnerege ohagalala mwaha nihinona wi niherana ethu yapama. Kuddiwale wi ‘Yehova podi wuvaha okwaranya ele ovahiliwe.’ (2 Cró. 25:9) Ebaribariya sowihina kawo muthu anonne ovaha ompitha Yehova, teto kawo ethu enathabwa ohagalasa opitha oreelihiwa ni Yehova. Bumwahaya nnafuna nithome omutajhiha Babihu Yehova ali Mulugu oovaha.