• “Yakala ninga mamunaga eere okuma mba.”

• “Giwoona ninga muhiyana ootakala ni ahinna thima.”

• “Miyo kaganda owoga muselu ola ni athu amodhaya. Gawanana meeka.”

• “Yakala ninga Yehova kanagipwatha.”

Madhu ala enowoniha wihina ahiyana enowoona goyi amamuniwa yamonaga pornografiya. Vano akala oliye anomoona pornografiya muwari mwa mweeri obe yakadhene, mwadhiye podi obajha ohumuroromelaga. Eli ninga anawoga muhiyana dhaala ooteliwa, “Miyo gowikohesa, munyamulobwana baani agitenle? Ehikalawo ethu emodha anavitiye?”

Musolo ola wegeredhiwe wihina wakavihere ahiyana eteliwe ni alobwana enamoona pornografiya. a Nnere wawona malagano amBibiliyani enaatodole ahiyana eteliwe. Malagano ayo enowoniha wihina ahiyana eteliwe ehikanna thima vamentoni va Yehova, teto eneere wakavihera ahiyana eteliwe, okanna murenddele ni wandana wohuthikeya ni Yehova. b

Ebaribari wihina we kunahowela osugwa dhego dhatedhene anerana mamuno, mbwenye dhihikalawo dhithu onandiwe werana wihina okanne murenddele. Kasugwa dhotajhiha ngasi-ngasi.

Kuwivahe nibili. Muhiyana ooteliwa podi wubuwelaga wihina mamune anamoona pornografiya, mwaha wi oliye ohumwerela ethu yabure. Daniela c anawoga egi: “Miyo gahithabwa otakaleliwa vanlubale ni gahikoya ntxiga. Mbwenye gahonelamo wihina gere wenjhedhedha muladduya.” Alice ubuwela wi kathambwe owoma wihina mamune anfunege oliyene baahi. Oliye owikoha, “Mwahaya bwaddi mamunaga agaasugwa ahiyana amodha ohiya ogisugwa miyo?”

Akala we onubuwela ndo, onone wihina Yehova kanuwoona ninga muthu anaatota makathamihoya. Tiago 1:14 anihina: ‘Mbwenye, kadda muthu aneehiwa ni munigwa wa mmurima mwaaye.’ (Rom. 14:12; Fil. 2:12) Ohiya wuvaha nibili, Yehova anovaha thima wilibihedha wawo. — 2 Crónicas 16:9.

Teto sapama onona wihina akala mamuno anomoona pornografiya, eyo kinatapulela wihina we  kuthambwe owoma. Mespesiyalista enahudhera muselu ola wa pornografiya, enowoga wihina pornografiya anowunnuwiha munigwa obe ethakwithakwi yowawerana mararuwo, muhiyana di muhiyana ahinandiye wakwanihedha.

Kuthabwege othuwathuwa. Catherine anowoga egi, mburo waatene wakalesiye amubuwela mamune amoonaga pornografiya baahi. Frances anowoga egi: “Miyo ginoothuwathuwa gahinona mburo wili mamunaga, ginovireliwa nlabo nantero ngali oothuwathuwene.” Ahiyana amodhaya enowoga wi enokanna manyazo yakala ni addibila obe arogola enonne wodhela emanya ya mamuniwa. Amodhaya enawoga wihina enakala suthukumwee, mwaha enakala ninga kaavo ananda wawonelamo makathamiho enaafwanya.

Kahi yabure wubuwela ni makalelo yala, mbwenye kahi yapama mudhidhi waamutene wubuwelaga wodhela museluyoyo, mwaha eyo podi othabwa wuthuwathuwiha. Ohiya eyo, odidele olibiha wandana wawo ni Yehova, mwaha werana ndo, kunathabwege othuwathuwa. — Sal. 62:2; Efé. 6:10.

Ethu enukavihere, fuwileri ni opendda dhopadduwa dha mBibiliyani dha ahiyana yaafwanyiwe makathamiho ookala othuwathuwene, mbwenye yaatodoliwe mwaha olobela wa Yehova. Ebaribari wihina Yehova kaamarinhe makathamiho ewa aatene, mbwenye Oliye ahavaha murenddele yahoweliwa. Motajhiha, ‘Ana ahithabwa wukuuwa’ mwaha wa dhithu dhampadduwela. Mbwenye naarive dhigaali ndo, Ana nuumala werana nlobelo navati vamurima, ahikanna murenddele naarive ahinonaga makalelo Yehova afuniye wakula nlobelo naaye.  — 1 Sam. 1:10, 12, 18; 2 Cor. 1:3, 4.

Bumwahaya waalobe nikavihero anamaholela mulogo, mwaha aliwa eli ninga ‘nikungu nothawelawo nafwanyiwaga nipevo nowopiha.’ (Isa. 32:2, nota.) Anamaholela mulogo podi omusayela murogola, enonniwa wihina anere wukavihera ofwanya murenddele.  — Pro. 17:17.

Ehikalawo ethu onandiiwe werana, wihina omukavihere mamuno ohiya emanya yoomoona pornografiya? Podi wera! Bibiliya anowoga wihina nafunaga omariha muladdu worusa obe omugonjhiha mwiddani akopolo, sapama okala ‘abiili opitha muthu mmodha.’ (Ecl. 4:9-12) Dhosayela dhinowoniha wihina malabo owinjhivene, mulobwana ni muhiyana yilibiheraga wihina egonjhihe elemelelo obe emanya yoomoona pornografiya, enere wanda ogonjhiha ni ohogolowela ororomelana mmodha ni mukwaye.

Ebaribari wihina mamuno anere wanda, akala oliye anofuna ohiya emanya eyo yoomoona  pornografiya. Motajhiha, oliye onolobela ni murima waye waatene wa Yehova amulobaga wihina anvahe kopolo? Oliye ohusayela nikavihero nanamaholela mulogo? (2 Cor. 4:7; Tia. 5:14, 15) Mamuno anosayela makalelo oolapelana ni pornografiya? Motajhiha, oliye onolabihedha telefoni obe komputadori ni manddile arabelaga woona dhithu dhaamuthukulele omothela mu yoweha? (Pro. 27:12) Oliye anorumedha nikavihero naawo ni anowuwaddela ethu-sithu enapadduwa? Akala oliye anowerana dhithu ndha, we podi omukavihera.

Nimakalelo baani? Kasugwa yotajhiha ela. Ethan mamune Felicia, ahikanna elemelelo yoomoona pornografiya obajha ehimene. Felicia onomuhiya Ethan ootapuwene wihina athapanye nuliye wodhela muselu ola, akanna munigwa obe ethakwithakwi yoomoona pornografiya. Ethan anowoga egi: “Miyo kaginamukuwa ethu mwaraga, nuudhivela oliye anogikavihera osukuma yoweha ela ni anogikohesa makalelo dhithudha dhinageddeliwa. Oliye anogikavihera okanna manddile gamulabihedhaga interneti.” Ebaribari wihina kahi ethu yokweya Felicia omoona mamune awanagana emanya yoomoona pornografiya. Mbwenye oliye onowoga egi: “Otakaleliwa ni okoya ntxiga kunaamukavihere mamunaga ohiya emanya ela. Malabo amatene nnathapanyedhihu yoweha yaye, oliye onokanna efunelo yogikavihera wagonjhiha makathamiho aaga oothuwathuwa.”

Othapanya ni makalelo yaala, podi omukavihera mulobwana anamoona pornografiya wanda omuhiya ni muhiyana wanda ohogolowela omuroromela mamune. Mwebaribarene akala mulobwana anorumedha othapanya ni mwadhiye wodhela dhoviriganiha dhaaye, ni okala ororomeleya ni mwadhiye, amwaddelaga mburo winadhowiye aavenyagavo ni anadhowiye werawo, enere okala yokweya mwadhiye omuroromela. Mwaha oliye onoonona wihina mamune kanamukuwa ethu.

Onoonamo wihina we podi omukavihera mamuno ni makalelo yaala? Akala siyeyo, nyu podi ohudhera vamodha musolo ola! Mwamala muthapanyedhe wodhela ndhe muhudherinyu. Mwahudheraga musolo ola, yoluba ya mamuno ekale wilibihedha wihina ahiye emanya yoomoona pornografiya, wihina we ohogolowele omuroromela. Ohiya oliye otakaleliwa wodhela muselu munafuninyu othapanyedha, oliye anohowela wonelamo makalelo emanyaye enuupathiwa. Vano epaddi yawo mwahudheraga musolo ola, ekale omukavihera mamuno ohiya emanya yoomoona pornografiya wihina obajhe omuroromela. Sathima nyu aabilene onona ethu baani enamuthukulela muthu okanna ethakwithakwi yoomoona pornografiya ni makalelo munafuninyu omariha muladduya. d

 Woona wihina othapanya onafuniwe okanna ni mamuno wineere wuthukulelani okangana, nyu podi omwithana namaholela mulogo munamuroromelinyu wihina ukavihereni. Mbwenye kuddiwale wihina naarive mamuno agahiyile emanya ela yoomoona pornografiya, podi ovira mudhidhi wowinjhivene wihina ohogolowele omuroromela. Naarive dhigaali ndo, kuselele. Woona wihina matelo enyu enna owomela vang’ono vang’ono, kuyelele ejhehedho. Nuuvilela, mudhidhi waviraga matelo enyu podi ohogolowela okala ooliba.  — Ecl. 7:8; 1 Cor. 13:4.

Ki mamuno ahogolowela omoona pornografiya, eyo enatapulela wihina oliye kathwaruwile obe kanna maneera? Naari kahi yeyo, ebaribariya sowihina akala mamuno ohukanna emanya yoomoona pornografiya, podi weera anerege owanana emanya ela egumaye yaatene. Naarive dhigavinre yaka dhowinjhivadhene oliye ahimoonile pornografiya, oliye podi okanna ethakwithakwi yoomoona pornografiya. Wihina eyo yahipadduwe, oliye anere ohowela weragana ethu-sithu wihina ibarele. Oliye anere ohowela weragana eyo, naarive ubuwelaga wihina ohugonjhiha emanya ela. (Pro. 28:14; Mat. 5:29; 1 Cor. 10:12) Oliye aneere ohowela osaddula makalelo aye owubuwela ni ohudhera ‘widda ele eli yabure’ — enavolowelavo emanya yoomoona pornografiya ni dhimanya dhimodha dhonyakavala ninga okeha. (Efé. 4:23; Sal. 97:10; Rom. 12:9) Mamuno, anowilibihedha wihina ahiye dhimanya dhendha? Oliye erana eyo, podi wera anere wanda ogonjhiha ni mukalakala. e

Kivano akala mamuno kanafunawene ohiya omoona pornografiya, onere ddi? Podi wera onere ohiya omuroromela mamuno ni onere otakaleliwa, mbwenye, ohiye muladduya mmadani mwa Yehova. Werana yeyo onere okanna murenddele. (1 Ped. 5:7) Odhowegeve omwaddamelaga Yehova wodhela ohudhera, opendda ni olobela. Okanne ebaribari wihina werana dhithu ndha Yehova anere wuwaddamela. Ninga munawogela Isaías 57:15, Yehova anakala ‘naale ekwerebeye ni enna muzimu wowiyeviha.’ Yehova anafuna wihina we ohogolowele okanna ohagalala. Odidele okala mukiristawu apama wodhela werana ndhe dhinamuhagalasa Yehova, osayele nikavihero nanamaholela mulogo ni kuyelele ejhehedhelo wihina nlabo nimodha mamuno anere wawerana masadduwo enahoweleya. — Rom. 2:4; 2 Ped. 3:9.