Ebaribari wi anamahara ale 70 kayalivo mudhidhi Yesu awitaga mathanga owubuwela ookwa waye, mbwenye eyo kinatapulela wi yerile ohiya omuhara Yesu obe Yesu kaarumedha wihina ekale nuliye mudhidhi yole wowubuwela okwa waye. Ethu Yesu afuniye yaali okala baahi naarumiwi aye oororomeleya mudhidhi yole.

Makuru aatene, yaali anamahara a Yesu. Vaari va anamahara aye, Yesu aasakunle alobwana owakwana 12 wihina ekale arumiwi aye. (Luk. 6:12-16) Yesu aali oGalileya mudhidhi “nuwawithana arumiwi kumi nabiili” ni “waruma wihina yalaleye Omwene wa Mulugu ni wavulumusa athu.” (Luk. 9:1-6) Nuuvira mudhidhi Yesu agaali oJudeya “wasakula athu 70 ni waruma abiili-abiili.” (Luk. 9:51; 10:1) Eyo enowoniha wihina Yesu ahikanna anamahara owinjhiva mburo dhohiyanahiyana walaleyiwa muthenga dhapama.

Majudewu yathomme okala anamahara Yesu, yowajha mathanga a paskwa. Teto podi wera yowerana eyo vamodha ni emudhi yewa. (Êxo. 12:17-20) Ohalaga mudhidhi vang’ono wihina Yesu akwe, oliye vamodha ni arumiwi aye yahidhowa oJeruzale. Mbwenye Yesu kawithanile anamahara aye aatene yakala oJudeya, oGalileya ni oPereya wihina yaajhe mathanga a paskwa. Eyo enowoniha wihina mudhidhi yole, Yesu afuna akale baahi naarumiwi aye. Bumwahaya oliye adhe awogege ni arumiwi aye 12 egi: “Goojheha vanlubale omujha paskwa ola vamodha ni nyu gihinabajhe woona goyi.” — Luk. 22:15.

Dhahikalawo dhithu dhowinjhiva dhaamuthukulenle Yesu othoma wajha mathanga ale naarumiwi aye baahi. Mohulegela oliye eere okwa ninga: “Nimbila na Mulugu, nnalevelela dhothega mwilaboni.” (Juwa. 1:29) Yesu aakwe oJeruzale yaali luwani waveleliwesa mukutho wa Mulugu. Mathanga a paskwa yowawubusedha amwaana Ezarayeli ethu Yehova aawerenliye wihina awobole Wijipitu. Teto wowawubusedha wihina mukutho wa Yesu wakale munlubale mwaha wi were wawobola athu aatene muuthegani ni muukwani. (1 Kor. 5:7, 8) Okwa wa Yesu oheriha wi arumiwi ale 12 ekale ntxikwa na mulogo wekiristawu. (Efe. 2:20-22) Sotikiniha onona wi Jeruzale oodhulu onna ‘mabwe 12 aaliserse,’ vilebiwe ‘mandina aarumiwi 12 a Nimbila.’ (Ovuhu. 21:10-14) Eyo enowoniha wi arumiwi ale 12 yere okavihera vanlubale wihina efunelo ya Mulugu yakwanele. Bumwahaya enowoneleyamo mwahaya bwaddi Yesu adhe afunege okala naarumiwi aye oororomeleya emahiyu yogomihedha wihina yajha mathanga a paskwa vamuthuponi wowubuwela okwa waye itiliye vasogolova.

Ebaribari wi anamahara ale 70 namodhaya kayali vamathangani vale owubuwela okwa wa Yesu, naarive dhigaali ndo anamahara aatene yaali oororomeleya yere okanna ofuru wojhavo mareeliho enakumelelavo mwaha okwa wa Yesu. Teto anamahara aatene a Yesu yaasakuliwe osogolo ninga makiristawu oothikitheliwa, yere okanna ofuru yokosa epaddi ya nipangano Noomwene Yesu eriliyena naarumiwi aye oororomeleya emahiyu yogomihedha. — Luk. 22:29, 30.