1. Ninga munawogela Hebreus 12:1, ethu baani nnahowelihu wera neegi nifiye omakuthulo wa othamaga wehu?

 BIBILIYA analiganiha egumi ya makiristawu ni ya anamathamaga. Anamathamaga enande ofiya omakuthulo eneere wakela egumi yohimala. (2 Tim. 4:7, 8) Bumwahaya nnohowela odhowagave neragana ndhe nnandihu wihina nidhowegeve nthamagaga. Thabwathabwa vano nilihu neena wihina nifiye omakuthulo wa othamaga wehu. Murumiwi Pawulo ahanda omariha othamaga waye, teto oliye ohuwoga ethu enaanikavihere werana emodhave. Murumiwi Pawulo ohuwoga egi: ‘Nirule dhithu dhatedhene dhonyemela . . . nthamage nuuvilela dila ntonyihedhiwihu.’ — Omwileri Hebreus 12:1.

2. Orula ‘dhithu dhatedhene dhonyemela’ winatapulela ddi?

² Murumiwi Pawulo nuwoga wihina nirule dhithu dhatedhene dhinaninyemela, nerege oliye afuna awoge wi mukiristawu kanahowela othukula ethu-sithu yoonyemela? Naari! Ohiya eyo, oliye afuna awoge wihina mukiristawu onohowela orula ethusithu yoonyemela ahinahoweliye. Dhithu dhonyemela ndha nahinahowelihu podi onikwerebeyiha ni onigomiha. Bumwahaya, akala nnofuna odhowagave nthamagaga ni ovilela, nnohowela wipendda akala kanthukunle ethu-sithu yonyemela nahinahowelihu, voharela nirule mowaguva. Mbwenye ohukalawo mutholo mmodhaya nnahowelihu othukula, mwaha nahiya yakalege ninga neere ohiya othamagawa. (2 Tim. 2:5) Mbwenye mutholo baani nnahowelihu othukula?

3. (a) Mowiwanana ni Gálatas 6:5, dhithu baani nnahowelihu othukula? (b) Ethu baani nnafunihu ohudhera, ki mwahaya bwaddi?

³ Omwileri Gálatas 6:5. Murumiwi Pawulo ohuwoga ethu  nnahowelihu othukula. Oliye ohuwoga wi ‘kadda muthu aneere othukula mutholo waye.’ Vala murumiwi Pawulo afuna awoge wi iyo aatene nihikanna mutholo Yehova anajhehiye wihina nakwanelihe. Ohudhera wula nnere woona ethu baani enavolowelavo othukula mutholo wehu ni makaleloya owerana eyo. Namala nnere woona dhithu dhimodha dhonyemela nithukunlihu, mbwenye nahinahowelihu ni makaleloya oohiya. Othukula mutholo wehu ni ohiya dhithu dhatedhene dhonyemela nihinahowelihu wineere onikavihera othamaga ofiyedha omakuthulo.

4. Mwahaya bwaddi wakwaneliha mpaganyo wawo wowivelela wa Yehova kahi ethu yorusa? (Osugwe fotu.)

⁴ Mpaganyo wehu wowivelela wa Yehova. Niivelelaga wa Yehova, iyo nahimpaganya omulabela Oliyene baahi ni werana efunelo yaye egumihu yatene. Bumwahaya nnohowela wakwanihedha mpaganyo ola. Wakwanihedha dhatedhene nimpaganyilihu Yehova mutholo munlubale, mbwenye kahi ethu yonyemela. Mweebaribarene, Yehova anipaddusile wihina neregena efunelo yaye. (Apo. 4:11) Oliye anipaddusile ni efunelo yomunona ni yomulabela,  teto anipaddusile nifwanafwaniho naaye. Bumwahaya nnowanda omwaddamela Yehova ni nnohagalala werana efunelo yaye. (Sal. 40:8) Ohiya eyo, neragana efunelo ya Yehova ni naamwiwelelaga mwanaye Yesu murima dhehu dhinotodoleya. — Mat. 11:28-30.

5. Ethu baani enuukavihere wakwanihedha mutholo wawo wowivelela wa Yehova? (1 João 5:3)

⁵ Nnande aavi othukula mutholo wehu. Dhihikalawo dhithu biili dhinanikavihere. Yobajha, odhowegeve wenjhedhedhaga odhivela onniwena ni Yehova. We podi werana eyo, wodhela opendda dhithu dhatedhene dhapama uwereliye ni mareeliho owinjhiva anafuniye wuvaha osogolo. Odhivela onniwena ni Mulugu wenjhedhedheyaga, enerege wukweyela omwiwelela. (Omwileri 1 João 5:3.) Yanabiili, omutajhihe Yesu. Oliye ahanda werana efunelo ya Yehova mwaha oolobela alobaga nikavihero ni awubuwela baahi mareeliho afuniye wawakela. (Heb. 5:7; 12:2) Ndala ninga Yesu, olobele wa Yehova olobaga nikavihero wihina wubuwelegeve ejhehedhelo yawo yosogolo. Wenjhedhedha odhivela wawo ni Yehova ni oharaga yotajhiha ya Yesu, onere wanda wakwaneliha mpaganyo wawo wowivelela wa Yehova.

6. Mwahaya bwaddi sapama osamalela emudhi yehu? (Osugwe fotu.)

⁶ Mutholo ninnihuna vemudhini. Mudhidhi nnathamagigihu dila ela yegumi, odhivela ninnihuna ni Yehova vamodha ni Yesu winohowela okala winlubale opitha odhivela ninnihuna ni amudhi ehu. (Mat. 10:37) Mbwenye eyo kinatapulela wi kannahowela ovaha thima mutholo ninnihuna vemudhini. Mwaha neegi nimuhagalase Yehova ni mwanaye Yesu, nnohowela wakwanihedha mutholo ninnihuna vemudhini. (1 Tim. 5:4, 8) Neerana eyo nnere ohagalala. Yehova ohunona wi emudhi enahagalala anamatelana yeddihanaga nuudhivela vamodha ni nriho, abaabi yadhivelaga ni yalagaga aniiwa teto anamwani yawiwelelaga makolo ewa.  — Efé. 5:33; 6:1, 4.

7. Nnande aavi wakwaneliha mutholo wehu vemudhini?

⁷ Nnande aavi othukula mutholo wehu? Akala we oli baabi, mayi obe mwaana, kuddiwale wihina ethu yathimaya fuwaparihedha mabasa malagano amBibiliyani. Kuweregena dhithudha mwamakalelo onafuneliwe obe ninga athu a murudda wawo eneriwana, newene kuxixe ohara dholaga dhinavaha mEspesyalista amwilaboni enawogiwa wodhela muselu wa murala. (Pro. 24:3, 4) Olabihedhege pamadhene malivuru ehu, mwaha enonikavihera waparihedha mabasa malagano amBibiliyani. Motajhiha artigu dhinawoga wodhela “Ajuda Para a Família” munoofwanyeya muselu dhinawoga wodhela makathamiho enaafwanya anamatelana, abaabi ni azombwe. b Wikome oparihedha mabasa malagano amBibiliyani naarive athu amodhaya aveemudhini vawo yahifunaga. Werana ndo, emudhaawo eneere okavihereya ni onere wawakela mareeliho a Yehova.— 1 Ped. 3:1, 2.

8. Dhothoma dhehu dhinanipatha aavi?

⁸ Orumedha dhokumelelavo dha dhoothoma dhehu. Yehova ohunivaha mukono wathima, oneeti wosakula ele nnafunihu. Oliye anafuna wi neregena dhothoma dhapama wihina nikale athu oohagalala. Mbwenye neerana yothoma yabure, Yehova kananibarele wodhela makathamiho enaakumelelevo. (Gál. 6:7, 8) Bumwahaya nnohowela orumedha dhokumelelavo dhinadha mwaha werana dhothoma dhabure, dhowoga madhu nahabihile wubuwela  obe mwaha werana dhithu ni marulu. Ethu ninga yeyo yapadduwa, mubuwelo podi onnyemelaga. Orumedha dhokumelelavo dhinadha mwaha dhoothega dhehu, podi onithukulela owoga dhotheega dhehu, woogolela dhoviriganiha dhehu ni ohuhogolowela werana emodhave. Werana dhithundha podi onikavihera odhowagave nthamagaga dila ya egumi.

9. Werana yothoma yabure, ethu baani onahoweliwe wera? (Osugwe fotu.)

⁹ Nnande aavi othukula mutholo dhehu? Akala oherana yothoma vano osinyuwa, ethu baani onahoweliwe werana? Orumedhe wi kunande osaddula dhithu dhipadduwile kale. Kunonge mudhidhi wawo wisinjhedhaga obe wawinkedhaga amodha wihina aliwa binna nibili. Ohiya eyo, orumedhe wihina ohuviriganiha ni werena dhatedhene onandiwe wihina owomihedhe dhoviriganiha dhawo. Akala onowivaha nibili mwaha wa yoviriganiha weriliwena, okale owiyeviha ni olobele wa Yehova orumedhaga wihina ohuviriganiha omulobaga wihina ulevelele. (Sal. 25:11; 51:3, 4) Waalobe nlevelelo ale watheegeliwe ni yahoweleyaga osayele nikavihero na anamaholela mulogo. (Tia. 5:14, 15) Ohudhere ni dhooviriganiha dhawo ni wilibihedhe wihina onahogolowele werana emodhave. Werana dhithu dhendha, podi okanna ebaribari wihina Yehova aneere wuweddela thagaraga ni aneere wuvaha nikavihero onahoweliwe. — Sal. 103:8-13.

10. Mwahaya bwaddi ohanda wakwanihedha ndhe nnafunihu, podi okala yoonyemela nahinandihu othukula? (Gálatas 6:4)

¹⁰ Ohanda wakwanihedha nde nnafunihu. Iyo podi okwerebeya niiliganihaga naathu amodha. (Omwileri Gálatas 6:4.) Nakanna elemelelo yowiliganiha naathu amodha, iyo podi okala athu anrima teto podi wambela opokihana. (Gál. 5:26) Naaxixaga werana dhithu dhimodhave dhinerana athu amodha mbwenye nnonaga wihina kannande werana, iyo podi witotela makathamiho. Teto akala ethu nnajhehihu kinereya ninga mwafunelihu enopiha mbani, kubuwela makalelo onafuniwe okwerebeya wajhehaga ethu ononniwe wi kunande werana! (Pro. 13:12) Naxixa werana ele nahinandihu, iyo podi okwerebeya ofiyedha ohiya othamaga dila ya egumi. — Pro. 24:10.

11. Nnahowela weera ddi wihina nahijhehege dhithu nnonnihu wi kannande werana?

¹¹ Nnande aavi orula mutholo ola? Kuwunlelege werana dhithu wahinandiwe. Yehova kanajheha wihina we werena dhithu ohunandiwe. (2 Cor. 8:12) Teto okanne ebaribari wi Yehova kanaliganiha ndhe oneriwe ni ndhe enerana athu amodha. (Mat. 25:20-23) Yehova onovaha thima mabasa onaapariwe ni murimawo wamuteene, nroromelo onniwena ni ovilela ononihiwe. Wanone manddile awo, mwaha wi werana ndo onere wanda wonelamo wihina dhihikalawo dhithu wahinandiwe werana mwaha wa oredda, wuluvala obe mudhidhi onafwanyiwiwe. Ndala ninga Barzilayi, onone okoodda mutholo dhimodha ononniwe wihina kunande wakwanihedha. (2 Sam. 19:35, 36) Teto ninga Moyizeji, olobe nikavihero naathu amodha ni wagawele mutholo dhawo dhahoweleyaga. (Êxo. 18:21, 22) Okanna manddile, wineere wukavihera ohubuwela werana dhithu ononniwe wihina kunande werana ni dhuukwerebeyihe ofiyedha ohanda othamaga dila ya egumi.

12. Muthu eerana yothoma yabure, nerege nibilina thehu? Owogemo.

¹² Wivaha nibili mwaha wa dhothoma dhabure dhaathu amodha. Iyo kaninna oneeti yowathomela athu dhithu dhowera; newene kannanda wabarela wa makathamiho enakumelelavo mwaha wa dhothoma dhewa dhabure. Motajhiha, mwaana podi othoma ohiya  omulabela Yehova. Yothoma eyo, podi wapiha mbani abaabi. Mbwenye abaabi yivaha nibili mwaha yothoma yamwaniwa, eyo podi okala ethu yoonyemela vanlubale. Mbwenye oyo kahiyo mutholo Yehova anafuniye wihina abaabi ethukule. — Rom. 14:12.

13. Abaabi, eneere ddi aniwa yerana yothoma yabure?

¹³ Nnande aavi orula mutholo ola? Kudduwale wihina Yehova ohunivaha ofuru yosakula ele eli yapama ni yabure. Oliye onowahiya athu aatene osakula akala enoofuna omulabela obe naari. Yehova ohunona wi nyu abaabi kamuli oologomana, Oliye anajheha wi nyu mwerena ndhe munandinyu. Yosakula mwaninyu anafuniye werana, mutholo waye kahi weenyu. (Pro. 20:11) Naarive dhigaali ndho, nyu podi wambela wubuwela dhego muviriganihilinyu mmulelaga mwaninyu. Akala siyeyo, munfugulele Yehova murima weenyu ni mmulobe wihina uleveleleni. Yehova ohunona wi kamunande owomihedha dhithu dhivirile. Mbwenye mudhidhi mmodhave, Yehova kanajheha wi nyu mumbarelege mwaninyu wa makathamiho enakumelelavo mwaha wa yoviriganiha yaye. Mwanawo ilibihedha wihina amuhogolowele Yehova, kuddiwale wi Oliye anna ojheha wihina amwakele. — Luc. 15:18-20.

14. Mwahaya bwaddi wivaha nibili ethu yoonyemela nnahowelihu orula?

¹⁴ Othabwa wivaha nibili. Ebaribari wihina neerana yothega nnokubanya. Mbwenye Yehova kanafuna nidhowegeve niivahaga nibili. Mwaha eyo ethu yoonyemela nnahowelihu orula. Kivano nnaanone aavi akala nnothabwa wivaha nibili? Nalobela wa Yehova nimwaddelaga dhoviriganiha dhehu, nimulobaga wihina anilevelele ni niilibihedhaga wihina nnahogolowele werana yothega emodhave nikanne ebaribari wihina Yehova ohunilevelela. (At. 3:19) Mbwenye namala werana dhithu dhatedhene ndha iyo wivahagave nibili, nnonege wihina nnothabwiha. Mwaha wi Yehova mweebaribarene ohunilevelela. Oliye kanafuna wihina iyo niivahege nibili. Teto Yehova ohunona wi wivaha nibili winonitotela makathamiho. (Sal. 31:10) Naathabwaga wivaha nibili,  iyo podi ohiya othamaga dila ya egumi.— 2 Cor. 2:7.

15. Enukavihere ddi ohuthabwa wivaha nibili? (1 João 3:19, 20) (Osugwe fotu.)

¹⁵ Nnande aavi orula mutholo ola? Akala we onowivahave nibili kudduwale wi Yehova Mulugu oolevelela. (Sal. 130:4) Yehova onowapaganya ale ethwaruwile mweebaribarene egi: ‘Kaginadha gihogolowelaga wubuwela dhotega dhawo.’ (Jer. 31:34) Eyo enatapulela wi Yehova kanaalabihedhe dhotheega dhawo dhakale wihina utorihena. Vano wafwanyiwaga makathamiho enakumelela mwaha wa dhoviriganiha dhawo, kuwubuwelege wihina Yehova kuulevelenle. Kuwivahege nibili mwaha oyelela mutholo wanniwena mwaha wa Yoviriganiha weriliwena kale. Yehova kanubuwelela dhoviriganiha dhawo teto ni weya onohowela werana emodhave. —  Omwileri 1 João 3:19, 20.

16. Ninga anamathamaga, ethu baani nahinahowelihu odduwala?

¹⁶ Woona wihina nnathamaga dila ya egumi, nnohowela ‘othamaga wihina nande omwaakela padamari.’ (1 Cor. 9:24) Iyo nnere wanda werana eyo, noonelamo ohiyana olivo wa mutholo nnahowelihu othukula ni ndhe nahinahowelihu othukula. Ohudhera wula, nihoona dhotajhiha wa dhithu nnahowelihu othukula ni ndhe nahinahowelihu othukula. Mbwenye dhikalawo dhithu dhimodha. Yesu ohuwoga egi: “Mwahinyemelihe murima weenyu mwaha wothabwa othuwathuwela ojha, ong’wa, ni dhithu munahowelinyu kadda labo.” (Luc. 21:34) Yolebela ela ni dhimodha dhinafwanyeya mBibiliyani, podi wukavihera owomihedha dhithu onahoweliwe wihina odhowegeve othamagaga dila ya egumi.

17. Ddiniyani enanivaha ebaribari wihina enowandeya othamaga dila ya egumi ofiyedha omakuthulo?

¹⁷ Iyo nihikanna ebaribari wihina enowandeya othamaga dila ya egumi ofiyedha omakuthulo, mwaha wi Yehova aneere onivaha kopolo nnahowelihu. (Isa. 40:29-31) Mbwenye kanikwerebeye! Ohare yotajhiha ya murumiwi Pawulo, ilibihendhe vanlubale wihina amwakele padamari aye. (Fil. 3:13, 14) Kaavo muthu anaathamage dila ela ya egumi vamburoni vawo, mbwenye nnikavihero na Yehova onere wanda. Mwaha Yehova aneere wukavihera othukula mutholo dhawo ni orula ndhe dhinutotela makathamiho. (Sal. 68:19) Nnikavihero na Yehova, onere wanda othamaga dila ya egumi ofiyedha omakuthulo ni ogonjhiha!