Ohudhera 5
‘Odhivela wa Kiristu winonithukulela’
‘Mwaha odhivela wa Kiristu winonithukulela . . . wihina ale enakalawo yahikalegewo ni efunelo yewa.’ — 2 COR. 5:14, 15.
JHIBO 13 Kiristu yotajhiha yehu
DHITHU NNAAHUDHERIHU a
1-2. a) Nnakala aavi napendda wodhela egumi ni mabasa aapanre Yesu? b) Ohudhera wula nnaasuze ddi?
MUTHU nnamudhivelihu akwa nnothabwa okanna munukwela. Malabo oobajhene we onokala owukuwene mudhidhi wubuwela dhithu erilena marafula ole malabo ogomihedha thabwathabwa akala ohuthabwa woona goyi. Mbwenye wavira mwana mudhidhi muthu anobajha ohagalala ubuwela dhithu ahudhihiwiye ni marafula ole, ethu awogiliye obe ethu eriliyena yulibihe.
2 Emodhave, iyo nnothabwa wukuuwa noonaga goyi onile Yesu labo aakwiliye. Thabwa-thabwa mudhidhi wowubuwela okwa wa Yesu iyo nnokumiha mudhidhi wihina nipendde makalelo mukutho onanikaviheriwa. (1 Cor. 11:24, 25) Naari dhigaali ndo, iyo nnohagalala mwaha dhithu dhatedhene Yesu awogiliye ni eriliyena agaali mwilaboni ya vati. Emodhave, solibiha wubuwela dhithu ananereliye peeno ni anaanereliye osogolo. Ninga nnafunihu woona ohudhera wula, opendda dhithu ndha ni opendda makalelo Yehova ni Yesu enanonihiwa odhivela winonthukulela wooniha odhivela wehu mwa makalelo ohiyana-iyana.
OTAMALELA WINONTHUKULELA OHARA MWEDDELO WA YESU
3. Dhithu baani dhinanthukulela otamalela mukutho wa Yesu?
3 Opendda egumi ni okwa wa Yesu winonthukulela otamalela. Agaali elabo yela ya vati Yesu ahahudhiha athu wihina Omwene wa Mulugu onere odhana mareeliho owinjhiva. Vano iyo nnovaha thima dhohudhiha dha mBibiliyani dhinawoga wodhela woboliwa. Teto nnotamalela vanlubale mukutho wa Yesu mwaha ononivaha ofuru wokanna wandana wapama ni Yehova vamodha ni Yesu. Ale enamuroromela Yesu, ehikanna ejhehedhelo yokanna egumi yohimala osogolo ni wawakela amudhiwa ekwile. (João 5:28, 29; Rom. 6:23) Iyo kannafwanelela wawakela mareeliho ala ni kannande omwerela Yehova ni Yesu dhatedhene enerenliwa. (Rom. 5:8, 20, 21) Mbwenye nnowanda wooniha wihina nnowatamalela vanlubale.
Opendda yopadduwa ya Mariya Madalena enanikavihera aavi okala athu ootamalela? (Osugwe ddima 4-5)
4. Mariya Madalena onihe aavi wihina otamalela ele Yesu amwereliye? (Osugwe fotu.)
4 Kasugwa yopadduwa ya mwihiyana dhaala ali mu Judewu ithaniwa Mariya Madalena. Oliye oonihiwa goyi ni ademoniyu atanu nabili. Podi wera oliye owubuwela wihina kaavulumuwe, bumwahaya kannanganyedha wihina ahitamalela vanlubale Yesu nuwawigara ademoniyu ale. Otamalela wula wahimuthukulela okala namahara a Yesu, nulabihedha kopolo dhaye mudhidhi waye ni dhokanna dhaye wihina amukavihere Yesu mmabasani olaleya. (Luc. 8:1-3) Oliye ovaha thima ndhe Yesu amwereliye, mbwenye podi wera kanonne dhatedhene erena Yesu osogolo. Oliye eere wapelekela egumaye ‘athu aatene yaamuroromele.’ (João 3:16) Naarive dhigaali ndo, Mariya ahoniha wihina omutamalela vanlubale Yesu mwaha okala ororomeleya wa oliye. Mudhidhi Yesu oonaga goyi vantxikwani na goyi Mariya Madalena aali vevale amulibihaga Yesu ni athu amodha. (João 19:25) Yesu agakwile, Mariya vamodha ni ahiyana amodha abiili yahigula guwo wihina yegeredhe muruthu wa Yesu. (Mar. 16:1, 2) Mariya ahireelihiwa vanlubale mwaha ororomeleya waye. Oliye ahikanna ofuru anamahara amodha a Yesu yahanniwana, ofuru wogumana ni othapanya ni Yesu nuvenyihiwa mukwani. — João 20:11-18.
5. Nnonihe aavi wihina nnotamalela vanlubale dhatedhene ananerela Yehova ni Yesu?
5 Emodhave, iyo nnowoniha wihina nnotamalela vanlubale dhatedhene dhinanerela Yehova ni Yesu wodhela olibihedha kopolo dhehu, dhokanna dhehu ni mudhidhi wehu wihina nikavihere mabasa Omwene. Motajhiha, iyo podi wivahedhela wihina nikavihere mabasa oomaga ni ovenyihedha Nyumba dhinalabihedhiwa wihina nimwebedhemo Mulugu.
MAKALELO NNAMUDHIVELIHU YEHOVA NI YESU WINONTHUKULELA WADHIVELA AMODHA
6. Mwahaya bwaddi nigawoga wi yowobola nvaho munlubale wa Yehova wa iyo?
6 Wubuwela makalelo Yehova ni Yesu enandhiveliwa, winonthukulela wawoniha odhivela. (1 João 4:10, 19) Noonelamo wi Yesu anikwenle iyo odhivela wehu onowunnuwelavo. Murumiwi Pawulo ahitonyihedha wi ootamalela vanlubale ele Yesu amwereliye nuuleba egihina: ‘Mwaana a Mulugu . . . ohugooniha odhivela ni ohiivelela mwaha wa miyo.’ (Gál. 2:20) Mwaha yowobola, Yehova ononivaha ofuru wowandana ni Oliye. (João 6:44) Kunahagalala onona wi Yehova onowoona dhithu dhapama oneriwena ofiyedha onvaha mwanaye wihina uwobole wihina wandane ni Oliye? Ni kinuthukulela wunnuwiha odhivela onniwena ni Yehova vamodha ni Yesu? Vano sapama wikoha ayi, ‘Odhivela wula winaagithukulele werana ddi?’
Makalelo nnamudhivelihu Yehova ni Yesu onithukulelege walaleya athu aatene muthenga wOmwene (Osugwe ddima 7)
7. Mowiwanana ni fotu, nnonihe aavi odhivela ninnihuna wa Yehova vamodha ni Yesu? (2 Coríntios 5:14, 15; 6:1, 2)
7 Odhivela wehu wa Yehova ni Yesu winonithukulela wadhivela athu amodha. (Omwileri 2 Coríntios 5:14, 15; 6:1, 2.) Makalelo ootonyihedha odhivela wula fuukala ooviheya mmabasani oolaleya. Nnothapanya ni athu aatene nnafwanyihu. Kinapwatha akala muzugu, obe kafiri, obe ooreela obe oohawa, obe a nihimo nohiyana. Ni makalelo yala, nnerege otonyihedha wi nnowerana efunelo ya Yehova yowihina ‘athu aatene evuluwe ni ekanne enonelo yeebaribari.’ — 1 Tim. 2:4.
8. Nnatonyihedha aavi wihina nnowadhivela addibilihu ni arogolihu?
8 Iyo nnowoniha wi nnomudhivela Yehova vamodha ni Yesu naadhivelaga addibila, naarogola. (1 João 4:21) Iyo nnowathuwathuwela addibilihu ni nnowakavihera mudhidhi yahowelaga. Ddibilihu amuyelela muthu anamudhiveliye mukwani iyo nnomutodola, akala muredda nnompaada ni akala owuukuweene nnowilibihedha wihina nimuhagalase. (2 Cor. 1:3-7; 1 Tes. 5:11, 14) Ohiya eyenove, nnowilibihedha walobelela addibilihu mwaha ‘malobelo a muthu owogowa ehikanna kopolo.’ — Tia. 5:16.
9. Makalelo mamodha enoniha wi nnomudhivela Yehova ni Yesu baavi?
9 Makalelo mamodha ootonyihedha wi nnowadhivela addibila ni arogola fuwilibihedha okanna murenddele ni aliwa. Yehova tajhiha yinlubale wodhela olevelela ni iyowa nnohariha yotajhiha yaye. Akala Yehova ahifiyedha onvaha mwanaye wihina anoobole, ki iyo, kannafwanelela walevelela addibilihu? Kannafuna nikale ninga mudhaari ole abure asorihiwe va yoladdaniha ya Yesu. Naarive nabuye agamulevelele mangawu manlubale anniyena oliye kaamulevelele mukwaye aanna mangawu mang’ono baahi. (Mat. 18:23-35) Akala ohukanna muladdu ni ddibila mmodha mmulogoni, ononamo aavi omuloba nikurumuwelo nihinafiye labo nowubuwela okwa wa Yesu? (Mat. 5:23, 24) Werana ndo onotonyihedha wi onomudhivela Yehova vamodha ni Yesu.
10-11. Anamaholela mulogo enonihe aavi wihina enomudhivela Yehova ni Yesu? (1 Pedro 5:1, 2)
10 Anamaholela enaatonyihedhe aavi wihina enomudhivela Yehova ni Yesu? Makalelo mamodha ni manlubaleya ootonyihedha odhivela wula fuwasamalela Mambila a Yehova. (Omwileri 1 Pedro 5:1, 2.) Yesu ahimooniha eyo murumiwi Peduru pamadhene. Podi wera Peduru numukoodda Yesu dila tharu ahithuwathuwa ni oofuna omooniha Yesu wihina oomudhivela. Mudhidhi vang’ono Yesu agavenyihiwe muukwani omukoha Peduru egihina: ‘Simawu mwaana Juwawu, we onogidhivela?’ Mwebaribarene Peduru owerana ethu-siithu wihina oonihe wi omudhivela Yesu. Vano Yesu owoga ni Peduru egihina: ‘Wajhihege mambila aaga.’ (João 21:15-17) Peduru ahasamalela mambila a Yesu nuudhivela ofiyedha okwa waye oonihaga wihina oomudhivela vanlubale Yesu.
11 Anamaholela mulogo, munoonihe aavi thima enna madhu aasorihile Yesu wa murumiwi Peduru mudhidhi woWubuwela okwa wa Yesu? Nyu podi woniha wi munomudhivela Yehova ni Yesu mwaasayelaga mudhidhi wihina mwaalibihe addibila vamodha naarogola ni mwaasayelaga ale eridhale epaddi yomuzimuni wihina emuhogolowele Yehova. (Eze. 34:11, 12) Nyu podi walibiha anamahudhera aBibiliya wodhela wawakela pama vamodha naaleya yadhele woona muthupo woWubuwela okwa wa Yesu, mwaha aliwa podi ofiyedha okala anamahara a Yesu.
OMUDHIVELA YESU WINONIKAVIHERA OLIBA MURIMA
12. Mwahaya bwaddi madhu aasorihe Yesu emahiyu ahinakwe eganivaha oliba murima? (João 16:32, 33)
12 Emahiyu Yesu ahinakwe, oliye ahiwoga ni anamahara aye egihina: ‘Mwilaboni munere okanna makathamiho, mbwenye mulibe murima! Miyo gihigonjhiha elabo.’ (Omwileri João 16:32, 33.) Yamukavihere Yesu okalave ooliba murima ni okalave oororomeleya vaari vaamwiiddani aye ofiyedha okwa yaali ddi? Yamukavihere sowihina egumaye yaatene apwenhe mmadani mwa Yehova. Teto ahinona wihina anamahara aye yere ofwanyiwa makathamiho mamodhave, bumwahaya adhe amulobege Yehova wihina aasugwerege. (João 17:11) Mwahaya bwaddi onona eyo eganilibiha? Mwaha Yehova ohuthabwa okanna kopolo ompitha mwiddani di mwiddani ehu. (1 João 4:4) Yehova anowoona dhithu dhatedhene dhinapadduwa. Bumwahaya nnohowela okanna ebaribari wihina iyo podi omuroromela oliye ni wi anere onikavihera ogonjhiha woova ni anere onikavihera oliba murima.
13. Juze oArimateya oonihe aavi wihina ahikanna oliba murima?
13 Osugwe yopadduwa ya Juze oArimateya. Oliye aali muthu athabwa orihiwa ni maJudewu. Teto ookosa epaddi ya Sinediriyu, waali onamathonga winlubale wa maJudewu. Mbwenye Yesu aaparaga mabasa aye mwilaboni yavati, mulobwana ola Juze kaali ooliba murima. Juwawu ohuwoga wihina mulobwana ola Juze ‘aali namahara a Yesu, mbwenye mowipiteya, mwaha wawoova maJudewu.’ (João 19:38) Juze ahithabwa okanna nroromelo, mbwenye kawoga wihina aali namahara a Yesu. Podi wera oova wihina athu enahiye omuriha ninga muthu athima. Mbwenye Bibiliya anihina Yesu nuukwa, Juze omaga murima ni odhowa wa Pilatu ni oloba muruthu wa Yesu.’ (Mar. 15:42, 43) Nuuvira mudhidhi athu aatene onona wihina aali namahara a Yesu, vano kanna manyazo ononiwa ninga namahara a Yesu.
14. Akala onowawova athu onere ddi?
14 Onowawova athu ninga Juze oArimateya? Onookannaga manyazo oononiwa ninga Namoona a Yehova oskola obe omabasani? Ofiyedha peeno enowurusa okala namalaleya ohubaddiziwa obe obaddiziwa woovaga dhithu athu enuwubuwelegiwana? Kuwenye wihina woova ngo wuhihe werana dhithu ononniwe wihina sapama. Olobele ni murima wawo wamutene wa Yehova. Ni omulobe wihina ukavihere werana efunelo yaye. Woona wihina Yehova anna wawakula malobelo awo onere okanna kopolo ni onere oliba murima.— Isa. 41:10, 13.
OHAGALALA WINONTHUKULELA OMULABELA YEHOVA NAHIKWEREBEYILE
15. Yesu nuwathwanyuwedha namahara aye, ohagalala yanniwana wathukulele werana ddi? (Lucas 24:52, 53)
15 Yesu nuukwa, anamahara aye yahithabwa wukuuwa. Kipwehe vamburoni vewa. Aliwa kiyamuyelele mukwiwa baahi mbwenye yahiyelela ejhehedhelo yewa. (Luc. 24:17-21) Mbwenye wukuuwa wule kuwalegele, Yesu wathwanyuwedha. Yesu waaja mudhidhi wihina awonelihemo anamahara aye makalelo okwa waye wakwanihedhiwa dhovuhulela dha mBibliyani. Ohiya eyenove, oliye wavaha mabasa manlubale wihina yaparege. (Luc. 24:26, 27, 45-48) Egavinre malabo 40 Yesu nuuhogolowela odhulu, wukuuwa wule osadduwa okala ohagalala winlubale. Aliwa yahagalanle mwaha yahinona wihina Yesu ahikalawo ni wihina eere wakavihera wakwanihedha mutholo aavahiliye. Ohagalala wule yanniwana wahathukulela omulabela Yehova ehikwerebeyile.— Omwileri Lucas 24:52, 53; Atos 5:42.
16. Nnaatajhihe aavi anamahara a Yesu?
16 Nnaatajhihe aavi anamahara a Yesu? Iyo podi ofwanya ohagalala namwebedhaga Yehova mudhidhi watene ohiya mudhidhi woWubuwela okwa wa Yesu. Wihina wande okala oohagalalene sapama osogoliha Omwene wa Mulugu mwigumini mwawo. Addibila amodha enna osogoliha Omwene wa Mulugu. Motajhiha, amodha enosayela mudhidhi wihina yenjhedhedhe mabasa ewa oolaleya, yoone mutugumano ni yandege okanna ohudhera weemudhi sumana dhatedhene. Amodha ehifiyedha ohiya osayela dhoorela, athu amodha enathabwiwa ovaha thima. Mwahaya bwaddi? Mwaha enafuna wihina elabihedhiwege mmulogoni obe edhowe murudda winahoweleya anamalaleya. Ebaribari wihina nnohowela okala oovilela wihina nidhowegeve nimulabelaga Yehova, mwaha oliye anonipaganya onreeliha nasogoliha Omwene waye mwigumini mwehu. — Pro. 10:22; Mat. 6:32, 33.
Mudhidhi woWubuwela okwa wa Yesu openddege dhithu uwerele Yehova vamodha ni Yesu (Osugwe ddima 17)
17. Dhithu baani oneriwena mudhidhi wowubuwela okwa wa Yesu? (Osugwe fotu.)
17 Okuma peeno, nnojheha nuuthaba labo nowubuwela Okwa wa Yesu winereye Txipili, labo na 4 a Abril. Mbwenye kinahoweleya ojheha ofiya labo nenno wihina nubuwele egumi ni okwa wa Yesu ni makalelo Yehova ni Yesu enandhiveliwa. Openddege dhithu nda mudhidhi watene woWubuwela okwa wa Yesu. Motajhiha, waaje mudhidhi wihina wileri ni opendde dhithu dhinafwanyeya kaxa eli va Tradução do Novo Mundo “A Última Semana de Jesus na Terra” va Apendisi B12. Mudhidhi wilerigi dhopadduwa nda osayele dholebela dhinukavihere wenjhedhedha otamalela wawo, makalelo onamudhiveliwe Yehova ni Yesu, oliba wawo murima ni ohagalala. Windo wubuwele makalelo enoniha wihina onotamalela. Mohanganyedha Yehova anere ovaha thima dhatedhene oneriwena wihina Wubuwele okwa wa Yesu. — Apo. 2:19.
JHIBO 17 ‘Miyo ginofuna’
a Mudhidhi wowubuwela Okwa wa Yesu nnohowela opendda egumi ya Yesu wodhela okwa waye ni makalelo Yehova vamodha ni Yesu enidhiveliwa. Opendda ni makalelo yayo winere onikavihera wawenjhedhedha mabasa ehu nnamparelihu Babihu Yehova. Ohudhera wula nnere woona dhithu nnahowelihu werana wihina noonihe wi nnotamalela mukutho wa Yesu ni wi nnomudhivela Yehova vamodha ni Yesu. Teto nnere ohudhera ethu enaanikavihere wadhivelaga addibilihu, arogolihu, okala ooliba murima, ohagalala mudhidhi naaparaga mabasihu olaleya.
