1. Yoladdaniha baani enanikavihera wonelamo wi nnomuhowela Yehova wihina aneeddihe?

 KUBUWELA ogaarimenle vaari va kokola. Epaddi yaatene dhihikala dhithu dhowopiha ninga: Anenyama amukokolani owoopiha, analobo enavaliha oredda, mwinga dhowopiha, muliddi dhahinooneya ni mabwe. Were okurumuwa wahakale ni muthu anoholela ni anonne pamadhene mburo dhowopiha ni makalelo owibarela! Elabo ela ya peeno eli ninga kokola yowopiha. Muhudhala dhithu dhowopiha dhinanithusa thabwa-thabwa epaddi yehu yomuzimuni ni wandana wehu ni Yehova. Mbwenye iyo nihikanna muthu apama ananeddiha ali Yehova. Oliye ananeddiha dila yobareleya ni anonikavihera ofiya mburo nnadhowihu, mparayizu elabo yela yavati.

2. Yehova ananeddiha ni makalelo baani?

² Yehova ananeddiha aavi? Oliye anoneddiha thabwa-thabwa wodhela omulabihedha Bibiliya. Teto anowalabihedha athu wihina aneeddihe. Motajhiha Yehova anomulabihedha “mudhaari oororomeleya ni athotho” wihina anivahe yoojha yomuzimuni ni onikavihera werana dhothoma dhapama. (Mat. 24:45) Teto Yehova anowalabihedha alobwana amodha ninga anameeddela mulogo ni anamaholela mulogo wihina aneeddihe. Aliwa enoonilibiha ni enonivaha dhoholela wihina dhinikavihere wawanana makathamiho. Iyo nnomutamalela vanlubale Yehova mwaha oneeddiha pamadhene malabo ala oorusa nnakalihu, omakuthulo wahinafiye. Oholeliwa wula winonikavihera odhowagave nandanaga ni Yehova ni odidela weedda dila enanthukulela wakela egumi ya mukalakala.

3. Dhithu baani nnahudherihu?

³ Naarive nnonaga wi di Yehova ananihoolela, malabo mamodha podi okala yorusa ohara dhoholela nnakelihu munikuruni naye. Thabwa-thabwa akala dhohooleladha dhinadhela wa athu oohilogomana. Mbwenye mwahaya bwaddi egakala yorusa ohara dhoholela? Podi wera yolagaya nakenlihu kenidhivenle obe iyo podi wubuwelaga wi yoholelaya kinoneleyamo pama ni wihina kinadhela wa Yehova. Bu mudhidhi yoyo nnahowelihu othabwa omuroromela  Yehova wi dinaholela nlogo naye ni ohara dhoholela dhaye ethu yapama. Wihina nande olibiha nroromelo nehu wi Yehova dineddiha nlogo naye, ohudhera wula nnere woona ponto tharu: (1) makalelo Yehova eddihiliye nlogo naye kale, (2) makalelo Yehova aneeddihiye nlogo naye peeno (3) mwahaya bwaddi sapama odidela ororomela makalelo Yehova ananeddihiye.

MAKALELO YEHOVA EDDIHILIYE NLOGO NA AMWAANA IZARAYELI

4-5. Ethu baani yoniha wihina Yehova damulabihedha Moyizeji wihina aholele nlogo na amwaana Izarayeli? (Osugwe fotu yavakapani.)

⁴ Yehova ahimuthoma Moyizeji wihina awobole amwana Izarayeli Wijipitu. Teto Yehova ahawooniha pamadhene amwaana Izarayeli wihina oomulabihedha Moyizeji wihina aweddihe. Motajhiha, Yehova oolabihedha murabo ni mutana, vano mahiyu oolabihedha mootho wihina aweddihe. (Êxo. 13:21) Moyizeji oohara murabo ole, nimakalelo yaala oliye wathukulela amwaana Izarayeli Niya Yoofila. Amwaana Izarayeli nuwoona wihina osogolo wewa wahikala niya, teto mundduli mwewa waali anyakoddo oWijipitu aliwa othuwathuwa vanlubale. Teto obajha wubuwela wihina Moyizeji kerilena yothoma yapama mwaha wathukulela Niya Yoofila. Mbwenye Moyizeji kerilena yothoma yabure, mwaha di Yehova afuna wihina nlogo naye ndhowe mburo yole, aamulabihedhaga Moyizeji wihina aakwanihedhe yofuna yaye. (Êxo. 14:2) Teto ele yahinvaha Yehova ofuru wi oonihe kopolo dhaye mwamakalelo ootikiniha. — Êxo. 14:26-28.

⁵ Muwari mwa yaka 40, Moyizeji ahididela okala oororomeleya wodhela ororomela dhoholela dha Yehova wihina aholele nlogo na amwaana Izarayeli mwiddeddereni. a Muwari mwa mudhidhene Yehova ahihiya murabo waye wihina okale vadhulu va musasa wa Moyizeji wihina amwaana Izarayeli yandege woona. (Êxo. 33:7, 9, 10) Yehova oowoga ni Moyizeji wodhela murabo, vano Moyizeji owawaddela dhoholela dhatedhene amwaana Izarayeli. Ndala amwaana Izarayeli yowanda woona pamadhene wihina aali Yehova amulabihedha Moyizeji wihina aweddihe.

6. Amwaana Izarayeli yakala aavi yavahiwaga dhoholela dha Yehova? (Números 14:2, 10, 11)

⁶ Yowukulihaya sowihina, amwaana Izarayeli owinjhiva kayarumedha wihina di Yehova awoga ni aliwa wodhela Moyizeji. (Omwileri Números 14:2, 10, 11.) Dila dhowinjhivadhene, yokodda orumedha wi di Yehova amulabihedha Moyizeji. Mwaha wa yeyo Yehova keenyile wihina amwaana Izarayeli ale oohiwelela evolowe elabo yothomeliwa. — Núm. 14:30.

7. Amwaana Izarayeli amodha yoonihile aavi wi yororomela makalelo Yehova eeddihiye nlogo naye? (Números 14:24) (Osugwe fotu.)

⁷ Mbwenye amwaana Izarayeli, amodhaya yahiwelela dhoholela dha Yehova. Motajhiha, Yehova ahiwoga egi: ‘Kalebe uhoniha efunelo . . . yogiwelela ni murima waye wamutene.’ (Omwileri Números 14:24.) Yehova ahimureeliha Kalebe ofiyedha onvaha epaddi ya elabo aalobiliye elabo yothomeliwa. (Jos. 14:12-14) Nlogo nooharela na amwana Izarayeli nahididela ohara dhoholela dha Yehova. Moyizeji nuukwa Jozuwe okala namaholela a nlogo na amwaana Izarayeli, ‘teto aliwa yomuriha vanlubale egumaye yaatene.’ (Jos. 4:14) Yokumelelavoya sowihina Yehova ahareeliha amwaana Izarayeli ni wathukulela elabo yothomeliwa. — Jos. 21:43, 44.

8. Owogemo makalelo Yehova eddihiye nlogo naye mudhidhi wa mamwene. (Osugwe fotu.)

⁸ Nuuvira yakadhene Yehova wasakula anamatoriha wihina eholelege nlogo naye. Vasogolova mudhidhi wa mamwene, Yehova wasakula anamavuhulela wihina aholelege nlogo naye. Mamwene yaali oororomeleya wa Yehova yowakela dholaga dha anamavuhulela. Motajhiha, mwene Davidi ahirumedha yolaga aavahiwiye  ni namavuhulela Nata. (2 Sam. 12:7, 13; 1 Cró. 17:3, 4) Mwene Jeyozafa ahihara yolaga ya namavuhulela Jaziyeli wihina anone ethu baani ahoweliye wera wihina akavihere ni alibihe nlogo wi ‘yaroromele anamavuhulela a Mulugu,’ (2 Cró. 20:14, 15, 20) Vano mwene Ezekiya ahisayela nikavihero na namavuhulela Izayiya nuusegedheya. (Isa. 37:1-6) Mamwene yaharaga dhoholela dha Yehova, aliwa yoreelihiwa teto nlogo naatene nakala noobareleya. (2 Cró. 20:29, 30; 32:22) Yowoneya pamadhene wihina Yehova oowalabihedha anamavuhulela wihina aholele nlogo naye. Mbwenye naarive dhigaali ndo, mamwene owinjhiva ni nlogo yokoodda wavuruwana anamavuhulela a Yehova. — Jer. 35:12-15.

MAKALELO YEHOVA AHOOLELIYE MAKIRISTAWU NSAKA NOOBAJHA

9. Yehova aamulabihedhe aani wihina aweddihe makiristawu a nsaka noobajha? (Osugwe fotu.)

⁹ Yehova eegeredhile mulogo woobajha weekiristawu yaka ya 33 M.W. Mbwenye Yehova aweddihile aavi makiristawu ala? Yehova omuthoma Yesu wihina akale musolo wa mulogo dhatedhene. (Efe. 5:23) Mbwenye Yesu kawoga ni kadda muthu ethu yahoweliwa werana. Oliye aalabihedha arumiwi ni anamaholela mulogo ooJeruzale wihina aavahe dhoholela makiristawu oobajha. (Dho. 15:1, 2) Ohiya eyo, yahithomiwa anamaholela mulogo wihina eholelege mulogo. — 1 Tes. 5:12; Titu 1:5.

10. (a) Makiristawu oobajha yakala aavi yakelaga dhoholela? (Dhowera Dhaarumiwi 15:30, 31) (b) Mwahaya bwaddi kale athu amodha kayaroromela alobwana Yehova aalabihedhiye wihina aholele nlogo naye? (Osugwe kwaduru “ Mwahaya bwaddi athu amodha kinarumedha weddihiwa ni alobwana Yehova anaalabihedhiye wihina eeddihe nlogo naye?”)

¹⁰ Nerege makiristawu a nsaka noobajha yororomela makalelo Yehova eddihiye nlogo naaye? Hee, owinjhiva wa aliwa yohagalala mwaha ohara dhoholela yakeliwa. Teto ‘yohagalala vanlubale mwaha wa madhu oolibiha yavahiwiwa.’ (Omwileri Dhowera Dhaarumiwi 15:30, 31.) Ki peeno, Yehova anaholela nimakalelo baani nlogo naaye?

MAKALELO YEHOVA ANANEDDIHIYE PEENO

11. Owoge yopadduwa enooniha makalelo Yehova aneeddihiye nlogo naye peeno.

¹¹ Yehova anodhowave eddihaga nlogo naye peeno. Oliye anowerana eyo wodhela omulabihedha Bibiliya ni wodhela mwanaye Yesu ali musolo wa mulogo. Nerege dhihikalawo dhithu dhinanthukulela orumedha wi Yehova anowalabihedhave athu wihina aholele nlogo naye? Hee.  Motajhiha kasugwa ethu epadduwile obajha yaka ya 1870. Charles Russell ni akwaye, yamuhudhera Bibiliya obajha wonelamo wihina yaka ya 1914 yaakale yathima, mwaha si yaka yeela Omwene wa Mulugu wafuniwa obajha othonga. (Dan. 4:25, 26) Wihina aliwa yande wonelamo pamadhene muselu ola, aliwa yohowela ohudhera vanlubale dhovuhulela dha mBibiliyani. Nerege Yehova owakavihera ni owaholela mudhidhi aliwa esanyihaga muselu ndha? Mwebaribarene, owaholela. Ethu yapadduwile wapela elabo yaatene yaka ya 1914 yowoniha wihina Omwene wa Mulugu ohubajha othonga. Yaka yeele, yahambela koddo yoobajha ewaniwe elabo yaatene yavati, vano oredda, oddiginyeya wa elabo ni dala wenjhedhedheya. (Luk. 21:10, 11) Mwebaribarene Yehova ahaalabihedha alobwana ala oororomeleya wihina akavihere nlogo naye.

12-13. Ethu baani yeriwena wihina yegeredhiwe mabasa oolaleya mudhidhi wa koddo yamulimawu yapele elabo yaatene yavati?

¹² Kubuwela ethu yapadduwe mudhidhi wa koddo yamulimawu yapadduwe wapela elabo yaatene. Nuumala ohudhera pamadhene yolebela ya Ovuhulela 17:8, addibila ooSede enlubale wonelamo wihina koddo ele yanabili yawaniwa elabo yaatene yavati kayathukulele koddo ya Armajedo obajha, mbwenye were wathukulela mwana mudhidhi wa murenddele wohakwanela, wahavaha ofuru woolaleya muthenga wOmwene. Vano aliwa werana yothoma yakala ninga kiyoneleyamo, yaali ofugula eskola yomuhudhera Bibiliya yoJileyade Torre de Vigia, Wihina yaxagihe amisiyonariyu wi yapare mabasa oolaleya ni oohudhiha wapela elabo yaatene. Amisiyonariyu owinjhiva yahirumiwa mudhidhi yoole wa koddo. Ohiya eyo, mudhaari ororomeleya ofugula eskola ya Curso do Ministério Teocrático b wihina yaxagihe addibila aatene ammulogoni wi ekale anamalaleya ni anamahudhiha apama. Ni makalelo yala, nlogo na Mulugu ninna wegeredhiwa wihina yande wakwanihedha mabasa manlubale yafuniwa okanna osogolo.

¹³ Nubuwela ethu epadduwile mundduli, nnowanda woona pamadhene wihina Yehova ohoolela nlogo naye mudhidhi yoole worusa. Okuma mudhidhi wa koddo yanabili ewaniwe wapela elabo yaatene yavati, nlogo na Yehova nnowanda wapara mabasa oolaleya yahiharahariwaga vanlubale ninga kale. Mwebaribarene mabasa ala oolaleya enna othabwa wenjhedhedheya wapela elabo yaatene.

14. Mwahaya bwaddi nigahowela ororomela dhoholela dhinadhela nikuru na Yehova ni dha anamaholela mulogo? (Ovuhulela 2:1) (Osugwe fotu.)

¹⁴ Peeno, addibila a Nikuru Nolamulela enna odhowave eharaga dhoholela dha Yesu. Aliwa enowerana eyo wodhela werana dhothoma dhiniwanana ni efunelo ya Yesu. Ohiya eyo, Anameeddela mulogo ni anamaholela mulogo enolabihedhiwa wihina yawaddele addibila ammulogoni dhoholela enakeliwa nNikuru Nolamulela. c Anamaholela mulogo ethikitheliwe omuzimuni eli ‘nlada noojha’ na Yesu. (Omwileri Ovuhulela 2:1.) Ebaribari wi anamaholela aatene kilogomanne ni enoviriganiha. Moyizeji ni Jozuwe yoviriganiha malabo mamodha ni arumiwiya yoviriganiha. (Núm. 20:12; Jos. 9:14, 15; Rom. 3:23) Naarive dhigaali ndo, iyo nnowanda woona pamadhene wihina Yesu anomuholela mudhaari oororomeleya ni anamaholela mulogo. Teto anerege walabihedha alobwana ala “ofiyedha omakuthulo wa elabo.” (Mat. 28:20) Bumwahaya nnohowela ororomela dhoholela Yesu ananivahiye alabihedhaga alobwana ala oororomeleya.

MWAHAYA BWADDI SAPAMA WAROROMELA ALOBWANA YEHOVA ANALABIHEDHIYE WIHINA ANEEDDIHE?

15-16. Ethu baani onahudheriwe ni dhopadduwa dha athu yaahanre dholaga dha Yehova?

¹⁵ Naaharaga dhoholela dha Yehova nnowanda wawoona pamadhene mareelihoya. Motajhiha, Andy ni mwariye Robyn, yahihara yoholela ya mudhaari oororomeleya ni athotho wodhela ojajaliha egumi yewa. (Osugwe nota nuumuhudherana Bibiliya ni ezugu va Mateus 6:22.) Mwaha werana eyo, aliwa yahikanna oneti wolaba ninga avuluntariyu womaga Nyumba dhOmwene. Robyn anowoga egi: “Malabo mamodha nookala mburo wothabwa oyeva ni wahanna kuzinya. Teto gohowela oguliha dhipano dhohiyanahiyana galabihedhimi wihina gitirarina fotu, nde dhaali dhithu dhagidhivela. Miyo gahifiyedha wunla labo gagulihilimi makina aaga ootirarina fotu. Mbwenye ndala ninga Sara, mwadha Abarawu, miyo gahithoma ohisugwa dhithu gahilimi mundduli.” (Ebe. 11:15) Mbwenye ethu baani Andy ni mwariye Robyn ehudheriwa ni yopadduwa yewa? Robyn anowogave egi: “Iyo nahihagalala vanlubale mwaha onona wihina nanvaha Yehova dhaatedhene ninnihuna. Naakaviheraga nikuru na Yehova, nnowanda woona makalelo enaakale egumi mwilaboni exa.” Teto ni mamuneya Andy anowoga egi: “Iyo nnohagalala mwaha onona wihina ninna onvaha Yehova mudhidhi wehu vamodha ni kopolo dhehu.”

¹⁶ Kasugwa yopadduwa emodhaya enoniha wihina  sapama ohara dhoholela dha Yehova. Nuumariha ohudhera oskola, Márcia othoma ohara yolaga aakenliye yolaba ninga piyonera. (Mat. 6:33; Rom. 12:11) Oliye anowoga egi: “Miyo gahivahiwa ofuru wohudhera muwari mwa yaka nayi gahilivile ethu, ohuniverisidadi dhaala. Mbwenye miyo goofuna wawenjhedhedha mabasa aaga gamparelimi Yehova, vano miyo othoma werana kursu ya yaka vang’ono ni wahudhera mabasa yagikavihere wisamalela wula gilabaga ninga piyonera. Ela yaali yothoma yapama gerilimina mwigumini mwaaga. Vano gili piyonera teto mabasa aaga enogivaha mudhidhi wihina gikavihere oBeteli ninga commuter ni omparela Yehova mabasa mamodhaya ooriya.”

17. Mareeliho mamodha nnawakelihu naaharaga dholaga dha Yehova baavi? (Isaías 48:17, 18)

¹⁷ Malabo mamodha nnowakela munikuruni mwa Yehova dhoholela dhinanibarela. Motajhiha, nnowaddeliwa wodhela yowopiha othamagela dhoreela ni werana dhithu dhanthukulele ohawiwelela malamulo a Yehova. Naharaga dholaga ndha, nnowanda woona mwigumini mwehu wihina sapama ohara dhoholela dha Yehova. Teto naharaga dhoholela nda, nnokanna mubuwelo wapama ni nnowarabela makathamiho owinjhiva. (1 Tim. 6:9, 10) Nerena ndo, nnowanda omulabela Yehova ni murimihu waatene! Kawo ethu mwilaboni yaanivahe ohagalala, opwaaseya ni murenddele yahili omulabela Yehova. — Omwileri Isaías 48:17, 18.

18. Mwahaya bwaddi we oli owikomeene wihina odhowegeve oharaga dhoholela dha Yehova?

¹⁸ Mohanganyedha, Yehova anerege walabihedha alobwana a velaboni yavati wihina anivahe dhoholela mudhidhi wa ohoseya winlubale ni mudhidhi wa Onamathonga wa yaka Txikwi. (Sal. 45:16) Iyo nnerege ohara dhoholela nnaakeligihu mudhidhi yoyo, naarive nuubuwelaga werana ethu emodhaya? Enere okala yokweya ohara dhoholela dha Yehova mudhidhi yoyo, nabajha wiwelela ovanene dhoholela ananivahiye. Bumwahaya, nnafuna nikome oharaga dhoholela dha Yehova malabo aamatene. Eyo enovolowelavo wiwelela dholaga dhatedhene ananivahiye, aalabihedhaga alobwana aathomiliye wihina enisamalele. (Isa. 32:1, 2; Ebe. 13:17) Naamuharaga ole ananeddiha nuupama, ali Yehova, iyo podi okanna ebaribari wi anere onibarela wa ethu-sithu eli yowopiha ni nnerege odhowagave nandanaga ni Oliye ni mukalakala mwilaboni exa.