MADHU owi “karo” ni Egerego enalabihedhiwa mu Tradução do Novo Mundo podi wagiwana karo dhohiyana-hiyana. (At. 8:28, 29, 38) Mbwenye enakala ninga karo aagwenle mulobwana ole owEtiyopiya, yaali enlubale opitha karo dhalabihedhiwa okoddoni obe wihina athu yerena jogu dhoothamaga. Kasugwa dhithu dhinanthukulela orumedha eyo.

Mulobwana ole owEtiyopiya aali muthu anna mutholo mumweneni mwa musano owEtiyopiya teto aheedda olenddo woolapa. Oliye aali “nameeddiha malondda munlubale a Kandasi ni musano owEtiyopiya, namasogolela a dhoreela dhaye.” (At. 8:27) Elabo yoSudawu enoniwe peeno ninga Ejipitu yokosa epaddi ya Etiyopiya mudhidhi wa kale. Podi wera mudhidhi eeddaga olenddo waye ahilabihedha karo dhohiyahiyana, mbwenye oliye oohowela olabihedha karo enlubale wihina dhoobo aathukunliye mulenddoni mwaye dhaakwanemo. Mudhidhi wa arumiwi dholabihedhiwa karo dhanna maroda mannayi teto yolabihedhiwa ethu vadhuluva yaabarela ale yagwelamo. Livuru dhaala na referensiya na madhu a mBibiliyani nnawoga wihina karo ninga dhendha dhokanna mburo wihina dhiyemo dhoobo dhowinjhiva, teto athuya yagwelamo yokanna olenddo wapama ni podi wera dholabihedhiwa wihina dheddiwena olenddo woolapa.

Mulobwana ole owEtiyopiya eera wileri mudhidhi Filipi aamwaddamenliye. Yolebela ya Atos munafwanyeya yopadduwaya enihina ‘Filipi othamaga ni waddamela karo ele, nuwindo omwiwa mulobwana ole iilerigi ni ndhu nootama yovuhulela ya Izayiya.’ (At. 8:30) Karo dhalabihedhiwa wihina dheddiwena olenddo woolapa kadhathabwa othamaga. Woona wi karoya kayathamagesa mulobwana ole owEtiyopiya owanda wileri dholebela ni yaheriha wihina Filipi ande waddamela karo ele naarive eeddaga ni moddo.

Mulobwana ole owEtiyopiya ‘omuloba wihina Filipi agwele ni akarati nuliye.’ (At. 8:31) Karo dhalabihedhiwa mudhidhi yole wihina athu yerena jogu dhothamaga, nameddihaya akala owimelene. Mbwenye karo yalabihedhiwa wihina yeriwena olenddo, wokalamo mburo wihina athu abiili ekaratimo.

Mowiwanana ni ndhe nihudherihu va Atos kapitulu 8 ni thalako dhimodha, malivuru ehu enakumihiwa ovanene enowoniha fotu ya mulobwana ole owEtiyopiya agaagwenle karo enlubale, dhohiyana ni ndhe dhing’ono dhalabihedhiwa okoddoni obe wihina dheriwena jogu dhothamaga.