Ohudhera 4
Yehova ononireeliha mwaha wilibihedha wehu nadhowa wubuwela okwa wa Yesu
‘Mudidele werana ndala mugubuwelaga miyo.’ — LUC. 22:19.
JHIBO 19 Wubuwela okwa wa Nabuya Yesu Kiristu
DHITHU NNAAHUDHERIHU a
1-2. Mwahaya bwaddi nigadhowa omuthuponi woWubuwela okwa wa Yesu yaka dhatedhene?
OFIYEDHA peeno dhihivira yaka 2000, Yesu agapelenke egumaye wihina nikanne ofuru wokanna egumi yohimala. Omahiyu Yesu ahinakwe ahiwoga ni anamahara aye wihina yubuwelege okwa waye mwamakalelo ookweya elabihedhaga ekaathe ni vinyu. — 1 Cor. 11:23-26.
2 Iyo nnowiwelela nlamulo nna na Yesu mwaha nnothabwa omudhivela. (João 14:15) Yaka dhatedhene nnowoniha wi nnotamalela mukutho wa Yesu, mwaha waaja mudhidhi wihina nubuwele makalelo mukutho wa Yesu winanikaviheriwa ni olobela ntamalelaga. Teto nnowilibihedha mwaha wawenjhedhedha mabasa ehu oolaleya, nawithanaga athu owinjhiva wihina edhe yoone muthupo ola woWubuwela okwa wa Yesu. Teto kannenya wihina ethu-siithu obe muthu di muthu anihihe woona muthupo ola woWubuwela okwa wa Yesu.
3. Ohudhera wula nnaasuze ddi?
3 Ohudhera wula nnere woona makalelo mararu adhaari a Yehova enilibihedhiwa wihina yubuwele okwa wa Yesu wodhela: (1) Wubuwela okwa wa Yesu mwamakalelo oliye ahudhihiye, (2) wawithana athu amodha wihina ekalevo labo nowubuwela okwa wa Yesu ni (3) odhowa omuthuponi woWubuwela okwa wa Yesu naarive dhirusaga.
WUBUWELA OKWA WA YESU MWAMAKALELO OLIYE AHUDHIHIYE
4. Ebaribari baani nnahudherihu nlabo nowubuwela okwa wa Yesu yaka dhatedhene, ki mwahaya bwaddi nigahowela ovaha thima ebaribari ela? (Lucas 22:19, 20)
4 Yaka dhatedhene nnovuruwana mwaha onawakula makoho wodhela okwa wa Yesu. Iyo nnohudhera mwahaya bwaddi nigahowela woboliwa ni makalelo okwa wa muthu mmodha baahi onaliviwa dhothega dhaathu aatene. Teto nnowubusedhiwa muthu anafwanelela ojha ekaathe ni omung’wa vinyu ni yotapulela ya ekaathe ni vinyu. (Omwileri Lucas 22:19, 20.) Ohiya eyo nnohudhera wodhela mareeliho enawakele ale enna ejhehedhelo yokalawo mwilaboni exa. (Isa. 35:5, 6; 65:17, 21-23) Sapama ovaha thima ebaribari ela ya mBibliyani. Matxikwi ni matxikwi aathu kinonne wodhela ebaribari ela, teto kinavaha thima okwa wa Yesu. Ohiya eyenove aliwa kinubuwela okwa wa Yesu mwamakalelo oliye ahudhihiye. Nimakalelo baani?
5. Ethu baani epadduwe anamahara owinjhiva a Yesu nuukwa?
5 Anamahara owinjhiva a Yesu nuukwa, makiristawu owoota yahivolowela mulogo. (Mat. 13:24-27, 37-39) Aliwa yowoga ‘dhithu dhohidhuwanyeya wihina yaholose amodha.’ (Atos 20:29, 30) Ethu modha ‘yohudhuwanyeya’ athu ala yambeliwa ohudhiha sowihina Yesu kapelenke egumaye ‘dila modha baahi wihina anobole mutheegani,’ ninga Bibiliya anahudhihiye, mbwenye yahudhiha wihina mukutho wa Yesu wohowela wereya dila dhowinjhiva. (Heb. 9:27, 28) Athu owinjhiva enorumedha dhohudhiha dhowoota ndha. Aliwa enodhowa wigereja— sumana dhatedhene obe malabo aamatene — wihina yubuwele okwa wa Yesu obe ninga enawogeliwa “Santa Misa.” b Gereja dhimodha kadhinathabwa Wubuwela okwa wa Yesu mbwenye owinjhiva wa athu yala kinonne dhithu dhinavolowelavo Wubuwela okwa wa Yesu. Amodha enowikoha: ‘Okwa wa Yesu winatapulela wihina dhothega dhaaga podi oleveleliwa mwebaribarene?’ Amodha enikohesa ndo mwaha ohudhera wi okwa wa Yesu kunathimiha dhothega dhehu. Ki makiristawu eebaribari enakavihera aavi athu ala onona makalelo apama oWubuwela okwa wa Yesu?
6. Ebaribari baani anamahudhera a Bibiliya yafwannyiwa yaka ya 1872?
6 Yaka ya 1870, Charles Taze Russell vamodha nnikuru dhaala ni anamahudhera Bibiliya, wambela omuhudhera pamadhene Bibiliya mwaha yafuna yonelemo yotapulela ya okwa wa Yesu ni makalelo apama owubuwela. Vano yaka ya 1872 nnikavihero na Bibiliya aliwa yahanda wonelamo wihina Yesu ahikwa wihina anoobole. Ni yahilibihedha vanlubale wihina yakavihere athu amodha onona ebaribari elabihedhaga malivuru, majornali ni marevista. Nuuvira mudhidhi vang’ono, aliwa wambela Wubuwela okwa wa Yesu labo nimodha vayakani ninga makiristawu oobajha yeriwana.
7. Dhithu yasayele anamahudhera Bibiliya dhinanikavihera aavi peeno?
7 Peeno iyo nnopurelamo ebaribari ya mBibiliyani nikuru nne efwannyiwa. Nimakalelo baani? Yehova ohunikavihera wonelamo pamadhene yotapulela ya okwa wa Yesu ni dhithu dhatedhene anawereliye athu osogolo. (1 João 2:1, 2) Vano nihinona wihina dhikalawo dhijhehedhelo biili wa adhaari a Yehova — amodha enere okanna egumi yohimala odhulu vano matxikwi ni matxikwi aathu enere okanna egumi yohimala mwilaboni yavati. Opendda makalelo Yehova ananidhiveliye ni makalelo okwa wa Yesu winanikaviheriwa winonandaniha nuliye. (1 Ped. 3:18; 1 João 4:9) Bumwahaya ninga makiristawu oobajha nnowilibihedha vanlubale wihina nubuwele okwa wa Yesu mwamakalelo oliye anihudhihiye.
WAWITHANA ATHU WI YOONE WUBUWELA OKWA WA YESU
Onere ddi wihina okale ooviheyene mudhidhi womugawa konviti oWubuwela okwa wa Yesu? (Osugwe ddima 8-10) e
8. Nikuru na Yehova nnera ddi wihina yawithane athu owinjhiva wi Yubuwele okwa wa Yesu? (Osugwe fotu.)
8 Okuma kale nikuru na Yehova nnowawithana athu wi yubuwele okwa wa Yesu. Yaka ya 1881, addibila ni arogola yahithaniwa wihina etugumane vade va ddibila dhaala elabo yo wAmerika, oPensilivaniya wihina yonelemo muthupo ola wavayekiwa. Nuuvira mudhidhi, muthupo ola wambela weriwana mulogo dhatedhene. Mweri wa março a 1940, anamalaleya yahikongomedhiwa wawithana athu yanna efunelo wihina edhe yoone muthupo ole. Yaka ya 1960, yaali dila yobajha Beteli wimpirimiri akonviti oWubuwela okwa wa Yesu. Okuma yaka yeyo yahigawiwa konviti dhowinjhiva. Mwahaya bwaddi nigilibihedha vanlubale wawithana athu?
9-10. Wawithana athu wihina yoone muthupo woWubuwela okwa wa Yesu winakavihera aavi? (João 3:16)
9 Efunelo yehu sowi ale enadhowa woona muthupo woWubuwela okwa wa Yesu dila yobajha ehudhere ethu Yehova ni Yesu enerenliwa, bumwahaya nigawithana athu wihina yoone muthupo woWubuwela okwa wa Yesu. (Omwileri João 3:16.) Efunelo yehu sowi ale enadhowa Wubuwela okwa wa Yesu edahinyiwe murima ni ekanne efunelo yohudhera dhithu dhimodha wodhela Yehova ni ekale adhaari aye. Mbwenye kahi aliwene baahi enapurelamo mutugumano oyo.
10 Iyo nnowawithana naleya ehiyile omulabela Yehova. Nnowerana eyo wihina nawubusedhe wihina Yehova onowadhivela vanlubale. Owinjhiva wa aliwa enomurumedha konviti ola, ni nnohagalala vanlubale wawona. Mwaha woWubuwela okwa wa Yesu aliwa enowubuwela makalelo yakaliwa oohagalalene mwaha omulabela Yehova. Kasugwa yopadduwa ya Monica. c Mudhidhi wa COVID-19 oliye ohogolowela olaleya ni anamoona a Yehova. Nuwoona muthupo woWubuwela okwa wa Yesu yaka ya 2021, oliye owoga egihina: “Wubuwela okwa wa Yesu wahigidahinya murima. Muwari mwa yaka 20 ela dila yobajha wawithana athu wihina edhowe Yubuwele okwa wa Yesu. Miyo ginotamalela vanlubale mwaha ethu agerele Yehova ni Yesu.” (Sal. 103:1-4) Iyo nnowilibihedha vanlubale wihina nawithane athu odhowa omuthuponi woWubuwela okwa wa Yesu. Ethu enanihagalasa sowihina Yehova anoothabwa ovaha thima wilibihedha wehu.
11. Yehova anakavihera aavi wilibihedha wehu wihina nakavihere athu wi Yubuwele okwa wa Yesu? (Ageu 2:7)
11 Yehova anoreeliha wilibihedha wehu wihina nawithane athu wi edhowe omuthuponi woWubuwela okwa wa Yesu. Yaka ya 2021, naarive mutipa ola wa koronaviru ogaathambwe, athu owakwana 21 367 603 yahona Wubuwela okwa Yesu. Numero nna nnokwaranya numero na anamoona a Yehova eli wapela elabo yatene! Ebaribari wihina Yehova kanahagalala ni numerove baahi naathu mbwenye anahagalala ni kadda muthu anadhowa omuthuponi woWubuwela okwa wa Yesu. (Luc. 15:7; 1 Tim. 2:3, 4) Iyo nihikanna ebaribari wihina nadhowa wawithana athu wihina Yubuwele okwa wa Yesu, Yehova anonikavihera wafwanya ale enna efunelo.— Omwileri Ageu 2:7.
ODHOWA OMUTHUPONI WOWUBUWELA OKWA WA YESU NAARIVE DHIRUSAGA
Yehova onoreliha wilibihedha wehu wihina noone muthupo woWubuwela okwa wa Yesu (Osugwe ddima 12) f
12. Dhithu baani dhanthukulele ohudhowa wubuwela okwa wa Yesu? (Osugwe fotu.)
12 Yesu ohuwoga wihina malabo ookuthula, nnerege ofwanyiwa makathamiho manlubale — oharahariwa, dhiredda, koddo ni makathamiho mamodha. (Mat. 10:36; Mar. 13:9; Luc. 21:10, 11) Malabo mamodha dhithu ndho podi onikathamihaga odhowa Wubuwela okwa Yesu. Addibilihu naarogolihu eneera ddi wihina yagonjhihe makathamiho ala? Ki Yehova anaakavihera aavi?
13. Nimakalelo baani Yehova aareelihiye oliba murima wa Artem’s ni efunelo yaye yowubuwela okwa wa Yesu naarive agaali mukambura?
13 Kambura. Addibilihu eli mukambura mwaha ororomeleya wewa enowilibihedha vanlubale wihina yoone muthupo ola. Kasugwa yopadduwa ya Artem’s. Yaka ya 2020, ahifugeliwa mukambura yaalimo anyakambura 5. Naarive dhigaali ndo oliye ahegeredha ekaathe ni vinyu wihina ubuwele okwa wa Yesu, ni ahegeredha mwahaye. Mbwenye anyakambura amodha yoomujha sola ni yoruwanesa vanlubale. Ki vano Artem’s eerile ddi? Oliye waloba wihina ehiye omujha sola ni ehiye oruwana muwari mwa wora modha baahi. Vano ethu yamutikinihe Artem’s sowihina aliwa yahenya. Artem’s “wivahedha wihina awonelihemo dhithu dhimodha wodhela muthupo ola.” Mudhidhi yole aliwa kiyavuruwane, mbwenye osogolowa numala Wubuwela okwa wa Yesu aliwa wambela wawerana makoho.
14. Anamoona a Yehova yandile aavi woona muthupo woWubuwela okwa wa Yesu naarive efwanyiwaga mutipa wa koronaviru?
14 Mutipa wa koronaviru. Mwaha wa mutipa wa koronaviru, Anamoona a Yehova kiyatugumane vamodha mu Nyumbani Yomwene wihina yoone muthupo ola. Mbwenye yahilibihedha vanlubale wihina Yubuwele okwa wa Yesu. d Mulogo dhanna interneti dhahoona muthupo ola dhilabihedhaga vidiyukonferensiya. Mbwenye athu owinjhiva kiyanna interneti ki yandile addi woona mutugumano ola? Dhilabo dhimodha muthupo ola wahivavihiwa muradiyoni ni mutelevizawuni. Teto addibila ooBeteli yahigaravari mwaha ni dhiwogelo dhokwaranya 500. Vano addibila, wavahedha mwaha ndha ale yahowela. Mwaha wa yeyo addibila enakala murudda wolapela yahanda ovuruwana muthupo ola.
15. Ohudhere ddi ni yopadduwa ya namahudhera Bibiliya anithaniwa Sue?
15 Oharahariwa naamudhi. Enakathamiha athu amodha woona muthupo woWubuwela okwa wa Yesu fuharahariwa naanamudhi. Kasugwa yopadduwa ya namahudhera anithaniwa Sue. Yaka ya 2021, nihalaga labo nimodha wihina Nubuwele okwa wa Yesu, Sue omwaddela namahudhiha aye wihina kawedhe woona muthupo woWubuwela okwa wa Yesu mwaha oharahariwa naamudhaye. Vano namahudhiha aye omwilerela yolebela ya Lucas 22:44. Nuwindo, omwaddela wihina naafwanyiwaga makathamiho nnohowela ohara yopadduwa wa Yesu, oliye oolobela wa Yehova ni ohiya mmadani mwaaye. Vano labo noharela, Sue wegeredha ekaathe ni vinyu ni woona Ohudhera wa Membesi woWubuwela okwa wa Yesu mu site jw.org. Emahiyu yole wanda woona muthu woWubuwela okwa wa Yesu amulabihedhaga telefoni okwartu waye. Voharela, Sue omulebela karta namahudhiha aye nawoga negi: “Dhithu mugaddenlinyu ndilo dhihigilibiha vanlubale. Giherana dhatedhene gaandimi wihina goone muthupo woWubuwela okwa wa Yesu, ni Yehova ogikavihera. Kaginna madhu oomutamalela Yehova mwaha ohagalala ginnimina!” Onorumedha wihina Yehova anere wukavihera wafwanyiwaga makathamiho mamodhave?
16. Mowiwanana ni yolebela ya Romanos 8:31, 32, mwahaya bwaddi nihanganyedhaga wihina Yehova anere oreelihe wilibihedha wehu wihina noone muthupo woWubuwela okwa wa Yesu?
16 Yehova onovaha thima wilibihedha wehu wihina noone muthupo woWubuwela okwa wa Yesu. Nikanne ebaribari wihina Yehova ononireeliha nonihaga otamalela wehu mwaha dhatedhene ananereliye. (Omwileri Romanos 8:31, 32.) Bumwahaya nnafuna nikome wihina noone muthupo woWubuwela okwa wa Yesu okwa wa Yesu yaka yela ni wilibihedha vanlubale wavolowela mabasa oomuzimuni mudhidhi yola wavayekiwa.
JHIBO 18 Ginotamalela mukutho weenyu
a Txipili labo na 4 mweri wa Abril a 2023, matxikwi ni matxikwi aathu wapela elabo yatene enere otugumana wihina yubuwele okwa wa Yesu. Amodha enakale dila yobajha woona muthupo oyo. Teto amodha baale eridhale epaddi yomuzimuni, ehiyile odhowa omuthuponi muwari mwa yakadhene. Naarive amodha efwanyiwaga makathamiho oohiyana-iyana enere wilibihedha wihina yoone muthupo ola. Mbwenye okanne ebaribari wihina naarive ofwanyiwaga makathamiho bi makathamiho Yehova anere oreeliha wilibihedha wawo.
b Athu yala enorumedha wihina mudhidhi yole ekaathe ni vinyu enosadduwa okala mwiili nnikame na Yesu. Teto enorumedha wihina mwiili ni nnikame na Yesu nnokuthiwa malabo aamatene nubuwelaga okwa wa Yesu.
c Mandina mamodha ehisadduliwa.
d Osugwe mu site jw.org dhohudhera dhinna musolo “Memorial de 2021.”
