Musolo ole, naahihudhera ethu yathima enaapatha athu aatene veelaboni yavati ni angeroya: Eli otxeniha ndina na Yehova. Muselu wa onamathonga wa Yehova, obe neere, akala makalelo oothonga a Yehova bapama, enokosa epaddi ya otxenihiwa wa ndina na Yehova. Nimakalelo mamodhave, muselu wa ororomeleya wa athu avelaboni yavati onookosa epaddi ya otxenihiwa wa ndina na Yehova.

Mwahaya bwaddi malabo ala nigathabwaga ovaha thima otxenihiwa wa ndina na Yehova? Nnere woona dhithu thaaru.

Ethu yobajha, Saddana ohutakaliha ndina na Yehova, obe emuthu yaye, mmunddani mwa Ideni. Nikoho Saddana amwereliye Adawu ni Eva, yakala ninga Yehova aali Mulugu anrima ni aapandda malamlo oorusa. Dhatedhene Saddana aawogiliye dhahithabwa ohiyana ni ndhe Yehova aawogiliye. Yakala ninga oliye amwithana Yehova, muliba woota. Oliye ahitakaliha ndina, obe emuthu ya Yehova. Ni makalelo yala oliye okala ‘Ddiyabo’ enatapulela ‘muliba woota.’ (João 8:44) Mwaha Eva orumedha dhowota dha Saddana, oliye ahihiya omwiwelela Mulugu ni ahihiya okavihera onamathonga waye. (Gén. 3:1-6) Ofiyedha peeno Saddna anna ovuwiha dhowota wodhela emuthu ya Yehova. Podi wera athu owinjhiva kinamwiwelela Yehova mwaha wa dhowoota dhendha. Bumwahaya wa nlogo na Yehova, winkedhiwa wa ndina noowela na Yehoa yowota enlubale. Mwaha makathamiho amatene edhanle mwilaboni peeno ekumelenle mwaha yowota yeela.

Yanabiili, Yehova ohuthoma wakihedha ni otxeniha ndina naye, wihina akavihere dhopaddusa dhaye dhatedhene. Eyo ethu yathima vanlubale vamentoni va Yehova. Bumwahaya oliye anowoga egi: ‘Mohanganyedha miyo ginere weeliha ndina naaga ninlubale.’ (Eze. 36:23) Teto Yesu ohuwoga ethu yathima, adhaari oororomeleya a Yehova enahoweliwa owogaga yalobelaga. Oliye ohuwoga egi: “Ndina nenyu ntxenihiwe.” (Mat. 6:9) Bibiliya anowoga dila dhowinjhivadhene mwahaya bwaddi ekala ethu yathima othithimiha ndina na Yehova. Kasugwa dhotajhiha ndha: ‘Mmuthithimihe Yehova mwaha wa ndina naye.’ (1 Cró. 16:29; Sal. 96:8) ‘Mmwibele mwaha wa ndina naye noothithimihiwa.’ (Sal. 66:2) ‘Gineere wuthithimihani nimukalakala.’ (Sal. 86:12) Mudhidhi Yesu agaali velaboni yavati nlabo dhaala agaali otempulu oJeruzale ahiwoga egi: ‘Babani muthithimihe ndina nenyu.’ Nuwindo Yehova mwinyene, odhulu, omwakula egi: ‘Miyo gihithithimiha ni ginere othithimiha.’ — João 12:28. a

Yanathaaru, efunelo ya Yehova eneerege wiwanana ni ndina naye, obe emuthu yaye. Kabiha wubuwela: Enaapadduwe ddi wehiwa winlubale wavira, dhavira yaka txikwi Yesu athongaga? Neerege eneere okalawo angero obe athu yahinaafunege otxeniha ndina na Yehova? Wihina nande wakula nikoho nna, kabeni nubuwele dhithu ndhe biili dhinakosa epaddi ya otxenihiwa wa ndina na Yehova,  dhili: ororomeleya wa athu ni onamathonga wa Mulugu. Neerege dhavira yaka txikwi, eneerege ohoweleya athu veelaboni yavati woniha wihina boororomeleya vamentoni va Yehova? Naari. Mwaha mudhidhi yoyo athu aatene eneerege egamanle wehiwa, enaakale oologomana ni eneere wakela egumi yohimala. Mudhidhi oyo wafiya, eneere okalawo athu yahinaafunege okavihera onamathonga wa Mulugu? Naari. Mwaha athu aatene, odhulu ni elabo yavati, eneere okala owiwanana ni eneere okanna ebaribari wihina makalelo a Yehova othonga bapama ni bowogowa. Ki ndina na Yehova nnerege odhogave nikalaga ethu yathima wa nlogo naye?

Dhavira yaka txikwi athu aatene eneere onona ebaribari wodhela Yehova, teto ndina naye nnere otxenihiwa mwadhatedhene. Mbwenye ndina na Yehova, nnerege odhowagave nikalaga ethu yathima wa adhaari atene a Yehova oodhulu ni aveelaboni yavati. Aliwa eneere omoona Yehova eraganave dhithu dhotikiniha. Kabiha wubuwelela: Yesu ahogoloselela Omwene ababe, Yehova aneere okala ‘dhatedhene mwa aatene.’ (1 Cor. 15:28) Vasogolova, athu aatene avelaboni yavati eneere okanna ‘ofuru ni nthithimiho na aana a Mulugu.’ (Rom. 8:21) Omakuthulo Yehova aneere wakwaneliha efunelo yaye enlubale, eli watugumana athu ni angero ninga emudhi enlubale. — Efé. 1:10.

Dithu dhatedhene ndha dhapadduwa, emudhi yateene ya Yehova odhulu ni elabo yavati enaakale aavi? Mohanganyedha aatene eneere okanna efunelo yinlubale yomuthithimiha Yehova. Salmista Davidi ahivetheliwa waleba madhu ala: ‘Yehova Mulugu avuwihiwe . . . Ndina naye nothithimihiwa nivuwihiwe nimukalakala.’ (Sal. 72:18, 19) Malabo amatene nnerege ohudhera dhthu dhixa dhinafuna onithukulelaga iyo omuthithimihaga Yehova ni mukalakala.

Ndina na Yehova nnowoniha emuthu yaye. Ndina nna, nnonubusedha odhivela waye. (1 João 4:8) Iyo kannadha nidduwala wihina Yehova anipaddusile mwaha woodhivela waye, teto ohunivaha mwanaye ninga mukutho wowobola mwaha wodhivela waye ni Oliye anoothonga mwamakalelo owogowa ni oodhivela. Nnerege odhowave noonaga odhivela Yehova anniyena ni dhopaddusa dhaye, omwibela ni onvuwiha nimukalakala. Malabo amatene nnerege okanna dhithu dhinanithukulelege ofunaga omwaddamela Yehova, omwibela jhibo, onvuwiha ni othithimiha ndina naye nimukalakala. — Sal. 73:28.