1-2. Makathamiho baani oorusa enaafwanya adhaari amodha a Yehova?

 YAPADDUWA ethu yowopiha, egumi yehu podi osadduwa morurumusa. Motajhiha, ddibila dhaala anithaniwa Luis a ahaddeliwa wihina ahikanna oredda wa kanser wahathabwile ononiwa, mediku dhaala omwaddela wihina oliye anna mweri vang’ono akalagawo. Monika ni mamune yowakavihera mabasa owinjhiva oomuzimuni. Mbwenye labo nimodha Monika onona wihina mamune aali namaholela mulogo oowerana dhithu dhonyakavala mooviteya muwari mwa yakadhene. Olivia, murogola dhaala ali muddiye ohoowela ohiya nyumbaye wihina athawe ng’ovi mwaha furakawu aaddamela. Nuhogolowa aafwanyile nyumba yaye egaagujhuwe. Egumi ya athu yala araru yahisadduwa morurumusa. Onofwanyiwaga makathamiho ninga yala? Onofwanyiwaga makathamiho yaasaddunle egumi yawo morurumusa?

² Naarive nimulabelaga Yehova nuuroromeleya, nnofwanyiwa makathamiho ni oredda ninga athu aatene enafwanyiwiwa. Ohiya eyo podi wera nnowiddiwa ni nnoharahariwa mwaha okala Anamoona a Yehova. Ebaribari wihina Yehova kananibarela wa makathamiho aatene, mbwenye Oliye anonipaganya wihina anerege onikavihera. (Isa. 41:10) Nnikavihero naye iyo podi okalave oohagalala ni werana dhothoma dhapama wula nigarive oororomeleya wa Oliye, naarive nifwanyiwaga makathamiho oorusa. Muwari mwa ohudhera wula nnere woona makalelo mannayi Yehova ananikaviheriye naafwanyiwaga makathamiho mwigumini mwehu. Teto nnere woona ethu baani nnahowelihu werana negi nikaviheriwe ni Yehova.

YEHOVA ANERE WUBARELA

3. Ethu baani enakala yorusa werana naafwanyiwaga makathamiho manlubale?

³ Mwahaya bwaddi ekala ethu yorusa? Naafwanyiwaga makathamiho  manlubale, podi okala yorusa wubuwela ni makalelo apama ni werana dhothoma dhapama. Podi wera onosegedheya vanlubale ofiyedha thomela wugwela, obe podi wera nnothabwa othuwathuwa teto podi okalaga ninga oneedda vaari va funga ohandaga woona winayeliwe. Kasugwa makalelo yaali arogola ale abiili esorihiwe mundduli. Olivia anowoga egi: “Nyumba yaga nugujhuliwa ni furakawu ole gahisegedheya vanlubale ni gahisimwela.” Awogaga wodhela ele aamwerenle mamune, Monika anowoga egi: “Miyo gahithabwa wukuuwa, yakala ninga murima waga were olatiwa, yogirusa werana dhithu dhokweya dha kadda labo. Ethu gahajhehedhimi yahigipadduwela.” Ni makalelo baani Yehova anapaganyiye wihina anere onikavihera nasegedheya ni nahikanna yowera?

4. Mowiwanana ni Filipenses 4:6, 7, ethu baani Yehova anapaganyiye onerela?

⁴ Ethu baani Yehova aneriyena. Oliye anonipaganya onivaha ele Bibiliya anithaniye ‘murenddele wa Mulugu.’ (Omwileri Filipenses 4:6, 7.) Murenddele ola — opwaaseya wa mmurimani nnakannihu mwaha okanna wandana wooliba ni Yehova. Murenddele oyo ‘onoopitha mubuwelelo wa muthu’ teto ohukanna kopolo nahinandihu wubuwela. Onookalaga oopwaseyene numala werana nlobelo wa Yehova? Akala eyo enowupadduwelaga we ohunona ethu baani enatapulela ‘murenddele wa Mulugu.’

5. Murenddele wa Mulugu onabarela aavi mubuwelo wehu vamodha ni murima wehu?

⁵ Va Filipenses 4:7, nnowafwanyavo madhu owi murenddele wa Mulugu onere ‘obarela’ obe onere okurumusa ‘murima dhenyu ni yubuwelo yenyu.’ Madhu elabihedhiwe vala owi ‘obarela’ ni egerego yaali madhu yalabihedhiwa yagiwagana anyakoddo yabarela musiwo dha luwani wihina amwiddani enavolowe. Vano athu yakala muwari mwa luwani yabareliwa ni anyakoddo ala yagona oopwaseyene enonaga wihina musiwo dha luwani ele dhili dhobareleyadhene ni anyakoddo. Ni makalelo mamodhave murenddele wa Mulugu wakurumusaga mubuwelo wehu vamodha ni murima wehu nnakala oopwaseyene ni oobareleyene. (Sal. 4:8) Siyeyo yampadduwenle Ana naarive makathamiho aye yahimanle mowaguva oliye ahikanna murenddele. (1 Sam. 1:16-18) Teto nakala oopwaseya, enookweya wubuwela pama ni werana dhothoma dhapama.

6. Ethu baani nnahowelihu werana negi nifwanye murenddele wa Mulugu? (Osugwe fotu.)

⁶ Ethu baani nnahowelihu werana? Wafwanyiwaga makathamiho oorusa ni madhu mamodha wawithane “anyakoddo awo.” Ni makalelo baani? Olobele wa Yehova ofiyedha okanna murenddele waye. (Luc. 11:9; 1 Tes. 5:17) Luís, asorihiwe mundduli anowoga makalelo oliye vamodha ni mwadhiye, Ana, yandiliwa owanana ni muselu yiwaliwa wihina Luís anna malabo mang’ono ookalawo. Oliye anowoga egi:  “Mudhidhi ninga yola enorusa werana yothoma ninga makalelo oosamalela egumi ni dhithu dhimodha. Mbwenye yaali malobelo yanikavihenre okanna murenddele mudhidhi yole.” Luís ni mwadhiye enowoga wihina yoolobela nuuviheya, emulobaga Yehova wihina aavahe murenddele, opwaaseya ni thotho wihina yande werana dhothoma dhapama, teto siyeyo aliwa yandiliwa woona. Bumwahaya akala we onofwanyiwa makathamiho oorusa mwigumini mwawo, odidele olobela. Werana ndo, onere okanna murenddele wa Mulugu onaakurumuse murima wawo ni mubuwelo wawo. — Rom. 12:12.

YEHOVA ANERE WUKURUMUSA

7. Mubuwelo baani nnakannihuna nafwanyiwaga makathamiho oorusa?

⁷ Mwahaya bwaddi ekala ethu yorusa? Naafwanyiwaga makathamiho iyo podi weragana ni wubuwelaga dhithu nahadhihu nerena nahere nahifwanyiwaga makathamiho. Ndala ninga barku anafwanyiwiye nipevo ni otekuma wa niya, iyo podi wonaga wihina ninnofwanyiwa makathamiho ohiyanahiyana mudhidhi mmodhave. Ana, asorihiwe mundduli, anowoga wi mamune nuukwa malabo mamodha akala owukuwene, mbwenye malabo mamodha akala oohagalalene. Oliye anowoga egi: “Malabo mamodha gothabwa wukuuwa ofiyedha wubuwelaga wihina kagafwanelela ofwanyiwa makathamiho yaale, malabo mamodha gootakaleliwa mwaha omuyelela mamunaga muukwani.” Ana iwoona ninga aali yeka mwaha ohanda werana dhithu mamune amwereliye ahinathi okwa. Teto owiwoona ninga ali vaari va niya wula niyaya etekumaga nnipevo ninlubale. Yehova ananikavihera aavi nubuwelaga ni makalelo yala?

8. Mowiwanana ni Isaías 33:6, ethu baani Yehova anapaganyiye onerela?

⁸ Ni makalelo baani Yehova ananikaviheriye? Yehova anonipaganya wihina anere onikurumusa epaddi yomubuweloni ni yomuzimuni. (Omwileri Isaías 33:6.) Motajhiha, niya yathabwaga otekuma barkuya anotukumiwa wula ni wula. Wihina yande ovira vaari va otekuma wa niya, anamweddiha barku owinjhiva enolabihedha dhipano dhinamukavihera barkuya wi anaaberimege. Ni makalelo yala athuya enakala mbarkuni enakala oobareleyene mwaha barkuya kanathabwa oberima, teto enokanna olenddo wapama. Ethu enathabwa otikiniha sowihina dhipano ndha dhinathabwa okavihera barkuya eeddaga. Ni makalelo mamodhave Yehova anere onikurumusa epaddi yomubuweloni ni yomuzimuni nadidelave omulabela Oliye naarive naafwanyiwaga makathamiho oorusa.

9. Dhipano dhehu dhosayelana dhinanikavihere aavi okala ookurumuwene? (Osugwe fotu.)

⁹ Ethu baani nnahowelihu werana? Woonaga wihina onna ofwanyiwa makathamiho epaddi yomubuweloni werena ele onandiwe wihina odhowegeve omulabelaga Yehova. Ebaribari  wihina we podi ohandaga werana dhithu weresiwena kale, mbwenye kudduwale wihina Yehova kanajheha wihina werana dhithu ohunandiwe werana. (Omusugwe Lukaji 21:1-4) Kuhiye osayela mudhidhi wihina werana ohudhera wawo wavayeka ni opendda ndhe onahudheriwe. Mwahaya bwaddi sapama werana eyo? Mwaha wodhela nikuru naye, Yehova anonivaha vidiyu ni malivuru enanikavihera vanlubale onona makalelo oosugwera mubuwelo wehu, naafwanyiwaga makathamiho. Wihina ofwanye muselu onuukavihere, we podi olabihedha dhipano dhosayelana dhiliwo ni ewogelo yawo ninga apilikativo JW Library,^®Índice de Publicações da Torre de Vigia, ni Guia de pesquisa para Testemunhas de Jeová. Monika, asorihiwe mundduli anowoga wihina anolabihedha d hipano dhosayelana oona wihina kananda osugwera mubuwelo waye. Motajhiha oliye oosayela madhu owi. “raiva.” Malabo mamodha oliye oosayela madhu owi “traição” obe “lealdade.” Vano afwanya, oliye oodidela wileri ofiyedha okurumuwa. Oliye anowoga egi: “Gaabajhaga wileri gakalesa owuukuweene, gaalebaga madhu bi madhu yiwanana ni makathamiho yagifwanya mudhidhi yole. Voharela gowileri muselu gafwanyimi, vano vang’ono vang’ono yakala ninga Yehova annogikubarela. Mudhidhi gilerigi, gowonelamo wihina Yehova anowawona makathamiho enagifwanya ni annogikavihera.” Woone nikavihero nna na Yehova, sithu enukavihere okala oopwaseyene wafwanyiwaga makathamiho oorusa. — Sal. 119:143, 144.

YEHOVA ANERE WUKAVIHERA

10. Naafwanyiwaga makathamiho manlubale nnakala aavi?

¹⁰ Mwahaya bwaddi ekala ethu yorusa? Naafwanyiwaga makathamiho manlubale mwigumini mwehu, podi wera malabo mamodha nnoyelela kopolo epaddi yomwiilini ni yomubuweloni. Teto we podi wiwonaga ninga namathamaga iporosile. Wahinathi wiporosa wothamagesa pamadhene, mbwenye vano nuuwiporosa onathamaga otutunyaga. Podi wera enowurusa werana dhithu wandiwe werana wahinathi wiporosa. Obe we podi ohukanna efunelo yowerana dhithu wadhiveliwiwe werana. Ndala ninga Eliyaji, podi wurusaga ovenya ni ofunaga ogona baahi. (1 Reis 19:5-7) Ethu baani Yehova anapaganyiye onerela naafwanyiwaga makathamiho ninga yala?

11. Makalelo mamodhaya Yehova ananikaviheriye baavi? (Salmo 94:18)

¹¹ Ni makalelo baani Yehova ananikaviheriye? Oliye anopaganya wukavihera. (Omwileri Salmo 94:18.) Ndala ninga namathamaga iporosile anahoweliye nikavihero na muthu  mmodhaya wihina ahogolowele weedda, nihiyoya nnohowela nikavihero wihina nidhowegeve nimulabelaga Yehova nuviheya. Bu mudhidhi yoyo Yehova ananipaganyiye egihina: ‘Miyo Yehova, Mulugu awo, ginohiddela moono wawo woojha; Gili ole anuwaddela egi: “Kuwoove. Ginere wukavihera.”’ (Isa. 41:13) Mwene Davidi ahoona nikavihero na Yehova, mudhidhi awanaga ni makathamiho yanfwanya vamodha ni amwiddani aye, oliye owoga ni Yehova egi: ‘Moono wenyu woojha onogikavihera.’ (Sal. 18:35) Mbwenye Yehova ananikavihera ni makalelo baani?

12. Malabo mamodha Yehova anaalabihedhe aani wihina anikaviherena nakala owuukuweene?

¹² Malabo owinjhiva Yehova anaalabihedha athu amodha wihina anikavihere. Motajhiha, mwene Davidi nuyelela kopolo aali mukwaye Jonata aadhile ompaada wihina amulibihe ni amukavihere wihina akale oopwaseyene. (1 Sam. 23:16, 17) Ni makalelo mamodhave Yehova ahimulabihedha Elizewu wihina amukavihere Eliyaji. (1 Reis 19:16, 21; 2 Reis 2:2) Peeno Yehova podi walabihedha amudhihu, akwihu obe anamaholela mulogo wihina enikavihere. Mbwenye naafwanyiwaga makathamiho oorusa ethu nnafunihu fulapelana ni athu amodha, malabo mamodha kannafuna owoga ni muthu, teto eyo kahi yabure. Mbwenye nnande aavi wakela nikavihero na Yehova?

13. Ddiniyani nnahowelihu werana negi naakele nikavihero na Yehova? (Osugwe fotu.)

¹³ Ethu baani nnahowelihu werana? Owanena mubuwelo wofuna okalavo weka. Nakalaga yekihu ethu nnathabwesihu werana fuwapwasedha wawubuwela makathamiho enanifwanya baahi, iyo nubuwelaga ndo, podi onthukulela werana dhothoma dhabure. (Pro. 18:1) Ebaribari wihina malabo mamodha iyo nnohowela mudhidhi wihina nikalevo yekihu, thabwathabwa nafwanyiwaga makathamiho oorusa. Mbwenye naathabwaga okala yekihu muwari mwa mudhidhi wowinjhivene nnere olapelana ni athu Yehova analabihedhiye wihina anikavihere. Bumwahaya naarive yurusaga werana eyo malabo mamodha, orumedhege nikavihero na amudhaawo, akwawo ni na anamaholela mulogo. Wawoonege ninga makalelo Yehova anaalabihedhiye wihina ukavihere. — Pro. 17:17; Isa. 32:1, 2.

YEHOVA ANERE WULIBIHA

14. Dhithu baani dhanithukulele woova?

¹⁴ Mwahaya bwaddi ekala ethu yorusa? Malabo mamodha iyo podi ofwanyiwa makathamiho enanthukulela woova. Bibiliya anowawoga adhaari oororomeleya a Yehova a kale yasegedheyile  ni yaafwanyiwe woova mwaha wa amwiddani ni makathamiho mamodha. (Sal. 18:4; 55:1, 5) Ni makalelo mamodhave iyo podi oharahariwa nakala oskola, omabasani, ni amudhihu obe ni anamathonga. Teto mwaha wa oredda ninnihuna iyo podi woovaga okwa. Mudhidhi ninga yola, iyo podi wiwoonaga ninga nili yekihu ndala ninga mwaana mung’ono. Ki vano Yehova ananikavihera ni makalelo baani nafwanyiwaga makathamiho ninga yala?

15. Salmo 94:19 ananiroromeliha ddi?

¹⁵ Ni makalelo baani Yehova ananikaviheriye? Oliye anontodola ni anonikurumusa. (Omwileri Salmo 94:19.) Yolebela ela ya Salmo podi wuwubusedhaga mwaana mung’ono ahinanda ogona mwaha wa muzongwe a dari ni oojerima. Iyo podi omubuwela baabi a mwaana yola afiyaga okwartu wa mwanaye, agamuthukunle mmadani ofiyedha mwaanaya ogona. Naarive mwaana ole iwaga dari ndhe, babe anomulibiha mwaana ole ni anomukurumusa ofiyedha mwaana ole wonelamo wihina ali oobareyelene. Iyo naafwanyiwaga makathamiho enanthukulela woova, nnomuhowela baabihu oodhulu Yehova wihina anthukule mmadani mwaaye ofiyedha woova wehu ovira. Mbwenye Yehova anantodola ni makalelo baani?

16. Ddiniyani nnahowelihu werana negi nlibihiwe ni Yehova? (Osugwe fotu.)

¹⁶ Ethu baani nnahowelihu werana? Kuhiye ojha mudhidhi ni Yehova, wodhela olobela ni omwileri Bibiliya. (Sal. 77:1, 12-14) Wakanna elemelelo yowerana eyo, wafwanyiwaga makathamiho oorusa, ethu yobajha onafunigiwe werana enakale osayela nikavihero na Yehova. Omwaddelege Yehova dhithu dhatedhene dhinuthukulela woova ni dhothuwathuwiha dhawo, wamala opwasedhe ovuruwana dhithu Yehova anafuniye wuwaddela wodhela omwileri Bibiliya. Ni makalelo yala onere wanda woona olibihiwa onadhela wa Yehova. (Sal. 119:28) Wabajha woova, we podi ofwanya dhithu dhinulibihe wodhela omwileri Bibiliya. Motajhiha, we podi wileri livuru na Jó, Salmos, Provérbios ni madhu a Yesu enafwanyeya va Matewuji kapitulu 6. Wileri dholebela ninga dhendha podi wulibiha wafwanyiwaga makathamiho. Wamwilerigi Bibiliya ni walobelaga, onowanda woona olibihiwa onadhela wa Yehova.

17. Ethu baani nahinanganyedhihu?

¹⁷ Iyo podi ororomelaga wihina Yehova anerege onikavihera mudhidhi watene thabwathabwa naafwanyiwaga makathamiho oorusa mwigumini mwehu, iyo kannadha nikala yekihu. (Sal. 23:4; 94:14) Yehova anonipaganya onibarela, onikurumusa, onlibiha ni onikavihera. Isaías 26:3 anonroromeliha ethu emodhaya wodhela Yehova. Anihina: ‘Munere wabarela yaale enuroromelani ni murima wamutene; Nyu munere wavaha murenddele ohunadha omala, mwaha aliwa enuroromelani nyu baahi.’ Bumwahaya omuroromele Yehova teto werena dhatedhene onandiwe wihina opurelemo nikavihero Yehova anuvahiiye. Werana ndo, onere okala ooliba naarive ofwanyiwaga makathamiho oorusa.