1. Mwahaya bwaddi ekala yapama wiwegeredha ehinapadduwe ng’ovi?

 WIWEGEREDHA winowavulusa athu. Yapadduwa ng’ovi athu egiwegeredhile enowanda ovuluwa ni wakavihera amodha. Nikuru dhaala enakavihera yapadduwa ng’ovi Wewuropa nihiwoga negihina: “Wiwegeredha pama winokavihera.”

2. Mwahaya bwaddi nigahowela wiwegeredha ohoseya winlubale wahinafiye? (Matewuji 24:44)

² ‘Ohoseya winlubale’ winabajhe morurumusa. (Mat. 24:21) Mohiyana ni ng’ovi dhimodha, iyo nnojheha ohoseya winlubale. Yaka 2 000 mundduli, Yesu ahawaddela anamahara aye wihina ekale owiwegeredhene. (Omwileri Matewuji 24:44.) Nakala owiwegeredhene, eneere okala yokweya ovilelana mudhidhi ola worusa ni wakavihera athu amodha werana emodhave.— Luc. 21:36.

3. Nimakalelo baani ovilela, odhivela ni okala a nthebwa winaanikaviheriwa wiwegeredha ohoseya winlubale wihinafiye?

³ Kabeni noone dhikalelo tharu dhinanikavihere wiwegeredha ohoseya winlubale wahinafiye. Nnere ddi wafiya mudhidhi wolaleya muthenga wotoriha ni naharahariwaga? (Apo. 16:21) Nnere ohowela okala oovilela wihina nimwiwelele Yehova ni ororomelaga wihina oliye anere onibarela. Nnere ddi addibila yayelela ethu-sithu obe dhithu dhatedhene dhomwilini? (Hab. 3:17, 18) Nnere ohowela waweddela thagaraga wihina naakavihere ni dhithu enahoweliwa. Motajhiha, nnedihanege aavi yahoweleyaga okala mburo mmodhave naaddibilihu mwaha orijhiwa ni Gogi a Magogi? (Eze. 38:10-12) Nnohowela wadhivelaga vanlubale addibilihu wihina nande ovilela mudhidhi worusa.

4. Bibiliya anoniha aavi wihina nnohowela okala oovilela, woniha odhivela ni woniha thagaraga?

 ⁴ Lucas 21:19 anihina: “Mwaha woovilela weenyu munere ovulusa eguminyu.” Colossenses 3:12 anihina: ‘Muware thagaraga.’ Teto 1 Tessalonicenses 4:9, 10 anihina: ‘Makalelo oodhivelana mmodha ni mukwaye. . . . Iyo nnowukongomedhani wihina mudidele wenjhedhedha odhivela weenyu.’ Madhu ala yalebeliwe makiristawu yanna ni yoniha ovilela, odhivela ni thagaraga. Naarive dhigaali ndho aliwa yohowela odhowagave yonihaga dhikalelo ndha. Ni iyoya nnohowela werana emodhave. Wihina nande woniha dhikalelo ndha, kabeni noone makalelo makiristawu oobajha yonihiliwa. Teto nnere woona makalelo owatajhiha makiristawu ala wihina nikale owiwegeredhene ohoseya winlubale wahinafiye.

5. Makiristawu oobajha yonihile aavi ovilela mudhidhi eharahariwaga?

⁵ Makiristawu oobajha yohowela ovilela. (Heb. 10:36) Aliwa yofwanyiwa makathamiho mamodhave yafwanya athu aatene a mudhidhi yole, mbwenye aliwa yahikanna makathamiho mamodha mwaha wokala makiristawu. Owinjhiva wa aliwa yoharahariwa ohiya baahi nanamaholela amajudewu, mbwenye nanamathonga oRoma vamodha naamudhiwa. (Mat. 10:21) Teto muwari mwa mulogo, aliwa yohowela owanana dhohudhiha dhowoota yavuwiha mapostata dhaathukulele addibila ogaweya. (Atos 20:29, 30) Naarive dhigaali ndo, makiristawu ale yahivilela. (Apo. 2:3) Nimakalelo baani? Aliwa yopendda dhopadduwa dha adhaari a Yehova yonihile ovilela dhinafwanyeya mBibiliyani ninga ya Jo. (Tia. 5:10, 11) Teto aliwa yoolobela elobaga kopolo. (Atos 4:29-31) Yowapendda mareeliho yawakeliwa mwaha okala oovilela. — Atos 5:41.

6. Ethu baani erilena Merita wihina avilele, ki nnahudhera ddi?

⁶ Ni iyoya podi ohudhera ni opendda ni dhopadduwa dha adhaari a Yehova yonihile odhivela dhinafwanyeya mBibiliyani ni mmalivuruni mwehu. Murogola dhaala anithaniwa Merita anakala wAlbaniya ahihudhera wodhela adhaari ayo ni ahanda ogonjhiha oharahariwa anniyena vemudhini. Oliye anowoga egihina: “Yopadduwa ya Jo enafwanyeya mBibiliyani ehidahinya murimaga. Oliye ahithabwa woona goyi ni kaanonne baani aatatamula makathamihoya, naarive dhigaali ndo oliye ahiwoga: ‘Ginoofiyedha okwa waga gahiselele nroromelo naaga!’ (Jó 27:5) Miyo wonelamo wihina makathamiho aaga kayaligana naale yanfwannye Jo. Mohiyana ni oliye miyo gahimunona baani aatatamula makathamihoya.”

7. Naarive wahifwanyiwaga makathamiho ovanene, ethu baani yapama onahoweliwe werana?

⁷ Teto iyo podi olibiha ovilela wehu wodhela olobela wa Yehova ni owoga dhithu dhaatene dhinanithuwathuwiha. (Fil. 4:6; 1 Tes. 5:17) Podi wera movanene kunafwanyiwe makathamiho manlubale. Naarive dhigaali ndo, we onolobela wa Yehova omulobaga wihina okale oovilela watakaleliwa, wanyanyuwa obe wahinonaga ethu onafuniwe werana? Akala ohukanna elemelelo yomuloba nikavihero Yehova wafwanyiwaga makathamiho a kadda labo, we onere werana emodhave wafwanyiwaga makathamiho manlubale. Teto onere okanna ebaribari wihina Yehova ohunona mudhidhi ni makalelo anukaviheriye wahowelaga.— Sal. 27:1, 3.

8. Yopadduwa ya Mira enoniha aavi wihina ovilela ovanene winere onikavihera ovilela osogolo? (Tiago 1:2-4) (Osugwe fotu.)

⁸ Nabajha ovilela ovanene, enere okala yokweya ovilela ohoseya winlubale wafiya. (Rom. 5:3) Mwahaya bwaddi nigawoga ndo?  Addibila owinjhiva ehonelamo wihina yafwanyiwaga dhoweha enokanna kopolo wihina yande ogonjhiha dhoweha dhimodha dhinaharela. Yafwanyiwaga makathamiho ni yandaga ovilela, nroromelo enniwana wi Yehova nnothabwa oliba. Nroromelo nenno nnowakavihera wagonjhiha makathamiho enaharela. (Omwileri Tiago 1:2-4.) Siyeyo yapadduwile ni piyonera dhaala anakala wAlbaniya anithaniwa Mira. Mwaha wa makathamiho yanfwannye kale, oliye ali oolibeene wihina ande wagonjhiha makathamiho enanfwanya ovanene. Oliye onowoga wihina kale, ubuwela wi oliyeene baahi dafwanyiwa makathamiho owinjhiva. Eyo yapadduwa, oliye owubuwela dhithu dhatene amwerele Yehova muwari mwa yaka 20 mundduli, Nuwindo oliye owoga egi: ‘Odidele okala oororomeleya. Kuhiye wihina yaka ndha dhatene ni makathamiho amatene wagonjhihiliwe nnikavihero na Yehova dhikale dhebewene.’ Teto we podi wubuwela makalelo Yehova ukaviheriye okala oovilela. Okanne ebaribari wihina Yehova onowuwona wavilelaga dila dhatedhene ni anere wureeliha. (Mat. 5:10-12) Vano, ohoseya winlubale wabajha, onerege ogahudhere ovilela ni onerege odhowagave ovilelaga.

9. Nimakalelo baani mulogo wAntiyokiya ooSiriya yonihiliwa thagaraga?

⁹ Kasugwa yapadduwile ni makiristawu oJudeya nuufwanyiwa dala enlubale. Addibila a mulogo wAntiyokiya ooSiriya nuunona wodhela muselu ole wa dala yafwanye addibiliwa oJudeya, aliwa waweddela thagaraga. Mbwenye aliwa kiyaweddele thagaragave baahi, yaherana ethu-sithu. Aliwa ‘othoma mowiwanana ni ele kadda muthu anniyena, wihina yakavihere addibila oJudeya.’ (Atos 11:27-30) Naarive addibila yafwanyiwe dala egaali woolapela, makiristawu owAntiyokiya yahithoma wakavihera. —1 João 3:17, 18.

10. Nimakalelo baani nnaweddelihu thagaraga addibilihu yafwanyiwaga ngovi? (Osugwe fotu.)

¹⁰ Peeno iyo podi waweddela thagaraga addibilihu nanona wihina enna ofwanyiwa ngovi. Iyo podi werana ethu-sithu mowaguva wodhela waligarela anamaholela mulogo wi niivelele wihina nikavihere ni ethu-sithu. Iyo podi ovaha dhovelela dhehu ni walobelela ale enafwanyiwa ngovi. b (Pro. 17:17) Motajhiha yaka ya 2020, wegeredhiwa komisawu dhinakavihera yapadduwa ngovi, dhowakwana 950 wapela elabo yaatene wihina yakavihere addibila yaafwanyiwe mutipa wa koronaviru. Iyo nnowatamalela addibila ni arogola yivelele wihina yaapare mabasa ala ookavihera yapadduwa ngovi. Thagaraga sinaathukulela addibila ala okavihera. Mwaha wa thagaraga aliwa enogawa dhoojha, enowakavihera addibila epaddi yoomuzimuni teto malabo mamodha enovenyihedha nyumba, ni yahoweleyaga enomaga nyumba dhixa dhaaddibila ni nyumba dha Omwene. — Omuliganihe ni 2 Coríntios 8:1-4.

11. Nnooniha aavi wi nnomuthithimiha babihu Yehova wodhela waweddela thagaraga addibilihu?

¹¹ Naweddelaga thagaraga addibilihu yafwanyiwa ngovi, athu amodha avamuruddani enowoona dhithu nnerihuna. Motajhiha yaka ya 2019, ngovi ya furakawu Dorian, ogujhula nyumba yomwene oBahamas. Mudhidhi emagaga nyumba yomwene, addibila omuloba mulobwana dhaala ahaali namoona a Yehova wihina awoge muthengo wa mabasa dhaala yahoweliwa opariwa. Oliye wera: “Nyu kamunahowela opagari, ginere werana dhatedhene dhinahoweleya. Miyo ginere wukaviherani mwaha wa dhithu dhatedhene dhapama munerinyuna.  Miyo ginotikina mwaha wa dhithu munawerelinyu akwinyu.” Athu owinjhiva kimunonne Yehova, mbwenye owinjhiva wa aliwa enowoona dhithu dhinerana anamoona a Yehova. Sohagalasa onona wihina waweddelaga thagaraga addibilihu, winowathukulela athu amodha okanna efunelo yohudhera wodhela Yehova, ali ‘Mulugu odhaaleliwa thagaraga.’ — Efé. 2:4.

12. Mwahaya bwaddi woniha thagaraga ovanene winonikavihera wiwegeredha ohoseya winlubale wahinafiye? (Apocalipse 13:16, 17)

¹² Ddiniyani yanthukulele woniha thagaraga mudhidhi wa ohoseya winlubale? Bibiliya onowoniha wi ale ehinakavihera pulitika enere ofwanyiwa makathamiho ovanene ni muwari mwa ohoseya winlubale. (Omwileri Apocalipse 13:16, 17.) Addibilihu ni arogolihu podi ohowela nikavihero wihina ekanne yojha ya kadda labo. Mwenihu Yesu Kiristu adha wihina aatorihe athu, nnafuna wi nuliyeya oone wi ninna woniha thagaraga ni anithane wi ‘naakele Omwene.’ — Mat. 25:34-40.

13. Mowiwanana ni Romanos 15:7, makiristawu oobajha yalibihile aavi odhivela yanniwana mmodha ni mukwaye?

¹³ Odhivela yaali ethu enlubale yaatonyihedha makiristawu eebaribari. Mbwenye nerege yaali ethu yokweya aliwa odhivelana mmodha ni mukwaye? Kasugwa makalelo addibila ooRoma yaaliwa oohiyana mmodha ni mukwaye. Vaari va aliwa yahikalavo maJudewu yunnuwale yawiwelelaga malamulo a Moyizeji ni amodha yahali maJudewu, yaleliwe mwamakalelo oohiyana. Makiristawu amodha yaali adhaari mbwenye amodha kiyaali ni podi wera amodha wa aliwa yahikanna adhaari. Addibila yandile aavi ogonjhiha ohiyana wula ni olibiha odhivela yanniwana mmodha ni mukwaye? Murumiwi Pawulo ahakongomedha addibila ‘wakelanaga mmodha ni mukwaye.’ (Omwileri Romanos 15:7.) Oliye afuna awoge ddi? Ni Egerego madhu owi ‘wakelana’ enatapulela omwaakela muthu nuupama obe omwaakela vaadevihu, ndala ninga muthu anamwakeliye muthu mmodha vaade vaye obe omurumedha ninga mukwaye. Motajhiha Pawulo ahimwaddela Filemoni wihina amwakele ni makalelo apama Onezimu, aali mudhaari aye aathawile egi: ‘Omwakele nuupama.’ (Filemoni 17) Teto Akila ni Pirisila yahimwaakela Apolu. ‘Aliwa omwithanela okwibi ni obajha omutapulela pamadhene dila ya Mulugu.’ (Atos 18:26) Ohiya weenya ohiyana wewa wawiddanihe ni addibila amodha, makiristawu ale ogonjhiha ohiyana wewa ni wakelanaga mmavaade mwewa.

14. Ana ni mamune yonihile aavi odhivela?

¹⁴ Iyo podi wawoniha odhivela addibilihu ni arogola wodhela wandana naliwa ni ojha mudhidhi vamodha. Ndala iyo podi wathukulela aliwa okannaga efunelo yoononiha odhivela. (2 Cor. 6:11-13) Kasugwa ethu empadduwele Anna ni mamune. Nuuthomiwa wihina ekale amisiyonariyu owAfrika osidental obajha mutipa wa koronaviru. Aliwa yeere ofiyawene, mbwenye mwaha wa mutipa kiyenyeya ogumana naaddibila mmulogoni. Ethu baani yeriliwana wihina yoonihe odhivela? Aliwa yowaligarela addibila elabihedhaga vidiyu konferensiya wihina ethapanye naaddibila ni yowoga wi yofuna vanlubale wanona. Addibila yahatamalela vanlubale mwaha odhivela yonihiliwa. Vano addibila ale wambela waligarela ni wawinviyarela mensaje. Mwahaya bwaddi anamatelana ala edhe yilibihedhege vanlubale wihina yonihe odhivela? Ana anihina: “Miyo kagidha giddiwala odhivela yonihile addibila wihina yakavihere amudhaaga mudhidhi worusa ni wapama. Yotajhiha yewa enogithukulela miyo woniha odhivela.”

15. Ethu baani nihudherihu ni Vanessa wodhela wadhivela addibilihu aatene? (Osugwe fotu.)

 ¹⁵ Owinjhiva wa iyo nnafwanyeya mulogo wili addibila owinjhiva enna dhikalelo dhohiyana-iyana. Iyo podi olibiha odhivela ninnihuna naaliwa wodhela osugwa dhikalelo dhewa dhapama. Murogola dhaala ooNova Zelandiya anithaniwa Vanessa, yomurusa wandana naaddibila amodha a mmulogoni. Vano ohiya warabela oliye othoma ojha mudhidhi naaddibila ale yanna dhikalelo dhahamudhivela. Mwaha wa yeyo, oliye ahanda woona dhithu dhamuthukulela Yehova wadhivela addibila ale. Oliye anowoga egi: “Mamunaga nuukala nameeddela mulogo, iyo obajha ojha mudhidhi naaddibila yanna dhikalelo dhohiyana-iyana. Vano gihudhera wadhivela ni ginodhiveliwa ohiyana wula. Mwebaribareene Yehova onodhiveliwa ohiyana wula mwaha wi athu anawithaneliye munikuruni mwaaye bohiyana-iyana.” Nawonaga addibila ninga Yehova anawoniye nnowoniha wihina nnowadhivela. — 2 Cor. 8:24.

16. Mwahaya bwaddi eneere okala yofuneya woniha odhivela muwari mwa ohoseya winlubale? (Osugwe fotu.)

¹⁶ Odhivela onere okala wofuneya mudhidhi wa ohoseya winlubale. Kubuwela, Yehova anaanibarele ni makalelo baani ohoseya winlubale wabajha? Kasugwa dhoholela Yehova avahiliye nlogo naye nurijhiwa ni aBabiloniyu: ‘Nyu muli anlogo naaga, mudhowe mwavolowe mba mweenyu, ni nfuge musiwodha. Mwipite mudhidhi vang’ono, ofiyedha ovira owali watene.’ (Isa. 26:20) Podi wera ni iyoya nnere ohowela dhoholela ndha mudhidhi wa ohoseya winlubale. Nyumbadha podi wera dhinaakalege mulogo. Mudhidhi wa ohoseya winlubale, iyo nnere obareliwa ni Yehova nadidelave okala vamodha naaddibilihu. Bumwahaya nnohowela wilibihedha ohiya baahi wavilela addibilihu, mbwenye nnohowela wadhivelaga. Podi wera ethu enanthukulele ovuluwa fuwadhivela addibilihu!

17. Niwegeredha ovanene, dhithu baani nnandihu werana mudhidhi wa ohoseya winlubale?

¹⁷ ‘Nlabo ninlubale na Yehova,’ onaakale mudhidhi worusa wa athu aatene amwilaboni. (Sof. 1:14, 15) Ninlogona na Yehova nnere woona goyi. Mbwenye niwegeredha ovanene nnere wanda okala oopwaseya ni wakavihera amodha. Nnere wanda wawanana makathamiho bi makathamiho nuuvilela. Addibilihu yonaga goyi, nnere werana dhithu dhatedhene nnandihu wihina naakavihere ni wavaha ele enahoweliwa wodhela waweddela thagaraga. Nnere wandana naaddibila ni naarogola nonihaga odhivela ninnihuna naaddibila ovanene. Yehova anere onreeliha ni egumi yohimala navolowa elabo exa wahinakale ngovi newene makathamiho bi makathamiho. — Isa. 65:17.