1. Ni makalelo baani makiristawu enahoweliwa okala ninga muthanko? (Osugwe fotu.)

 ATHU amodha enowoga yegi: “Nipevo kannamothiha muthanko woopeepeya.” Madhu ala enowooniha wi muthanko dhimodha mwaha okala dhoopeepeya, kadhinakothowa nipevo naaviraga mwaha wi dhinokoromana mowaguva amala, dhinohogolowa okala dhowimeleene nipevona namaala. Nimakalelo mamodhave, neegi nande omulabela Yehova nuuhagalala nnohowela okala owaguva yapadduwaga makathamiho bi makathamiho mwigumini mwehu. Teto, neegi nande wawanana masadduwo mwigumini mwehu ni oriha monelo wa athu amodha nnohowela okala athu ookweya.

2. Dhikalelo baani dhinaanikavihere yapadduwa masadduwo ki ohudhera wula nnaasuze ddi?

² Mwaha okala adhaari a Yehova nnafuna noonihe wi nili athu ookweya. Teto nnafuna nikale athu apama ni owiyeviha. Ohudhera wula nnere woona makalelo dhikalelo ndha dhaakaviheriwa makiristawu amodha wawanana masadduwo mwigumini mwewa. Teto nnere woona makalelo dhikalelo ndha dhinanikaviheriiwa. Mbwenye nihinathi, nnafuna noone dhithu nnahudherihu ni Yehova vamodha ni mwanaye Yesu, eli yotajhiha yologomana wa athu eli ookweya.

3. Nnonne aavi wihina Yehova dookweya?

³ Yehova onowithaniwa ‘nibwe’ mwaha oliye ali txithi ni kanathikyeya. (Deut. 32:4) Teto mudhidhi mmodhave Yehova dookweya. Dhopadduwa dha mwilaboni dhinosadduwa mowaguva, mbwenye eyo kinamuthuwathuwiha Yehova mwaha oliye dowaguva ni onowerana dhatedhene wihina aakwanihedhe mpaganyo waye. Yehova aapaddusile athu moligana ni oliye, bumwahaya iyo nnowilibihedha wihina nahihiye masadduwo a mwigumini  mwehu onigonjhiha. MBibiliyani nnofwanyamo malagano enanivaha thotho wihina nerena dhothoma dhapama naarive nifwanyiwaga makathamiho bi makathamiho. Yotajhiha ya Yehova ni malagano aaye enonikavihera wonelamo wi naarive oliye agaali ‘nibwe’, oliye dookweya.

4. Owoge yotajhiha enooniha wihina Yehova dookweya. (Levítico 5:7, 11)

⁴ Dhatedhene apaddusile Yehova sowogowa, teto, dhinowoniha wihina oliye dookweya. Yehova kahiyo Mulugu oorusa. Motajhiha, Yehova aali ookweya ni amwaana Izarayeli. Oliye kaawaddihedha athu oohawa odhana mukutho mmodhave ninga wa ale yaali ooreela. Malabo mamodha oliye oowenya wihina kadda muthu avahe mukutho mowiwanana ni ele anniyena.— Omwileri Levítico 5:7, 11.

5. Owoge yotajhiha enooniha wi Yehova Mulugu owiyeviha ni athagaraga.

⁵ Wiyeviha ni thagaraga anna Yehova dhinomuthukulela okala ookweya. Motajhiha, Yehova ohoniha wiyeviha waye mudhidhi afunaga watolosa athu oSodoma ni Gomora. Aalabihedhaga angero aye Yehova owoga ni Lo wihina athawele omwangoni. Mbwenye mwaha wa woova oliye kaafuna odhowa. Vano Lo oloba wihina oliye vamodha ni emudhaye ethawele oZowar, luwani dhaala eng’ono Yehova aathomiliye ogujhula. Yehova ahafune, eere omuwaddihedha Lo ohara dhoholela dhaye, mbwenye Oliye orumedha moonelo wa Lo ni othoma ohigujhula luwani ele. (Gén. 19:18-22) Vasogolova nuuvira yaka dhowinjhivadhene, Yehova waweddela thagaraga athu oNinive woodhela omuruma namavuhulela Jonasi wihina awaddele wi luwani ele yere ogujhuliwa. Mbwenye athu oNinive nuutwaruwa, Yehova waweddela thagaraga, wodhela ohugujhula luwani ele. — Jonas 3:1, 10; 4:10, 11.

6. Owoge yotajhiha enooniha wihina Yesu dookweya ninga baabe.

⁶ Yesu onohara yotajhiha yaababe, bumwahaya adhe akalege ookweya. Oliye aarumiwe veelaboni yavati wihina aalaleye baahi athu a “nlogo naamwaana Ezarayeli.” Mbwenye oliye aali ookweya, bumwahaya adhe aalaleyege athu amodha. Motajhiha, nlabo dhaala muhiyana dhaala ahaali mweEzarayelita omukokorela Yesu ni omuloba wihina anvulumuse mwanaye onihiwa goyi ni ademoniyu. Mwaha wa thagaraga Yesu werana ele muhiyana ole aamulombiye ni onvulumusa mwanaye. (Mat. 15:21-28) Kasugwa yopadduwa emodha. Nubajha waapara mabasa aye oolaleya, Yesu owoga egi: “Muthu yole anagikodde . . . , nimiyowa ginere omukodda.” (Mat. 10:33) Mbwenye Yesu kaamukooddile Peduru naarive oliye agamukooddile dila thaaru. Oliye ahinona wihina Peduru ahithwaruwa ni wihina oliye aali mulobwana oororomeleya. Nuvenyihiwa muukwani Yesu onfwanya Peduru. Mohanganyedha Yesu ahiwoga nuliye wi oomudhivela ni ahimulevelela dhoothega dhaye. — Lucas 24:33, 34.

7. Mowiwanana ni Filipenses 4:5, munyamuthu baani nnafunihu okala?

⁷ Ofiyedha vala, nihoona wihina Yehova ni mwanaye Yesu, bookweya. Ki iyo? Yehova anajheha wihina ni iyoya nikale athu ookweya.  (Omwileri Filipenses 4:5.) Bibiliya dhaala onowatapulela madhu ala egi: “Ononiwe ninga muthu ookweya.” Vano iyo podi wikoha: ‘Athu enagoona ninga muthu ookweya, oovilela ni anaavuruwana athu amodha? Obe enagoona ninga muthu oorusa ni oovuruvuru? Gerege miyo ginowaawaddihedha amodha werana dhithudha mwamakalelo ginafunimi? Obe ginowavuruwana athu amodha ni ginowilibihedha ohara moonelo wewa?’ Nilibihedhaga okala athu ookweya, nnere woniha wi nnomutajhiha Yehova ni Yesu. Kabeni noone dhipaddi biili dhamwigumini mwehu nnahowelihu okala athu ookweya — yapadduwa masadduwo mwigumini mwehu obe akala moonelo wa athu amodha kunaligana ni wehu.

8. Enukavihere ddi okala muthu ookweya yapadduwa masadduwo mwigumini mwawo? (Osugwe nota.)

⁸ Yapadduwa masadduwo mwigumini mwehu nnohowela okala athu ookweya ni werana dhithudha mowaguva. Masadduwo ayo podi onitatamulela makathamiho nahajhehedhihu. Ninga motajhiha, mohujhehedha iyo podi okala aredda, orameyeliwa korowa obe mapolitiku podi werana dhithu dhathukulele egumihu ohikala yokweya. (Ecl. 9:11; 1 Cor. 7:31) Naakela mutholo muxa munikuruni mwa Yehova, iyo podi woonaga wihina soorusa wawerana masadduwo wihina nakwanihedhe mutholoya. Naarive egaali ethu yorusa, iyo podi wanda werana masadduwo mwigumini mwehu naparihedha mabasa dhithu ndha nayi: (1) warumedha masadduwoya, (2) osugwa osogolo, (3) osugwa mareeliho onawakeliwe ni (4) wakavihera amodha. b Kabeni noone dhopadduwa dhinaanikavihere woonelamo wi dhithu ndha nayi podi onikavihera.

9. Nimakalelo baani anamatelana dhaala eli amisiyonariyu yandiliwa wawanana makathamiho yahajhehedhiwa?

⁹ Waarumeedhe masadduwoya. Emanuele ni Francesca othomeliwa wihina ekale amisiyonariyu elabo yahaali yewa. Vano nuwambela ohudhera ewogelo exa ni wanona pamadhene addibila, okumelela mutipa wa koronaviru. Mwaha wa mutipa aliwa kiyeedda. Nuuvira mudhidhi amaye Francesca okwa mohijhehedheya. Francesca oofuna vanlubale okala naamudhaye, mbwenye mwaha wa mutipa wa koronaviru eyo kayandeya. Dhithu baani dhaamukavihere Francesca mudhidhi yoole? Yobajha yaali malobelo awerana mamune Emanuele, amulobaga Yehova thotho wihina yande wawanana makathamiho a kadda labo. Yehova ahawakula malobelo a mamune Francesca wodhela wavaha yoojha yomuzimuni mudhidhi wofwanelela. Motajhiha, aliwa yahilibihiwa vanlubale ni madhu aawogile ddibila dhaala akohiwa, oliye owoga egi: “Narumedha mowaguva dhithu dhinanipadduwela, nnere ohogolowela okala ohagalala ni nnere wanda wapara mabasa nuuviheya.” c Yanabili, aliwa othoma owomihedha makalelo ewa oolaleya elabihedhaga telefoni, eyo yahakavihera ofugula ohudhera wa Bibiliya. Yanatharu, aliwa yahirumedha nikavihero ni olibihiwa naaddibila a murudda yoole ni yahitamalela vanlubale. Motajhiha malabo amatene murogola dhaala aadhivela vanlubale oowalebela mensaje ni versu dha mBibiliyani wihina aalibihe. Murogola ola aherana eyo muwari mwa yaka yantero. Ni iyoya narumedha masadduwo enapadduwa mwigumini mwehu, nnere ohagalala wodhela werana ndhe nnandihu.

10. Nimakalelo baani murogola dhaala andiliye wawerana masadduwo manlubale mwigumini mwaaye?

 ¹⁰ Opwasedhe osugwa osogolo ni mareeliho onawaakeliwe. Christina, murogola dhaala oRomeniya anakala elabo yoJapawu, ahukuwa vanlubale nuunona wihina mulogo waye wawoga ewogelo yEngeleji were ohiya okala mulogo. Oliye kaadidenle wubuwela ndhe dhapadduwile, ohiya eyo, oliye otamela mulogo wawoga ewogelo ya eJaponeji ni werana dhatedhene andiye wihina akavihere mmalaleyelo ni ewogelo yeJaponeji. Oliye omuloba mukwaye omabasani wihina amukavihera ohudhera ewogelo yeJaponeji wihina awogege pama. Oliye omuloba mukwaye ole wihina amuhudhihe ewogelo yeJaponeji amulabihedhaga Bibiliya ni livuru Ofwanye egumi yohagalasa ya malabo amatene! nuwindo mukwaye ole orumedha. Mareelihoya? Ohiya baahi Christina ohudhera eJaponeji, oliye ahanda omukavihera mukwaye okanna efunelo yohudhera ebaribari. Naathabwaga osugwa mareeliho nnawakelihu ohiya dhithu dhamundduli, nnere wonelamo wihina wawerana masadduwo podi onikavihera wawakela mareeliho nahajhehedhihu.

11. Anamatelana dhaala, yandile aavi wawanana makathamiho ohikanna korowa?

¹¹ Wakaviherege athu amodha. Anamatelana dhaala enakala elabo mabasa ehu enakoddihiwiwa, obajha ofwanyiwa makathamiho oohukanna korowa mwaha wi elabo yeele korowadha dhahibajha orameya. Aliwa, yaandile aavi wawerana masadduwo? Vobajha, aliwa ojajaliha egumiwa. Voharela, ohiya opwasedha makathamiho yaafwanya, aliwa othoma ojha mudhidhi yaparaga mabasa olaleya ni yakaviheraga athu amodha. (At. 20:35) Ddibila ola onowoga egi: “Ojha mudhidhi naaparaga mabasa oolaleya ohunikavihera ohithabwaga wubuwela dhithu dhaanikwerebeyihe, teto wihinikavihera opwasedha werana efunelo ya Yehova.” Yapadduwa masadduwo nnohowela ohuddiwala wihina sathima wakavihera athu amodha thabwathabwa wodhela wapara mabasa oolaleya.

12. Yotajhiha ya murumiwi Pawulo, enaanikavihere aavi nafwanyiwaga makathamiho mmalaleyelo?

¹² Mmalaleyelo nnohowela okala owaguva wawerana masadduwo. Mwaha nakala mmalaleyelo nnowafwanya athu a murudda enna dhilemelelo ni enarumedha dhego dhohiyanahiyana. Murumiwi Pawulo ahinona wawerana masadduwo, teto iyo podi ohudhera ni yotajhiha yaye. Yesu ahimuthoma Pawulo ninga ‘murumiwi a malogo.’ (Rom. 11:13) Pawulo ahalaleya maJudewu, aGerego, athu yathambwe ohudhera ni yahathabwile ohudhera, anamathonga ni mamwene. Wihina ande wadahinya murima athu aatene ala, Pawulo ohowela ‘olawiha mweddelo wa athu aatene.’ (1 Cor. 9:19-23) Wihina Pawulo ande walaleya athu aatene ala, oliye ohowela onona wego wadheeliwa ni dhithu yarumedhiwa. Ndala owanda osaddula makalelo aye oolaleya. Ni iyoya podi owomihedha makalelo ehu oolaleya wodhela wubuwelaga dhithu dhinaathuwa-thuwiha athu avamuruddani veehu.

13. Naarihaga moonelo wa athu amodha, yowopiha baani nnarabelihu enafwanyeya va 1 Coríntios 8:9?

¹³ Okala athu ookweya wineere onikavihera oriiha moonelo wa athu amodha. Motajhiha, arogola amodha enodhiveliwa wimakiyaari mbwenye amodhaya kinadhiveliwa. Addibila amodha enosakula ong’wa vang’ono, mbwenye amodhaya enosakula ohung’wawene. Teto iyo aatene nnofuna okanna egumi yapama mbwenye kadda muthu onosakula makalelo oosamalela egumaye. Nuubuwelaga wihina iyo dinonne werana pama dhithudha ni naawaddihedhaga athu werana dhithudha mwamakalelo nnafunihu, iyo podi wakwakwathusa amodha ni othukulela mulogo ogaweya. Mweebaribarene  kannafuna ethu ninga yeyo epadduwe mmulogoni! (Omwileri 1 Coríntios 8:9; 10:23, 24) Vano nnere woona dhipaddi biili dhinooniha wihina naparihedha mabasa malagano a mBibiliyani nnere wanda okala athu owipimelela ni a murenddele.

14. Ethu baani nihinafunihu oddiwala nathomaga wodhela makalelo ehu oowara ni owiwomihedha?

¹⁴ Dhowara ni makalelo oowomihedha mathithi. Yehova kanawoga dhithu baani nnahowelihu owaraga obe naari, mbwenye oliye onoonivaha malagano enanikavihera onona makalelo apama oowara. Iyo nnohowela owara mwamakalelo enamuthithimiha Mulugu nikalaga ookweya, amanddile ni ‘ohikaliha manyazo.’ (1 Tim. 2:9, 10; 1 Ped. 3:3) Iyo kannafuna withithimiha mwaha wa makalelo ehu oowara. Malagano a mBibiliyani podi wakavihera anamaholela mulogo ohapandda malamulo wodhela makalelo owara ni owiwomihedha. Motajhiha, anamaholela mulogo dhaala yafuna yakavihere addibila yahanna makalelo apama owawomihedha mathithi. Anamaholela mulogo, yaakavihere aavi addibila ale yahapanddile malamulo? Nameeddela mulogo ahavaha yolaga anamaholela mulogo ale egihina: “Akala we ohukanna epaddi omutugumanoni, vano we woona wi addibila enna osugwa makalelo awo oowara ohiya ovuruwana ndhe onawogiwe, onone wi ehikala ethu yahili pama ni makalelo awo oowara ni owisamalela.” Yolaga ele yokweya yahakavihera anamaholela mulogo omariha muladdu ole yahapanddile malamulo. d

15. Malamulo baani ni malagano a mBibiliyani enaanikavihere nahowelaga werana dhothoma woodhela makalelo oosamalela egumihu? (Romanos 14:5)

¹⁵ Osamalela egumi. Kadda mukiristawu onohowela werana yothoma wodhela murombwe baani anafuniye ojha obe naari. (Gál. 6:5) Mukiristawu ahoowelaga osakula makalelo  oosamalela egumaye, oliye onohowela okala pasope wihina ahalupe malamulo a mBibiliyani enawoga wodhela nikame ni makanga. (At. 15:20; Gál. 5:19, 20) Vano onelamo wi kanaalupe malamulo yaala, kadda mukiristawu onohowela othoma wodhela murombwe baani anafuniye orumedha obe naari. Athu amodha, enosakula ojha murombwe dhoospitale baahi, mbwenye amodha enosakula makalelo mamodhaya oojha murombwe. Iyo nnohowela oriiha yothoma ya kadda ddibila wodhela makalelo oojha murombwe naarive nahirumedhaga. Mowindo nnohowela wubuwela pontu ndha nayi: (1) Omwene wa Mulugu baahi bunande omariha dhiredda dhatedhene. (Isa. 33:24) (2) Kadda mukiristawu onohowela onona pamadhene ele eli yapama wa oliye. (Omwileri Romanos 14:5.) (3) Kuwatorihe amodha wodhela dhothoma dhewa, newene kukale nibwe nowakwakwathusa. (Rom. 14:13) (4) Makiristawu enowoniha odhivela ni ehinona wihina wiwanana mmulogoni ethu yathima opitha moonelo weewa. (Rom. 14:15, 19, 20) Nahiddiwaala pontu ndha, nnere okanna wandana woliba naaddibila ni nnere odhana murenddele mmulogoni.

16. Anamaholela mulogo enoonihe addi wihina bookweya yalabaga ni anamaholela amodha? (Osugwe fotu.)

¹⁶ Anamaholela mulogo enohowela okala yotajhiha yapama wodhela okala athu ookweya. (1 Tim. 3:2, 3) Motajhiha, namaholela mulogo kanahowela wubuwela wihina moonelo waye bwathima mwaha okala owunnuwelavo wapitha amodha. Oliye anohowela ohidduwala wihina muzimu wotxena wa Yehova podi omulabihedha namaholela di namaholela mulogo owoga ethu enaakavihere werana yothoma yapama. Teto anamaholela mulogo yarumedha ohara yothoma ehinaalupa malagano a mBibiliyani, namaholela mulogo ookweya anere okavihera yothoma ele naarive aganna moonelo mmodha.

17. Nakala athu ookweya, nnaawakele mareeliho baani?

¹⁷ Mukiristawu ookweya onowawakela mareeliho owinjhiva. Motajhiha, onokanna wandana wooliba naaddibila vamodha naarogola ni onoodhana murenddele mmulogoni. Teto nnohagalala ni nnokanna ofuru yowanona athu a dhilemelelo ni dhikalelo dhohiyanahiyana. Ni sotikiniha onona wi naarive nigaali ohiyanahiyana aatene nnamwebedha Yehova mowiwanana. Teto yathimaya ni enanihagalasa fuunona wi iyo aatene nnomutajhiha Yehova ali muthu ookweya ni owaguva wawerana masadduwo.