Amodhaya eleliwe dhilabo alobwana enawoniwa ahiyana ninga kinna thima. Motajhiha, nameeddela mulogo dhaala anithaniwa Hans, analaba oBoliviya anowoga egihina: “Alobwana amodha eleliwe murudda winathabwa ovaha thima mubuwelo wowihina ahiyana kinna thima, teto dila dhowinjhivadhene kinaariha ahiyana.” Namaholela mulogo dhaala anakala elabo yoTayiwan, anithaniwa Shengxian, anowoga egi: “Murudda ginakalimi alobwana owinjhiva enubuwela wihina ahiyana kinna oneti wowoga mubuwelo wewa, mulobwana awoga monelo wa muhiyana wodhela muselu bu muselu alobwana akwaye kinamonelamo.” Alobwana amodhaya enowoniha wihina kinaariha ahiyana mwamakalelo oohoneya, motajhiha amodhaya podi owogaga dhithu ninga masika mbwenye dhinatakalela ahiyana.

Sapama onona wihina mulobwana di mulobwana aleliwe murudda bu murudda obe elabo si elabo, podi osaddula mubuwelo waye. Oliye podi ohudhera wihina alobwana ni ahiyana enoligana, teto podi wanda osukuma mubuwelo wowi, alobwana bathima wapitha ahiyana. (Efé. 4:22-24) Oliye anere wanda werana eyo wodhela ohara yotajhiha ya Yehova. Ohudhera wula nnere woona makalelo Yehova anaweddihiye ahiyana, ni makalelo addibila enahoweliwa omutajhiha Yehova wodhela waweddiha ahiyana ni makalelo anamaholela mulogo enahoweliwa wariiha arogola.

YEHOVA ANAWEDDIHA AAVI AHIYANA?

Yehova yotajhiha yapama wodhela makalelo owaweddiha ahiyana, Oliye di baabi ehu ni onowadhivela ahiyana. (João 3:16) Teto arogola oororomeleya ahima oofuneya a Yehova. Vano kabeni noone makalelo Yehova anaadhiveliye ni anaarihiye ahiyana.

Yehova kanna nsakulo ni ahiyana. Yehova aapaddusile alobwana ni ahiyana moligana ni Oliye. (Gén. 1:27) Yehova kaavahile alobwana thotho dhowinjhiva wapitha ahiyana, teto kanathabwa wavaha  thima alobwana wapitha ahiyana. (2 Cró. 19:7) Oliye aapaddusile alobwana ni ahiyana mwamakalelo mamodhave wihina yandege wonelamo ebaribari ya mBibiliyani teto wihina yandege otajhiha dhikalelo dhaye. Yehova anoothabwa ovaha thima nroromelo na alobwana ni na ahiyana, naarive akala ejhehedhelo yewa sowakela egumi yohimala mparayizu elabo yavati obe okala mamwene ni anamakutha odhulu. (2 Ped. 1:1; nota.) Eyo enowoniha wihina Yehova kanna nsakulo ni ahiyana.

Yehova anowavuruwana ahiyana. Yehova anodhiveliwa onoona makalelo eli ahiyana ni dhithu dhinathuwathuwiha. Motajhiha, Oliye ahavuruwana ni ahawakula malobelo a Rakeli ni Ana. (Gén. 30:22; 1 Sam. 1:10, 11, 19, 20) Teto Yehova ahavethela anamaleba Bibiliya wihina elebe dhopadduwa dha alobwana yaavuruwanile ahiyana. Motajhiha Yehova ahimwaddela Abarawu avuruwane ele Sara afuniye owoga. (Gén. 21:12-14) Mwene Davidi ahinvuruwana Abigayili, mwebaribarene Davidi ahoonelamo wihina aali Yehova aamurumile Abigayili wihina awoge nuliye. (1 Sam. 25:32-35) Teto Yesu atajhiha pamadhene dhikalelo dha Yehova ahavuruwana amaye, Mariya. (João 2:3-10) Dhopadduwa ndha dhinowoniha pamadhene wihina Yehova anowavuruwana ahiyana oonihaga wihina Oliye anowariha vanlubale ahiyana.

Yehova anowaroromela ahiyana wihina aliwa enowanda werana ethu-sithu. Yehova ahinona wihina Eva eere wanda osamalela elabo yaatene yavati. (Gén. 1:28) Vamentoni va Yehova Adawu kaathambwe okanna thima ompitha Eva, ohiya eyo Eva aali namakavihera aye. Yehova ahimusakula namavuhulela Debora ni Hulda wihina yavahege yolaga amwaana Ezarayeli, teto eyo yovolowelavo omulaga mwene ni namatoriha. (Juí. 4:4-9; 2 Reis 22:14-20) Peeno Yehova ohukanna ebaribari wihina arogola podi wanda wakwanihedha mutholo bu mutholo enakeliwa munikuruni naye. Arogola ala oororomeleya enolaba ninga anamalaleya, apiyonera ni amisiyonariya. Teto aliwa enowakavihera mabasa oodezenyari, oomaga, oowomihedha Nyumba dhOmwene ni Beteli. Amodhaya enowakavihera mabasa ooBeteli, amodhaya enalaba kambilinya dholapela dhotapulela. Arogola ala eli ninga anyakoddo owinjhiva Yehova analabihedhiye wihina aakwanihedhe efunelo yaye. (Sal. 68:11) Ela enowoniha wihina ahiyana bathima ni enowanda werana ethu-sithu.

NNANDE AAVI OMUTAJHIHA YEHOVA WODHELA MAKALELO OWAWEDDIHA AHIYANA?

Wihina wande onona akala onowaweddiha arogola mwamakalelo Yehova anafuniye onohowela wipendda pamadhene wodhela makalelo awo owubuwela ni owerana dhithudha, mbwenye wihina wande werana eyo onohowela nikavihero. Motajhiha makina a raio-X podi wooniha akala murima wa muthu kunalaba pama. Ni makalelo mamodhave akwihu vamodha ni Bibiliya podi onikavihera wiwoona akala nnowaweddiha ahiyana ndala ninga Yehova anafuniye. Mbwenye onande aavi wakela nikavihero nna?

We podi omukoha mukwawo. (Pro. 18:17) Iyo podi omukoha mukwihu anoniwe ninga muthu apama, ookweya ni owipimelela. Mukwihu oyo oororomeleya podi okala mulobwana obe muhiyana. We podi omukoha: “Onoonamo aavi makalelo ginaweddihimi arogola? Aliwa enowanda woona wihina ginowariha? Gerege ginohowela werana ethu-sithu wihina giwomihedhe makalelo aaga owariha ahiyana?” Vano mukwawo oyo awoga ethu-sithu onahoweliwe owomihedha kusayele makalelo owisinjhihedha, ohiya eyo wawerana masadduwo enahoweleya.

Wahudherege madhu a Mulugu. Makalelo apama oonona akala onowaweddiha arogola ni makalelo apama fuudhela walabihedha madhu a Mulugu wihina wande opendda mubuwelo wawo ni dhowera dhawo. (Heb. 4:12) Namwilerigi Bibiliya nnohudhera dhopadduwa dha alobwana yaweddihile pama ahiyana ni ale yahaweddihile pama. Vano iyo podi oliganiha dhopadduwa dhewa ni makalelo nnaweddihihu ahiyana, ohiya eyo kiyakale yapama olabihedha yolebela wihina okavihere mubuwelo wabure wowihina ahiyana kinna thima. Motajhiha mowiwanana ni 1 Pedro 3:7, mulobwana anohowela omuriha mwariye ‘ninga muhadha wohiliba opweseya.’ b Eyo enatapulela wihina muhiyana kanna thima obe kanna thotho obe kananda werana ethu-sithu ninga mulobwana? Naari kahi yeyo! Waliganihe madhu a murumiwi Peduru ni yolebela ya Gálatas 3:26-29. Yolebela ela enowoniha wihina Yehova ohasakula ahiyana vamodha ni alobwana wihina yathongege ni Yesu odhulu. Naamuhudheraga Bibiliya ni naakohaga  akwihu wodhela makalelo nnaweddihihu ahiyana iyo podi ohudhera makalelo owariha arogolihu.

ANAMAHOLELA MULOGO ENONIHE AAVI WIHINA ENOWARIHA AROGOLA?

Addibila ammulogoni podi ohudhera makalelo owaweddiha arogola ni nriho wodhela ohara yotajhiha ya anamaholela mulogo. Ki vano anamaholela mulogo enande aavi okala yotajhiha yapama? Kabeni noone makalelo ohiyanahiyana aliwa eneriwana eyo.

Anamaholela mulogo enowatamalela arogola. Murumiwi Pawulo ohuhiya yotajhiha yapama wihina anamaholela mulogo eharege. Karta murumiwi aalebenliye mulogo woRoma oliye ahatamalela arogola owinjhiva (Rom. 16:12) Onowanda wubuwela makalelo arogola ala yaliwa oohagalalene nuwiwa karta nna nileriwaga mmulogoni? Ni makalelo mamodhave, anamaholela mulogo enowilibihedha vanlubale wihina yatamalele arogola mwaha wa dhikalelo dhewa dhapama, teto mwaha wa mabasa aatene enampareliwa Yehova. Eyo enowathukulela arogola wonelamo wihina ehikanna thima ni enorihiwa mmulogoni. Madhu oolibiha a namaholela mulogo podi okala ethu aliwa enahoweliwa wiwa wihina edhowegeve emulabelaga Yehova nuroromeleya. — Pro. 15:23.

Anamaholela mulogo enohowela watamalela arogola ni murima wewa watene ni owoga ethuya enathukulela aliwa watamalela. Mwahaya bwaddi eyo sathima? Murogola dhaala anithaniwa Jéssica anowoga egi: “Sohagalasa vanlubale wamwiwaga ddibila awogaga egi: ‘Parabéns’. Mbwenye sapama addibila yawogaga ethuya enatamaleliwa. Motajhiha, aliwa podi omutamalela mayi ananda wamaaliha anaaye mudhidhi wa mutugumano, obe omutamalela murogola anilibihedha vanlubale wihina amudhowele namahudhera aye a Bibiliya wi oone mutugumano.” Anamaholela mulogo yawogaga ethuya enaathukulela omutamalela murogola, arogolaya enowanda wonelamo wihina enowapara mabasa oofuneya, teto bathima mmulogoni.

 Anamaholela mulogo enowavuruwana arogola. Anamaholela mulogo eli owiyeviha enowanda wonelamo wihina kahiyo aliwa yekiwa enanda okumiha mubuwelo wapama malabo aamatene, aliwa enowaloba nikavihero arogola ni enowapwasedha wavuruwana yawogaga. Ni makalelo yala anamaholela mulogo enowalibiha arogola ni enowikavihera annya. Ni makalelo baani? Namaholela mulogo dhaala anithaniwa Geraldo, analaba oBeteli, anowoga egi: “Miyo gihonelamo wihina oloba nikavihero ni moonelo wa arogola winogikavihera miyo wapara pama mabasa aaga, dila dhowinjhiva aliwa binonne wapara pama mabasaya wapitha addibila owinjhiva.” Mmulogoni arogola owinjhiva enolaba ninga apiyonera, mwaha wa yeyo aliwa ehinona dhithu dhowinjhiva wodhela athu a murudda wehu. Namaholela mulogo dhaala anithaniwa Bryan anowoga egi: “Arogolihu podi okavihera vanlubale nikuru na Yehova, bumwahaya nnohowela opurelamo thotho dhewa ni dhikalelo enniwana!”

Namaholela mulogo ali athotho kanalamusa monelo wa arogola. Mwaha wa ddi? Namaholela mulogo dhaala anithaniwa Edward anowoga egi: “Monelo ni thotho dha murogola podi onikavihera wonelamo dhithudha mwamakalelo apama ni dhinonikavihera werana yothoma enariha mubuwelo wa athu amodha.” (Pro. 1:5) Teto naarive akala namaholela mulogo kanaalabihedhe monelo wa murogola, anohowela omutamalela mwaha oliye ovaha monelo waye.

Anamaholela mulogo enowaxagiha arogola. Anamaholela mulogo athotho enoopatha mudhidhi wihina yaxagihe arogola. Motajhiha, aliwa podi waxagiha arogola weddiha mutugumano wa mmalaleyelo ahikalavo ddibila abaddiziwe. Teto aliwa podi waxagiha wanda olabihedha dhipano obe makina enalabihedhiwa dhaamagiwaga ni dhawomihedhiwaga Nyumba dhOmwene. oBeteli, anamasogolela adepartamentu enowaxagiha arogola wihina yande wakwanihedha mutholo dhohiyanahiyana ninga owomihedha dhithu dhohiyana-hiyana, ogula, kontabilidade, onona walabihedha akomputadori ni dhithu dhimodha. Anamaholela mulogo yaxagihaga arogola enowoniha wihina enowaroromela aliwa wi enere wanda wakwanihedha mutholo bu mutholo enakeliwa.

Arogola owinjhiva enolabihedha dhithu ehudheriwa ni anamaholela mulogo wihina yaakaviherena amodha. Motajhiha, arogola amodha enolabihedha dhithu ehudheriwa mudhidhi yaparaga mabasa oomaga Nyumba dhOmwene wihina yakavihere addibila owomihedha nyumba dhewa dhinongeyile mwaha wa ng’ovi. Amodhaya exagihiwe onona wapara mabasa oolaleya elabihedhaga karinyu, enowakavihera arogola owinjhiva onona wapara pamadhene mabasa ala. Ki vano arogola enawona aavi anamaholela mulogo enapatha mudhidhi wihina yaxagihe? Murogola dhaala anithaniwa Jennifer anowoga egi: “Mudhidhi gaakaviheraga mabasa oomaga Nyumba Yomwene namaholela mulogo dhaala ahipatha mudhidhi wihina agixagihe, oliye oopwasedha ogisugwa makalelo gaaparimi mabasaya ni oogitamalela. Gahidhiveliwa vanlubale olaba nuliye mwaha gahonelamo wi oliye oogiroromela ni oovaha thima mabasa aatene gaaparimi.”

MWAHAYA BWADDI SATHIMA WAWEDDIHA AROGOLA NINGA AMUDHI EHU?

Iyo nnowadhivela vanlubale arogolihu ndala ninga Yehova anaadhiveliye! Bumwahaya nnohowela waweddiha ninga amudhi ehu. (1 Tim. 5:1, 2) Iyo nnohagalala vanlubale omulabela Yehova vamodha ni arogolihu, teto aliwa enohagalala mwaha onona wihina iyo nnowadhivela ni eli oobareleyene. Murogola dhaala anithaniwa Vanessa anowoga egi: “Miyo ginomutamalela vanlubale Yehova mwaha okala epaddi ya nikuru naye muli addibila owinjhiva enagilibiha mudhidhi wamutene.” Murogola dhaala anakala elabo yo Tayiwan anowoga egi: “Miyo ginomutamalela vanlubale Yehova vamodha nnikuru naye mwaha wasamalela pama ahiyana ni oriha monelo wehu, eyo enolibiha vanlubale nroromelo naaga teto enogithukulela ovaha thima oneti ginnimina wokala epaddi ya nikuru na Yehova.”

Mwebaribarene Yehova anohagalala vanlubale awonaga addibila yilibihedhaga wihina yaweddiye arogola ni nriho vamodha ni odhivela! (Pro. 27:11) Ddibila dhaala anakala wEskosiya anithaniwa Benjamin ohuwoga egi: “Athu a mwilaboni kinaariha ahiyana, bumwahaya iyo nnafuna wihina muhiyana avolowa mu Nyumbani Yomwene oonelemo wi iyo nili oohiyana.” Mowindala aatene iyo nnafuna nilibihedhe wihina nimutajhihe Yehova ni waweddiha arogolihu oofuneya nuudhivela vamodha ni nriho aliwa enafwaneleliwa. — Rom. 12:10.