Okale oohagalala wula omujhehaga Yehova
WE onojheha nlabo Yehova anadhiye amarihe makathamiho a mwilaboni ni asaddule dhithu dhaatedhene wi dhikale dhixa? (Ovuhu. 21:1-5) Mwebaribarene we oli ethakwithakwive ojhehaga nlabo nno ofiya! Mbwenye kahi ethu yokweya ojheha nuuvilela wihina Yehova akwanihedhe mpaganyo dhaye, thabwathabwa nafwanyiwaga makathamiho. Najhehaga vanlubale ethu yahinathi wereya, iyo podi okala owukuwene. — Pro. 13:12, nota.
Naarive dhigaali ndo, Yehova anafuna wihina nimujhehege nuuvilela wi anere werana dhithudha mudhidhi wofwanelela. Mwaha bwaddi Yehova agafuna wi iyo nivilele? Enaanikavihere ddi okala ohagalala wula nijheehaga?
MWAHAYA BWADDI YEHOVA AGAFUNA WI NIMUJHEHE?
Bibiliya anihina: ‘Yehova anna ojhehedha wihina uwoniheni opama waye, Oliye anere ovenya wihina uweddeleni thagaraga. Mwaha Yehova, Mulugu owogowa. Oohagalala baale enamujhehedha.’ (Isa. 30:18) Madhu ala anamavuhulela Izayiya yaalebeliwe maJudewu yaali ohiwelela. (Isa. 30:1) Mbwenye vaari va majudewu yahikalavo majudewu amodha yaali ororomeleya, teto madhu ala yowavaha ejhehedhelo aliwa. Adhaari oororomeleya a Yehova peeno podi okanna ejhehedhelo emodhave awilerigi madhu a Izayiya.
Iyo nnohowela ojheeha ni ovilela, mwaha Yehova anojheha nuuvilela. Oliye ohuthoma nlabo anafuniye wamariha makathamiho aamatene a mwilaboni. Yehova anajheha nlabo ni mudhidhiya wifiye. (Mat. 24:36) Mudhidhi yoyo, dhithu dhatedhene Saddana anamwinkedhiye Yehova vamodha na adhaari aye, dhinere wonihiwa wi sowota. Vano Yehova anere omugujhula Saddana vamodha ni aatene enakosa epaddi yaye, mbwenye Yehova ‘anere oneeddela thagaraga iyo.’
Njheehaga nlabo nno ofiya, podi wera Yehova kanamarihe makathamiho enanifwanya, mbwenye oliye anonipaganya wi iyo podi okala ohagalalene wula nijheehaga. Ndala ninga Izayiya awogiliye, enowandeya iyo ohagalala wula nijheehaga wereya ethu yapama. (Isa. 30:18) a Mbwenye dhinandeya aavi? Kabeni noone dhithu nayi dhinanikavihere.
NNANDE AAVI OKALA OHAGALALA WULA NIJHEHAGA?
Wubuwelege dhithu dhapama. Mwene Davidi ahereliwa dhithu dhowinjhiva dhabure mwigumini mwaye. (Sal. 37:35) Naarive dhigaali ndo, oliye oleba egi: ‘Okale omaleyene vamentoni va Yehova ni omujhehege oliye nuuvilela. Kutakaleliwe ni athu enakala ninga dhewa dhinowaweddela pama mwaha werana dhithu dhabure.’ (Sal. 37:7) Davidi oohara yolaga ela ni oopwasedha wubuwela ejhehedhelo yovulusiwa Yehova aampaganyiliye. Teto oliye otamalela dhithu dhatedhene dhapama Yehova amwereliye. (Sal. 40:5) Ni Iyoya nubuwelaga dhithu dhapama Yehova ananereliye mwigumini mwehu, ohiye wubuwelaga dhithu dhabure dhinanipadduwela mwigumini mwehu, nnere wanda omujheha Yehova.
Odidele onvuwiha Yehova. Podi wera Davidi dimulembe Salmo 71, oliye ahiwoga ni Yehova egi: ‘Mbwenye miyo ginerege wujhehani ni ginerege wuvuwihani kadda labo.’ (Sal. 71:14) Davidi aanvuwihe Yehova nimakalelo baani? Oliye eere owoga wodhela Yehova naathu amodha ni eere omwibela jhibo dhonvuwiha Yehova. (Sal. 71:16, 23) Ndala ninga Davidi, iyo podi okala ohagalala wula nimujhehaga Yehova. Iyo nnonvuwiha Yehova wodhela olaleya, naathapanyaga kadda labo ni wodhela wiiba jhibo dhehu dhOmwene. Ononamo aavi nlabo onafuniwe wiiba jhibo si jhibo yOmwene wapwasedha madhu a jhiboya ni wubuwela makalelo enahagalasiwa murima wawo?
Olibihiwege ni addibila. Davidi nuufwanyiwa makathamiho, oliye owoga ni Yehova egi: ‘Mwakavihere adhaari enyu oororomeleya, ginere ojheha ndina nenyu.’ (Sal. 52:9) Iyo podi olibihana ni addibila, ohiya nakala mmutugumanoni obe mmalaleyelo baahi, mbwenye najhaga mudhidhi ni aliwa mburo dhohiyanahiyana. — Rom. 1:11, 12.
Olibihe nroromelo nawo. Salmo 62:5 anihina: ‘Mwakavihere adhaari enyu oororomeleya, ginere ojheha ndina nenyu.’ Sathima vanlubale olibiha ejhehedhelo yehu thabwathabwa akala ninna ojheha muwari mwa yakadhene omakuthulo wa elabo ela yabure. Nnohowela okanna ebaribari wihina mpaganyo dhatedhene dha Yehova dhinere wakwanela naarive ehoweleyaga ojheha muwari mwa mudhidhi wowinjhiva. Iyo podi olibiha ejhehedhelo yehu wodhela wahudhera madhu a Mulugu, ohudhera dhovuhulela ni woona makalelo dhipaddi dhimodha dha Bibiliya dhiniwananiwa ni dhimodha ni ohudhera dhikalelo dha Yehova. (Sal. 1:2, 3) Ohiya eyo nnohowela odhowagave ‘nilobaga muzimu wotxena’ wihina wandana wehu ni Yehova okaleve wooliba, wula nimujhehaga Oliye wakwanihedha mpaganyo waye wonivaha egumi yohimala. — Judasi 20, 21.
Ndala ninga mwene Davidi, ororomele wihina Yehova anowasamalela, anowabarela ni anowawoniha odhivela waye wahinamala aatene yaale enamujheha. (Sal. 33:18, 22) Bumwahaya odidele omujheha Yehova nuuvilela, wodhela opwasedha dhithu dhapama dhinapadduwe mwigumini mwawo, onvuwihaga Yehova, olibihiwaga ni addibila ni olibihaga ejhehedhelo yawo yohagalasa onniwena.
a Madhu owi ‘enamujhehera,’ ni Ebarayiku, podi otapulela “ofuna vanlubale wi ethu epadduwe,” ela enowoniha wihina kahi yabure ofunaga wihina Yehova aamarihe makathamiho ehu.
