1. We onodhiveliwa ohudhera dhovuhulela dha mBibiliyani?

 MUZOMBWE dhaala anithaniwa Ben anawoga egi: “Ohudhera dhovuhulela winoogidhivela vanlubale.” Niweya onoonamo ndo? Onoonamo wi ohudhera dhovuhulela kahi ethu yokweya? Obe onoonamo wi ohudhera dhovuhulela winoogweliha thomela. Mbwenye wabajha wonelamo mwahaya bwaddi Yehova adhe enyege dhovuhulela ndha olebiwa mBibiliyani, podi wera onere osaddula moonelo wawo.

2. Ohudhera wula, nnaasuze ddi?

² Ohudhera wula, nnere woona mwahaya bwaddi nigahowela odhowagave nihudheraga dhovuhulela dha mBibiliyani ni makalelo apama oohudhera dhovuhuleladha. Ohiya eyo, nnere ohudhera dhovuhulela biili dhinafwanyeya livuru na Daniyeli ni woona makalelo dhovuhulela ndha dhinafuniiwa onikavihera ovanene.

3. Ethu baani nnahowelihu werana neegi noonelemo dhovuhulela dha mBibiliyani?

³ Akala nnofuna woonelamo dhovuhulela dha mBibiliyani, nnere ohowela nikavihero na athu amodha. Kubuwela yopadduwa ela. Wubuwele waredhelaga murudda wahinafiyegiwewo, mbwenye oli ni mukwawo anonne pama muruddaya. Oliye ohunona pamadhene vego vilinyu ni kadda dila winathukuleliiwa. Mohanganyedha, okanna mukwawo ninga yoola anonne mburo dhatedhene wineere wukavihera vanlubale! Nimakalelo mamodhave, Yehova ali ninga mukwihu ole. Mwebaribareene Yehova ohunona pamadhene mudhidhi nilihu ni ethu enafuna opadduwa osogolo. Bumwahaya neegi ninone pamadhene dhovuhulela nnohowela okala athu owiyeviha ni oloba nikavihero naye.— Dan. 2:28; 2 Ped. 1:19, 20.

4. Mwahaya bwaddi Yehova adhe enyege olebiwa dhovuhulela mBibiliyani? (Jeremias 29:11) (Osugwe fotu.)

 ⁴ Ndala ninga abaabi enaafunana opama aniwa, Yehova anafuna wihina anaaye ekanne osogolo wapama. (Omwileri Jeremias 29:11.) Mbwenye mohiyana ni abaabi, Yehova ohunona pamadhene dhithu dhinaapadduwe osogolo. Teto oliye kanoota. Bumwahaya Yehova adhe enyege olebiwa dhovuhulela mBibiliyani. Nimakalelo yala, nnowanda onona dhithu dhinafuna opadduwa osogolo. (Isa. 46:10) Mwebaribareene dhovuhulela ndha nvaho wa Yehova. Mbwenye nnande aavi okanna ebaribari wihina dhovuhulela dha mBibiliyani dhineere wakwanela?

5. Azombwe, enahudhera ddi ni yopadduwa ya Max?

⁵ Oskola, azombwe ehu yapeliwe ni athu ehinamuriha Bibiliya. Dhithu dhinawogiwa ni dhineeriwana podi wathukulela azombwe eli makiristawu wambela wanganyedha ebaribari. Kasugwa epadduwile ni ddibila dhaala anithaniwa Max. Oliye anowoga egi: “Ngaali muzombwe gowanganyedha akala dhithu yagihudhiha makolo aaga dhaali ebaribari obe akala Bibiliya aali madhu a Mulugu.” Ethu baani makolo a Max yeriliwana? Max onowogave egi: “Aliwa yahipwaseya, mbwenye gahinona wi vati va murima aliwa yahithuwathuwa.” Makolo a Max yahawakula makoho amatene anniyena wodhela Bibiliya. Max aherana epaddi yaye. Oliye anowogave: “Miyo gahihudhera dhovuhulela dha mBibiliyani. Miyo osanyiha dhovuhulela dhimodha ni othapanya naathu amodha wodhela ndhe gifwanyilimi.” Yokumelelavoya? Max anowogave egi: “Numala, miyo kaganganyedha wihina Bibiliya madhu a Mulugu!”

6. Onere ddi wabajha wanganyedha ebaribari, ki mwahaya bwaddi?

⁶ Akala ndala ninga Max, onowanganyedha akala dhinawoga Bibiliya ebaribari, kukubanye. Mbwenye onohowela werana ethu-sithu, mwaha wanganyedha winakala ninga mukwita. Nahikala pasope, mukwita podi ononga ethu yathima. Wihina nande ovenyihamo “mukwita”, obe neere, wanganyedha wanonge nroromelo naawo, onohowela wikoha: ‘Ginorumedha wi ndhe Bibiliya anawogiye wodhela osogolo ebaribari?’ Akala we onowanganyedha, onohowela ohudhera dhovuhulela dha mBibiliyani dhakwanenle. Ki onande aavi werana eyo?

7. Ethu baani yamukavihere Daniyeli ohudhera dhovuhulela dha mBibiliyani? (Daniel 12:10) (Osugwe fotu.)

⁷ Daniyeli ohunihiyedha yotajhiha yapama wodhela makalelo oohudhera dhovuhulela. Daniyeli ahudhera dhovuhulela ni efunelo yapama, efunelo yaye yaali onona ebaribari. Daniyeli aali owiyeviha, oliye ahinona wihina Yehova eere omukavihera wonelamo dhovuhulela, ahere akanna wandana wooliba ni Oliye ni adidela omwiwelela. (Dan. 2:27, 28; omwileri Daniel 12:10.) Daniyeli ahoniha wi aali muthu owiyeviha, mwaha ahiroromela nikavihero na Yehova. (Dan. 2:18) Oliye oopwasedha osanyiha dhipaddi dha Bibiliya dhaliwo mudhidhi yole. (Jer. 25:11, 12; Dan. 9:2) Iyo, nnande aavi omutajhiha Daniyeli?

8. Mwahaya bwaddi athu amodha kinarumedha dhovuhulela dha mBibiliyani, ki ethu baani nnahowelihu werana?

 ⁸ Okanne efunelo yapama. Ohudherege ni efunelo yofuna onona ebaribari. We onahudhera dhovuhulela wihina onone ebaribari? Akala siyeyo Yehova aneere wukavihera. (João 4:23, 24; 14:16, 17) Mbwenye athu amodhaya enamuhudhera Bibiliya ni efunelo yabure. Motajhiha athu amodha enamuhudhera Bibiliya wihina yonihe wi Bibiliya kanahudhiha ebaribari. Athu ninga yala enowubuwela wi, akala Bibiliya kahiyo madhu a Mulugu kinahoweleya ohara ndhe dhinawogiye. Teto podi othoma werana ele enafuniiwa. Bumwahaya enohoweleya omuhudhera Bibiliya ni efunelo yapama. Ohiya eyo, ekalelo baani nnafunihu okanna neegi noonelemo dhovuhulela dha mBibiliyani?

9. Ekalelo baani nnahowelihu okanna neegi noonelemo dhovuhulela dha mBibiliyani? Owogemo.

⁹ Okale owiyeviha. Yehova anakavihera ale eli owiyeviha. (Tia. 4:6) Bumwahaya nnohowela olobela wihina nande wonelamo dhovuhulela dha mBibiliyani. Teto nnohowela okala owiyeviha wihina nrumedhe nikavihero na mudhaari oororomeleya ni athotho, mwaha di mudhaari yola Yehova anamulabihedhiye wihina anivahe yojha mudhidhi wofwanelela. (Luc. 12:42) Yehova Mulugu owegeredheya. Eyo enowoneleyamo mwaha wi oliye analabihedha nikuuru nimodha baahi wihina anikavihere wonelamo ebaribari ya mBibiliyani. — 1 Cor. 14:33; Efé. 4:4-6.

10. Nnahudheravo ddi ni yopadduwa ya Esther?

¹⁰ Ohudhere ni opwaaseya. Osakule yovuhulela enuuthukula murima, nuwindo osanyihe. Siyeyo murogola dhaala anithaniwa Esther eriliyena. Oliye afuna anone dhovuhulela dhinawoga wodhela odha wa Mesiya. Esther anawoga egi: “Nganna yaka 15 goofuna okanna ebaribari wihina dhovuhulela dhinawoga wodhela Mesiya, dhalebiwe yakadhene mundduli Yesu ahinabaliwe. Bumwahaya miyo obajha osanyiha muselu ole. Nuwileri rolu dhifwanyiwe o Mar Morto, miyo woonelamo wi rolu ndhe dhalebiwe mudhidhi wakale Yesu ahinabaliwe. Ela yoowoniha wihina dhovuhulela ndha dhivetheliwe ni Mulugu. Ebaribari wi gohowela wileri muselu ndhe dila dhowinjhivadhene wihina gande woonelamo. Mbwenye vano, kaginanganyedha wihina ndhe anawoga Bibiliya sibaribari.” Nuuhudhera nupwaseya dhovuhulela dha mBibiliyani, Esther ahihagalala mwaha woona wihina wilibihedha waye kawaali webeweene.

11. Mwahaya bwaddi ekala yathima iyo nannya wonelamo wihina ndhe anawoga Bibiliya sebaribari?

¹¹ Noonaga wihina dhovuhulela dhowinjhiva dhihakwanela, iyo nnomuroromela vanlubale Yehova ni dhoholela ananivahiye. Ohiya eyo, dhovuhulela dha mBibiliyani dhinonikavihera wubuwelaga ejhehedhelo yehu naarive nifwanyiwaga makathamiho ovanene. Vano, kabeni nihudhere dhovuhulela biili dhinafwanyeya livuru na Daniyeli, dhinaakwanela ovanene. Wonelamo dhovuhulela ndha wineere onikavihera werana dhothoma dhapama.

12. Manyalo a ‘mujhila ni ologo’ enatapulela ddi? (Daniel 2:41-43)

¹² Omwileri Daniel 2:41-43. Yoroha Daniyeli amutapuleliye mwene Nabukodonozori, manyalo a ekwamuthuya yaali a ‘mujhila ootaganyihiwa ni ologo.’ Naliganiha yovuhulela ela ni dhimodha dhinafwanyeya livuru na Daniel ni Apocalipse, nnowonelamo wihina manyalo a ekwamuthu enatapulela Estadu Unidu ni Grã-Bretanha. Malogo ala menddi enalaba vamodha ninga Potensiya Mundiyale. Wodhela Potensiya Mundiyale ela, Daniyeli ahiwoga wihina omweneya weere okala ‘wovaadda mudhidhi mmodhave wohivaadda.’ Mwahaya bwaddi Daniyeli adhe erege omwene oyo weere okala wohivaadda? Mwaha ‘athu a omwene yoyo kayiwananege.’ b

13. Dhithu baani dhathima nnahudherihu ni yovuhulela ela?

¹³ Iyo podi ohudhera dhithu dhathima ni ekwamuthu Daniyeli atapuleliye, thabwathabwa ni manyalo a ekwamuthu ele. Yobajha, nnohudhera wi Potensiya Mundiyale Anglo-Americana, anowoniha kopolo dhaye mwamakalelo ohiyanahiyana. Motajhiha, Estadu Unidu ni Grã-Bretanha dhakosa epaddi ya dhilabo dhagonjhihile koddo yobajha ni koddo yanabiili yapele elabo yaatene. Mbwenye, potensiya ela enna oyelela kopolo ni enerege odhowave eyelelaga kopolo mwaha athuya kiniwanana ni kinawiwelela anamathonga. Ethu emodhaya nnahudherihu, sowihina potensiya ela enaakale yogomihedha othonga, Omwene wa Mulugu ohunathi ofiya wihina ogujhule onamathonga waatene. Motajhiha, dhilabo dhimodha dhinoxixa ogwela vamburoni va potensiya Anglo-Americana. Mbwenye aliwa kinande, mwaha wi potensiya ela sogomihedha ni enaagujhuliwe baahi ni Omwene wa Mulugu, onaliganihiwa ni nibwe nnagujhule manyalo a ekwamuthu ela eli Potensiya Mundiyale Anglo-Americana. — Dan. 2:34, 35, 44, 45.

14. Nimakalelo baani woonelamo yovuhulela wodhela manyalo a mujhila etaganyihiwe ni ologo, winaanikaviheriwa werana dhothoma dhapama?

¹⁴ We onorumedha wihina yovuhulela ya manyalo a mujhila etaganyihiwe ni ologo, sebaribari ni enna wakwanela? Akala we onorumedha wihina eyo ebaribari, eneere woneya wodhela dhothoma dhawo. We kunaathamagelege dhoreela mwaha wi ohunona wi elabo ela eneere ogujhuliwa mohulegela. (Luc. 12:16-21; 1 João 2:15-17) Wonelamo yovuhulela ela, winere wukavihera ovaha thima mabasa oolaleya ni oohudhiha. (Mat. 6:33; 28:18-20) Wamala ohudhera yovuhulela ela, we podi wikoha: ‘Dhothoma ginerimina mwigumini mwaaga dhinowoniha wi ginorumedha wi Omwene wa Mulugu onere ogujhula onamathonga waatene velaboni yavati?’

15. Peeno, ‘mwene oonorti’ ni ‘mwene oosuli baani’? (Daniel 11:40)

¹⁵ Omwileri Daniel 11:40. Kapitulu 11 a Daniyeli, enowawoga amwene abiili enawanela onamathonga. Naliganiha yovuhulela ela ni dhimodha dhinafwanyeya mBibiliyani, nnowonelamo wi ‘mwene oonorti’ di Rusiya ni dhilabo dhiniwananiyena. Vano ‘mwene oosuli’ di Potensiya Mundiyale Anglo-Americana. c

16. ‘Mwene oonorti’ aneddiha aavi nlogo na Mulugu?

¹⁶ Nlogo na Mulugu nnakala elabo enathongiwa ni mwene ‘mwene oonorti’ enna oharahariwa. Addibilihu amodha ehukuthiwa ofiyedha  ovokedhiwa mukambura mwaha wa nroromelo neewa. Mbwenye ohiya wakwerebeyiha, oharahariwa wula winna olibiha nroromelo naaddibilihu. Mwaha wa ddi? Mwaha aliwa ehinona wi oharahariwa wula winna wakwaneliha yovuhulela ya Daniyeli. d (Dan. 11:41) Onona eyo podi onikavihera ni iyoya olibiha nroromelo nehu ni okalave oororomeleya wa Yehova.

17. Makathamiho baani enaafwanya addibila enakala elabo enathongiwa ni mwene oosuli?

¹⁷ Kale ‘mwene oosuli,’ ahiharahara nlogo na Mulugu. Motajhiha, okuma yaka ya 1900 ofiyedha 1950, addibila owinjhiva yaahivokedhiwa mukambura ni aniwa yahithamagihiwa oskola mwaha ohivolosiha mpulitikani. Mbwenye peeno, ‘mwene oosuli’ onowalabihedha makalelo mamodha wihina akwerebehihe nroromelo na nlogo na Mulugu. Motajhiha, mudhidhi athu yeragana kampanya wihina yavotari, mukiristawu ahikala pasope podi obajha okanna efunelo yokala epaddi ya partidu emodha. Ebaribari wihina mukiristawu ola kanaavotari, mbwenye mmurimani mwaaye ohusakula  partidu yaye. Eyo enatapulela wihina neegi nihikale epaddi ya elabo nnohowela osugwera pama mubuwelo wehu! — João 15:18, 19; 18:36.

18. Nnakala aavi namonaga ‘mwene oonorti’ ni ‘mwene oosuli’ erofwinyanaga? (Osugwe fotu.)

¹⁸ Ale yahinarumedha dhovuhulela dha mBibiliyani, podi othabwa othuwathuwa yamonaga ‘mwene oonorti’ ni ‘mwene oosuli’ erofwinyanaga. (Dan. 11:40; nota.) Mamwene ala ehikanna futhi dhinna kopolo yogujhulana elabo yatene yela yavati. Mbwenye iyo nihinona wi Yehova kanenye aliwa werana eyo. (Isa. 45:18) Teto iyo kannathuwathuwa mwaha wa dhithu dhinafuna opadduwa osogolo. Ohiya eyo orofwinyana wula wa ‘mwene oonorti’ ni ‘mwene oosuli’ winolibiha nroromelo nehu. Mwebaribarene orofwinyana wula winowoniha wi nili omakuthulo wa elabo ela.

19. Ethu baani nihinafunihu odduwala wodhela dhovuhulela dha mBibiliyani?

¹⁹ Iyo kannonne makalelo dhovuhulela dhimodha dha mBibiliyani dhinafuniiwa wakwanela. Ni namavuhulelaya Daniyeli kaanda wonelamo dhovuhulela dhimodha alembiye. (Dan. 12:8, 9) Ohunona makalelo dhovuhulela dhimodha dhinafuniiwa wakwanela, kinatapulela wi dhovuhuleladha kadhinakwanele. Iyo podi ororomela wihina Yehova aneere onikavihera wonelamo ndhe nnahowelihu onona mudhidhi wofwanelela, ndala ninga eeriliyena kale. — Amós 3:7.

20. Dhovuhulela baani dhohagalasa nnajhehedhihu wakwanela mohulegela, ki ethu baani nnafunihu odidela weragana?

²⁰ Ovuwihiwa wa ‘murenddele ni obareleya’ wineere weriwana. (1 Tes. 5:3) Vasogolova anamathonga a elabo ela eneere orugunuwela ni ogujhula dhigereja dhowoota. (Apo. 17:16, 17) Yindo aliwa eneere orijha nlogo na Mulugu. (Eze. 38:18, 19) Dhopadduwa ndha, dhineere otatamula koddo ya Armajedo. (Apo. 16:14, 16) Iyo nihikanna ebaribari wihina dhithu ndha dhineere wakwanela mohilegela. Njhehaga ndho opadduwa, nidhowegeve nimutamalelaga baabihu oodhulu wodhela opwasedha ohudhera dhovuhulela dha mBibiliyani ni wakavihera amodha werana emodhave.