1-2. Ethu baani nnahowelihu odhowagave neragana namala obaddiziwa? Owogemo.

 ONODHIVELIWA oxela vaade vawo? Wahinathi otamela nyumba-si nyumba, podi wera onorajhiha wegeredha pamadhene nyumbaya. Mbwenye yaapadduwe ddi dhahere dhivira yaka dhowinjhivadhene wahixelagamo mba mwawo? Mwebaribarene mwere odhala dhithu dhotakala ni kamwavireyege. Nafunaga wihina nyumbihu ekale yowegeredheyene nnohowela oxelagamo mudhidhi wamutene.

² Nimakalelo mamodhave wafunaga wihina okanne ekalelo yapama ni mubuwelo wapama onamuhagalasa Yehova kukale muthu owihiya, nnohowela wilibihedha vanlubale. Ebaribari wihina nahinaathi obaddiziwa nahawerana masadduwo manlubale mwigumini mwehu, ‘wihina nisukume dhithu dhatedhene dhonyakavala dhinanonga mwiili ni murima wehu.’ (2 Cor. 7:1) Mbwenye vano nnohowela ohara yolaga ya murumiwi Pawulo enihina: ‘Musaddulegeve mubuwelo weenyu.’ (Efé. 4:23) Mwahaya bwaddi nigahowela osaddula mubuwelo wehu? Mwaha dhithu dhabure dhinapadduwa mwilaboni muna, podi otakaliha mubuwelo wehu ni murima wehu. Wihina eyo yahipadduwe ni wihina ndhowegeve nimuhagalasaga Yehova, nnohowela openddaga mubuwelo wehu nahihiyedhedhaga, emuthu yehu ni dhofuna dhehu.

3. Osaddula mubuwelo wehu enatapulela ddi? (Romanos 12:2)

³ Nnande baddi osaddula mubuwelo wehu, obe osaddula makalelo ehu owubuwela? (Omwileri Romanos 12:2.) Iyo  kannahowela okanna mubuwelo mmodhave mudhidhi wamutene, ndhithu nnadhiweliwihu werana. Nnohowela opendda murima wehu, ni dhowera dhehu ni wawerana masadduwo enahoweleya wihina nimuhagalase Yehova. Nnohowela werana eyo ohiya dila modha baahi, mbwenye mudhidhi wamutene.

4. Nnere ddi wihina mubuwelo wehu ni dhowera dhehu dhahivoloweliwe ni dhowera dha elabo?

⁴ Nalogomana nnerege wanda omuhagalasa Yehova mudhidhi wamutene. Mbwenye nahinathi ofiya nlabo nno, nnohowela wilibihedha wihina nikalegewo mwamakalelo enamuhagalasa Yehova. Va Romanos 12:2, murumiwi Pawulo ohuwoga egi, nnohowela odhowagave nisaddulaga mubuwelo wehu wihina nonelemo ethu baani Yehova anajhehiye wa iyo. Kanihiye wihina elabo ela enivolowele ni dhowerana dhewa. Nnohowela wipendda wihina nonelemo akala dholuba dhehu ni dhowera dhehu — dhinavoloweliwa ni mubuwelo wa Yehova obe wa elabo.

5. Nnande addi opendda mubuwelo wehu wodhela nlabo na Yehova? (Osugwe fotu.)

⁵ Kaabiha wubuwela, Bibiliya onowoga egi,‘nnohowela ohidduwala nlabo na Yehova.’ (2 Ped. 3:12) We poddi wikoha, makalelo gineddihimi egumi yaga enowoniha wi nnakalawo malabo okuthula? Yothoma yaga wodhela ohudhera ofakulidade ni mabasa, enowoniha wihina omulabela Yehova ethu yathima mwigumini mwaga? Ginororomela wihina Yehova anere ogisamalela miyo vamodha ni amudhi aaga obe ginathuwathuwela okanna dhithu dhomwilini? Mwebaribarene Yehova onohagalala anonaga nilibiheraga wihina nimuhagalase nindhe nnadhiveliwihu werana. — Mat. 6:25-27, 33; Fil. 4:12, 13.

6. Nnahowela ndhowegeve neraga ddi?

⁶ Iyo nnohowela opendda mubuwelo wehu  mudhidhi wamutene, nuwindo wawerana masadduwo enahoweleya. Murumiwi Pawulo ohuwoga egi: ‘Mudidele wipendda akala muli oolibeene munroromeloni, mudidele wipendda wi moone emuthu yenyu.’ (2 Cor. 13:5) Okala munroromeloni kinatapulela odhowa omutugumanoni ni mmalaleyelo baahi, enovolowelavo emuthu yehu, mubuwelo wehu ni dhofuna dhehu. Bumwahaya, nnohowela osaddula mubuwelo wehu wodhela wawileri madhu a Mulugu ni ohudhera wubuwela ninga Yehova, omagomihedhowa wilibihera werana dhatedhene wihina omuhagalase Yehova. — 1 Cor. 2:14-16.

7. Ninga munawogela Efésios 4:31, 32, ethu baani emodha nnahowelihu werana, ki mwahaya bwaddi werana eyo ekala ethu yorusa?

⁷ Omwileri Efésios 4:31, 32. Ohiya osadhulagave makalelo ehu owubuwela, nnohowela “owara emuthu exa.” (Efé. 4:24) Mbwenye wihina nande werana eyo, nnohowela wilibihedha. Mbwenye dhikalelo dhimodha, nnahowelihu wilibihedha wihina nisukume sindha, wukuuwa, owali ni onyanyuwa. Mbwenye werana eyo podi ohikala ethu yokweya. Mwahaya bwaddi? Mwaha malabo mamodha dhithundha dhinonigonjhiha. Motajhiha, Bibiliya onowoga egi: athu amodha “kinarusa onyanyuwa” ni “enodhiveliwa onyanyuwa.” (Pro. 29:22) Muthu anna dhikalelo dhendha, podi wera anere ohowela wilibihedha vanlubale, wihina asaddule mubuwelo waye naarive agabaddiziwe. Nnere woona yotajhiha wodhela muselu yola ddima enaharela.

8-9. Yopadduwa ya Stephen, enanihudhiha ddi wodhela owara emuthu exa?

⁸ Ddibila dhaala anithaniwa Stephen karusa onyanyuwa ni ahikanna makathamiho wihina isugwere. Oliye onowoga egi: “Naarive ngabaddiziwe gohowela wilibihedha wihina gisugwere. Nlabo dhaala ngali mmalaleyelo miyo wiiyeliwa radiyu amukaroni mwaga, vano miyo wambela omuthamagiha mbavaya, gimwaddamelaga mbava ole omurahila radiyu ole nuwindo oliye othawa. Vano nuwawaddela addibila makalelo ganfwanyimi radiyo ole, namaholela mulogo dhaala ogikoha egi; ‘Stephen were ddi wahamwihidde mbavaya?’ Ndhe awogile namaholela mulogo ole, dhahigithukulela miyo wubuwela ni wonelamo wihina ginohowela wawerana masadduwo mwigumini mwaaga, wihina gikale muthu owiyeviha.” b

⁹ Ninga enoniha yopadduwa ya Stephen, naarive nonihaga wihina nihanda osukuma ekalelo yabure, ekalelo yabure eyo podi okumelela mudhidhi nahajheherihu. Eyo yapadduwa niwe kuwukuwe ni kufiyedhe wubuwela wi kuli mukiristawu apama. Eyo yahipadduwa ni murumiwi Pawulo ofiyedha oliye owoga egi: “gafunaga werana ethu yapama enagidhela sile eli yabure”. (Rom. 7:21-23) Ninga nonilihu mundduli nahixelaga vade vehu malabo amatene vinere ohogolowela otakala. Nimakalelo mamodhave, mwaha iyo okala athu ohilogomana, dhikalelo ndhe dhabure podi ohogolowela mwigumini mwehu. Bumwahaya nnohowela wilibihedhaga wihina nigonjhihe dhikalelo ndha dhabure. Nnande aavi?

10. Onere ddi wihina owanena dhikalelo dha bure? (1 João 5:14, 15)

¹⁰ Akala we ohukanna ekalelo ononniwe wihina sabure, olobele wa Yehova omulobaga nikavihero wihina wande ogojhiha ni ororomele wi oliye anere wukavihera. (Omwileri 1 João 5:14, 15.) Ebaribari wi Yehova kanukavihere  motikina wihina athimihe dhikalelo dhabure ndha, mbwenye oliye anere wuvaha kopolo onahoweliwe wihina wande owanana. (1 Ped. 5:10) Bumwahaya, werena epaddawo wodhela oparihedha mabasa ndhe onalobiwe mulobelo mwawo ni osukume dhithu dhuthukulele ohogolowela werana dhithu dhabure. Motajhiha, okale pasope ni filime, programa anonihiwa mutelevizorini ni wawileri malivuru yuwubusedhe dhikalelo onawaniwena wihina osukuma, teto kuthabwege wubuwela dhithu dhabure. — Fil. 4:8; Col. 3:2.

11. Nnere ddi wihina niware emuthu exa?

¹¹ Namala orula emuthu ya kale nnohowela wilibihedha owara emuthu exa. Nnande addi werana eyo? Okanne yoluba yohudhera dhikalelo dha Yehova ni otajhiha. (Efé. 5:1, 2) Motajhiha, wamala wileri yopadduwa yamBibliyani enoniha wihina Yehova Mulugu oolevelela, kabiha wikoha, ‘Miyo ginolevelela?’ Wamwilerigi Bibiliya ni woona wihina Yehova Mulugu anathuwathuwela ale eli ohawa, kabiha wikoha, ‘Miyo ginowathuwathuwela addibila eli ohawa ni ginowoniha wi ginowathuwathuwela wodhela dhithu ginerimina?’ Bumwahaya, ndhowegeve nisaddulaga mubuwelo wehu, wodhela owara emuthu exa. Teto kuddiwale wihina onere ovira mudhidhi wowinjhivene wihina eyo epadduwe.

12. Kopolo dha Bibiliya dhimukavihere aavi osaddula egumi ya Stephen?

¹² Stephen, awogiwe mundduli, nuuvira mudhidhi ahanda owara emuthu exa. Oliye onowoga egi: “Numala obaddiziwa gihifwanyiwa dhoweha dhowinjhiva dhaagithukulele werana dhithu dha bure. Gahihudhera okala muthu apama wodhela wasukuma athu yagiligesa obe wodhela waja makalelo owapwaseyiha akwaga. Athu owinjhiva vamodha ni mwaraga, yahigitamalela vanlubale wodhela miyo wawaja makalelo ala owerana dhithudha. Teto ni miyoya gahitikina vanlubale! Kaginarumedha wihina gandile meeka osaddula ekalelo yaga. Vano gihikanna ebaribari wihina Bibiliya ohukanna kopolo yasaddula dhigumi dhaathu.”

13. Enanikavihere ddi werana opama? (Gálatas 5:16)

¹³ Omwileri Gálatas 5:16. Werana ethu yapama kahiyo ethu yokweya. Mbwenye wihina nerena ethu yapama, Yehova nuupama waye ononivaha muzimu yotxena wihina anikaviherena. Naamuhudheraga Bibiliya, nnahiya wihina muzimu yotxena wuneddihege mwigumini mwehu. Teto nnowakela muzimu wotxena nakala omutugumanoni. Mwaha omutugumanoni nnoojha mudhidhi wowinjhivene nigaali ni addibila vamodha ni arogola, enilibihedha ninga iyo werana dhithu dhapama, eyo enonilibiha vanlubale. (Heb. 10:24, 25; 13:7) Nalobelaga ni murima wehu watene wa Yehova, nimulobaga wihina anikavihere ogonjhiha ekalelo nnonnihu wihina sabure, oliye anere onivaha muzimu wotxena wihina onilibihe. Omuhudhera Bibiliya, woona mutugumano ni olobela, kadhinathawihe dhikalelo dhehu dhootakala. Mbwenye ohara yolaga ela enere onikavihera owanana mubuwelo wabure. Ninga anawogela Gálatas 5:16, nahiselela wedda mowiwanana ni muzimu wotxena wa Mulugu, ‘kannadha nerana dhithu dhomwilini.’

14. Mwahaya bwaddi ekala yathima odhowagave nsayelaga mubuwelo wapama?

¹⁴ Namala walemelela mabasa omuzimuni, nnohowela odidelagave wapara mabasa ala wihina nikanne mubuwelo wapama. Mwahaya bwaddi? Mwaha nihikanna mwiddanihu ahinanivumela. Mwiddani ola, fuwehiwa wofunaga werana dhithu dha bure. Naarive  nigabaddiziwe iyo podi wehiwaga wihina nerena ethu yabure. Ninga ojogari jogu dha aposta, ofunaga olezela ni woona pornografiya. (Efé. 5:3, 4) Muzombwe dhaala ali mukiristawu, onowoga egi: “Koddo ginawanimina fuwakalela murogo alobwana akwaaga, miyo gubuwela wi ele yapadduwe mudhidhi vang’ono, mbwenye mubuwelo oyo onogiharahara.” Onere ddi akala we onna owanana yoweha eli yabure enarusa ogonjhiha?

15. Mwahaya bwaddi sapama onona wi athu amodha ehanda wagonjhiha makathamiho mamodhave nnawanihuna? (Osugwe fotu.)

¹⁵ Akala we onna owanana yoweha yorusa ogonjhiha, kuddiwale kuli weka. Bibiliya anawoga egi: ‘Dhoweha dhatedhene dhinufwanyani, dhinowafwanya athu aatene.’ (1 Cor. 10:13a) Madhu ala yahalibiha vanlubale addibila ni arogola a mulogo wo Korintiyu. Mwaha amodha wa aliwa kale yaali anamararuwa ni alezeli (1 Cor. 6:9-11) Mbwenye onoona wi aliwa numala obaddiziwa, kiyakanna munigwa wohogolowela werana dhithundha? Ebaribari wi aliwa yali makiristawu othikitheriwa, mbwenye woona wihina aliwa yali athu ohilogomana podi weera yokanna munigwa wowerana dhithu dhabure. Onona eyo podi onikavihera. Nimakalelo baani? Mwaha nihinona wihina naarive nifwanyiwaga dhoweha, ehikalawo athu yandile ogonjhiha. Iyo nnohowela okalavegave ‘oliba munroromeloni nnonaga wi addibila elabo yaatene ya vati, enofwanyiwa makathamiho mamodhave.’ — 1 Ped. 5:9.

16. Ethu baani yowopiha nahinahowelihu wubuwela, ki mwahaya bwaddi?

¹⁶ Kuwubuwelege wihina kaavo ananda wawonelamo makathamiho enuufwanya. Wubuwela ndo podi wuthukulela we wiwoonaga ninga kunna kopolo yowanda wagonjhiha makathamiho enuufwanya. Mbwenye kasugwa Bibiliya enanihudhihiye, oliye onowoga egi:  ‘Mulugu dororomeleya ni kanuhiyeni wehiwa ni dhithu muhinandinyu ovilelana, mbwenye yadha yowehaya oliya anere wukaviherani wihina mwakwanihe.’ (1 Cor. 10:13b) Nikavihero na Yehova iyo nnere wanda ogonjhiha wodhela oherana ele eli yabure.

17. Naarive yahili yokweya osukuma dhofuna dhabure, ethu baani iyo aatene nnahowelihu werana.

¹⁷ Kuddiwale iyo aatene kanilogomane, bumwahaya enere okala yorusa ohiya wubula dhithu dhabure. Mbwenye wakanna efunelo yowerana ethu yabure, osukume mowaguva, ninga Juze amuthawile mwadha Potifare. (Gén. 39:12) Kuhiye wihina dhofuna dhabure dhuugonjhihe ofiyedha werana yothega!

18-19. Nilibiheraga wihina nsaddule mubuwelo wehu makoho baani nnahowelihu wawerana?

¹⁸ Ninga nonilihu muwari mwa yohudhera ela, osaddula mubuwelo wehu, enovolowelavo ohiselela wilibihedha wihina mubuwelo wehu ni dhowera dhehu dhimuhagalase Yehova. Wihina naande werana eyo nnohowela wipendda ni wawerana makoho ala: “Dhowera dhaaga dhinowoniha wihina nnakalawo malabo okuthula? Ginna owedha owara emuthu exa? Ginna weenya wihina muzimu wotxena ogikavihere oherena dhithu dha bure dhagithukulele otheega?”

¹⁹ Mudhidhi onapeddegiwe kujhehege okala ologomana. Mbwenye ohagalale mwaha wilibihedha wawo wodhela owanana efunelo yowerana dhithu dha bure. Woona wi onohowela osaddula ethu-sithu, Kuwukuwe, mbwenye ohare yolaga enafwanyeya va Filipenses 3:16 enihina: ‘Kinapwatha masadduwo nawenrihuna, mbwenye ndideleve weddaga mowiwanana.’ Werena eyo, okanne ebaribari wihina Yehova anere wureeliha mwaha wilibihera wihina osaddula mubuwelo wawo.