1. Wubuwelaga wodhela Yehova ononamo wi Oliye ali aavi?

 ONOWABIHAGA wubuwela makalelo ali Yehova? Wasugwaga odhulu wula omubuwelaga Yehova, ononamo wi Oliye ali aavi? Ebaribari wi kannanda omoona Yehova, mbwenye Bibiliya onomuwoga Yehova mwamakalelo ohiyanahiyana. Motajhiha, Yehova anowithaniwa ‘nduwa ni yobarela’ teto anowithaniwa ‘mootho wootolosa.’ (Sal. 84:11; Heb. 12:29) Va yoowona dhaala, namavuhulela Ezekiyeli anniyena, ahiwoga wihina Yehova anakala ninga nibwe na safira, mujhila wojerimela ni muzirilimbo. (Eze. 1:26-28) Makalelo Bibiliya anamuwogiye Yehova, podi onitikiniha ofiyedha iyo wiwoonaga ninga kanili ethu.

2. Mwahaya bwaddi podi okala yorusa omwaddamela Yehova?

² Woona wihina kannanda omoona Yehova, podi okala yorusa orumedha wihina Oliye anonidhivela. Athu amodha ehithabwa woona goyi mwigumini mwewa, mwaha wa yeyo aliwa podi wubuwelaga wihina Yehova kanadha aadhivelaga aliwa. Podi wera aliwa enubuwela ndo, mwaha makolo ewa kayadhivela. Yehova anowanda wonelamo makalelo iyo nilihu ni ohunona mwahaya bwaddi malabo mamodha podi okala yorusa orumedha wi enowandeya omwaddamela Oliye. Vano wihina anikavihere, Yehova anomulabihedha Bibiliya wihina anoonihe wi Oliye Mulugu odhivela.

3. Mwahaya bwaddi sathima onona wodhela odhivela wa Yehova?

³ Ekalelo enathabwa omutonya Yehova fudhivela. (1 João 4:8) Bibiliya anowoga wihina Mulugu odhivela, teto budhivela onamuthukulela oliye werana ethu sithu. Odhivela wa Yehova, munlubale ni bwakopolo mwahaya onowakavihera naleya ehinamudhivela. (Mat. 5:44, 45) Ohudhera wula, nnere woona dhithu nnaahudherihu wodhela Yehova vamodha ni odhivela waye. Naathabwaga ohudhera wodhela Mulugu ehu, nnerege othabwa omudhivela.

YEHOVA ANONIDHIVELA VANLUBALE

4. Wubuwelaga wodhela odhivela wa Yehova onakala aavi? (Osugwe fotu.)

⁴ ‘Yehova ohukanna nthebwa vanlubale.’ (Tia. 5:11) MBibiliyani, Yehova anowiliganiha ni mayi oodhivela. (Isa. 66:12, 13) Kamubuwele  mayi anamusamalela pamadhene mwanaye mung’ono. Nuudhivela waatene, anomuthukula mmadani ni anomuwogana ni ndhu nopwaseya ni nokurumusa. Mwanayeya abajha wunla obe oonaga widdela, oliye anowerana dhatedhene anandiye wihina mwanaye akanne ele anahoweliye. Iyo nafwanyiwaga makathamiho, podi okanna ebaribari wi Yehova anonidhivela. Salmista dhaala ahileba egi: ‘Makathamiho nugipinyaminya, nyu muhigitodola ni muhugimaaliha.’ — Sal. 94:19.

5. Odhivela ohunamala wa Yehova onatapulela ddi mwigumini mwawo?

⁵ Yehova dororomeleya. (Sal. 103:8) Oliye kanaselela onidhivela, naarive niviriganihaga. Nlogo naamwaana Izarayeli noomukula Yehova dila dhowinjhivadhene. Naarive dhigaali ndo, amwana Izarayeli yathwaruwa, Yehova owawoniha odhivela waye ohunamala wodhela wasoriha madhu ala: ‘Mwaha wihina oli athima vamentoni vaaga, we ohurihiwa teto miyo ginowudhivela.’ (Isa. 43:4, 5) Teto Yehova kasaddunle odhivela waye. Iyo podi omuroromela malabo aamatene. Naarive nigerilena yothega enlubale, Yehova kananinyanyala. Nathwaruwa ni namuhogolowela, nnere woona wihina Oliye anoodidela onidhivela. Oliye anonipaganya ‘onilevelela ni murima wamutene.’ (Isa. 55:7) Bibiliya anowoga wihina makalelo oolevelela a Yehova onakala ninga ‘mudhidhi wa murenddele onadhela [wa Oliye].’ — Atos 3:19.

6. Zacarias 2:8 ananihudhiha ddi wodhela Yehova?

⁶ Omwileri Zacarias 2:8. Yehova anoniliganiha ni ninto naye. Ninto epaddi ya mwiili wehu ehinarusa othegeleya ni eli yathima vanlubale. Mowindala, enakala ninga Yehova anawoga egi: “Ole anuwereleni ethu yabure, nyu muli nlogo naaga, anathegela ethu eli yathima wa miyo.” Mwaha wa odhivela Yehova anniyena ni iyo, Oliye anowonelamo mubuwelo wehu ni anofuna vanlubale onibarela. Iyo noonaga goyi, nuliyeya anowoona goyi. Bumwahaya, iyo podi olobela wa Oliye ni ebaribari yaatene negi: ‘Mugibarele ninga mento enyu.’ — Sal. 17:8.

7. Mwahaya bwaddi nigahowela olibiha nroromelo nehu mwaha onona wi Yehova anonidhivela?

⁷ Yehova anafuna wi we ohanganyedhege wi oliye anowuudhivela vanlubale. Mbwenye Oliye ohunona wi mwaha wa dhithu dhimodha dhupadduwele kale, we podi wanganyedhaga akala Oliye anowuudhivela obe naari. Teto podi wera onofwanyiwa makathamiho oorusa ovanene enuthukulela ohuroromela wihina Yehova anowuudhivela. Ki vano, ethu baani enuukavihere, olibiha nroromelo nawo wihina Yehova anowuudhivela? Ethu  enukavihere fuudhela wubuwela makalelo Yehova anonihiye odhivela waye ni Yesu ni makiristawu teto ni aatene iyo.

YEHOVA ANONIHA AAVI ODHIVELA WAYE?

8. Mwahaya bwaddi Yesu ahikanna ebaribari wi Yehova anomudhivela?

⁸ Muwari mwa yaka matxikwi ni matxikwi, Yehova akala vamodha ni mwanaye Yesu odhulu ni yowonihana odhivela winlubale enniwana mmodha ni mukwaye. Yehova ahoniha pamadhene wihina oomudhivela Yesu, ninga anawogela, Matewuji 17:5. Yehova ahafune eere owoga egi: “Oyo di muthu ginamurumedhimi.” Mbwenye Yehova afuna wihina nnone wi oomudhivela vanlubale mwanaye Yesu. Bumwahaya Yehova ahiwoga egi: “Yesu di ‘mwanaye, anamudhiveliye’.” Yehova oomuriyana Yesu, mwaha wihina oliye ahiivahedha wi avelele egumaye. (Efé. 1:7) Yesu kanganyedha wihina Ababe yomudhivela vanlubale. Oliye ahikanna ebaribari wihina Yehova omudhivela ofiyedha oliye owoga dila dhowinjhivadhene egi Ababa enogidhivela. — João 3:35; 10:17; 17:24.

9. Madhu baani enoniha wihina Yehova anowadhivela makiristawu oothikitheliwa omuzimuni? owogemo. (Romanos 5:5)

⁹ Yehova onowawoniha odhivela makiristawu othikitheliwa omuzimuni. (Omwileri Romanos 5:5.) Wapwasedhe madhu enihina ‘ohuheliwa.’ Disiyonariyu dhaala a madhu a mBibiliyani anihina madhu ala enakala ninga “wumba wa manjhe enanikunela.” Yoladdaniha ela enowoniha pamadhene makalelo Yehova anaadhiveliye makiristawu oothikitheliwa omuzimuni! Teto naaliwaya ehinona wi ‘Yehova anowadhivela.’ (Judas 1) Murumiwi Juwawu ahiwoga makalelo aaliye wodhela oleba egi: ‘Kasugwani makalelo enidhivele Ababa, ofiyedha iyo withaniwaga ahima a Mulugu!’ (1 João 3:1) Mbwenye nerege Yehova anaadhivela makiristawu oothikitheliwa omuzimuni baahi? Naari, Yehova ohoniha wi ononidhivela iyo aatene.

10. Ethu baani enlubale Yehova eriliyena enoniha wihina Yehova anowuudhivela?

¹⁰ Ethu baani enlubale Yehova eriliyena enoniha wihina anonidhivela? Ethu enlubale enoniha wi Yehova anonidhivela si yowobola! (João 3:16; Rom. 5:8) Yehova ohumuleva mwanaye athabwesiye omudhivela wihina anikwele iyo aatene wi dhothega dhehu dhileveleliwe ni nandane nuuliye. (1 João 4:10) Naapenddaga muthengo Yehova ni Yesu eliviliwa wihina enoobole, nnowanda wonelamo makalelo aliwa enanidhiveliwa kadda muthu wa iyo. (Gál. 2:20) Yowobola kiliviwe mwaha wa wogowa wa Yehova baahi. Mbwenye mwaha wa odhivela. Yehova ohoniha odhivela waye anniyena ni iyo wodhela omuleva ole athabwiye omudhivela, Yesu. Yehova ahenya wihina mwanaye onihiwe goyi ni anikwele.

11. Ethu baani nnahudherihu ni Jeremias 31:3?

¹¹ Ninga nonilihu, Yehova onosayela makalelo owooniha wihina ononidhivela. (Omwileri Jeremias 31:3.) Oliye anithanile mwaha wihina anonidhivela. (Omusugwe Deuteronómio 7:7, 8.) Kaavo ethu newene muthu anaande onimwalaniha ni odhivela Yehova anniyena ni iyo. (Rom. 8:38, 39) Odhivela Yehova anniyena ni we onuthukulela okala aavi? Kabeni nipendde yolebela ya Salmo 23. Va yolebela ela nnere woona makalelo Davidi aaliye mwaha Yehova omooniha odhivela ni makalelo amusamaleliye. Teto nnere woona makalelo odhivela wa Yehova onapathiwa egumi yehu

WUBUWELAGA ODHIVELA YEHOVA ANNIYENA NI WE ONAKALA AAVI?

12. Watapulele aavi mogwaddela yolebela ya Salmo 23?

¹² Omwileri Salmo 23:1-6. Va Salmo 23, Davidi ohoniha wihina oororomela wi Yehova eere omusamalela. Oliye ahiwoga wodhela wandana woliba anniyena ni Yehova ni ahimwithana Yehova Namakukula aye. Davidi aali oobareleyene mwaha onona wihina di Yehova anamuholela, teto oomuroromela ni murimaye waatene. Davidi ahinona wihina Yehova erege omoniha odhivela waye malabo aamatene. Ethu yamuthukulela Davidi omuroromela Yehova yaali ddi?

13. Mwahaya bwaddi Davidi ahikanna ebaribari wihina Yehova eere omusamalela?

 ¹³ ‘Kinagihalele ethu.’ Davidi oowonelamo wihina Yehova oomusamalela malabo aamatene, mwaha wihina kavo ethu yamuhalela, ohiya eyo Davidi ahinona wihina Yehova aali mukwaye ni oomurumedha vamentoni vaye. Bumwahaya Davidi ahinona wihina naarive epadduwe ethu-sithu osogolo, Yehova erege omusamalela. Nroromelo anniyena nowihina Yehova anomudhivela, naali nooliba opitha ethu-sithu. Teto naali nroromelo nenna namuthukulela Davidi okanna murenddele ni ohagalala ni ele anniyena. — Sal. 16:11.

14. Yehova ananisamalela ni makalelo baani?

¹⁴ Yehova anonisamalela ni odhivela, thabwathabwa nafwanyiwaga makathamiho mwigumini mwehu. Claire, a analaba oBeteli okwaranya yaka 20, ahukuuwa vanlubale nuunona wihina amudhaaye yofwanyiwa makathamiho ohiyanahiyana. Ababe yahikanna oredda wa torombozi teto ddibile mmodha ahitxosiwa. Ohiya eyo, mwaha ohikanna korowa amudhaaye yahiyelela nyumba yakaliwa. Yehova oonihile aavi wi oowasamalela? Claire anowoga egi: “Yehova aherana dhatedhe wihina emudhaaga ekanne ele yahoweliwa kadda labo. Dila dhowinjhivadhene Yehova oonivaha okwaranya ele nubuwelihu. Malabo mamodha, ginowubuwela makalelo Yehova agisamaleliye mudhidhi ngaali ni amudhaga. Miyo kaginadha giddiwala mudhidhi ole. Teto eyo enogikavihera odhowagave gimulabelaga Yehova nuuhagalala, gafwanyiwa makathamiho mamodha mwigumini mwaga.”

15. Mwahaya bwaddi Davidi adhe ahogolowelege okala oohagalala? (Osugwe fotu.)

¹⁵ ‘Oliye anogilibiha.’ Malabo mamodha, Davidi akala owukuwene mwaha wa makathamiho yanfwanya. (Sal. 18:4-6) Naarive dhigaali ndo, makalelo Yehova amusamaleliye ni amonihiye  odhivela, womukavihera oliye ohogolowela ohagalala. Yakala ninga Yehova eere omuthukulela Davidi mburo wa ‘mpodda mukiiti ni omukwakwasela mburo dhoridhela.’ Nimakalelo yala Davidi oohogolowela okanna kopolo yodhowagave amulabelaga Yehova nuuhagalala. — Sal. 18:28-32.

16. Odhivela wa Yehova onuhagalasa aavi?

¹⁶ Peeno iyo nnowanda wagonjhiha makathamiho mwaha wa nikavihero na Yehova. Ninga anawogela Bibiliya, ‘Mwaha odhivela wa Yehova kanitolosiwe.’ (Lam. 3:22; Col. 1:11). Kasugwa yotajhiha ya Raquel. Oliye ahisimwela ni ahukuuwa vanlubale, mamune numusukuma oliye vamodha ni Yehova mudhidhi wa mutipa wa Koronaviru. Ethu baani Yehova eriliye wihina amukavihere? Oliye anowoga egi: “Yehova aherana dhatedhene wihina miyo gonelemo wi oliye anogidhivela. Oliye aheriha wihina akwaaga owinjhiva ejhege mudhidhi wowinjhiva ni miyo, egivahege yoojha, eginviyarelege mensaje ni dholebela wihina egilibihe, yooteya ni miyo ni yoogubusedha wihina Yehova anna ogisamalela. Miyo ginomutamalela vanlubale Yehova malabo aamatene, mwaha ogivaha emudhi enlubale enonne wooniha odhivela.”

17. Mwahaya bwaddi Davidi ‘koova ethu-sithu?’

¹⁷ ‘Kaginoove ethu, Mwaha nyu muri ni miyo.’ Davidi ahikanna amwiddani owinjhiva akopolo, mwaha wa yeyo, malabo owinjhiva egumaye yakala vang’ovini. Naarive dhigaali ndo, oliye akala oobareleyene ni koova ethu mwaha wa odhivela wa Yehova. Oliye owonelamo wihina Yehova aali nuliye mudhidhi wamutene, teto eyo yomuhagalasa. Bumwahaya oliye ahifiyedha wiiba egi: ‘[Yehova] oogikavihera ogonjhiha woova waaga.’ (Sal. 34:4) Malabo mamodha, Davidi owoova vanlubale, mbwenye oliye owanda ogonjhiha woova wula mwaha wihina ahikanna ebaribari wi Yehova oomudhivela.

18. Onona wihina Yehova anonidhivela onanilibiha aavi nafwanyiwaga woova?

¹⁸ Onona wi Yehova anonidhivela, winanivaha aavi kopolo nafwanyiwaga mudhidhi worusa? Piyonera dhaala anithaniwa Susi, anowoga makalelo oliye vamodha ni mamune yaaliwa mwaniwa nuuwipa. Oliye anowoga egi: “Ethu yabure ni yowukuliha yupadduwela mwigumini mwawo enowuthukulela woovaga ni wubuwelaga wihina osogolo dhinere wupadduwela dhithu dhimodha dhabure. Mbwenye odhivela wa Yehova wahinikurumusa ni wahinithukulela okala oobareleyene.” Raquel, awogiwe mundduli anowoga egi: “Emahiyu dhaala gahithabwa wukuuwa, miyo othuwathuwa ofiyedha woovaga. Emahiyu yele gahunla ofiyedha olobela wa Yehova ni ndhu nootama. Mudhidhi yoole, gahonelamo wi Yehova ahikurumusa murima waaga ndala ninga  mayi aneriye ni mwanaye mung’ono, nuwindo miyo ogonelavo. Miyo kaginadha giddiwala nlabo nne.” Namaholela mulogo dhaala anithaniwa Tasos, ahimala yaka nayi agaafugeliwe mukambura mwaha okoodda odhowa okoddoni. Ki vano oliye andile woona aavi wi Yehova omudhivela ni omusamalela? Oliye anowoga egi: “Yehova ahigivaha dhithu dhatedhene gahowelimi okunamo, eyo yahigithukulela othabwaga omuroromela Oliye. Naarive okala mukambura yahili ethu yokweya, Yehova ahigivaha ohagalala wodhela muzimu waye wotxena. Eyo yahigikavihera woonelamo wihina gaathabwaga omuroromela Yehova, gowanda woona wihina Oliye onogidhivela. Vano miyo othoma olaba ninga piyonero a mudhidhi wamutene ngali mukambura.”

OMWADDAMELE MULUGU AWO OODHIVELA

19. (a) Onona wihina Yehova anonidhivela enapatha aavi malobelo ehu? (b) Yolebela baani ya mBibiliyani enawoga wodhela odhivela wa Yehova enathabwa odahinya murima wawo? (Osugwe kwaduru enna musolo “ Dholebela dhinanikavihera woona makalelo Yehova ananidhiveliye.”)

¹⁹ Dhopadduwa dhaatedhene nonilihu muwari mwa yohudhera ela, dhinowoniha wihina Yehova, ‘Mulugu oodhivela’ teto Oliye ali ni iyo! (2 Cor. 13:11) Oliye anomuthuwathuwela kadda muthu wa iyo. Teto iyo podi okanna ebaribari wihina ‘odhivela waye wahinamala [ohunirijha iyo aatene].’ (Sal. 32:10) Naapendaga makalelo Yehova ananonihiye odhivela waye, nnerege othabwa omwaddamela ni Oliye anere okala muthu eebaribari mwigumini mwehu. Iyo podi olobela wa Yehova mudhidhi bu mudhidhi nimwaddelaga wi nnohowela vanlubale odhivela waye. Teto iyo podi omwaddela Yehova dhithu dhaatedhene dhinanithuwathuwiha. Nikannaga ebaribari wihina Oliye anowonelamo dhinanipadduwela ni anofuna vanlubale onikavihera. — Sal. 145:18, 19.

20. Odhivela wa Yehova onanaddameliha aavi ni Oliye?

²⁰ Ndala ninga nnaddamelihu mootho mudhidhi wooriidha wihina noothe, nnafuna nerena emodhave wodhela waddamela odhivela wa Yehova. Naarive odhivela wa Yehova wigaali winlubale, odhivela wula winoolibiha. Bumwahaya onfugulele Yehova murima wawo wihina wande woona odhivela waye mwigumini mwawo. Vano nabajha woona odhivela wa Yehova, aatene iyo podi owoga neegi: ‘Ginomudhivela vanlubale Yehova!’ — Sal. 116:1.