Apapa yaali apastori ya egereja Unida yoKanada, sumana dhaatedhene nimaDomingu mambesi apapa yoonirumesa miyo ni murogolaga wihina nahudhere wigereja ohudhera waahima. Vano yaakwana mawora a 11 noogumana wihina ndhowe wigereja wi niiwe misa. Txiguwo, iyo noodhowa onyumbani yOmwene ni amama, mwaha wa yeyo, iyo nowanda woona ohiyana wanna dhigereja ndha biili.

Amama yahithapanya ni akwiwa Bob ni Marion ndhe yahudheriwa mBibiliyani teto naliwaya orumedha. Yaka ya 1958 anamatelana ala vamodha ni aniwa araru ogithukula wihina noone Musonkano munlubale wa malabo 8 wanna musolo “Vontade Divina,” elabo yoNova Yorki. Peeno ginowonelamo wihina gahavaha mabasa vanlubale wihina aliwa yande ogithukulela omusonkanoni wule. Mbwenye ole waali Musonkano gahinadhimi giddiwala mwigumini mwaaga.

Ngaali muzombwe, miyo gakalesa murudda dhoothemba teto goodhiveliwa wasamalela anenyama. Miyo gahubuwela okala mediku aanenyama, amama owoga muselu ola ni namaholela mulogo dhaala, oliye nuudhivela ogubusedha wihina nnakalawo malabo okuthula ni omwera universidade muwari mwa yakadhene podi ononga wandana waaga ni Yehova. (2 Tim. 3:1) Bumwahaya, miyo othoma ohidhowa omukosa universidade.

 Naarive dhigaali ndo, miyo gowubuwelesa dhithu gafunimi werana gamala ohudhera oskola. Naarive gidhowaga sumana dhatedhene mmabasani oolaleya, miyo kagadhiveliwa olaleya. Newene kagubuwela okala piyonero. Teto apapaga yahaali namoona a Yehova ni atitiyu, yogikongomedha warumedha mabasa a empereza dhaala ya seguru, elabo yoToronto. Woona wihina atitiyu yahikanna mutholo munlubale empereza yeele, miyo warumedha mabasa ale.

OToronto, miyo golabesa mudhidhi wowinjhiveene teto athu gaalabesimina kiyaali anamoona a Yehova. Mwaha wa yeyo, kagadhowesa omutugumanoni ni mmabasani oolaleya malabo amatene. Vobajhavene, miyo gakalesa ni avwaaga yahaali namoona a Yehova, vano aliwa nuukwa, gohowela otamela mburo mmodhaya wihina gikalegewo.

Anamatelana ale yagithukulele omusonkanoni yaka ya 1958, yaali ninga makolo aaga. Aliwa ogiithana wihina gikalege naaliwa, teto yahigikavihera wunnuwelavo epaddi yomuzimuni. Vano yaka ya 1960, miyo vamodha ni mwaniwa John obaddiziwa. John wambela wapara mabasa oopiyonero, eyo yahigithukulela wawenjhedhedha mabasa aaga oolaleya. Addibila ammulogoni woona wihina goowunnuwelavo epaddi yomuzimuni. Vano vasogolova miyo othomiwa ninga Namaholela a Mutugumano Egumi ni Mabasa.

Yaka ya 1966, miyo otelana ni Randi Berge, piyonera dhaala ooviheya anna efunelo yokavihera murudda winahoweleya anamalaleya. Nameeddela mulogo ehu onlibiha ni onikongomedha wihina ntamele mulogo wo Orillia, elabo yOntario Wihina nakavihere. Mohulegela iyo otamela oOrillia.

Nufiya oOrillia, miyo obajha olaba ninga piyonero a mudhidhi wamutene vamodha ni mwaadhaga Randi. Oviheya waye wahigithukulela miyo werana emodhave! Nuwilibihedha wihina gikale piyonero apama miyo obajha ohagalala mwaha omulabihedha Bibiliya wihina gaakaviherena athu ohudhera ebaribari. Yaali gari enlubale wakavihera anamatelana dhaala naadhivelihu vanlubale oOrillia wawerana masadduwo mwigumini mwewa wihina ekale adhaari a Yehova.

Nidhowaga oToronto, iyo ogumana ni ddibila Arnold MacNamara, aali mmodha wa ale yaholela oBeteli. Vano oliye ogikoha akala nere odhiveliwa olaba ninga apiyonero avayeka. Mohulegela miyo omwaakula: “Iyo podi olaba murudda bu murudda, mbwnye wakala oKebeki naari!” Miyo gahivoloweliwa ni nsakulo yanna athu oKebeki yawoga Efranseji. Mudhidhi yole nahikalawo nikuro napulitika nafuna wihina elabo yoKebeki yahitongiwege ni elabo yoKanada.

Ddibila Arnold wakula, “Murudda Beteli anaathomeliyewo apiyonero avayeka fuKebeki baahi.” Mohilegela miyo orumedha, miyo gahinona wihina Randi ahikanna efunelo yokavihera elabo yeele. Nuuvira mudhidhi miyo woonelamo wihina ele yaali yothoma yathima nerilihuna mwigumini mwehu!

Nuumala ohudhera Efranseji muwari mwa sumana tanu, miyo ni Randi vamodha ni anamatelana amodha iyo odhowa oRimouski walapele makilometuru 540 ni oMontreal. Iyo kananonne owoga pama Efranseji, eyo yahoneya mudhidhi gilerigi dhovuwiha mmulogoni. Ohiya wera nnere wawakela vamusonkanoni “addibila yaadhele elabo ya Awustriya,” miyo owoga wihina neere wakela “balame dhinithaniwa avestrus.”

ORimouski, iyo nahakela nikavihero naarogola annayi oviheya yaali addiye. Teto nahakela nikavihero na emudhi Huberdeaus, yanna ahima abiili anahiyana. Anamatelana ala yahalugari nyumba wihina apiyonero aatene ekalegemo. Apioyonero ale yowakavihera oliva korowa wihina anamatelana ale epagarina nyumbaya. Iyo nithanesa nyumba ele Nyumba Yotxena, mwaha nyumbaya yaatene yapintariwe ni kore yotxena. Malabo mamodha nakalesamo athu owakwana 12 obe 14. Woona wihina iyo naali apiyonero avayeka, nalabesa okuma mambesi ofiyedha mahiyu. Bumwahaya iyo nootamalelesa vanlubale mwaha okanna muthu anivelelesa mmalaleyelo naarive vigarimbe ni oriidhaga.

Iyo nahithabwa wandana vanlubale ni apiyonero ale, ofiyedha wawonaga ninga amudhihu. Malabo mamodha iyo aatene nowothesa mootho vamodha, obe noopiyesa vamodha. Ddibila mmodha aali namwiba, bumwahaya maSabadu amatene iyo nowibesa ni noowina.

Athu owinjhiva a murudda wo Rimouski yahikanna efunelo yomuhudhera Bibiliya. Muwari mwa yaka tanu nahikanna gari yowawoona anamahudhera owinjhiva yunnuwelagavo epaddi yomuzimuni, ebaddiziwaga ni woona mulogo okannaga anamalaleya owakwana 35.

OKebeki, nahixagihiwa pama wihina naande wapara mabasa oolaleya. Iyo nahoona makalelo Yehova anikaviheriye mmabasani olaleya ni wodhela onisamalela epaddi yomwilini. Ohiya eyo, iyo nahihudhera wadhivela athu a murudda yole, dhilemelelo dhewa vamodha ni ewogelo yewa yeFranseji. Eyo yahinikavihera iyo odhiveliwaga dhilemelelo dhohiyana-iyana. — 2 Co. 6:13.

Mohujhehedheya Beteli onloba wihina nitamele sidadi yoTrakadiye, enakala sere-sere ya niya, omayelo nduwa ya elabo yo nova Brunswick. Wawerana masadduwo ala kiyaali ethu yokweya, mwaha neere obajhawene walugari nyumba dhaala, teto gahimwasinari kontaratu wihina gilabege ninga purusori mawora vang’onove kadda sumana eskola dhaala. Ohiya eyo, anamahudhera ehu a Bibiliya yeere obajhawene okala anamalaleya ohibaddiziwa. Teto mudhidhi yoole mabasa omaga Nyumba yOmwene yaali vaari.

Omakuthulo wa sumana yeele iyo nahilobela vanlubale ni nahidhowa waredhela sidadi yoTrakadiye, yathambwe ohiyana ni sidadi yoRimouski naalihuwo. Vano iyo othoma wihina akala Yehova ohuniruma wi ndhowe, nnere odhowa. Iyo ohiya dhatedhene  mmadani mwa Yehova, vano iyo woona makalelo Yehova anikaviheriye wagonjhiha makathamiho amatene yaali osogolo wehu. (Mal. 3:10) Teto mwaha Randi okanna wandana woliba ni Yehova, okanna efunelo yokavihera ni okala muhiyana emwerumweru ninga aneresiyena malabwene, yahinikweyele wawerana masadduwo yahoweleya.

Mulogo ole naatamelihu aaliwo namaholela mulogo mmodha ithaniwa Robert Ross. Oliye vamodha ni mwariye Linda yahilaba ninga apiyonero murudda yoole. Aliwa yahithoma okala murudda yoole numbala mwaniwa oobajha. Naarive eganna mwana mung’ono, aliwa yahididelave okala ooviheya ni mabasa oolaleya ni yahikanna ekalelo yowawakela aleddo. Eyo yahinilibiha vanlubale.

Nuulaba ninga apiyonero muwari mwa yaka biili elabo yoTrakadiye, Nahawakela mareeliho mamodha, miyo othomiwa ninga nameeddela mulogo. Muwari mwa yaka 7 nahilaba sirkwitu dhohiyahanahiyana dhewogelo ya Engeleji, voharela iyo othomeliwa sirkwitu emodha yewogelo yeFranseji, oKebeki. Ddibila Léonce Crépeault aali Supertendenti ehu a Distiritu oKebeki, oodhiveliwesa otamalela mwaha geresimina. Teto oliye oogikohesa: “Ethu baani onahoweliwe werana wihina wande wadahinya murima athu enuvuruwana?” a Mwaha efunelo yaye yoogikavihera, gahanda wonelamo dhithu gahowelimi werana wihina mwaha dhaaga dhikale dhokweya wonelamo ni wadahinya murima athu enagivuruwana.

Mutholo gahinadduwalimi, waali ole gaakenlimi va musonkanoni yaka ya 1978 wanna musolo “Fé Vitoriosa” elabo yoMontreal. Miyo galaba departamentu ya dhoojha. Iyo najheha wi neere wawakela athu owakwana 80 000 ni nahakela dhoholela dhixa wodhela makalelo owapara mabasaya. Dhithu dhatedhene dhaali dhixa, dhipanodha, dhojhadha ni makaleloya oopiya. Iyo nahikanna konjeladori dhowakana 20, mbwenye malabo mamodha kadhalaba pama. Mwaha wa jogu yeriwana va estadiyuni nafunihu werana musonkano, kanandile wegeredha dhithudha mutaneene. Mwaha wa yeyo nohowela ovenya mambeseene vati vihinase wihina negeredhe dhithu dhahoweleya omusonkanoni wule. Noohowela ohiddiha mootho nduwa nihinakume wihina nimwegeredhe matabixu. Iyo nahigoma, mbwenye gahihudhera dhithu dhowinjhiva ni addibila nalabihuna vamodha, yapara mabasa nuuviheya ni oohagalalene. Wandana nerilihuna vamusonkanoni vale ohufiyedha peeno. Nahithabwa ohagalala vanlubale  mwaha okala va musonkanoni ole wathima elabo yoKebeki. Murudda mmodhave waali oharahariwa okuma yaka ya 1940 ofiyedha 1950!

Gihihudhera vanlubale ni addibila yaholela Departamentu ya musonkano dhinlubale oMontreal. Yaka dhaala, ddibila David Splane vano analaba nikuru nolamulela aali namaholela a musonkanoya. Vano musonkano woharela miyo othomiwa wihina gikale namaholela a musonkanoya, teto ddibila David Splane ahigikavihera vanlubale.

Dhigavinre yaka 36 nilabaga ninga anameeddela mulogo, miyo withaniwa wihina gikale namahudhiha a eskola ya anamaholela mulogo yaka ya 2011. Muwari mwa yaka biili gaaparaga mabasa yaala, nahigona kama dhohiyana-iyana dhowakwana 75. Omagomihedho wa kadda sumana ya Eskola, anamaholela mulogo yohagalala ni yotamalela vanlubale mwaha woona wi nikuru nolamulela nowathuwathuwela epaddi yomuzimuni.

Voharela miyo othomiwa wihina gikale namahudhiha a Eskola Yanamalaleya Oomwene. Malabo owinjhiva anaskolaya yakalesa oogomene ni othuwathuwene mwaha yohowela werana dhithudha mowaguva. Ninga motajhiha, aliwa yohowela okala ookiratene mawora owakwana 7 ehudheraga, mawora mararu emweraga T.P.C ni yohowela wegeredha dhipaddi dhewa nayi obe tanu kadda sumana. Miyo ni namahudhiha mmodhaya nowawaddela anaskolaya wihina yegi yande werana dhatedhene yohowela nikavihero na Yehova. Miyo kagidha gidduwala makalelo anaskola yakaliwa yonelamo wihina nnikavihero na Yehova aliwa yowanda werana dhithu yahajhehedhiwa.

Mwaha amama wathuwathuwela athu amodha, anamahudhera aye yahifiyedha okanna efunelo yowunnuwelavo epaddi yomuzimuni ni yahathukulela apapa osaddula monelo wewa wodhela ebaribari. Nuuvira malabo mararu amama egakwile, nahitikina vanlubale wawoona apapa evuruwanaga mwaha onyumbani yOmwene, teto aliwa yahididelave woona mutugumano muwari mwa yaka 26. Apapa kiyabaddiziwe, mbwenye anamaholela mulogo yahiwoga wihina aliwa yakalesa arajhi ofiya omutugumanoni sumana dhatedhene.

Amama yaali yotajhiha yapama wa miyo ni arogolaga araru. Aliwa ni amamuniwa enna omulabela Yehova nuroromeleya. Teto abiili wa aliwa enna olaba oBeteli, mmodha oPortugal, mmodhaya oHayiti.

Miyo ni Randi nnalaba ninga apiyonero a vayeka elabo yoHamilton, oOntario. Mudhidhi gilabaga ninga nameeddela mulogo, noodhiveliwa vanlubale wavelela addibila yadhowaga wawaredhela ni wahudhiha anamahudhera ewa. Mbwenye vano nnohagalala mwaha okanna anamahudhera ehu ni wawona aliwa yunnuwelagavo epaddi yomuzimuni. Vano mulogo nilihu nihandana naaddibila ni nnolibiheya namoonaga Yehova aasamalelaga.

Nubuwelaga mundduli, nnotamalela vanlubale mwaha athu owinjhiva onithuwathuwela. Ni iyoya nnowilibihedha wawoniha athu amodha wi ‘nnowathuwathuwela vanlubale’ wodhela walibiha mwaha omulabela Yehova nuuviheya. (2 Cor. 7:6, 7) Motajhiha, emudhi dhaala muhiyanaya ni anaye abiili yaali a piyonero. Vano miyo omukoha mulobwanaya akala owubuwela okala piyonero. Mbwenye oliye wakula egi: “Miyo ginna wakavihera apiyonero araru vaadevaga.” Nuwindo miyo omukoha: “Onoonamo wi nikavihero onaavahiwe nnopitha makalelo Yehova anaakaviheriye?” Miyo omwaddela wihina oliye ahakale piyonero eere okanna ohagalala wimodhave wanna mwadhiye ni anaaye. Vano nuuvira mweeri mitanu nammodha oliye wavolowela mabasa oopiyonero.

Miyo ni Randi, nnerege odhowave nawaddelaga athu amodha dhithu dhotikiniha Yehova aneeriye ni nnojheha wi naaliwaya ehagalale mwaha omparela Yehova mabasa ndala ninga iyo. — Sal. 71:17, 18.