OHUDHERA 38
JHIBO 25 Addibila oothikitheliwa a Yesu
We onoopwasedha ovuruwana dhoxagiha nnakelihu wodhela dhithu dhinapadduwe osogolo?
“Mmodha anere othukuliwa mmodha anere ohiyiiwa.” — MAT. 24:40.
DHITHU NNAAHUDHERIHU
Nnere woona dholaddaniha tharu Yesu aawogiliye wihina dhinikavihere wonelamo dhithu dhinafuna opadduwa mudhidhi Yesu anafuniye otoriha elabo ela yabure.
1. Otorihiwa baani onaapadduwe mohilegela?
IYO nnakalawo mudhidhi dhinapadduwa dhithu dhowinjhiva dhotikiniha! Teto mohulegela Yesu anere watoriha athu aateene. Yesu ahiwoga dhithu dhaapadduwege ofiyedha mudhidhi wotoriha wodhela wavaha “yintelelo” anamahara aye dhonihege wihina oliye ohambela othonga ni “omakuthulo wa dhithu dhatedhene” ohaddamela. (Mat. 24:3) Yintelelo ela enafwanyeya livuru na Matewuji, kapitulu 24 ni 25, ni yolebela ya Marku kapitulu 13 ni Lukaji kapitulu 21.
2. Ohudhera wula, dhithu baani nnafunihu opwasedha, ki mwahaya bwaddi opwasedha dhithu ndha dhinere onikavihera vanlubale?
2 Yesu ahawaddela anamahara aye muselu dhofuneya dhawoga wodhela dholaddaniha tharu. Yoladdaniha yobajha, enawoga wodhela mambila ni mbuzi. Yanabili, wodhela anamwali yahinagonege ni alobwana ooxaga ni oolodhowa ni yanatharu, ya talentu. Kadda yoladdaniha enonikavihera wonelamo wihina ekalelo ya kadda muthu, enere ovolowela makalelo anafuniye otorihiwa. Naasuzaga dholaddaniha ndha, nnere woona dhithu dhinanihudhihiwa ni makalelo ooparihedha mabasa mwigumi mwehu. Yoladdaniha yobajha nnafunihu woona enawoga wodhela mambila ni mbuzi.
MAMBILA NI MBUZI
3. Mudhidhi baani Yesu anafuniye waatoriha mambila ni mbuzi?
3 Va yoladdaniha ya mambila ni mbuzi, Yesu ahiwoga wodhela otorihiwa wa athu enna ofuru wowiwa muthenga dhapama ni othoma akala enere orumedha muthenga dhapama obe naari, teto akala enere othoma wakavihera addibile oothikitheliwa. (Mat. 25:31-46) Yesu anere watoriha mambila ni mbuzi va “mahoso manlubale,” ohalaga mudhidhi vang’ono wihina koddo ya Armajedo yambele. (Mat. 24:21) Ndala ninga namakukula anahiyanihiye mambila ni mbuzi, Yesu anere wahiyaniha athu enaakavihera addibile oothikitheliwa ni ale yahinaakavihera.
4. Mowiwanana ni Isaías 11:3, 4, mwahaya bwaddi nigahowela okanna ebaribari wihina Yesu anere waatoriha athu aatene mwamakalelo owogowa? (Osugwe fotu yavakapani.)
4 Yehova ohumuthoma Yesu ninga namatoriha. Teto yovuhulela ya Izayiya enowoniha wi Yesu anere okala namatoriha owogowa. (Omwileri Isaías 11:3, 4.) Yesu anopwasedha osugwa pamadhene dhithu kadda muthu aneriyena, anawogiye ni anubuweliye. (Mat. 12:36, 37; 25:40) Mwaha wa yeyo, Yesu anere wanona baani aakavihere addibile oothikitheliwa ni mabasa yapanriwa. a Ethu modha yathima enooniha wihina mambila enowakavihera addibila a Kiristu, fuudhela wapara mabasa oolaleya. Athu yaala enere otorihiwa ninga athu “owogowa” teto enere wakela mukono wa “egumi yohimala,” velaboni yavati. (Mat. 25:46; Ovuhu. 7:16, 17) Ala mareeliho manlubale enawakele ale enaadidele okala oororomeleya! Mwaha yadidela okala oororomeleya mudhidhi wa mahoso manlubale ni yavira, mandina ewa kinathimihiwe mu “mulivuruni na egumi.” — Ovuhu. 20:15.
Mohilegela Yehova anere watoriha athu ninga mambila obe ninga mbuzi (Osugwe ddima 4)
5. Nnahudhera ddi ni yoladdaniha ya mambila ni mbuzi, ki baani anafwanelela opwasedha yoladdaniha ela?
5 Wonihe wi oli muthu oororomeleya. Yoladdaniha ya mambila ni mbuzi asorihile Yesu, enathabwa owoga wodhela ale enna ejhehedhelo yokala velaboni yavati, athu yaala enowooniha wi ehikanna nroromelo wodhela wakavihera addibile a Kiristu ni mabasa oolaleya, teto wodhela okala oororomeleya nnikuru ning’ono naaddibila oothikitheliwa Yehova athomiliye ninga mudhaari oororomeleya ni athotho. (Mat. 24:45) Ki owoga wodhela ale enna ejhehedhelo yodhowa odhulu? Naaliwaya enohowela opwasedha ovuruwana dhoxagiha dhinafwanyeya va yoladdaniha ela. Mwahaya bwaddi? Mwaha Yesu anopwasedha osugwa makalelo ewa oowoga, owubuwela ni owerana dhithudha. Naaliwaya enohowela woniha wihina boororomeleya. Bumwahaya, Yesu adhe asorihege dholaddaniha biili wihina aaxagihe addibila ala oothikitheliwa. Dholaddaniha ndha dhinafwanyeya va yolebela ya Matewuji kapitulu 25. Vano kabeni noone yoladdaniha enawoga wodhela anamwali yahinagonege ni alobwana ooxaga ni oolodhowa.
ANAMWALI OOLODHOWA NI OOXAGA EHINAGONEGE NI ALOBWANA
6. Nimakalelo baani anamwali atanu yonihiliwa wihina yaali ooxaga? (Matewuji 25:6-10)
6 Va yoladdaniha ya anamwali yahinagonege ni alobwana, Yesu ahiwoga wodhela anamwali owakwana kumi yadhowile ogumana ni namatela. (Mat. 25:1-4) Anamwali aatene yafuna envelele namatela vamathangani a matelo. Yesu owoga wi atanu waaliwa yaali “ooxaga” mbwenye amodhaya atanu yaali “oolodhowa” Anamwali ale ooxaga yaali mento ni owiwegeredhene. Naarive namatelaya alegelaga, anamwali ale ooxaga yaali owiwegeredhene ni yahithoma omujheha, naarive akala namatelaya aafiye vaari va mahiyu. Bumwahaya anamwali ale oxaga yahadhana makura wihina panti dhewa dhihiddegeve, teto aliwa yahadhana makura mamodha wihina ale yaali mpantini yamalamo yapwehemo mamodha, akala namatelaya eere olegela ofiya. Ni makalelo yaala aliwa yaali owiwegeredhene wihina panti dhewa dhinathime. (Omwileri Matewuji 25:6-10.) Vano namatela nufiya anamwali ooxaga odhowa vamodha nuliye omathangani a matelo. Ni makalelo mamodhave makiristawu oothikitheliwa enakale owiwegeredhene mwaha wodidela okala oororomeleya ofiyedha mudhidhi anaafiye Yesu. Vano ale enakale owiwegeredhene, enere woniwa ninga athu oofwanelela okala ni namatela Yesu Kiristu mumweneni mwaaye odhulu. b (Ovuhu. 7:1-3) Ki yapaddunwe ddi ni anamwali atanu oolodhowa?
7. Ddiniyani yapadduwile ni anamwali atanu oolodhowa, ki mwahaya bwaddi?
7 Mohiyana ni anamwali ale ooxaga, anamwali oolodhowa kayiwegeredhile wihina emwakele namatela afiya. Mwaha panti dhewa dhaali neena nuuthima, teto aliwa kayadhilena makura mamodha wihina ehiddihena panti dhewa makuraya yamalamo. Vano nunona wihina namatela eere ofiya mohilegela, aliwa omaruwa wihina yaagule makura. Namatela nuufiya, aliwa yaali ehinathi ohogolowa. Bumwahaya, “anamwali ale yamanle wiwegeredha ovolowa nuliye wihina yaajhe mathanga amatelo, vano musiwo ofugiwa.” (Mat. 25:10) Vasogolova anamwali ale oolodhowa nuhogolowa, teto nuuxixa ovolowa wihina yajhe mathanga amatelo, namatela wawaddela egi: “Miyo kagunonneni.” (Mat. 25:11, 12) Anamwali ale oolodhawa kayiwegeredhile wihina emujhehe namatela mudhidhi bu mudhidhi afuniye ofiya. Makiristawu oothikitheliwa enahudhera ddi ni yoladdaniha ela?
8-9. Makiristawu oothikitheliwa enahudhera ddi ni anamwali yahinagonege naalobwana? (Osugwe fotu.)
8 Woonihe wi oli mento ni owiwegeredhene. Yesu kafuna awoge wi yeere okalawo makuru menddi a makiristawu oothikitheliwa, nimodha naakale nowiwegeredhene nimodha naari. Mbwenye oliye afuna awoge ethu yapadduwele makiristawu oothikitheliwa, yahere yahikala owiwegeredhene ni oovilela ofiyedha omakuthulo. Ethu ninga yeela yahere yapadduwela, aliwa kayamwakele padamari ewa. (Juwa. 14:3, 4) Ola muselu wathima vanlubale. Naarive akala ninna ejhehedhelo yodhowa odhulu obe yokala velaboni yavati, aatene iyo nnohowela ohuddiwala yoxagiha enafwanyeya va yoladdaniha ya anamwali yahinagonege ni alobwana. Kadda muthu wa iyo anohowela okala mento ni owiwegeredhene wi nande ovilela ofiyedha omakuthulo. — Mat. 24:13.
9 Nuwoga thima yokala mento ni okala owiwegeredhene wodhela olabihedha yoladdaniha ya anamwali yahinagonege ni alobwana, Yesu owoga yoladdaniha emodha. Yoladdaniha ela, enowoniha wihina sathima okala namalaba ooviheya ni werena ele nnandihu.
Sathima aatene iyo opwasedha yoladdaniha ya anamwali yahinagonege ni alobwana wihina nikale mento ni owiwegeredhene wi nande ovilela ofiyedha omakuthulo (Osugwe ddima 8-9)
TALENTU
10. Ni makalelo baani adhaari abiili yonihiliwa wi yaali ooxaga? (Matewuji 25:19-23)
10 Va yoladdaniha ya talentu, Yesu ahiwoga wodhela adhaari abiili yaali oororomeleya ni mudhaari mmodha ahaali oororomeleya. (Mat. 25:14-18) Adhaari ale abiili yahoniha wihina yaali oororomeleya wodhela olaba nuuviheya wihina yenjhedhedhe dhoreela dha nabwiya ewa. Ahinathi weedda olenddo, nnabuya ewa ahavaha adhaari ale talentu obe neere korowna dhowinjhiva. Vano adhaari abiili ale yaali oororomeleya, yahilaba nuuviheya ni yahilabihedha korowa dha nabwiya ewa ni thotho. Ki yokumelelavoya yaali eevi? Mulobwana ole nuhogolowa, ahifwanya korowa dhowinjhiva okwaranya ndhe aahiliye. Nuwindo nabwiya ole watamalela adhaari aye. Mwaha wa yeyo, aliwa ovolowa wihina “ehagalale ni nabwiya ewa.” (Omwileri Matewuji 25:19-23.) Ki ddiniyani yampadduwele mudhaari anatharu? Korowa ahiyedhiwiye ni nabwiya aye erilena ddi?
11. Ddiniyani yapadduwile ni mudhaari aali “mangonya,” ki mwahaya bwaddi?
11 Mudhaari anatharu aakenle talentu modha, mbwenye oliye aali “mangonya.” Nabwiya aye afuna wihina oliye alabihedhe talentu ele ni thotho. Mbwenye ohiya olabihedha ni thotho, oliye othoma otibela. Vano nabwiya aye nuhogolowa, mudhaari ole kaanna ethu wihina anvahe. Mwebaribareene mudhaari ole kaanna ekalelo yapama. Ohiya oloba nikurumuwelo mwaha ohanda wenjhedhedha dhoreela dha nabwiya aye, mwamakalelo abure mudhaari ole omwithana nabwiya aye “muthu ookukusa.” Dhithu erilena mudhaari ole dhahimutakalela vanlubale nabwiya aye. Bumwahaya oliye wakiwa talentu aavahiwiye ni othamagihiwa vaade va nabwiya aye. — Mat. 25:24, 26-30.
12. Adhaari ale abiili oororomeleya peeno enatapulela aani?
12 Adhaari ale abiili oororomeleya, enatapulela makiristawu oothikitheliwa eli oororomeleya. Nabwiya Yesu anowawithana wihina evolowe wi “ehagalale nnabwiya ewa” obe neere aliwa enomwakela padamari ewa odhulu wodhela okala oobajha ovenyihiwa muukwani. (Mat. 25:21, 23; Ovuhu. 20:5b) Mbwenye yotajhiha ya mudhaari ole abure aali mangonya, enowaxagiha vanlubale makiristawu othikitheliwa. Nimakalelo baani?
13-14. Makiristawu oothikitheliwa enahudhera ddi yoladdaniha ya talentu? (Osugwe fotu.)
13 Woonihe wi onolaba nuuviheya ni onowerana ele onandiwe. Va yoladdaniha ya talentu ni yaanamwali yahinagonege ni alobwana, Yesu kafuna awoge wi makiristawu amodha oothikitheliwa yeere okala amangonya. Ohiya eyo, oliye afuna awoge dhithu dhapadduwele yahere aliwa ehiya olaba nuuviheya. Eyo yahapadduwe makiristawu ale kayande ‘ohiddelela withaniwa ni osakuliwa’ ni kayarumedhiwe odhowa odhulu. — 2 Ped. 1:10.
14 Yoladdaniha Yesu awogiliye wodhela talentu ni anamwali yahinagonege naalobwana, enowoniha pamadhene wihina makiristawu aatene oothikitheliwa enohowela okala mento ni owiwegeredhene, teto enohowela olaba nuviheya ni werana ele enandiwa. Nerege Yesu ahiwoga ethu emodha yaaxagihe makiristawu oothikitheliwa? Hee ahiwoga! Ethu Yesu awogiliye enafwanyeya va Matewuji 24:40, 41 enowoniha otorihiwa wogomihedha wa makiristawu oothikitheliwa.
Yesu anofuna vanlubale wihina makiristawu oothikitheliwa elabege nuviheya ni ekale athotho (Osugwe ddima 13-14) d
BAANI “ANAATHUKULIWE?”
15-16. Ni makalelo baani Matewuji 24:40, 41 anaakaviheriye makiristawu oothikitheliwa wonelamo wi sathima okala mento?
15 Yesu ahinathi owoga dholaddaniha ndhe tharu, oliye ahiwoga wodhela otorihiwa wogomihedha wihina onihe makiristawu baani oothikitheliwa yarumedhiwe. Oliye wawoga alobwana abiili yaali mmunddani ni ahiyana abiili yasila vansiloni. Va dholaddaniha nda biili, enakala ninga kadda yoladdaniha athuya yapara mabasa mamodhave, mbwenye Yesu ahiwoga wihina ‘mmodha anere othukuliwa mmodha anere ohiyiiwa.’ (Omwileri Matewuji 24:40, 41.) Voharela, Yesu wawaddela anamahara aye egi: “Vano mukale mento mwaha labo anafuna odha Nabwiya enyu kamunonne.” (Mat. 24:42) Teto Yesu nuwoga yoladdaniha yaanamwali ehinagonege naalobwana, oliye ahasoriha madhu oligana. (Mat. 25:13) Nerege madhu ala aasorihile Yesu enowiwanana? enakala ninga enowiwanana. Bumwahaya Yesu “anaathukule” baahi makiristawu oothikitheliwa enaadidele okala ororomeleya wihina yathongege mumweneni mwaaye.— Juwa. 14:3.
16 Wonihege wi oli mento. Mukiristawu oothikitheliwa ahinakale mento epaddi yomuzimuni, kinaakale vamodha ni makiristawu amodha “oosakuliwa.” (Mat. 24:31) Ebaribariya sowihina, adhaari aatene a Yehova, naarive akala ejhehedho yewa, sodhowa odhulu obe okala elabo yavati, enohowela ohara yoxagiha ya Yesu yokala mento ni ororomeleya.
17. Mwahaya bwaddi kannahowela othuwathuwa akala Yehova anothoma wathikithela makiristawu malabo yaala a peeno?
17 Iyo nihimunona pamadhene Yehova, teto nihinona wihina makalelo aye otoriha bowogowa. Iyo kanathuwathuwa akala Yehova ohuthoma wathikithela makiristawu ororomeleya malabo yaala a peeno. c Iyo nnowubuwela yoladdaniha Yesu awogiliye wodhela alobwana yambele olaba mundda wa uva egaakwanne mawora 17. (Mat. 20:1-16) Ale yithaniwe wihina yambele olaba txiguwo yakele korowa emodhave ni ale yambele olaba mambesi. Ni makalelo mamodhave, makiristawu ethikitheliwe kale ni ale enathikitheliwa ovanene, enaamwakele padamari ewa yadidela okala ororomeleya ofiyedha omakuthulo.
OPWASEDHEGE OVURUWANA DHOXAGIHA
18-19. Dhithu baani nihudherihu, ki dhoxagiha baani noonilihu?
18 Dhithu baani nihudherihu? Yoladdaniha ya mambila ni mbuzi enowoniha wihina ale enna ejhehedhelo yokala ni mukalakala velaboni yavati, enohowela odidela okala ororomeleya wa Yehova okuma peeno ofiyedha mudhidhi wa mahoso manlubale onaddamela. Teto nihoona wi osogolo, Yesu anere watoriha ale enaadidele okala oororomeleya ninga athu oofwanelela wakela “egumi yohimala.” — Mat. 25:46.
19 Teto nihudhera dholaddaniha biili dhinaaxagiha makiristawu othikitheliwa. Va yoladdaniha wodhela anamwali ooxaga ni oolodhowa, Yesu awogiliye atanu yaali athotho. Aliwa yaali mento ni owiwegeredhene, wihina emujhehe namatela mudhidhi bu mudhidhi afuniye ofiya. Mbwenye anamwali oolodhowa kiyaali owiwegeredhene. Bumwahaya, namatela keenyile anamwali ale evolowe wi yajhe mathanga a matelo. Nihiyoya nnohowela okala owiwegeredhene wihina nijheehe mudhidhi Yesu anafuniye odha wihina amarihe makathamiho aatene a elabo yela yabure. Ohiya eyo, yoladdaniha ya talentu Yesu asorihiliye, nihoona wi adhaari ale abiili oororomeleya yalaba ni oviheya ni yaali athotho. Aliwa yahilaba ni oviheya wihina yakwanihedhe efunelo ya nabwiya ewa, bumwahaya aliwa yahirumedhiwa nnabuya ewa. Mbwenye mudhaari ole ale mangonya ahikooddiwa. Nahudhera ddi? Nahudhera wi nohowela odidela wapara mabasa a Yehova nuviheya ofiyedha omakuthulo. Omagomihedho, nihoona wi makiristawu oothikitheliwa enohowela okala mento yegi “ethukuliwe” ni Yesu wihina emwakele padamari ewa odhulu. Makiristawu othikitheliwa eli ethakwithakwive wihina ‘etugumanihiwe’ ni Yesu odhulu. Koddo ya Armajedo yavira, makiristawu ale oothikitheliwa enakale muteliwi a Yesu vamatelo a mwana nimbila. — 2 Tes. 2:1; Ovuhu. 19:9.
20. Dhithu baani Yehova anafuniye wawerela ale enapwasedha ovuruwana dhoxagiha dhaaye?
20 Mudhidhi Yesu anafuniye watoriha athu ohaddamela, mbwenye iyo kannahowela woova. Nadidela okala oororomeleya wa Babihu oodhivela Yehova, oliye anere onivaha “kopolo dhohikala dha masika” wihina nande “wimela txithi vamentoni va Mwaana Muthu.” (2 Kor. 4:7; Luk. 21:36) Naarive akala ejhehedhelo yehu sodhowa odhulu obe okala velaboni yavati, aatene iyo nafuna nimuhagalase Babihu Yehova wodhela opwasedha ovuruwana dhoxagiha dhinafwanyeya mu nladdaniho asorihile Yesu. Teto mwaha wa opama wohinifwanelela wa Yehova, mandina ehu enere ‘olebiwa mulivuruni’ neegumi. — Dan. 12:1; Ovuhu. 3:5.
JHIBO 26 Akala wawerele addibilaga ogerele miyo
a Omusugwe artigu anna musolo “Ddiniyani nnonnihu wodhela makalelo Yehova anafuniye waatoriha athu osogolo?” mu Namasugwera a Maio a 2024.
b Wihina onone dhithu dhimodha, omusugwe artigu anna musolo “Você vai se manter vigilante?” mu A Sentinela a 15 a Março a 2015.
d OTAPULELIWA WA FOTU: Murogola dhaala ali mukiristawu oothikitheliwa anomuhudhiha Bibiliya namwali dhaala anfwanyiliye mmalaleyelo.
